Feijóo di que se Rivera non quere goberno de Podemos pida aos seus que voten ao PP

Salienta a necesidade de mobilizarnos e anima a votar contra o bloqueo, a favor de Galicia, de España e da moderación

 

Feijóo di que se Rivera non quere un goberno de Podemos, que lle diga aos seus votantes en Galicia que voten ao PP

· Apunta que cantos máis escanos teñan os populares, máis opción terá o PSOE para non “someterse a Pablo Iglesias e servir de muleta de Podemos”

· Indica que concentrar o voto no Partido Popular garante que haxa goberno, gobernabilidade e que o país volva arrancar

 

Santiago de Compostela, 20 de xuño de 2016.- O presidente do PPdeG, Alberto Núñez Feijóo, asegurou que se Albert Rivera non quere un goberno de Podemos, que lle diga aos seus votantes en Galicia que voten ao Partido Popular.

 

Desta maneira se expresaba o dirixente, que participou esta tarde xunto ao ministro de Sanidade, Alfonso Alonso, nun mitin en Santiago no que tamén contaron coa presenza do presidente local, Agustín Hernández e da candidata ao Congreso, Marta González.

 

Alí, dirixiuse a aquelas persoas afíns a Ciudadanos que o que queren é moderación, unidade de España e reformas; e aseguroulles que teñen nas papeletas do PP a posibilidade de que o seu voto se converta en escanos que defenden todo iso, posto que Ciudadanos non vai ter escanos en Galicia e a súa papeleta só beneficia a Podemos.

 

Así mesmo, tamén fixo referencia a aqueles socialistas que non queren que o seu partido se someta a Pablo Iglesias e “serva de muleta de Podemos”, sinalando que teñen no voto ao PP unha vía para evitalo.

 

Deste xeito, aseverou que cantos máis votos e escanos teña o Partido Popular, máis opcións haberá para que o PSOE opte pola moderación e o constitucionalismo.

 

MOBILIZARSE E VOTAR

Segundo admitiu o líder do PPdeG, nestas eleccións decidimos a través dos votos que España volva moverse ou siga parada. Así, recordou que hai catro anos mobilizámonos e votamos porque non había que conformarse co empobrecemento da nosa sociedade, polo que apuntou que agora tampouco hai que resignarse a que o conxunto do Estado alongue este bloqueo dos últimos seis meses.

 

Ademais, Feijóo salientou a necesidade de mobilizarnos contra o bloqueo, a favor de Galicia e de España, e a favor da moderación; incidindo en que temos que mobilizarnos co voto ao PP que é o único co que o país pode volver moverse.

 

No mesmo senso, incidiu en que para os intereses do país, temos que concentrar o voto no PP: para que haxa goberno, gobernabilidade e para que “España volva arrancar”.

 

Pola contra, advertiu que, para os intereses de Podemos, quedar na casa ou votar a Ciudadanos é exactamente o mesmo xa que significa restarlle escanos ao PP e que eles se beneficien; de igual modo que para os intereses do PSOE o mellor resultado é que a situación sexa igual que a destes meses, para que “Sánchez siga a súa carreira agonizante”.

 

Durante a súa intervención, o dirixente lembrou que o que levan facendo o resto de partido tralas eleccións de decembro non é democracia senón un boicot ao resultado das urnas que é a primeira vez que ocorre na historia de España.

 

Nese sentido, Feijóo pediu que non deixemos volver bloquear o país, xa que a indefinición calculada do PSOE e de Ciudadanos, que nunca din claramente o que van facer, está destruíndo o sistema democrático. Así, fronte ao bloqueo que traen consigo os socialistas e o partido de Rivera, e fronte ao colapso que trae consigo o populismo, o presidente pediu o voto para o Partido Popular.

 

Para o presidente, só a papeleta dos populares asegura a moderación e o goberno fronte ao sectarismo e o desgoberno, facendo fincapé en que temos que votar con garantías xa que “un voto non é unha lotería”. 

