Categoría: PP de Galicia

O PPdeG reivindica as medidas “efectivas, pragmáticas e reais” en materia de vivenda que executa o Goberno autonómico, subliñando que esta é “a principal preocupación de galegos e galegas”. Pola contra, os populares critican o Plan Estatal de Vivenda “do Goberno que máis dano lle ten causado a Galicia” e urxen maior oferta e seguridade xurídica afeando cuestións como a financiación insuficiente e a falta de consenso coas comunidades autónomas por parte de Sánchez.

Así o manifestaron a secretaria xeral do PPdeG, Paula Prado, e o presidente provincial do PP de Ourense, Luis Menor, acompañados pola secretaria da Xunta Xestora do PP local, Ana Fernández, durante a clausura da xornada informativa organizada polo partido en Celanova, cuns 200 asistentes, para tratar o grave problema do acceso á vivenda. É a sexta xornada organizada pola área de Vivenda e Urbanismo do PP de Ourense, que xa fixo parada en Ourense, Barbadás, Xinzo de Limia, Verín e O Carballiño.

Prado lembrou un dos compromisos da campaña e gran obxectivo da lexislatura de Alfonso Rueda á fronte do Goberno galego: duplicar o número de vivendas públicas, pasando de 4.000 a 8.000 en toda Galicia. Neste sentido, sinalou que en 2026 entregaranse os primeiros fogares deste plan.

Ademais, destacou que o Executivo autonómico destinou un orzamento “histórico” en materia de vivenda neste 2026, con 350 millóns de euros e un plan de acción que inclúe novas modificacións lexislativas, tributarias e fiscais para incentivar e favorecer a construción de nova vivenda.

Fronte a estas medidas, a número dous dos populares galegos criticou a “inseguridade xurídica que provoca unha lei estatal de vivenda desastrosa, que pensa máis nos okupas que nos propietarios”.

Tamén puxo en valor o desenvolvemento do solo que desenvolve o goberno do presidente Alfonso Rueda para a construción de 25.000 novas vivendas, para facilitar o labor de promotores e cooperativas; así como o programa Fogar Vivo para mobilizar vivendas baleiras.

“Falamos de medidas reais, de garantías xurídicas, de pensar nos galegos e galegas por moito que lle pese á oposición”, subliñou a secretaria xeral do PPdeG, que criticou que o PSdeG defenda “a cegas” o Plan Estatal de Vivenda e que o BNG sexa “cómplice e socio do Goberno sanchista, a cambio de nada para Galicia”.

“Sánchez e os seus están máis ocupados nas súas leas internas e nos casos de corrupción que lle van aflorando día tras día”, dixo Prado, que cualificou o modelo do Goberno de Sánchez como “unha política de confrontación baleira que leva oito anos facendo da vivenda un luxo”. “Queremos menos impostos, máis oferta e máis seguridade xurídica”, engadiu.

LUIS MENOR: “É UN OBSTÁCULO PARA O CRECEMENTO ECONÓMICO”

Luis Menor advertiu que non se pode cometer o erro de analizar a falta de vivenda unicamente como unha crise habitacional, asegurando que tamén é “un terrible obstáculo para o crecemento económico de calquera territorio, tamén no rural”.

Neste sentido, puxo o foco no incremento da poboación na provincia de Ourense desde hai catro anos, achegándose na actualidade aos 307.000 habitantes, dos que case 10.000 son novos veciños, na súa maioría migrantes, “básicos no noso esquema laboral e aos que temos que ofrecer alternativas dignas para residir”.

Fronte a esta realidade “cun Goberno central que só xera problemas coas súas erradas leis”, o presidente provincial defendeu que os compromisos do PP alí onde goberna son realidades. Ademais das “valentes medidas” do presidente Alfonso Rueda, puxo en valor as iniciativas postas en marcha na Deputación de Ourense, que pese a non ter competencias directas en vivenda, “non mira cara a outro lado”.

Citou iniciativas como o primeiro Plan Provincial de Vivenda, que este ano case triplicou a súa dotación con 1,2 millóns de euros para rehabilitación de inmobles, ou a entrega esta mesma semana de tres vivendas na estación de Vilavella, no marco do proxecto Estacións Vivas. “O Partido Popular ten alternativas para contribuír a facer máis accesible a vivenda a calquera cidadán”, concluíu.

ANA FERNÁNDEZ URXE DISPOÑER DE NORMAS URBANÍSTICAS

Por outra banda, Ana Fernández sinalou a “necesidade prioritaria” de contar cun novo Plan Xeral de Ordenación Municipal (PXOM) en Celanova, xa que a vila leva máis de tres décadas sen actualizar a súa ordenación urbanística. Así, sinalou a “urxencia” de dispoñer de normas que faciliten máis solo urbanizable, máis vivenda protexida, maior seguridade xurídica, máis rebaixas fiscais e menos burocracia. Neste sentido, anunciou que levarán no seu programa das eleccións municipais a posta a disposición do Goberno autonómico de solo público para vivendas de protección oficial.

O coordinador da área de Vivenda e Urbanismo do PP de Ourense, Benito Iglesias, puxo o foco sobre dous factores clave para fixar poboación: a vivenda e o emprego. Destacou que os traballadores estranxeiros representan xa o 7 % do total de autónomos na provincia. De aí, dixo, que adquira relevancia a nova liñas de axudas da Xunta para rehabilitar vivendas en concellos de menos de 20.000 habitantes, vinculando estas achegas á contratación de traballadores en empresas galegas.

