O PPdeG impulsará a modificación e actualización da Lei de prevención do consumo de alcochol en menores

Santiago, 27 de decembro de 2016.- O portavoz de Sanidade do Grupo Popular, Aurelio Núñez Centeno, asegurou hoxe no Parlamento que “a modificación e actualización da Lei de prevención do consumo de alcohol en menores é un compromiso que figuraba no programa electoral do PPdeG, polo que imos instar ao Goberno a cumprilo”.

Aurelio Núñez concretou que esta nova normativa incluirá a regulación do consumo na vía pública, a restrición efectiva do acceso de menores de idade ás bebidas alcohólicas e a desnormalización da tolerancia ao consumo.

 

CONSECUENCIAS NO FUTURO

 

“O abuso de alcohol non é un problema exclusivo dos menores, ou de mozos e mozas, pero si ten consecuencias para o seu desenvolvemento futuro moi superiores ás dos adultos a nivel de saúde, de estudos, de comportamentos, así como con consecuencias visibles e negativas para a súa saúde física, psíquica e social”, indicou.

 

Deste xeito, Núñez Centeno sinalou que “o consumo de alcohol en menores ten unha problemática propia e entidade suficiente para que mereza unha lei e unhas medidas diferenciadas”. “O consumo de alcohol en menores é un problema específico e moi importante, no que deben interactuar moitos ámbitos como a familia, a educación, a sanidade, a publicidade ou as propias administracións públicas”, apuntou.

 

O portavoz popular manifestou que adoptar medidas contra o consumo de alcohol “non é criminalizar á mocidade, senón pelexar contra modos de comportamento moi prexudiciais para a súa saúde, a convivencia e as futuras actitudes cara ao alcohol dos nosos mozos e mozas”. En concreto, dixo que “é grave a intoxicación aguda con resultado de coma e inclusive morte, pero tamén o é a afectación multiorgánica que está cientificamente comprobado que produce a toma masiva de bebidas alcoholicas en días illados, ademais do feito de que un menor que consume ten mais probabilidades de ser un adulto que consume”.

Cristina Romero cualifica a desigualdade salarial como “unha das discriminacións máis inxustas que sufrimos as mulleres”

Santiago, 27 de decembro de 2016.- A deputada do Grupo Popular Cristina Romero cualificou hoxe no Parlamento a desigualdade salarial existente entre mulleres e homes como “unha das discriminacións máis inxustas que sufrimos as mulleres”. Deste xeito, o Grupo Popular apoiou hoxe a aprobación polo Pleno instar á Xunta a convocar, por mediación do Consello Galego de Relacións Laborais, a patronal e sindicatos para promover que na negociación colectiva de ámbito galego se considere como obxectivo a acadar en 2020 a igualdade salarial efectiva entre homes e mulleres, así como que o Goberno central promova unha Lei de igualdade retributiva entre homes e mulleres.

 

Cristina Romero afirmou que “a aposta deste Goberno para atallar esta discriminación que estamos a sufrir é firme” e lamentou “que se utilice a discriminación como escusa para formular outras cuestións xenéricas nas que o Goberno galego xa está a traballar”.

 

CALIDADE DE EMPREGO IGUALITARIO

 

“Estamos todos de acordo en que a máxima preocupación do Goberno sexa seguir impulsando a calidade do emprego dun xeito igualitario”, indicou a deputada popular. Neste sentido, apuntou que a Xunta aposta polo emprego feminino e a igualdade de xénero mantendo a discriminación positiva nas políticas activas de emprego, potenciando os plans de igualdade nas empresas, traballando coa Inspección de Traballo con actuacións dirixidas á persecución da discriminación das mulleres e instando ao  Consello Galego de Relacións Laborais a un acordo marco interprofesional de ámbito autonómico sobre igualdade de oportunidades entre mulleres e homes.

 

Ademais, engadiu que “se continúa traballando no fomento do emprendemento feminino a través do Programa EMEGA, unha medida integral de promoción da igualdade no eido laboral que apoia e favorece o éxito da iniciativa emprendedora das mulleres”.

 

CONTINUAR AVANZANDO

 

“Galicia continuará avanzando cara a unha igualdade efectiva entre homes e mulleres grazas a unha planificación axeitada, que para o próximo ano contará cun novo Plan de Emprego Feminino para que ás mulleres ocupemos o lugar que nos corresponde no mercado laboral, academos participación en todos os sectores e en todas as categorías profesionais e para eliminar, por os todos os medios posibles, esta brecha salarial que tanto nos prexudica”, sinalou.

 

Cristina Romero manifestou que o discurso da oposición “non é crible porque nas comunidades autónomas gobernadas por socialistas, nacionalistas e a nova política de Podemos teñen unha brecha salarial cinco punto por enriba de Galicia, como está a ocorrer en Andalucía, Cataluña ou Aragón”. “Todos estamos a favor de acabar con esta diferenza que tanto nos prexudica como sociedade”, asegurou.