[iframe width=”600″ height=”350″ src=”https://www.youtube.com/embed/aNOFjxXZDSg” frameborder=”0″ allowfullscreen ]

Feijóo: “O PPdeG leva moitos anos traballando a prol das familias que peor o pasan”

Ourense, 20 de xuño, 2016.- O presidente do PPdeG, Alberto Núñez Feijóo, afirmou hoxe que, mentres algúns buscan sacar rédito político da pobreza e cren que acaban de inventar a loita contra a exclusión, o PPdeG leva moito tempo loitando contra ela e axuda ás familias que o pasan mal.
 
Así se expresaba o líder dos populares galegos no acto sectorial con entidades sociais advertiu que Galicia pide cooperación pero esixe tamén que ninguén pretenda monopolizar a loita contra a pobreza para obter réditos políticos. celebrado esta mañá en Ourense, onde asegurou que Galicia ten un obxectivo claro: lograr que toda a poboación se beneficie da recuperación económica. Algo que, como sinalou, conseguirase a través da implicación das empresas, das Administracións locais, e das entidades sociais, nun movemento a prol da inclusión social coordinado e encabezado pola Xunta. 
 
Nesta liña, Feijóo advertiu que Galicia pide cooperación pero esixe tamén que ninguén pretenda monopolizar a loita contra a pobreza para obter réditos políticos. 
 
O PAPEL DO GOBERNO GALEGO 
Segundo o líder do PPdeG, a Xunta asumiu desde o principio as súas responsabilidades neste eido e materializou o seu apoio a través de actuacións como a Axenda Social Única, á que se adheriron a Fegamp e a Rede Galega de Loita contra a Pobreza e a Exclusión Social. 
 
Como engadiu, este documento demostra que os empresarios, os activistas es os políticos galegos saben aparcar as diferenzas para traballar xuntos cando hai tanto en xogo. “E para min, nada é tan importante, nada é tan prioritario, como lograr que ningunha familia galega o pase mal por motivos económicos”, subliñou.
 
Por este motivo, sinalou que o Goberno dos populares galegos, malia contar nos últimos anos cunhas contas máis reducidas, destinou ao eido da inclusión social un 50% máis do que investía o Goberno bipartito: “Soubemos entender que é nos tempos complicados cando resulta máis importante axudar a quen está en situación de risco”, aseverou.
 
Do mesmo xeito, a Xunta destina a axudas a concellos e entidades 11,1 millóns de euros para promover a inclusión social, máis do dobre do que se destinaba en 2009; destina ás Axudas de Inclusión Social 4,5 millóns de euros, un 55% máis que hai sete anos; e destina á Renda de Inclusión Social de Galicia (Risga) 53 millóns de euros, fronte aos 22 millóns que se dedicaran a este fin en 2009. “Con estes fondos, garantimos unha renda mínima para unhas 14.000 persoas que están en situación de exclusión social”, destacou o presidente do PPdeG.
 
No que atinxe ás Risgas, Feijóo quixo destacar tamén un dato que convida ao optimismo, posto que o número de novas solicitudes destas axudas reduciuse desde 2013 e, de feito, na actualidade hai un 15% menos de persoas que piden a Risga das que había no ano 2009.
 
Así mesmo, o líder dos populares galegos puxo en valor outras medidas adoptadas desde o Goberno que preside, como as destinadas a loitar contra a pobreza enerxética, por exemplo, o tícket eléctrico. Tamén subliñou as iniciativas que intentan evitar ou paliar os efectos dos desafiuzamentos, como o Programa de Vivendas Baleiras que, por desgraza, non contou co apoio de Podemos/Mareas na Coruña e Ferrol; os convenios coa Sareb e as entidades bancarias; os acordos cos bancos e co Consello Xeral do Poder Xudicial para suspender ou anular os desaloxos; ou o Bono de Alugueiro Social.
 