A concelleira ourensá e membro da área de Vivenda e Urbanismo do PP de Ourense, Sonia Ogando, referiuse á falida Lei estatal de Vivenda e ás reformas posteriores que non aportan seguridade xurídica aos propietarios: “Todo o contrario, beneficia a aqueles que se sitúan á marxe da lei”. Para Ogando, o Goberno central “fai un uso electoralista da vivenda, con improvisacións lexislativas por riba de solucións”. Ademais, citou unha fórmula que medrou notablemente en Galicia fronte a “inquiokupación” e okupación: os seguros de impago.

Como en xornadas anteriores, a responsable territorial do Goberno galego en materia de vivenda en Ourense e membro da área de Vivenda e Urbanismo do PP de Ourense, Pilar Fernández, detallou as axudas do Goberno galego nesta materia, entre as que destacou dous programas con moi boa acollida: Fogar Vivo, o plan de rehabilitación en municipios de menos de 5.000 habitantes, as axudas á mocidade para mercar vivendas e os programas para rehabilitar inmobles municipais.

A secretaria xeral do PPdeG, Paula Prado, defendeu o impulso da potencialidade industrial e da economía galega que realiza o presidente Alfonso Rueda e o Goberno galego, no contexto da elección de Galicia por parte do primeiro produtor chinés de automóbiles, SAIC, para o seu desembarco en Europa. Pola contra, lamentou a postura do PSOE e o BNG, xa que os socialistas “cólganse a medalla, loan a Sánchez e aseguran que isto é grazas ao Goberno central”, mentres que os independentistas galegos se manteñen no seu “negacionismo industrial” e no “non ao futuro de Galicia”.

Así o manifestou durante unha rolda de prensa na sede autonómica, na que puxo en valor que SAIC elixa Ferrol e As Pontes para levantar a súa fábrica de coches eléctricos de MG, o que supón unha “excelente nova” para a nosa comunidade e para todos os galegos e galegas, “mostra da capacidade de Galicia para aproveitar oportunidades e atraer investimentos industriais internacionais á nosa terra”, dixo.

Neste sentido, lembrou que esta operación suporá 2.300 empregos, 120.000 vehículos ao ano e 200 millóns de euros de investimento. “É un exemplo máis de que en Galicia se traballa co foco posto en seguir medrando e impulsando a economía galega”, salientou Prado, lamentando que o que debería ser motivo de orgullo para todos, non o é para partidos como o PSdeG e o BNG.

A “LETRA PEQUENA” DO BNG: UNHA ESCUSA PARA SACAR A PANCARTA

“Non son capaces de aplaudir o desembarco deste xigante chinés no noso territorio, porque están máis preocupados en atacar ao Goberno autonómico que en mirar polo ben de Galicia e a súa cidadanía”, subliñou. Neste sentido, lembrou os argumentos do BNG para criticar o desembarco de SAIC, amparándose en que “tiñan que ler a letra pequena”. Para a número dous dos populares galegos, este argumento é “unha escusa para opoñerse, para montar algunha plataforma e para sacar a pancarta”. Así, afeou que o seu brazo sindical, a CIG, pida un novo modelo industrial para Galicia mentres lidera protestas contra calquera parque eólico que se instale no noso territorio.

Tamén criticou a postura do líder dos socialistas galegos, José Ramón Gómez Besteiro, por “estar ao servizo do líder”, Pedro Sánchez, e por utilizar a cogobernanza co Executivo central “para poñerse medallas”, cando a colaboración institucional “debería ser normal, e non nada extraordinario”. Neste sentido, puxo o exemplo da reforma de financiación autonómica, que o Goberno de Sánchez quere poñer en marcha sen beneficiar a Galicia, e co “si” que clama Besteiro.

FINANCIACIÓN: “O QUE É DE TODOS, FÁLASE ENTRE TODOS”

“Por sorte, contamos cun Goberno autonómico que mira polos intereses dos galegos e galegas e por iso a Xunta se nega a participar nas reunións bilaterais que propón o Goberno de España”, xustificou Prado, lembrando as palabras do presidente Alfonso Rueda sobre esta cuestión: “O que é de todos, fálase entre todos”.

Explicou que coa reforma do financiamento proposta, Galicia só obtería o 2,8% dos recursos, cando contamos co 6% da poboación de España. “Non queremos ser máis que ninguén, pero menos tampouco. O Goberno central tense que sentar a falar coas Comunidades Autónomas para consensuar un modelo equitativo”, esixiu a secretaria xeral do PPdeG.

Para Prado, esta reforma está pactada co independentismo catalán porque del “depende o sillón de Sánchez na Moncloa”.

Tamén lamentou a postura da líder do BNG, Ana Pontón, que en Galicia “acostuma ao non a todo”, pero en Madrid “todo o consente, e din si a Pedro Sánchez”. Afeou aos nacionalistas galegos a súa “dobre vara de medir”, xa que admiten que seguirán cogobernando con Sánchez mentres non haxa unha condena por financiación ilegal, pero obvian a gravidade dos casos de política nacional, como son Begoña Gómez, David Sánchez, Koldo e Ábalos, Plus Ultra e imputación de Zapatero, Leire Díez e trama da SEPI, financiación irregular e caixa B do PSOE, fiscal Xeral do Estado, trama de Hidrocarburos ou o Caso Tito Berni.

“A única certeza é que o Goberno de Sánchez pasará á historia por ser o máis corrupto da historia de España. Historia da que tamén forman parte os seus socios, no Goberno e en moitas cidades, como é o BNG”, sentenciou.

