O GPP asegura que os orzamentos da Deputación de Ourense permiten “seguir camiñando na boa dirección”

Santiago, 20 de decembro de 2016.- O deputado do Grupo Popular César Fernández Gil asegurou esta tarde no Parlamento que os orzamentos da Deputación de Ourense para 2017 permiten “seguir camiñando na boa dirección e dando respostas ás necesidades que ten a sociedade da provincia de Ourense”.

César Fernández indicou que o goberno da Deputación de Ourense ten “unha visión integral da provincia e amosa que existe proxecto político que cristaliza en plans e nun orzamento”. Neste sentido, lembrou que estas contas están aprobadas desde o pasado mes de setembro, “o que outorga certidume, planificación e seguridade para as entidades locais e os cidadáns”.

 

XESTIÓN SERIA E SOLVENTE

 

Estas orzamentos “amosan que existe unha xestión seria e solvente da Deputación de Ourense, poñendo a disposición dos ourensáns unha administración pública para mellorar os servizos que reciben”.

 

En concreto, o deputado popular sinalou que estes orzamentos “responden ao Plan de mandato Ourense 15-19, a través do que se reduciu a débeda desta administración desde o 116 por cento ao 25 por cento”.

 

Entre os proxectos estratéxicos que se levarán adiante, Fernández referiuse á aposta polo termalismo como eixo de desenvolvemento provincial; o plan de fomento do emprego para os concellos, distribuído con criterios de obxectividade no reparto dos fondos públicos; o proxecto de Provincia Intelixente, para afondar no desenvolvemento da administración electrónica; o incremento do plan de cooperación de obras e servizos para os concellos; e as axudas para que os concellos que acrediten insuficiencia financeira sufraguen gasto corrente; ao tempo que foi a primeira deputación en asumir os gastos que ocasionan os grupos de emerxencias supramunicipais nos concellos.

 

César Fernández manifestou que “parece que aos grupos da oposición o último que lles preocupa é Ourense, porque a realidade que pintan é permanentemente desmentida pola sociedade ourensá”. Deste xeito, pediu “un mínimo de respecto cara aos representantes públicos da sociedade de Ourense”, aínda que recoñeceu que á oposición “pódelle resultar frustrante chegar e ter que someterse ao que dita a realidade”.

O GPP pon de relevo que Darío Campos preside na Deputación de Lugo un goberno en precario

Santiago, 20 de decembro de 2016.- O deputado do  Grupo Popular Daniel Vega puxo de relevo esta mañá no Parlamento que o presidente da Deputación de Lugo, o socialista Darío Campos, preside un goberno “en precario” e lembroulle que “está obrigado a pactar para que un ano máis os orzamentos do ente provincial non queden en fume”. Para evitar esta situación, Vega tendeu a man do PPdeG ao Goberno provincial en minoría, dun xeito responsable e tal e como fixeron na presente anualidade, para que sexa posible chegar a unhas contas de consenso que permitan resolver os problemas dos lucenses tamén no 2017.

 
Daniel Vega lembrou que Darío Campos “é o presidente con menos respaldo das catro deputacións galegas e o mais débil que se acorda na institución provincial”. “A pesar diso, segue aplicando a unilateralidade, carente de man esquerda, de diálogo e pouco interesado no funcionamento normal da institución”, dixo.

 

 “Non podemos comprender a falta de diálogo do PSOE, pese a que presenta unhas contas que só defenderán, no mellor dos casos, 10 dos 25 deputados provinciais”, sinalou o deputado popular. Neste sentido, engadiu que “o único que nos queda claro é que vostede so chega a acordos cando se trata de manterse no poder e non pensa no interese dos lucenses”, polo que recomendoulle “unha vez máis que sexa consciente da súa febleza e conxugue o verbo pactar”.

 

O deputado popular reclamoulle, por exemplo, que os orzamentos da 2017 incorporen o investimento necesario para facer posible a dotación de material do auditorio de Lugo, en cuxa construción a Xunta xa investiu 20 millóns de euros. Lembroulle tamén que nas contas pactadas para a anualidade de 2016, a Deputación comprometeuse co PP a ampliar as dotacións en materia de axuda no fogar, o plan de obras e servizos, impulsar o programa de axudas para concellos de menos de 20.000 habitantes ou o plan para a renovación de marquesiñas, “cuestións que esiximos incorporar tamén nos orzamentos de 2017”.