O GPP incidirá no pleno do Parlamento ao Ministerio de Fomento para a conexión de Lugo coa alta velocidade ferroviaria

Santiago, 26 de decembro de 2016.- O portavoz do Grupo Popular, Pedro Puy, incidiu hoxe na inclusión no Pleno de mañá dunha proposición non de lei, a iniciativa do PPdeG, a través da que se solicita ao Ministerio de Fomento a conexión de Lugo cos servizos de alta velocidade ferroviaria, para o que se demanda a inclusión de compromisos nos orzamentos de 2017.

 

A iniciativa defendida polo Grupo Popular ten como obxectivo insistir ante o Goberno central na necesidade de acometer, no menor prazo de tempo posible, un proceso de modernización da liña ferroviaria entre Lugo e Ourense, a través de Monforte. Ademais, demándase ao Ministerio de Fomento que priorice os investimentos que garantan a modernización e faciliten a conexión de Lugo cos servizos de alta velocidade ferroviaria, de xeito que se garanta que os tempos de viaxe entre Lugo e Madrid se sitúen arredor das tres horas.

 

PROBA DO SIDA

 

O Grupo Popular tamén defenderá outra proposición non de lei a través da que se demanda á Consellería de Sanidade que inicie a oferta rutineira da proba do SIDA ás persoas de entre 15 a 59 años que vaian proceder a unha extracción de sangue no seu centro de saúde. Esta medida xa está prevista no Plan galego anti VIH/sida e outras infeccións de transmisión sexual 2015-2018 da Consellería de Sanidade.

 

Pedro Puy salientou o “especial protagonismo” que terá na sesión plenaria os asuntos relacionados coa violencia de xénero e a igualdade. “Desde o Grupo Popular rexeitamos e condenamos todas aquelas accións de violencia de xénero e avogamos por unha unidade de acción contra esta lacra social, como se viu no último pleno no que se aprobou unha declaración institucional”, apuntou.

 

Neste punto, Puy afirmou que “hai marxe para os acordos” en materia de loita contra a violencia de xénero, polo que sinalou que “se a oposición trae propostas que teñan efectividade e sexan boas para erradicar esta lacra social contarán co apoio do Grupo Popular”

 

COLABORAR COA XUSTIZA

 

Cuestionado sobre a citación pola Audiencia Provincial de A Coruña a dous responsables do Sergas para declarar pola subministración do tratamento para a hepatite C, Puy lembrou que “a Xunta está a colaborar coa Xustiza en todo momento e debemos esperar que a Xustiza actúe coa independencia que estas cuestións requiren”.

 

Neste sentido, sinalou que “non me parece oportuno condicionar a actividade do Parlamento á existencia dun auto xudicial” e lamentou que se “intente converter a Cámara nunha especie de seguidor e comentarista de procedementos xudiciais”.

Pedro Puy destacou que o gasto farmacéutico da Xunta supera os 1.100 millóns de euros, nun orzamento total de 9.000 millóns, “o que da unha idea do esforzo que toda a sociedade está a facer para que a protección sanitaria e o tratamento farmacéutico funcione ben”. Así mesmo, lembrou que se levan tratado en Galicia máis de 4.700 persoas afectadas pola hepatite C, das que máis de 1.100 foron antes da entrada en vigor do plan estratéxico para a abordaxe desta enfermidade a nivel nacional.

O PPdeG ve a mensaxe de Nadal de Felipe VI “apegada á realidade social, política e económica do país”

Santiago, 25 de decembro de 2016.- O secretario xeral do PPdeG, Miguel Tellado, valorou este domingo a mensaxe de Nadal da Súa Maxestade o Rei Felipe VI como “un discurso apegado á realidade social, política e económica do país”. “Compartimos enteiramente a diagnose do Xefe do Estado en canto á necesidade de consolidar a recuperación económica mediante a creación de máis emprego de mellor calidade”, subliñou, para destacar o “marcado carácter europeísta, e a súa reivindicación de valores como a tolerancia, o respecto e a importancia da familia na nosa sociedade”. 

Continue reading

O PPdeG agarda que a igualdade entre autonomías acordada no CPFF impere tamén na Conferencia de Presidentes

Santiago, 23 de decembro de 2016.- O secretario xeral do PPdeG, Miguel Tellado, ofreceu este venres unha rolda de prensa na que celebrou que no Consello de Política Fiscal e Financeira (CPFF) do xoves se acordase que todas as Comunidades Autónomas conten co mesmo tope de déficit, en contraposición coa asimetría que propuña Cataluña ou algúns gobernos socialistas. 

Continue reading

A Xunta aproba un ano máis o complemento extraordinario de máis de 200 euros para os preto de 40.000 perceptores de pensións non contributivas

O presidente da Xunta, Alberto Núñez Feijóo, avanzou hoxe a aprobación do complemento extraordinario de 206 euros para os perceptores de pensións non contributivas da Seguridade Social, no cal o Goberno galego investirá case 8,2 millóns de euros. Un complemento que, segundo precisou, chegará a arredor de 40.000 persoas, entre perceptores de pensións non contributivas, do Fondo de Asistencia Social e do Subsidio de Garantía de Ingresos Mínimos.