“PREFIREN O DELITO Á ALTERNANCIA POLÍTICA”

En canto aos casos de corrupción, fixo fincapé nas “cloacas do socialismo, que extorsionan e perseguen a xuíces e fiscais, cun sicariato montado nos cinco días de reflexión do “One” para ameazar e asasinar civilmente a aqueles que estaban investigando a súa familia e ao seu círculo máis próximo”. Criticou que os independentistas galegos “prefiran o delito a alternancia política, por medo a que o PP gañe as eleccións”.

Igualmente, incidiu na investigación ao expresidente Zapatero, presunto “cabecilla” dunha organización criminal nunha trama internacional de tráfico de influencias e branqueo de capitais. “Hai algo máis indecente que enriquecerse coa pobreza?”, preguntouse a secretaria xeral dos populares galegos, aludindo ás bolsas de comida en Venezuela ou ao presunto cobro ás familias de presos políticos en Venezuela.

“Non podemos, nin imos aceptar, leccións destes partidos políticos, porque só hai unha explicación para quen non condena estas tramas de corrupción: están dentro da mesma trama”, puntualizou Paula Prado, que fronte a isto puxo en valor ao PPdeG como o partido que traballa por Galicia, “con seriedade e rigor, mirando polo futuro de todos os galegos e galegas”.

A secretaria xeral do PPdeG, Paula Prado, puxo en valor as políticas de promoción turística e gastronómica dos gobernos populares como o de Bande durante a inauguración da LV edición da Festa do Peixe, unha cita consolidada no calendario festivo da provincia de Ourense e declarada de Interese Turístico de Galicia.

Xunto con outros representantes do partido na comarca, a número dous dos populares galegos asegurou que é un “pracer volver sempre a esta tradicional celebración e ver como se une veciñanza e visitantes”. Puido comprobar de primeira man a vontade e o esforzo das persoas implicadas na festa, o que amosa “a identidade e poder da xente do rural”, a que “sempre vai ter ao seu carón ao PPdeG, o partido do rural que traballa por impulsar políticas útiles para todos os galegos e galegas”.

Prado aproveitou para felicitar a alcaldesa de Bande, Sandra Quintas, pola organización e acollida deste evento senlleiro, así como por xerar “estabilidade” e “boa xestión” nun concello que está a experimentar un importante dinamismo. “Isto non sería posible sen as políticas responsables do PPdeG e que

A secretaria xeral do PPdeG, Paula Prado, puxo hoxe en valor o “compromiso do Goberno galego co reforzo” do dispositivo de prevención e defensa contra os incendios forestais en Galicia, que é “referencia a nivel nacional e internacional”. Subliñou as “importantes melloras” que incorpora a actualización do Pladiga 2026 en materia de prevención, vixilancia e tecnoloxía, extinción e en medios materiais e humanos.

Así o manifestou a número dous dos populares galegos durante unha visita nas Nogais aos labores de prevención que realiza a Unidade Batracio -do Servizo de Prevención e Defensa contra Incendios Forestais de Galicia- neste municipio lucense. Concretamente, están realizando rozas en pistas forestais, creando e mellorando cortalumes e accesos a zonas de montaña. De feito, neste municipio xa levan actuado nos últimos meses en arredor de 20 hectáreas.

No encontro, no que tamén participou o alcalde, Jesús Manuel Núñez; o portavoz de Medio Rural do PPdeG no Parlamento de Galicia, Miguel Ángel Viso, e outros cargos do partido na provincia, Prado remarcou que a prevención “non é exclusiva da Xunta de Galicia” e chama a atención sobre os concellos que aínda non se adheriron ao convenio con Seaga de xestión da biomasa nas faixas secundarias, co que a Xunta ofrece facilidades para que municipios e propietarios cumpran coas súas obrigas.

Concretamente, a secretaria xeral lamenta que a día de hoxe aínda hai concellos que seguen sen sumarse a este convenio. “O idóneo tería sido que se adheriran antes do 21 de marzo e enviar a planificación de traballos e actuacións antes do 31 dese mes, pero a realidade é que só o 30% o fixeron daquelas”. Incide en que “máis da metade dos concello que non se adheriron (8) son do partido que sempre pretende dar leccións: o PSOE”.

Pregúntase que leccións pode dar un PSOE que está á fronte “dun Goberno central sumido na corrupción e no escándalo diario, defendendo ao expresidente Zapatero, imputado, e ao seu líder Pedro Sánchez”. Do mesmo xeito, afeou que o BNG “siga mantendo no poder a Sánchez e que non consideren necesario convocar eleccións”. “O PSOE pasará a historia por estar á fronte do Goberno máis corrupto de España, e desta historia tamén forman parte os nacionalistas, socios e cómplices de Sánchez”.

Para Prado, ante a actualidade política que afecta ao Goberno, “o único que procede é que os cidadáns decidan que tipo de goberno queren para o seu país e o futuro de España”. “É fácil distinguir os que buscan solucións dos que só pretenden enredar”, engade.

Fronte aos do “ruído” e a “pancarta”, o PPdeG eríxese como o partido no que “confían” a maioría dos galegos e galegas e, ademais, é o “partido do rural”, gobernando no 60% dos concellos de menos de 5.000 habitantes, como é o caso das Nogais.

25 MILLÓNS DE EUROS ANUAIS PARA A XESTIÓN DA BIOMASA

A número dous do PPdeG fixo fincapé no esforzo do Goberno galego en materia de prevención, con máis de 75 millóns de orzamento neste 2026 co que se prevé actuar en case 34.000 hectáreas de superficie e, dentro dos cales, se dobra o investimento do convenio de xestión da biomasa nas faixas secundarias: 25 millóns de euros anuais e máis apoios para concellos e propietarios.

