Di que, malia sumar catro millóns de desempregados e ter un millón de traballadores en ERTE, o Goberno quere botar a ENCE e Alu Ibérica do país 

O secretario xeral do PPdeG, Miguel Tellado, lamentou a deixadez e o abandono do Goberno central que, unido á súa política enerxética e industrial desastrosa, están provocando no sector a maior crise da súa historia recente. “Pedro Sánchez ten que rectificar e buscar solucións para o noso tecido industrial, antes de que sexa demasiado tarde”, aseverou.

Como ocorreu coa planta de Alcoa en San Cibrao e con Siemens-Gamesa nas Somozas, indicou que agora seguen o mesmo camiño ENCE e Alu Ibérica, unhas empresas que non se están indo de España senón que as están botando.

“A suposta política de transición ecolóxica do Goberno nin é ecolóxica nin aposta por ningunha transición. Galicia está sendo vítima de políticas caóticas e contraditorias que non atenden a ningunha estratexia industrial, só ás imposicións ideolóxicas deste Executivo que está destruíndo o presente e o futuro do tecido industrial galego”, precisou.

O número dous do PPdeG incidiu en que, nun país que supera os catro millóns de desempregados e que ten un millón de traballadores e ERTE, o Goberno non só e culpable por acción senón tamén por omisión, pois négase a tomar medidas necesarias e nin sequera busca solucións para que as empresas non fuxan de España e milleiros de postos se vaian á rúa.

No caso de ENCE, que garante o sustento de máis de 5.000 familias, “todo depende da vontade política do PSOE, que só debe realizar unha pequena modificación na Lei de Cambio Climático”. Segundo recordou, a empresa pasa cada ano todas as inspeccións medioambientais da Xunta e cumpre todas as normativas vixentes en materia ambiental, polo que Sánchez busca no ecoloxismo unha escusa para deixar a miles de galegos na rúa: “É vinganza, un novo ataque a Galicia por non votar ao PSOE”.

Así mesmo, Tellado tamén afeou a indiferenza coa que reaccionan o PSdG e o BNG neste Concello, que non din “nin unha palabra ante esta situación, que no caso de materializarse, provocaría un dano irreparable á cidade de Pontevedra, á provincia e a toda Galicia”.

De igual xeito, amosouse preocupado polo caso de Alu Ibérica tras estarse demostrando que o acordo de venta ao que chegaron Alcoa e o Goberno de Sánchez en 2019 foi un “peche en falso”, como xa advertira a Xunta.

O INDEPENDENTISMO DO BNG

Por outra banda, o secretario xeral falou da perigosa deriva antisistema do “Bloque Independentista Galego”, que cada día manifesta máis abertamente as súas posicións soberanistas e rupturistas co noso sistema democrático.

Nese senso, criticou os movementos dentro do BNG que apostan abertamente polo independentismo en Galicia, cunha linguaxe moi preocupante que chama á loita e á revolución. Precisamente onte no Congreso os nacionalistas volvían unirse aos independentistas cataláns e aos radicais vascos de Bildu, o que o deputado Néstor Rego definiu como “unha fronte republicana e soberanista”.

“O Bloque pasou do nacionalismo pragmático de Anxo Quintana ao separatismo agresivo de Oriol Junqueras e á filosofía borroka de Arnaldo Otegi. Esta é a forma que ten de defender os intereses dos galegos en Madrid”, dixo explicando que, “para montar teatriños en contra da Monarquía e da Constitución da man de Esquerra e Bildu, o BNG é sempre o primeiro”.

REIVINDICAR CON PRUDENCIA

Por último, sinalou que o PPdeG unirase ás reivindicacións do Día da Muller e avanzou que os populares celebrarán un acto no que terán todo o protagonismo mulleres anónimas da sociedade civil.

Sobre isto, aclarou que a visibilidade das reivindicación non pode ser incompatible coa prudencia. “Non nos corresponde a nós autorizar ou desautorizar as manifestacións. En todo caso, a todas as persoas que decidan saír á rúa, pedímoslle o maior comportamento cívico e o respecto, escrupuloso, das recomendacións sanitarias”, engadiu afirmando que agardan que, o 8 de marzo, a única noticia sexa a loita pola igualdade real entre homes e mulleres.

Ademais, lembrou que este é o segundo ano que vivimos este día baixo a pandemia “pero o primeiro no que o Goberno non o oculta”, apuntando que agora estamos ben informados das consecuencias das aglomeracións, cousa que non ocorreu o ano pasado pola desinformación dun Executivo que primou a súa axenda partidista á saúde pública.

De feito, cuestionou que a Ministra de Igualdade estea volvendo convocar manifestacións aínda que recoñeceu non sorprenderse das constantes contradicións do Goberno central nin da irresponsabilidade dos ministros de Podemos.