O portavoz do Grupo Popular, Alberto Pazos, afirmou hoxe que a “extrema debilidade” do Goberno de Pedro Sánchez para aprobar tanto decretos-lei como os propios orzamentos do Estado “vai ser a mellor escusa que van ter os socialistas e nacionalistas galegos para xustificar que non se cumpra a súa promesa de gratuidade da AP-9”.

“Nós imos seguir insistindo, tanto na eliminación das peaxes nesta autoestrada como na súa transferencia a Galicia, ao que sumamos agora a solicitude de liberación da peaxe do treito Vigo-Porriño, de xeito que se mellore a seguridade de forma inmediata na A-55 e como medida rápida e economicamente máis viable ante a construción dun novo túnel nesta autovía”, indicou.

Alberto Pazos lembrou que “o único que sufrimos os galegos nestes últimos meses respecto da AP-9 foi un novo incremento das súas peaxes: o 5,34 por cento desde o pasado día 1 de xaneiro, o que supón pagar máis de 20 euros para quen teña que facer o traxecto entre Vigo e A Coruña”.

RESCATE E BONIFICACIÓNS, O MESMO CUSTO

“Dáse o paradoxo de que, coas novas bonificacións das peaxes anunciadas polo Goberno de Pedro Sánchez, que esperemos que algún día sexan realidade, o custo da indemnización polo rescate da autoestrada e o custo total desas bonificacións ata o final da concesión aseméllanse de xeito considerable, xa que ronda os 2.300 millóns de euros”, explicou o portavoz popular, quen indicou que “o Ministerio debería valorar se realmente compensa manter esas bonificacións ou abonar o rescate da AP-9”.

Pazos avanzou que “imos seguir insistindo na demanda para que o Goberno de Pedro Sánchez transfira a Galicia a AP-9, tal e como o pediu este Parlamento por unanimidade en varias ocasións, pero agora imos dar un paso máis, co obxectivo de mellorar a seguridade nun dos treitos da autovía A-55 no que se rexistra o maior número de accidentes de España.

En concreto, dixo que “pedimos que o Goberno central negocie coa concesionaria da AP-9 liberar inmediatamente a peaxe do treito entre Vigo e Porriño, de xeito que se mellore a seguridade de forma inmediata na autovía A-55, ao posibilitar aos condutores utilizar o treito da AP-9 de forma gratuíta, en vez de arriscarse a circular polas perigosas curvas de Mos que tanta sinistralidade rexistran”.

“Trátase dunha solución alternativa de uso inmediato ante a futura construción dun novo túnel na A-55 entre Vigo e Porriño”, unha obra que “comezou con gran polémica, logo de que o Goberno central presentara unha proposta que supón unha grave afección a parroquias como Bembrive en Vigo ou Sanguiñeda, Petelos, Pereiras e Tameiga en Mos”, apuntou.

Por este motivo, o Grupo Popular esixirá ao Goberno central no Pleno da vindeira semana que abra de xeito inmediato un período de interlocución con todos os concellos afectados por esta importante obra, de xeito que se defina unha actuación respectuosa co territorio, socialmente viable e dote á zona dunha infraestrutura axeitada e segura.

SOLUCIÓN EN MANS DO GOBERNO DE SÁNCHEZ

Alberto Pazos tamén se referiu ao “novo episodio da demostración da extrema debilidade do Goberno de Pedro Sánchez” vivido o pasado mércores no Congreso ao ver como se rexeitaba a aprobación do coñecido como Decreto Omnibus pola negativa chantaxista dos seus socios cataláns de Junts.

“O que debe quedar claro, desde o primeiro momento, é que quen traizoa e utiliza ao seu antollo a Pedro Sánchez e ao seu Goberno son os seus aliados de Junts,  que foron quen puxeron cos seus votos a este Goberno bicolor de PSOE e SUMAR e que agora decidiron, ao non atender as súas chantaxes, que non ían apoiar este decreto”, subliñou.

“O Partido Popular xa avisou, desde o primeiro momento, que non estaba disposto a apoiar este Real-Decreto na súa totalidade, simple e llanamente porque, ademais da revalorización das pensións, das bonificacións ao transporte ou das axudas aos afectados pola DANA, recollía outras moitas cuestións coas que non estaba de acordo, como subas de impostos, xa que non se prorrogan as baixadas do IVE que están vixentes para determinados alimentos ou electricidade; unha maior protección aos okupas, obrigando aos propietarios a seguir pagando do seu peto os gastos da súa vivenda okupada, coa imposibilidade de recuperala; a cesión, aceptando un novo chantaxe dos nacionalistas vascos, dun palacete en París ao PNV; ou inflixindo un recorte ao financiamento das comunidades autónomas, xa que non se actualizan as previsións de ingresos de 2025 nas entregas a conta ás comunidades, o que supón recortes de recursos económicos ás comunidades autónomas para destinalos a sanidade, educación ou políticas sociais, como a dependencia”, manifestou.

Alberto Pazos incidiu que “a solución neste momento está nas mans do Goberno de Pedro Sánchez, porque o Partido Popular xa anunciou que está plenamente disposto a aprobar un decreto que se centre no realmente importante: a revalorización das pensións, as bonificacións ao transporte público e as axudas aos afectados pola DANA”. Neste sentido, puxo de manifesto a vontade do PP de “apoiar medidas coherentes” ao aprobar cos seus votos no mesmo Pleno do Congreso o decreto que unicamente falaba de pensións, máis en concreto, de poder compatibilizar o cobro dunha pensión coa realización dun traballo remunerado.

Para rematar, Alberto Pazos criticou a postura adoptada polo único deputado do BNG nas votacións dese Pleno. “Paradoxicamente, votou a favor dos decretos que non saíron adiante a pesar dos agravios que supoñen para Galicia e votou en contra do decreto aprobado, gracias ao apoio do Partido Popular, que abre a posibilidade de cobrar unha pensión ao tempo que se realiza un traballo remunerado, sen esquecernos da súa nova e manifesta contradición: critican denodadamente en Galicia a aprobación, por maioría parlamentaria, das leis de acompañamento, ao tempo que apoian no Congreso a aprobación dun Decreto-Lei Omnibus, que inclúe unha chea de medidas enmascaradas nunha suba das pensións e unhas axudas ao transporte”, sinalou.