Xa no contexto do aumento de medios previstos polo Goberno galego para a campaña de incendios, os populares tamén destacan a incorporación de 42 novas brigadas, que implican 168 efectivos máis, o reforzo da unidade especialista en grandes incendios forestais (a UDEX), o aumento de medios aéreos e 16 novos bulldózeres para prevención.

UN ALCALDE QUE GOBERNA DENDE 2011

Ademais, Paula Prado puxo en valor o equipo de Jesús Manuel Núñez nas Nogais, onde goberna de forma continuada desde o 2011. Neste sentido, o alcalde popular acadou para o seu concello melloras en núcleos rurais, acceso ás axudas a domicilio, políticas sociais avanzadas e unha mellora das infraestruturas.

O alcalde aproveitou para poñer en valor as tarefas de prevención que realiza o Goberno galego nas Nogais “con todos os seus medios” e resaltou o “importante traballo” que fai a Unidade Batracio no Distrito VII. “A prevención é tarefa de todos”, engadiu, agradecendo o apoio do Goberno galego nas diferentes accións que “debemos realizar nos concellos, os particulares e as comunidades de montes”.

O PPdeG esixe que se manteña o texto acordado por unanimidade no Parlamento galego para a transferencia da Autoestrada do Atlántico (AP-9) a Galicia, tras coñecerse as emendas transaccionais pactadas por PSOE, Sumar e BNG e que rebaixan o acordo acadado por unanimidade no Parlamento de Galicia. “O único que evidencia é o interese destes grupos en marxinar ao principal partido de Galicia, que goberna na comunidade autónoma, ten maioría no Parlamento de Galicia e é a primeira forza do Congreso dos Deputados”, sinalaron os deputados do PPdeG.

Así o reclamaron hoxe na reunión da ponencia da Comisión de Transportes e Mobilidade Sustentable sobre a Proposición de Lei Orgánica de transferencia da titularidade e competencias da AP-9 á nosa Comunidade. Os deputados nacionais galegos Celso Delgado, Pedro Puy e Tristana Moraleja lamentan que os mesmos grupos políticos “que estaban bloqueando o debate da transferencia da AP-9 no Congreso anuncien agora un texto alternativo” á proposición de Lei Orgánica que altera o aprobado por unanimidade polo Parlamento de Galicia, “o texto que recolle a vontade dos galegos”.

Tras unha primeira lectura e aínda pendentes dunha análise xurídica e económico-financeira en profundidade, os populares aseguran que as emendas transaccionais pactadas polo PSOE, Sumar e BNG se apartan de “aspectos esenciais do texto demandado de forma unánime desde Galicia e que foron tomados en consideración polo Congreso en xuño de 2024 para a súa tramitación”.

FINANCIACIÓN ECONÓMICA

O deputado Celso Delgado instou nesta reunión ao BNG e PSdeG a explicar “por que eliminan ou cambian o texto das disposicións que inclúen obrigas económicas e financeiras do Estado para a transferencia da AP-9”. Insiste en que “é fundamental” que esta transferencia veña acompañada dos “recursos económico necesario para a súa xestión e para manter todos os compromisos adquiridos ata agora”.

A transferencia a Galicia da autopista debe vir acompañada de dous requisitos. Por unha parte, Delgado explica que o Goberno de Pedro Sánchez “debe seguir financiando os compromisos adquiridos”, dotando á Xunta de medios financeiros “para ampliar as bonificacións das peaxes nun vial cuxa concesión a Audasa remata en 2048”, salvo que o Tribunal de Xustiza da Unión Europea ditamine o contrario.

Ademais, a transferencia da AP-9 debe “suprimir” o incremento tarifario do 1% anual que Audasa aplica desde 2019 en concepto de compensación económica polas obras de ampliación da Ponte de Rande e da circunvalación de Santiago, “unha actualización que se manterá por un período de 20 anos e que foi acordada na época do expresidente Zapatero”. “O texto remitido desde o Parlamento de Galicia instaba ao Estado a amortizar esa subida”.

En definitiva, o deputado ourensán lamenta que o acordo entre PSOE, Sumar e BNG non concrete unha cuestión “tan relevante como é o financiamento por parte do Estado e que non cumpre coas expectativas e reclamacións que Galicia fixo por unanimidade”.

DICTAME DA COMISIÓN EUROPEA

Do mesmo xeito, os deputados do PPdeG amosan a súa preocupación ante a desaparición neste acordo dunha disposición na que se obrigaba ao Goberno de Sánchez a asumir as obrigas económicas e financeiras en caso de que se declarase a nulidade das prórrogas mediante as cales se acordou a ampliación do período concesional. “Ante o escenario derivado do ditame da Comisión Europea sobre as prórrogas da AP-9 na que Bruselas cuestiona o cumprimento da normativa comunitaria de contratación pública, a supresión desta disposición podería prexudicar enormemente a Galicia”, reiteran.

CONTINÚA O TRÁMITE LEXISLATIVO

Finalmente cos votos de PSOE, BNG, Sumar, Bildu, ERC, PNV e Junts aprobouse un informe da ponencia que recolle o expresado nas emendas. O Grupo Popular defendeu a vixencia da literalidade do texto aprobado por unanimidade no Parlamento de Galicia. Agora virá o debate lexislativo na Comisión de Transportes e despois no Pleno.

Os deputados do PPdeG recordan tamén que a Comisión Europea advertiu, ademais, de que España podería ser levada ante o Tribunal de Xustiza da Unión Europea se non adopta as medidas oportunas. “Trátase dun asunto de enorme transcendencia para Galicia”, conclúen.