 
FALTA DE CREDIBILIDADE E INCUMPRIMENTOS

 
Por outra banda, Daniel Vega reprochou a falta de “credibilidade e palabra” do presidente socialista e repasou os múltiples compromisos incumpridos por Darío Campos daqueles que presentou na súa anterior comparecencia no Parlamento de Galicia. “Vostede veu aquí para propoñer múltiples iniciativas que despois quedaron en promesas rotas: eliminou os orzamentos participativos, hai un futuro incerto para a granxa Gayoso Castro, e 6 anos despois a Deputación de Lugo foi incapaz de poñer en marcha unha soa praza das residencias promovidas polo ente provincial”, concretou.

 
Vega tamén censurou que “o PSOE é responsable directo do deterioro da imaxe do ente provincial, entre liortas internas do provincial e os problemas xudiciais da institución”, polo que reclamou “accións decididas para devolver á Deputación a dignidade que nunca debeu perder”.

 
“Vostede, Sr. Campos, converteu a Deputación de Lugo na institución provincial con máis problemas internos de España: en pouco máis dun ano o seu grupo viuse reducido coa marcha do señor Martínez e despois romperon o pacto de goberno co BNG; ao tempo que a imaxe da institución viuse relegada ás portadas dos xornais que informaban dos líos xudiciais do seu ex presidente”, sinalou. “As deputacións provinciais non deben ser isto, porque a Deputación está para resolver dificultades e non para crealas”, apuntou.

 
Para rematar, Daniel Vega lembrou que son tempos de responsabilidade política. “Debémonos  aos cidadáns, chegou a hora do traballo e do diálogo, palabras fundamentais no día a día da política”.

O GPP critica que os orzamentos da Deputación de A Coruña sexan “pouco ambiciosos, cómodos e inconformistas”

Santiago, 20 de decembro de 2016.- O deputado do Grupo Popular Aurelio Núñez Centeno cualificou hoxe os orzamentos da Deputación Provincial de A Coruña de “pouco ambiciosos, cómodos e conformistas”, que “cun descenso das partidas para o beneficio dos cidadáns pero en claro avance para o PSOE e BNG, os grupos políticos que manexan o organismo”. Así mesmo, criticou “a pouca vontade de diálogo” amosada polo goberno da Deputación, polo que demandou que “retomen o consenso e negocien co grupo maioritario do PP”.

Aurelio Núñez explicou que as contas da Deputación de A Coruña para 2017 “conxeláronse, ao incrementarse unicamente o 0,52 por cento”. Nese sentido, considerou “curioso que os grupos da oposición vexan ridículo  un incremento dos orzamentos da Xunta do 3 por cento e vexan magnífico este incremento mínimo, pasota e pasivo na Deputación coruñesa”.

 

MENOS RECURSOS PARA OS CONCELLOS

 

“Gastan moito máis no goberno da Deputación e moito menos nas necesidades dos concellos”, sinalou o deputado popular. En concreto, lembrou que o capítulo de investimentos redúcese en  máis de 4,5 millóns de euros; as transferencias aos concellos en 762.000 euros; os gastos para conservación e mantemento de vías e obras provinciais en 1,6 millóns de euros; o investimento para cultura e deportes nun 15 por cento; e a partida de acción social nun 17,92 por cento, especialmente o destinado a políticas de igualdade, que pasa de 1,3 millóns a 673.000 euros.

 

Núñez Centeno referiuse expresamente ao novo plan único POS-Plus, que aglutina os antigos POS, PAS e PAI. “Este plan baleira de contido político en exceso a capacidade de actuación da Deputación e dota de menos recursos económicos aos concellos da provincia, xa que pasa dun investimento conxunto dos tres plans antigos de 78 millóns aos 74 millóns d euros do novo plan único”, explicou.

 

Así mesmo, o deputado popular cualificou de “conto da leiteira” o anuncio de que o POS-Plus se incrementará sensiblemente, porque “a día de hoxe non deixan de ser boas palabras que non se reflicten no papel”.

 

NEGOCIE CO PARTIDO  POPULAR

 

Aurelio Núñez demandou ao presidente da Deputación coruñesa que “retome o espírito de diálogo e de consenso” no organismo provincial. “Faga valer as súas ideas, non se deixe malaconsellar e ser refén da vicepresidenta do BNG, e negocie co Partido Popular para recuperar ese consenso que imperou nos últimos anos”, indicou.

