Santiago, 7 de xuño de 2022.- O Grupo Popular demandará no Pleno da vindeira semana que o Goberno central articule un concurso de méritos na Policía Nacional para cubrir as vacantes existentes na Policía Autonómica e que non aplique o Real Decreto-Lei 6/2022 que elimina o procedemento de avaliación ambiental, o trámite de información pública e as peticións de informes sectoriais para determinados parques eólicos cunha potencia instalada igual ou inferior a 75 MW.
Ao remate da Xunta de Portavoces, o viceportavoz popular, Alberto Pazos, informou que na sesión plenaria da vindeira semana comparecerá o conselleiro de Sanidade para informar sobre as medidas desenvoltas e das futuras actuacións previstas na atención primaria ante a situación de déficit de especialistas en medicina de familia.
73 POR CENTO DOS AXENTES AUTONÓMICOS
Dentro do apartado de proposicións non de lei, o Grupo Popular demandará que o Ministerio do Interior articule un concurso de méritos na Policía Nacional para cubrir as vacantes na Unidade de Policía Adscrita a Galicia, xa que na actualidade conta con 367 axentes dos 500 efectivos previstos.
Alberto Pazos lembrou que o ministro Marlaska anunciou onte nun encontro de Ameripol en Santiago que proximamente se asinará o acordo para realizar un concurso e cubrir as prazas vacantes na Policía Autonómica. “O certo é que non hai ningunha información concreta ao respecto”, sinalou o viceportavoz popular, quen cualificou de “irónico que se fale de cooperación policial entre administracións nun acto ao que a Xunta non foi convidada”. Deste xeito, lamentou que “unha vez máis non se convoque ao Goberno galego a este tipo de actos, a pesar da lealdade e cooperación coa que sempre respondeu o Goberno galego”.
Unha segunda proposición non de lei do Grupo Popular ten como obxectivo que o Goberno de España non aplique os criterios recollidos no Real Decreto-Lei 6/2022 para eliminar en determinados parques eólicos o procedemento de avaliación ambiental, o trámite de información pública e as peticións de informes sectoriais que permiten unha axeitada tramitación ambiental.
ESTRITO CONTROL NA INSTALACIÓN DE EÓLICOS
Pazos manifestou que “nos sorprende a insistencia da oposición en Galicia para que se tomen medidas que garantan un estrito control na instalación de parques eólicos en Galicia, ao mesmo tempo que BNG e PSdeG apoian medidas a nivel nacional que reducen as garantías ambientais nos parques eólicos que son competencia directa do Goberno do Estado”. “Diante desta situación incongruente, pedimos que a Xunta se preocupe por este tema de xeito que se respecten as mesmas garantías na instalación de parques eólicos tanto a nivel estatal como galego”, sinalou.
Relacionado con este asunto, o Grupo Popular tamén cuestionará ao Goberno galego sobre o actual modelo de desenvolvemento eólico de Galicia, “un exemplo a nivel nacional xa que o 77,5 por cento do territorio galego está blindado ante a instalación de eólicos, esixindo rigorosas garantías ambientais, técnicas e legais”.
Así mesmo, o Grupo Popular interesarase polas conclusións do informe sobre o aumento dos custos de produción no sector vacún de leite en Galicia e sobre os plans do Goberno central á hora de planificar a renovación das liñas de autobuses da súa competencia. Alberto Pazos considerou “incomprensible que o Goberno de España poida defender que é beneficioso para os cidadáns un mapa de transporte estatal con menos rutas, menos servizos, menos quilómetros percorridos, menos paradas e máis transbordos”.
Así, concretou que máis de 136.000 galegos de 23 concellos quedarán sen parada de autobús, reducíndose 76 servizos interiores en Galicia coa escusa de que este novo mapa só presta servizos interautonómicos. “Non é razoable que se afonde na desigualdade entre a poboación que vive no rural e nas zonas urbanas, polo que é necesario que se rectifique esta medida que só condena ao rural e fomenta un desmantelamento total dos servizos de transporte público”, engadiu.