A secretaria xeral do PPdeG, Paula Prado, defende o traballo diario de alcaldes e alcaldesas que gobernan en concellos rurais, como é o caso de Moraña, co popular Sito Gómez á fronte. Para a número dous dos populares galegos, é un “valente” que “percorre as nove parroquias” do seu municipio e logra que a veciñanza lle ofreza a súa confianza nas urnas, sendo o PP o partido máis votado neste municipio. Así, lembrou que o PPdeG goberna no 60% dos concellos de menos habitantes de Galicia, como Moraña, porque a xente “sabe que somos o partido do rural, o partido que máis se parece aos galegos e galegas”.

Así o manifestou durante un xantar do PP de Moraña, celebrado na carballeira de Santa Xusta, con preto de 400 asistentes. Un acto que, dixo Prado, “ningún outro partido podería celebrar, porque o seu balance é de leas internas, conflitividade e corrupción”, fronte á “estabilidade e unión” que si ofrece o PPdeG. Na cita, na que exerceu de anfitrión o alcalde Sito Gómez, tamén participaron o presidente do PP provincial de Pontevedra, Luis López; a secretaria provincial do PP de Pontevedra, Luisa Piñeiro, o responsable da área de Cultura, Lingua e Xuventude do Goberno galego, José López Campos.

Prado agradeceu o traballo dos predecesores do PP en Moraña, sinalando que o concello “medrou con Luisa Piñeiro, consolidouse con José Cela e segue ofrecéndolle todo aos veciños e veciñas grazas a Sito, un valente collendo o timón”.

Así, animou aos populares a “intensificar o traballo” de cara aos próximos retos electorais, para conseguir que os galegos e galegas depositen a confianza en candidatos coma Sito, con “con política pegada ao territorio, con responsabilidade, con boa xestión.

“Queremos seguir sendo a Galicia que goberna fronte á oposición que confronta e perde eleccións”, sinalou Prado. Neste sentido, referiuse ás ultimas noticias da imputación a José Luis Rodríguez Zapatero e do papel da esquerda, que o ten de “referente moral”, mentres Sánchez “segue aferrado a toda costa á Moncloa”.

Foi crítica cos “socios” do BNG, “cómplices do Goberno máis corrupto da historia de España” e que intenta “enganar” aos galegos e galegas dicindo a súa líder, Ana Pontón, que nas filas nacionalistas non hai ningún condenado por corrupción. Neste sentido, lembrou casos de condenas a membros do BNG como ocorreu en Fene ou en Melide.

LUIS LÓPEZ PIDE TRABALLAR PARA REPETIR A MAIORÍA ABSOLUTA

Pola súa banda, o presidente provincial do PP, Luis López, agradeceu o regreso a este multitudinario xantar popular do PP de Moraña tras o paréntese do ano pasado, “que era merecido e necesario para tomarse un descanso”, pero advertiu de que, desde xa, “hai que comezar a traballar arreo para que Sito Gómez e o PP repitan maioría absoluta, se se pode con máis folgura, para que Moraña permaneza na senda de investimentos e desenvolvemento dos últimos anos”.

López cualificou a Sito Gómez como “o alcalde da xente” e púxoo como exemplo do modo de xestión e de atención aos veciños que ofrecen os representantes do PP, xa que “escoitan, entenden e atenden aos veciños por riba de todas as cousas e niso Sito é un auténtico fenómeno”.

SITO GÓMEZ PON EN VALOR A CONCELLEIROS E MILITANCIA

Finalmente, Sito Gómez salientou o traballo dos concelleiros e de todos os militantes do PP de Moraña, “para axudarme de xeito imprescindible de darlle a este concello todo o que merece” e cualificou estes tres anos na alcaldía como “os máis bonitos da miña vida, xa que, malia as moitas dificultades que ten mellorar todos os días a vida dos veciños, permíteme estar ao voso carón e loitar para que Moraña teña todo o que merecedes”.

A secretaria xeral do PPdeG, Paula Prado, pon en valor a “enerxía” e o “talento” dos 15 alcaldes populares menores de 40 anos que gobernan en concellos de Galicia, co exemplo de Jorge Cubela á fronte da alcaldía de Cerdedo-Cotobade. Durante un xantar popular celebrado na Carballeira de San Xusto, con máis de 800 asistentes, referiuse a Cubela como “o mozo das maiorías absolutas e auténtico veterano a pesar da súa xuventude”. Tamén animou á militancia a seguir “intensificando esforzos” para acadar éxitos electorais similares de cara a 2027.

No acto, baixo o lema “15 anos ao servizo da veciñanza”, tamén participaron o presidente provincial do PP de Pontevedra, Luis López; a secretaria provincial, Luisa Piñeiro; a responsable da área de Vivenda e Planificación de Infraestruturas do Goberno galego, María Martínez Allegue, e o titular da área de Educación, Ciencia, Universidades e FP do Goberno galego, Román Rodríguez.

A número dous dos populares galegos puxo en valor a traxectoria de Cubela, que no 2011 se converteu no alcalde máis mozo de toda España, ao chegar á alcaldía con apenas 22 anos. Así, referiuse aos valores que caracterizan ao candidato popular, como valentía, rigor, estabilidade e unha política de escoita activa.

Tamén insistiu na “dificultade” de acadar maiorías absolutas como é o caso de Jorge Cubela, polo que pediu á militancia un “plus” de traballo de cara as eleccións municipais de 2027, co obxectivo de manter gobernos estables e acadar outros. Así mesmos, tivo palabras para os éxitos do PP de Cerdedo-Cotobade, especialmente co reto de asumir a fusión dos concellos.