O PPdeG, A CARÓN DOS QUE MÁIS O PRECISAN
O presidente do PPdeG insistiu en que este partido sempre está a carón dos que máis o precisan e axuda ás familias, non para crear persoas dependentes das axudas públicas, senón para impulsalas ata lograr que sexan autosuficientes. 
 
“A porta cara a inclusión social é a autosuficiencia económica e a porta cara a suficiencia autonómica non é outra que a creación de emprego”, asegurou, engadindo que Galicia, ademais de axudar ás familias con baixos ingresos, leva 31 meses consecutivos creando emprego. “A mellor política social é a que facilita o crecemento das empresas e busca crear postos de traballo”, subliñou.
 
Con respecto a isto, Feijóo fixo fincapé en que cada vez máis xente “esta sorrindo”, pero non debido a aqueles que queren sacar votos das bágoas e monopolizar os sorrisos, senón grazas aos que loitan contra a exclusión social, como é o caso das entidades sociais e das Administracións públicas.
 
[iframe width=”600″ height=”350″ src=”https://www.youtube.com/embed/KX844iRlePY” frameborder=”0″ allowfullscreen ]

Puy salienta o “notable contido lexislativo” do vindeiro pleno no Parlamento


PUY SALIENTA O “NOTABLE CONTIDO LEXISLATIVO” DO VINDEIRO PLENO CO DEBATE PARA APROBACIÓN DA REFORMA DA LEI DE SERVIZOS SOCIAIS, A DE POLICÍAS LOCAIS E A DE DEVOLUCIÓN AOS FUNCIONARIOS DE PARTE DA EXTRA DE 2013

·    A Lei de coordinación de policías locais atenderá cuestións demandadas polos representantes do sector, como a eliminación do tope de idade de 36 anos para acceder ao corpo ou a mellora dos procesos de cobertura de mandos

·    A sesión plenaria tamén aprobará restituír a partir do 1 de xaneiro a totalidade do complemento específico das pagas extra que se tivo que suprimir aos funcionarios por mor da crise e para garantir os servizos do Estado de Benestar

Santiago, 20 de xuño de 2016.- O portavoz do Grupo Popular,  Pedro Puy, subliñou hoxe o “notable contido lexislativo” que terá o Pleno da vindeira semana, na que se procederá ao debate para a súa aprobación de tres textos legais: a modificación da Lei de Servizos Sociais, o proxecto de Lei de coordinación das policías locais e a norma a través da que se abona este ano aos empregados públicos a parte devindicada da extra de 2013.

Á espera da reunión da Xunta de Portavoces de mañá, na que se pechará a orde do día da sesión plenaria que se celebrará a vindeira semana, Pedro Puy avanzou que está previsto o debate para a súa aprobación da proposición de lei do Grupo Popular para a modificación da Lei de Servizos Sociais.

Neste sentido, Puy salientou o consenso que o Grupo Popular buscou na tramitación desta proposición de lei, xa que “non rexeitamos ningunha das emendas presentadas por PSOE, BNG ou AGE, polo que confiamos no seu apoio a esta modificación da Lei de Servizos Sociais”.

Entre as medidas incorporadas neste novo texto lexislativo, o portavoz popular explicou que “se introduce o concerto social como novo modelo de xestión en materia de servizos sociais, ao tempo que se reforza o papel das entidades de iniciativa social”. “Así mesmo, dáse prioridade ás entidades sociais sen ánimo de lucro, aplicando medidas de preferencia e discriminación positiva, así como criterios sociais de calidade, experiencia e traxectoria acreditada esenciais ás persoas usuarias”, apuntou.

COORDINACIÓN POLICÍAS LOCAIS

O segundo texto lexislativo previsto para o seu debate e aprobación na sesión plenaria será o proxecto de Lei de coordinación das policías locais de Galicia, que vai permitir “unha maior eficacia en determinados aspectos operativos e de organización dos corpos de policía local, favorecendo tanto aos propios concellos como ao persoal que se integra nestes corpos”.