 

Para rematar, o deputado popular demandou que as contas da Deputación Provincial “deben seguir na liña do rigor e de control do gasto da anterior corporación provincial do PP”, que deixou unha institución saneada logo de amortizar unha débeda que superaba os 90 millóns de euros no ano 2011.

Puy amosa a disposición do GPP a negociar coa oposición acordos que poidan mellorar os orzamentos de 2017

Santiago, 19 de decembro de 2016.- O portavoz do Grupo Popular, Pedro Puy, manifestou hoxe que, unha vez rematen esta semana as comparecencias e se peche o prazo de presentación de emendas aos orzamentos da Comunidade galega para 2017, “iniciaremos un procedemento de negociación cos grupos da oposición que permita chegar a acordos e mellorar o documento orzamentario”.

Pedro Puy iniciou a súa comparecencia ante os medios de comunicación trasladando, no nome do Grupo Popular, “a máis enérxica condena dos casos de violencia machista que aconteceron esta fin de semana”. Neste sentido, animou “a toda aquela persoa que coñeza casos de malos tratos, e en especial ás mulleres que os sofren, a traballar nas denuncias e na persecución deste tipo de accións absolutamente intolerables e inxustificables”.

 

Así mesmo, felicitou á nova Presidenta local do PP en Vigo, Elena Muñoz, que saíu elixida nun “congreso que serve para deixar ben claro que no noso partido os procesos de elección son absolutamente democráticos”. Puy lembrou que o  Grupo Popular conta con dúas deputadas de Vigo, Teresa Egerique e Marián García, ademais doutro deputado da área metropolitana viguesa, Alberto Pazos, o que demostra que se trata dunha zona “que nos preocupa e motiva a traballar en coordinación coa dirección local de Vigo para impulsar todas aquelas iniciativas que supoñan mellora da cidade e da calidade de vida de todos os que residen en Vigo”.

 

DEBATE DE TOTALIDADE A MEDIADOS DE XANEIRO

 

O portavoz popular fixo un repaso da tramitación no Parlamento dos orzamentos da Comunidade galega para 2017 e lembrou que xa compareceron todos os membros do Consello da Xunta. A eles sumaranse hoxe os presidentes dos órganos institucionais do Consello Consultivo, Consello Económico e Social, Consello da Cultura Galega e Corporación de Radio e Televisión de Galicia; mañá farano os presidentes das Deputacións provinciais; e o mércores os representantes da Axencia Galega de Turismo, o director da Axencia Galega de Desenvolvemento Rural (AGADER), a Axencia Galega de Emerxencias e o Instituto Galego de Seguridade e Saúde Laboral (ISSGA).

 

O remate das comparecencias esta semana “permite confiar na celebración do Pleno de debate de totalidade ao inicio da primeira quincena de xaneiro”, avanzou Pedro Puy, quen tamén engadiu que “unha vez rematado o prazo de presentación de emendas, iniciaremos un procedemento de negociación cos grupos da oposición que permita chegar a acordos e mellorar o documento orzamentario para 2017”.

 

Cuestionado sobre a proposta de financiamento para Galicia presentada hoxe polo BNG, Puy lembrou que “xa foi votada na Cámara a finais da pasada lexislatura” e subliñou que “o sistema de cupo sería prexudicial para Galicia a curto prazo, como o din a maioría dos expertos que analizan o sistema de financiamento autonómico”.

 

O CUPO NON COMPENSA A GALICIA

 

“O propio sistema de cupo é contrario non so aos principios básicos da organización da facenda pública multinivel, senón incluso contraditorio co que defendemos todos: unha Europa máis solidaria e máis eficaz na loita contra as crises asimétricas”, manifestou.

 

Deste xeito, Puy explicou que, en termos financeiros, “non compensaría a Galicia, nin é unha proposta que sexa racional en relación coas circunstancias económicas e financeiras que estamos a vivir, cunha comunidade autónoma integrada e aberta á economía española e europea”.

 

Pedro Puy dixo que na actualidade “o debate na Unión Europea é se establecemos a nivel europeo políticas fiscais que permitan resolver as inequidades e os ciclos asimétricos que o mercado xera unha vez que hai un mercado único europeo”, polo que “cando estamos a falar dunha preocupación pola desigualdade, hai que pensar na escala do mercado onde se producen esas inequidades”.