A MAIOR TRANSFORMACIÓN DA HISTORIA DO MUNICIPIO

O presidente provincial do PP de Pontevedra, Luis López, puxo en valor o significado deste 15º aniversario da chegada de Jorge Cubela á Alcaldía de Cerdedo Cotobade, “xa que reflicte unha traxectoria de traballo moi ben feito, con investimentos importantes e tamén coa atención prioritaria aos veciños nas cousas máis pequenas e que melloran o seu día a día”.

Neste sentido, augurou que en 2031 volverán a reunirse para festexar o 20º aniversario porque Jorge Cubela “vai volver gañar as eleccións do próximo ano cunha ampla maioría absoluta”, lembrando que ten gañada a confianza da veciñanza.

Pola súa banda, o rexedor municipal de Cerdedo-Cotobade quixo expresar o seu agradecemento a todos os que colaboraron co PP e co goberno local nestes quince anos, “que foron os de maior transformación da historia de Cotobade e Cerdedo, hoxe unidos nun mesmo camiño que se demostrou moi produtivo e que gozan dun nivel de infraestruturas, equipamentos e servizos que hai anos non poderíamos nin soñar”.

O presidente do PPdeG, Alfonso Rueda, define a Nidia Arévalo como unha muller “todoterreo” que desenvolve “un labor incansable” á fronte da alcaldía de Mos, con catro maiorías absolutas ás súas costas e co reto de “ir a pola quinta”. Para o líder dos populares galegos, que a veciñanza siga confiando nela dende 2007 é grazas aos seus valores de “traballo, empeño e vocación”, que agora se “intensificarán” coa súa proclamación como presidenta do PP local.

Así o manifestou hoxe no Congreso do PP de Mos celebrado no Auditorio do Multiusos das Pozas, con máis de 800 asistentes, e no que se proclamou a Nidia Arévalo como nova presidenta do PP local. No acto interviron a secretaria xeral do PPdeG, Paula Prado, e o presidente do PP da provincia de Pontevedra, Luis López. Tamén asistiron o presidente saínte do PP de Mos, Camilo Augusto Martínez; a representante de Novas Xeracións de Mos, Sara Pérez; o exalcalde de Mos, Justo González e o exconcelleiro Alberto Méndez, entre outros representantes locais e autonómicos.

O presidente do PPdeG puxo a Nidia Arévalo como exemplo da “política municipal ben feita” e fixo un repaso pola traxectoria da nova presidenta de Mos, á que definiu como unha muller “con carácter; pero con respecto, educación e cos pés na terra” e asegurou que “volverá ser a alcaldesa de Mos” despois de “tantas vitorias e tantos momentos duros nos que soubo dar a cara”. Tamén se referiu a súa capacidade para facer equipos e ao seu papel como senadora, “multiplicándose, pero sempre coa cabeza posta en Mos e en Galicia”.

Para Rueda, a nova presidenta do PP de Mos “soubo entender sempre o que é este concello, cunha industria potentísima pola que loitou”. Así, “pelexa porque Mos non teña que renunciar a nada”.

O líder dos populares galegos tamén agradeceu a Camilo Augusto Martínez o seu traballo, porque grazas a iso “trouxo ao PP de Mos ás portas dunha quinta maioría absoluta”. Para o presidente dos populares galegos, “non hai nada sen partido e sen xente que dá a cara unicamente a cambio de saber que está contribuíndo a mellorar as cousas”, sinalou en referencia aos populares de Mos.

Ao remate, puxo de exemplo a políticas coma Nidia Arévalo fronte a unha oposición instalada nos “escándalos e disparates”, cun Goberno central “que avergoña, que hai tempo que acabou e se retorce para que poida seguir a única persoa interesada, Pedro Sánchez”. Neste sentido, reivindicou a necesidade de que Alberto Núñez Feijóo chegue á presidencia do Executivo, para “acabar co desgoberno”, “por Mos, por Galicia e polo noso país”.

PAULA PRADO SUBLIÑA O LIDERADO FEMININO

Pola súa banda, a secretaria xeral do PPdeG, Paula Prado, definiu a Nidia Arévalo como unha alcaldesa “inesgotable”, cun “liderado feminino” propio das 32 rexedoras “valentes” do partido en Galicia, ás que recentemente se sumou Elena Candia ao rescatar a Lugo da parálise e o desgoberno no que estaba a cidade da man da oposición. Tamén augurou que de cara ás eleccións municipais de 2027 sexan máis as alcaldesas mulleres do partido, porque será un “síntoma magnífico” de bo funcionamento do partido.

A número dous dos populares galegos puxo en valor a traxectoria de maiorías absolutas “nada doadas” de Arévalo e desexoulle éxitos de cara ao reto do “plus” de compromiso que require estar á fronte da presidencia do PP de Mos.

“Nidia demostrou ser unha magnífica xestora, fronte aos que apostan só pola lea e a confrontación e acaban perdendo todas as oportunidades”, sinalou. Así, reiterou que a nova presidenta do PP de Mos é “un deses espellos de liderado feminino nos que mirarse”.

LUIS LÓPEZ: “O QUE FUNCIONA NON SE TOCA”

Pola súa banda, o presidente provincial do PP, Luis López, louvou o traballo da agrupación local, “xa que se non sería imposible ter acadado catro rotundas maiorías absolutas” desde o ano 2011 e considera que esta nova etapa orgánica, coa alcaldesa Nidia Arévalo, “vai ser continuísta, porque o que funciona non se toca, pero ao mesmo tempo vai supoñer un sopro de aire fresco que sempre é necesario”.

Ademais, destacou o “enorme traballo” de Camilo Augusto ao fronte do partido desde o ano 2009 e cualificou ao PP de Mos de “exemplo” para toda a provincia pola súa capacidade de mobilización e pola súa atención aos veciños baseada nunha proximidade máxima.