A través deste texto lexislativo, se establecen cuestións que eran demandadas polos propios representantes do sector, como a eliminación do tope de idade dos 36 anos para acceder ao corpo de policía local galego; ou a mellora dos procesos de cobertura de prazas de mandos, facilitando a promoción interna.

Por último, na sesión plenaria tamén está previsto o debate para a súa aprobación, polo trámite de lectura única e urxencia, do proxecto de lei que permitirá abonar este ano aos empregados públicos a parte devindicada da extra de 2013.

“Este texto lexislativo é froito do acordo acadado entre a Xunta e as organizacións sindicais CSIF, CC.OO. e UXT e, ademais da recuperación desa parte da paga extra, incorpora a restitución a partir do vindeiro 1 de xaneiro da totalidade do complemento específico das pagas extra que se tivo que suprimir por mor da crise e para garantir os servizos do Estado do Benestar”, sinalou Puy.

Feijóo non cre democrático pedir que marche o candidato escollido por sete millóns

Indica que o PP é o partido máis unido de España e que Rivera non logrará dividilos coa súa estratexia

Feijóo asegura que non é democrático pedir que se marche o candidato ao que escolleron sete millóns e medio de españois

· Di que as explicacións de Ciudadanos sobre o acontecido con María Rey son insuficientes e apunta que a candidata abusou dos discapacitados co seu comportamento

Vigo, 17 de xuño de 2016.- O presidente do PPdeG; Alberto Núñez Feijóo, asegurou que o PP é o partido máis unido de España e que os populares teñen claro que o seu  candidato é Mariano Rajoy, o mesmo que os españois escolleron fai seis meses con sete millóns e medio de votos.

Así se expresaba o dirixente durante un paseo esta mañá por Vigo acompañado pola portavoz do PP local, Elena Muñoz, polo coordinador de mocidade e participación do PPdeG, Javier Dorado, e polos candidatos ás Cortes pola provincia de Pontevedra, Irene Garrido e Miguel Fidalgo.

Feijóo cualificou de “non democrática” a petición de Albert Rivera, que insiste en que para apoiar ao partido máis votado, ten que irse o candidato. Así, recoñeceu que, se o líder de Ciudadanos tivese a cantidade de apoios que obtivo Rajoy, “nin se me ocorrería dicir que para apoiar ao que gaña ten que irse Rivera. Isto é o contrario da democracia”.

“É unha estratexia de divide e vencerás”, apuntou o dirixente, que recoñecía que malia que as hai distintas en campaña electoral, “a de intentar dividir o que está unido é moi antiga”. Do mesmo xeito, mantivo que, neste caso, Rivera non vai lograr nin dividir nin tampouco vencer.

 

EXPLICACIÓNS INSUFICIENTES

“A min custaríame darlle a confianza a unha persoa que demostrou que usou unha praza de discapacitados falseando un documento en beneficio propio”. Así se pronunciaba o presidente acerca da polémica protagonizada pola cabeza de lista de Ciudadanos ao Congreso pola provincia de Pontevedra, María Rey.

Feijóo amosouse seguro de que os cidadáns están valorando cómo é posible que a persoa  que di querer representar os intereses dos pontevedreses poida falsificar un documento para ter uns privilexios que só corresponden aos que verdadeiramente o precisan. “Isto non é moi compatible con intentar pedir a confianza da xente”, precisou.

Ademais, o dirixente afirmou que se trata dun tema o suficientemente serio como para que, se ela non vai tomar ningunha decisión, a dirección dese partido si valore o acontecido. Nesta liña, engadiu que as explicacións de Ciudadanos son “bastante insuficientes”, xa que se  limitan a dicir que o sucedido non ten importancia porque ocorreu antes de que Rey fose nas listas ao Congreso pero que, de darse posteriormente, si a inhabilitarían como cabeza de lista.

Así mesmo, o presidente insistiu en que a candidata abusou dos discapacitados, pois mentres di que hai que ter sensibilidade con eles e visita entidades de discapacidade, ela mesma admite que lles quitou unha praza de aparcadoiro reservada.