O GPP solicita a Fomento e Audasa pantallas antirruído nas obras de ampliación da AP-9 na entrada de Vigo

 

Santiago, 17 de decembro de 2016.- O Grupo Popular vén de rexistrar unha proposición non de lei a través da que se solicita ao Ministerio de Fomento e á empresa Autopistas del Atlántico, S.A. (Audasa) que, no marco das obras de ampliación da capacidade da AP-9 que se levan a cabo na entrada a Vigo, se proceda a cumprir co seu compromiso de instalar pantallas antirruído, naqueles puntos onde sexa necesario de acordo coa normativa vixente, e se adopten medidas paliativas que minimicen o impacto da autoestrada e melloren a compatibilidade desta infraestrutura coa contorna construída e co día a día dos veciños.

O deputado popular Alberto Pazos considera necesario que “se adopten as medidas necesarias que palíen as molestias que a AP-9 lles ocasiona aos cidadáns”. Neste sentido, apunta que “este é o momento máis acaído, xusto cando se están a levar a cabo as obras de ampliación da capacidade da AP-9”.

 

COMPROMISO CON REDONDELA

 

Alberto Pazos lembra que Audasa “comprometeuse directamente co Concello de Redondela a realizar as actuacións paliativas necesarias para minimizar o impacto da infraestrutura ampliada, especialmente a contaminación acústica, que afecta especialmente aos veciños de Teis e de Chapela deste municipio”.

 

“As obras de ampliación entre os enlaces de Cangas e Teis da AP-9 que se están a realizar conlevarán un incremento do nivel de ruídos que padecen os veciños como consecuencia de que a circulación dos vehículos se situará máis próxima ás vivendas e do probable incremento do tráfico pola autoestrada”, indicou.

 

Pazos salientou que a ampliación da AP-9 “mellorará tanto o acceso como a saída de Vigo, reducindo os problemas de tráfico existentes na actualidade e reforzando a seguridade dos condutores, pero leva aparellado o incremento das molestias causadas polos ruídos aos veciños da zona, algo que a concesionaria comprometeuse a solventar e que consideramos necesario que o Parlamento galego se pronuncie sobre este tema”.

Galicia fará valer o seu peso como nacionalidade histórica na vindeira Conferencia de Presidentes

O secretario xeral do PPdeG, Miguel Tellado, ofreceu este venres unha rolda de prensa na que fixou a Conferencia de Presidentes autonómicos que se celebrará o próximo 17 de xaneiro como “unha das primeiras grandes citas políticas” do vindeiro 2017. “Agardamos un encontro produtivo entre iguais, nos que se dea un debate serio sobre as necesidades das nosas comunidades”, apuntou, para sinalar que agarda que os líderes autonómicos acudan ao encontro “con espírito construtivo, de diálogo e vontade de consenso”. “Estamos convencidos de que non será coma as dos tempos de Zapatero, que só servían para pasar a limpo o xa acordado con Cataluña”, lembrou.

Tellado desexou que Galicia poida facer valer o seu peso político nesta reunión como nacionalidade histórica, a única que acudirá cun talante de aliado do Goberno Central, dado que nin Euskadi nin Catalunya se presentarán, e a presidenta andaluza “parece máis preocupada polas loitas internas do seu partido que polos problemas da sociedade”.

Con todo, o secretario xeral subliñou que “somos aliados, pero non vasalos”, e recalcou que o presidente Feijóo se presentará en Madrid “non como un militante do Partido Popular, senón unicamente como militante de Galicia. Neste sentido, insistiu en que o líder do Executivo galego defenderá todos os acordos que sexan positivos para a nosa terra, e enfrontarase a todos aqueles que pretendan que Galicia reciba menos do que merece, “sexan do partido que sexan”.

Entre os factores que deberán terse en conta na Conferencia é a traxectoria que o Goberno galego seguiu nos últimos anos en canto a rigor na xestión das contas públicas. “Galicia cumpriu sempre, e iso ten un valor. Foi a única Comunidade que conseguiu baixar a débeda no último ano”, salientou.

MAN TENDIDA PARA AMPLIAR A MAIORÍA

O secretario xeral tamén quixo recordar que Feijóo acudirá ao encontro como único presidente cunha maioría absoluta, pero tendeulle a man á oposición para conseguir ampliar este apoio e acadar “posturas de país” en temas fundamentais. Sobre este punto, valorou positivamente a actitude do voceiro parlamentario socialista, Xoaquín Fernández Leiceaga, que esta semana mostrou vontade de “traballar con responsabilidade” a carón do Goberno. “Agardamos que obteña o apoio do seu partido nesta postura e que no resto de España haxa máis socialistas que sexan capaces de poñer os intereses dos cidadáns por diante das loitas partidistas.