NIDIA ARÉVALO ASUME O RETO “MÁIS COMPROMETIDA CA NUNCA”

Durante a súa intervención, Nidia Arévalo reivindicou a transformación experimentada por Mos nas últimas décadas, asegurando que o municipio “pasou de ser un lugar de paso a converterse nun lugar para vivir, investir e construír futuro”.

A nova presidenta do PP local destacou avances en servizos básicos, humanizacións, vivenda pública, educación infantil, desenvolvemento industrial e captación de proxectos estratéxicos, subliñando que “todo o conseguido foi posible grazas á estabilidade, á planificación e ao traballo constante ao lado da xente”.

A alcaldesa, que anunciou a súa vontade de prsentarse ás próximas eleccións, asumiu ademais o reto de presidir o Partido Popular de Mos “máis comprometida ca nunca” e coa vontade de seguir fortalecendo un proxecto político baseado na proximidade, na xestión e na escoita activa dos veciños.

Defendeu o lema “Sabemos o que quere Mos” como reflexo dunha forma de facer política “pegada á realidade de cada parroquia e ás necesidades reais da xente”. Neste sentido, apostou por abrir unha nova etapa no partido cun equipo “renovado, preparado e con ganas de seguir traballando por Mos”, presentando unha estrutura formada por coordinadores de áreas e parroquias para reforzar a presenza territorial do PP local e manter o contacto permanente coa cidadanía.

A rexedora apelou tamén á unidade e ao traballo colectivo para afrontar os retos de futuro do municipio, marcando como obxectivo político “seguir merecendo a confianza maioritaria dos veciños” e traballar para acadar unha quinta maioría absoluta que permita “seguir garantindo estabilidade, proxectos e futuro para Mos”.

SAÚDOS DE RAJOY E FEIJÓO

O congreso celebrouse no Auditorio do Multiusos das Pozas, onde se reuniron máis de 800 asistentes. Ademais das intervencións, proxectouse un vídeo de saúdo de Mariano Rajoy e de Alberto Núñez Feijóo e tamén se fixo un recoñecemento aos integrantes das candidaturas do PP de Mos nas eleccións municipais dende o ano 2007.

A secretaria xeral do PPdeG, Paula Prado, defende o “respecto pola democracia e polo servizo á cidadanía” fronte a un PSOE “corrupto e en descomposición” e un BNG “cómplice” dun Goberno de Pedro Sánchez que ten como “referente moral” a José Luis Rodríguez Zapatero, imputado por presunto branqueo de capitais, organización criminal e tráfico de influencias.

Así o manifestou durante unha rolda de prensa na sede autonómica, na que puxo en valor o recente acto de goberno do PPdeG, no que o presidente Alfonso Rueda deu conta do grado de cumprimento das medidas do programa electoral co que gañou as eleccións autonómicas en 2024 e do que o 87% delas están cumpridas ou en marcha. Para Prado, este balance non o podería realizar ningún outro partido. “De que ía falar o PSOE? Da Lei de amnistía, do Parador de Teruel, de Ábalos, Koldo, a muller de Pedro Sánchez ou o seu irmán…”, ironizou.

“Estamos ante o Goberno máis corrupto da historia de España e o BNG tamén forma parte des historia. Asistimos á degradación máxima do Estado de Dereito, a degradación máxima dun Estado”, destacou.

Para a número dous dos populares galegos é sorprendente que o PSOE “saia na defensa” de Zapatero, porque quen o defende é “porque forma parte da trama de corrupción” ou “porque renunciou a defender os estándares democráticos”. Do mesmo xeito, lembrou que o expresidente imputado foi “peza imprescindible” para que Sánchez sexa hoxe quen está á fronte do Executivo central.

Tamén lamentou o papel do PSdeG, que “se contradí, cada vez máis afastado da realidade, máis covarde e con máis leas internas”. Así, mencionou a ausencia do número un dos socialistas galegos, José Ramón Gómez Besteiro, na sesión de control do Parlamento galego, nun intento de evitar atender aos medios de comunicación. Optou por facer unha viaxe no AVE que fai parada na Gudiña para “vender como logro un servizo que o seu propio partido deteriorou”, mentres o líder dos socialistas de Vigo, Abel Caballero, criticaba que o AVE a Madrid pare en Santiago “porque se perde tempo”.

Citou igualmente á líder dos socialistas coruñeses, Inés Rey, que esixiu explicacións por carta ao seu compañeiro de partido, o subdelegado do Goberno, polos controis policiais do partido Deportivo-Andorra. “Estamos ante un PSOE cada vez máis roto, fragmentado e moi guiadiños polo señor Sánchez desde Madrid”, puntualizou.

O BNG MENTE: SI TEN CONDENADOS NAS SÚAS FILAS

Sobre os “cómplices do BNG”, sinalou que a nacionalista Ana Pontón “trata de enganar aos galegos e galegas” cando asegura que nas filas do BNG non hai ninguén condenado por corrupción. “É mentira”, salientou Prado, lembrando que o Tribunal Supremo condenou a un ano e medio de prisión e a tres de inhabilitación á exalcaldesa de Melide, Socorro Cea, por certificar unhas obras da depuradora de augas sabendo que non se iniciara; ou a condena por prevaricación da exedil do BNG de Fene, Mariela Aguilar, por impedir o debate dunha moción de censura.

Tamén mencionou que o BNG é asiduo a levar nas súas listas ás eleccións europeas a Pernando Barrena, condenado por un delito de pertenza á banda armada ETA.