[iframe width=”600″ height=”350″ src=”https://www.youtube.com/embed/VCh64TpXEx0″ frameborder=”0″ allowfullscreen ]

O ditame modificación da Lei de Servizos Sociais inclúe o 83% das emendas oposición

O novo texto lexislativo, que introduce o concerto social, queda pendente da súa aprobación definitiva en sesión plenaria


APROBADO O DITAME DA MODIFICACIÓN DA LEI DE SERVIZOS SOCIAIS DE GALICIA, IMPULSADA POLO GRUPO POPULAR E QUE INCORPORA O 83% DAS EMENDAS DO PSOE, BNG E AGE

Santiago, 17 de xuño de 2016.- A Comisión 5ª do Parlamento aprobou hoxe o ditame da proposición de Lei que modifica a Lei de Servizos Sociais de Galicia, impulsada polo Grupo Popular e na que se incorporaron o 83 por cento das emendas presentadas polos grupos do PSOE, BNG e AGE. O novo texto lexislativo, que introduce o concerto social como novo modelo de xestión dos servizos sociais, queda agora pendente da súa aprobación definitiva en sesión plenaria.

 

A portavoz de Asuntos Sociais do Grupo Popular, Marta Rodríguez, concretou que esta reforma puntual da Lei de Servizos Sociais, ademais de introducir o concerto social, reforza o papel das entidades de iniciativa social e garante dereitos esenciais ás persoas usuarias.

DOCUMENTO ABERTO

“Foi un documento aberto que intentamos consensuar coas entidades sociais e os grupos da oposición”, manifestou Rodríguez Arias, e mostra disto é que “o Grupo Popular non se rexeitou ningunha emenda nin do PSOE, nin do BNG, nin de AGE durante os traballos da ponencia, xa que todas elas ou foron aceptadas ou fíxose unha proposta de transacción”. Porén, lamentou que, a pesar destes acordos, os grupos da oposición non apoiaran esta proposición de lei e se abstiveran na votación do ditame.

A actual Lei de Servizos Sociais establece dúas fórmulas para prestar servizos sociais: a xestión directa e a xestión indirecta a través das distintas modalidades de contratación establecidas na normativa reguladora dos contratos do sector público. “Con esta proposición de lei se superan as limitacións da normativa actual e se regula o concerto social como novo modelo de xestión”, apuntou a portavoz popular.

SEGUINDO AS DIRECTRICES EUROPEAS

Marta Rodríguez explicou que o réxime de concerto social “é unha nova alternativa para a xestión dos servizos sociais seguindo as directrices europeas, diferenciada do concerto xeral regulado na normativa de contratación do sector público”.

“Para o establecemento do concerto social, as administracións públicas darán prioridade ás entidades sociais sen ánimo de lucro, aplicando medidas de preferencia e discriminación positiva, así como criterios sociais de calidade, experiencia e traxectoria acreditada”, sinalou.

Ademais, a modificación da Lei de servizos sociais recoñece por primeira vez unha serie de dereitos ás persoas usuarias no establecemento dos concertos sociais, atendendo os principios de dereito á libre elección; dereito ao arraigo da persoa á súa contorna social e continuidade da atención; e dereito á atención personalizada e integral.

Feijóo pide o voto para Rajoy porque ten a Galicia no seu corazón e nos orzamentos

Apunta que non é tolerable unha indefinición calculada que poida volver bloquear ao país durante os próximos anos
 
Feijóo pide o voto para Rajoy porque ten permanentemente a Galicia no seu corazón e nos orzamentos 
 
• Afirma que Iglesias quere controlalo todo e que en Sánchez e Rivera destaca a ambigüidade, sen certeza ningunha do que poden chegar a facer
 
Pontevedra, 16 de xuño de 2016.- O presidente do PPdeG, Alberto Núñez Feijóo, afirmou que Mariano Rajoy ten a Galicia permanentemente no seu corazón, nos orzamentos e no Boletín Oficial do Estado. Por este motivo, pediu o voto para que o candidato do PP á presidencia do Goberno continúe ese compromiso coa nosa terra.
 