Continue reading

O Parlamento solicita a instancias do GPP, a creación dunha consulta especializada de oncoloxía no Hospital da Costa

Santiago, 22 de decembro de 2016.- O Parlamento de Galicia aprobou hoxe a proposición non de lei do Grupo Popular a través da que se insta á Xunta a impulsar a creación dunha consulta especializada de enfermería oncolóxica no Hospital da Costa de Burela. O obxectivo é que este servizo complemente a prestación asistencial do novo hospital de día de oncohematoloxía posto en marcha na pasada lexislatura e que está a contribuír dun modo altamente eficaz á mellora da atención, tratamento e calidade de vida dos enfermos de cancro.

A deputada popular Encarna Amigo afirmou que esta consulta de enfermería oncolóxica no Hospital de Burela permitiría “seguir mellorando e complementando” o hospital de día de oncohematoloxía posto en marcha en novembro de 2014. En concreto, dixo que “hoxe existen dúas enfermeiras que atenden este servizo e o que queremos é reforzalo cunha enfermeira máis especializada na atención deste tipo de doentes, onde a sensibilidade e a transmisión de información específica é fundamental”.

 

“A posta en marcha da consulta de enfermería oncolóxica permitirá que os doentes conten cun persoal encargado de explicarlles os coidados que teñen que seguir, os efectos dos tratamentos e as fórmulas para palialos e, en xeral, resolver todas as dúbidas ou calquera cuestión referente á enfermidade”, apuntou a deputada popular.

 

Así mesmo, Amigo engadiu que esta nova consulta permitirá “diminuír o grao de ansiedade que produce a enfermidade e axilizar os procesos de valoración, así como a frecuencia das visitas dos pacientes á área de urxencias, como garantía para mellorar os obxectivos terapéuticos e de calidade de vida dos enfermos”.

 

PAPEL ESPECIAL

 

A deputada do Grupo Popular destacou que “os profesionais de enfermería oncolóxica “teñen un papel moi especial en ámbitos tan importantes como a prevención de complicacións e a detección e control dos efectos secundarios, coa finalidade de proporcionar atención especializada nos episodios críticos”. Ademais, sinalou que estes profesionais “incorporan aos coidados os aspectos psicosociais do enfermo e da súa familia, para conseguir unha atención integral que responda as necesidades dos mesmos”.

 

Encarna Amigo explicou que o hospital de día de oncohematoloxía de Burela ocupa unha superficie de 120 metros cadrados e conta con 12 postos para tratamentos “nos que os enfermos de cancro poden recibir os tratamentos de quimioterapia preto dos seus fogares e sen necesidade de desprazarse a Lugo ou A Coruña”. “Aída que a súa implantación foi progresiva ao longo do tempo, desde o mes de setembro as consultas xa funcionan os cinco días á semana, o que significa que o servizo xa está a pleno rendemento”, indicou.

O GPP asegura que o Sergas dispón de financiamento para a licitación do proxecto do novo centro de saúde de Cangas

Santiago, 22 de decembro de 2016.- O portavoz de Sanidade do Grupo Popular, Aurelio Núñez Centeno, asegurou hoxe que “coa partida xenérica do Sergas para centros de saúde poderase facer fronte ao custo que suporía a licitación do proxecto do novo centro de saúde de Cangas”. Neste sentido, sinalou que “o Sergas traballará nos vindeiros meses para definir, conforme ás necesidades asistenciais do concello de Cangas, os requirimentos deste novo centro de saúde e no momento que haxa acordo entre todas as partes procederase á licitación do proxecto definitivo para poder comezar a construción do novo centro de saúde”.

Aurelio Núñez considerou “aconsellable unificar nun centro de saúde equidistante os servizos que se prestan no centro de saúde de Aldán e o consultorio de Hío, cunhas instalacións máis tecnificadas e actualizadas, e cunha mellor cobertura de persoal ao unificarse nunha única edificación”.

 

DISCREPANCIAS COS TERREOS

 

Porén, lembrou que “os terreos proporcionados en O Viso están a xerar discrepancias entre os veciños”, pero indicou que o Sergas procederá a definir o proxecto do novo centro que atenda as necesidades asistencias do concello de Cangas. “No momento que haxa acordo entre todas as partes, procederase á licitación do proxecto definitivo”, apuntou.

 

Aurelio Núñez concretou que na actualidade 64 profesionais atenden aos veciños de Cangas, tanto no centro de saúde da capital municipal como no de Aldán e no consultorio de Hío. “Préstase todo tipo de servizos, incluída saúde mental, radiodianóstico con teleradioloxía, odontoloxía e fisioterapia, ademais de consultas de especialidades en xinecoloxía e oftalmoloxía”, sinalou.