Neste sentido, Prado remarcou o cinismo do BNG. Ana Pontón, preguntada pola imputación de Zapatero, dedicoulle “máis tempo a criticar ao Partido Popular que a falar do que está de actualidade: a corrupción que está acabando co PSOE”, amosando, unha vez máis, que son “moi bravos en Galicia, pero moi mansos en Madrid”. “Fronte a uns socialistas en descomposición e un BNG cómplice, está o Partido Popular, que ten respecto pola democracia, polas persoas e polo labor que deben facer os políticos, o de servir á cidadanía”, concluíu.

O presidente do PPdeG, Alfonso Rueda, reivindica que o 87% dos compromisos do seu programa electoral están cumpridos ou en marcha, co que o 18 de febreiro de 2024 gañou as eleccións autonómicas. O líder dos populares galegos pon deberes fronte “a etapa de alta montaña” que vén, as municipais de 2027, unha “tarefa colectiva” coa que “debemos non só manter, senón mellorar resultados”. Para este camiño “máis difícil”, anima a “pedalear, seguir traballando como sabemos, con estabilidade e responsabilidade, fronte aos que nunca fan nada”.

Así o manifestou na clausura do acto “Galicia Goberna”, no Auditorio da Sede Afundación de Vigo, con 400 asistentes, no que responsables das áreas do Goberno galego fixeron balance do cumprimento dese programa electoral co que o PPdeG gañou as últimas eleccións autonómicas hai máis de dous anos. Un éxito que o número un dos populares agradeceu ao seu equipo polo seu “traballo e esixencia”. Tamén tivo palabras de agradecemento para a secretaria xeral, o portavoz parlamentario, presidentes provinciais, alcaldes e alcaldesas, portavoces, militantes, simpatizantes e todas as persoas que traballan “dende a base, escoitando á cidadanía”.

UN ACTO QUE NINGÚN OUTRO PARTIDO PODERÍA CELEBRAR

Rueda fixo fincapé nese elevado grado de cumprimento do programa electoral co que gañou as eleccións autonómicas hai máis de dous anos. Citou ese 87% de compromisos que están xa realizados ou en marcha, co 13% apenas por cumprir cando aínda queda a metade da lexislatura por diante. Para o líder dos populares, esta rendición de contas cos cidadáns é “un exercicio de responsabilidade” e significa que “a palabra dada, ten consecuencias”, asegurando que o 100% dos compromisos quedarán feitos antes de que remate o actual mandato.

Neste sentido, reivindicou que o Goberno galego fai “exactamente o que os galegos votaron”, polo que “o ‘si’ de Galicia pode co ‘non’ dunha parte da oposición e co boicot doutra parte”. Lembrou que este acto “non o podería celebrar ningún outro partido”, lamentando que o balance socialista sexa o dun Goberno central que “está na supervivencia do xefe supremo”, cun PSdeG “que non se molla por Galicia” e un BNG “cunha listaxe de manifestacións” e dun “non a todo o que faga medrar Galicia”. Fronte a esta oposición, Rueda reivindicou ese “si rotundo” do PPdeG, da Galicia co “s” de “sentidiño” e o “i” de “impulso”.

Citou prioridades do seu mandato, como son a vivenda, a atención primaria, a dependencia e a economía familiar. Referiuse a compromisos adquiridos como a educación gratuíta, a sanidade pública pioneira con cribados e campañas de vacinación ou o primeiro Centro de Protonterapia público de España, o incremento do parque público de vivenda e o plan de choque da dependencia.

En clave política, máis alá do esforzo solicitado aos populares de cara ao reto das eleccións municipais, lembrou que o seguinte paso serán os comicios xerais, que se convocarán cando “lle conveña ao peor gobernante que tivo España”. Así, fixo referencia ás eleccións autonómicas que se celebran mañá en Andalucía, poñendo en valor a candidatura popular de Juanma Moreno, e augurándolle un éxito que será “importante” de cara a ese reto das xerais, nas que “Alberto Núñez Feijóo gañará”.

LUISA SÁNCHEZ: “VIGO NON QUERE CONFRONTACIÓN NIN VITIMISMO”

A presidenta do PP de Vigo, Luisa Sánchez, fixo de anfitrioa agradecendo que o PPdeG puxera a Vigo no mapa, recoñecendo a aposta do Goberno galego pola cidade olívica. “Vigo non quere confrontación nin vitimismo, quere mirar ao futuro, traballar con rigor e con solucións reais, porque se a Vigo lle vai ben, a Galicia vaille ben”, reivindicou, subliñando que o mellor para Vigo “aínda está por chegar”.  Precisamente, o presidente dos populares galegos aproveitou as súas primeiras palabras para agradecer o traballo dos “valentes do PP de Vigo”, que “aguantan e nos representan a toda Galicia”.

UN PERCORRIDO DENDE O MAR ATA O MEDIO AMBIENTE

O coordinador do programa electoral, Valentín García, foi o encargado de poñer en valor os eixos do programa electoral de 2024, co foco na Galicia do futuro. Tamén deu paso aos responsables das áreas do Goberno galego, que fixeron balance do elevado grado de cumprimento dos compromisos do PPdeG.

Así, interviñeron no acto a responsable de Mar, Marta Villaverde; de Medio Rural, María José Gómez; de Emprego, Comercio e Emigración, José González; de Cultura, Lingua e Xuventude, José López Campos; de Sanidade, Antonio Gómez Caamaño; de Vivenda e Planificación de Infraestruturas, María Martínez Allegue; de Facenda e Administración Pública, Miguel Corgos; de Economía e Industria, María Jesús Lorenzana; de Política Social, Fabiola García; de Educación, Ciencia, Universidades e Formación Profesional, Román Rodríguez, e de Medio Ambiente e Cambio Climático, Ángeles Vázquez.