O PPdeG solicita ao Fiscal elaborar un estudio sobre a influencia da publicidade nos casos de violencia machista

Santiago, 15 de decembro de 2016.- A portavoz de Xustiza do Grupo Popular, Paula Prado, propuxo esta tarde ao Fiscal Superior de Galicia, na súa comparecencia para presentar a Memoria da Fiscalía correspondente a 2015, a elaboración dun estudo, en colaboración con outros organismos públicos, sobre a influencia que poida ter a publicidade que se lle da aos casos de violencia de xénero na comisión de novos delitos.

Continue reading

O Parlamento aproba o desenvolvemento dunha Estratexia de Infraestrura Verde que protexa a diversidade

Santiago, 13 de decembro de 2016.- O Parlamento de Galicia aprobou esta tarde unha proposición non de lei, do  Grupo Popular e apoiada por PSOE e BNG, a través da que se insta á Xunta de Galicia ao desenvolvemento dunha Estratexia de Infraestrutura Verde que cree unha rede de espazos naturais e seminaturais deseñada e xestionada para protexer a biodiversidade, proporcionar servizos ecosistémicos e incrementar a resiliencia dos ecosistemas.

Continue reading

O Parlamento aproba solicitar á Xunta a creación dunha tarxeta dirixida aos peregrinos

 

Santiago, 13 de decembro de 2016.- O Parlamento de Galicia aprobou esta tarde a proposición non de lei do Grupo Popular, apoiada tamén polo Grupo Socialista, a través da que se insta á Xunta a crear unha tarxeta dirixida especificamente aos peregrinos que chegan a Compostela, que aglutine diferentes servizos do seu interese como entrada única nos museos, facilidades no transporte e descontos en actividades culturais, de ocio e restauración, en comercios e tendas de produtos galegos, de artesanía de Galicia e nos mercados de Abastos.

 

A portavoz de Turismo do Grupo Popular, Cristina Romero, lembrou que “os peregrinos son unha fonte de ingresos moi importantes para a economía galega e en especial para Santiago onde se deixaron no 2015 máis de 26 millóns de euros”. “A presenza dun número cada vez maior de peregrinos, especialmente internacionais, é una excepcional oportunidade para os diversos sectores que prestan servizos aos nosos visitantes”, sinalou.

 

Neste sentido, Romero explicou que esta nova tarxeta de fidelización do peregrino “aglutinaría os diferentes servizos aos que poden acceder, proporcionándolles unha atención diferenciada e de maior calidade e permitíndolles coñecer unha oferta que moitas veces pasa inadvertida”. “Ademais, redundaría nun incremento da súa estadía en Santiago é sería unha ferramenta máis para a promoción de Galicia e os seus recursos  e para combater a estacionalidade”, engadiu.

 

PREPARAR O XACOBEO 2021

 

Cristina Romero subliñou que “a vontade, tanto do Goberno como do PPdeG, é seguir facendo do turismo un baluarte indiscutible para consolidar a recuperación económica, sobre todo sabendo que esta lexislatura será clave para preparar o próximo Xacobeo 2021”. “Un acontecemento desta característica é de tal envergadura que non pode nin debe improvisarse  nin deixarse para o último momento, sobre todo si o que se pretende é facer no ano 2021 o mellor Xacobeo da historia”, indicou.

 

A  portavoz popular criticou o desinterese amosado por En Marea e o BNG respecto do turismo en Galicia, “un sector estratéxico que representa máis do 11 por cento do PIB galego e o 12 por cento do emprego, gracias a rexistrar este ano un máximo histórico nos niveis de demanda turística, cun total de 4,5 millóns de turistas aloxados e máis de 9 millóns de pernoctacións”.

GPP reitera que tanto o Goberno galego como o PPdeG continuarán demandando a transferencia da AP-9

Santiago, 13 de decembro de 2016.- O portavoz de Infraestruturas do Grupo Popular, Martín Fernández Prado, reiterou hoxe que tanto o Goberno galego como o PPdeG seguirán demandando a transferencia á Xunta da AP-9. Deste xeito, apoiou demandar ao Goberno central que non obstaculice a tramitación da proposición de lei aprobada por unanimidade na Cámara galega a través da que se demanda a transferencia desta autoestrada.

Continue reading