Así se expresaba nun mitin celebrado hoxe en Pontevedra e no que estivo acompañado da candidata ao Congreso, Ana Pastor, do presidente provincial, Alfonso Rueda, e do candidato popular á Moncloa, Mariano Rajoy.  
 
Segundo Feijóo, Rajoy demostrou o seu compromiso porque fala do que importa aos galegos, que é o emprego, poder chegar a fin de mes, que o presidente non deixe débedas, garantir as pensións e que se baixen os impostos. “Aos galegos nos importa Galicia e, en consecuencia, nos importa España”, engadiu. 
 
Así mesmo, salientou que tamén demostrou con feitos a importancia de que este país teña un goberno e recordou que, durante o seu mandato,  España evitou o rescate e converteuse no primeiro país en crecemento económico e de emprego da Unión Europea. 
 
 
INDECISIÓN POLA INDEFINICIÓN
Durante a súa intervención, o presidente do PPdeG tamén falou do elevado nivel de indecisión dos votantes, algo que considera comprensible polo alto nivel de indefinición por parte dalgúns dos candidatos a estas eleccións.
 
Nese senso, indicou que Rajoy si é claro e sempre mantivo o que dixo. Do mesmo xeito, recoñeceu que o candidato do PP só gobernará se gaña as eleccións.
Pola súa parte, lembrou que Pablo Iglesias quere controlalo todo e, no que respecta aos demais, destaca a indefinición e a ambigüidade. “Non hai certeza ningunha do que poden chegar a facer”, asegurou referíndose a que Sánchez é fiel a súa ausencia de criterio, e a que Rivera fixo o contrario do que dixo pois, logo de dicir que deixaría gobernar á lista máis votada, pactou con quen perdeu as eleccións.
 
“Non é tolerable nin admisible unha indefinición calculada”, admitiu Feijóo advertindo que non se pode permitir volver bloquear o goberno do país durante os próximos anos. 
 
“Eu non quero a parálise de Galicia. Preferimos a política estable de Galicia que a inestabilidade política do PSOE, das Mareas de Podemos e de Ciudadanos”, apuntou mentres indicaba que durante estes meses de bloqueo en España, na nosa comunidade continuáronse facendo cousas.
 
Como mostra disto, lembrou que se logrou eliminar o imposto de Sucesións, puxéronse impostos cero no rural, apoiouse ás familias e aos máis novos; conseguíronse máis vehículos para a factoría PSA en Vigo e máis contratos para os estaleiros galegos; ademais de dar inicio á fabricación de avións non tripulados en Rozas, Lugo. Por isto, mantivo que os populares non queren que os políticos que bloquearon España fagan o mesmo en Galicia.
 
Por outra banda, Feijóo tamén recoñeceu que, se Pablo Iglesias fora o candidato popular, diríalle que debería aprender da humildade dos galegos, así como se o fose Pedro Sánchez debería aprender da nosa responsabilidade. No tocante a Albert Rivera precisou que, de ser el o candidato do PP, non diría lle nada, posto que o líder de Ciudadanos non quere que fale ninguén que non sexa el.
 
Pola contra, o presidente si valorou a humildade e responsabilidade de Mariano Rajoy, un pontevedrés que cumpriu co seu deber durante os catro anos do seu mandato e que é unha garantía para España e para Galicia. 
 
[iframe width=”600″ height=”350″ src=”https://www.youtube.com/embed/O-pTpHogMEc” frameborder=”0″ allowfullscreen ]

Feijóo: “De ir tanto contra o PP fóiselles a man e o que están é en contra de España”

O presidente do PPdeG, Alberto Núñez Feijóo, asegurou que só hai un voto co que volveu a creación do emprego a España e ao naval galego: o voto ao PP.
 
Segundo admitiu o dirixente popular, non hai goberno alternativo ao PP e, por iso, cando o resto de partidos perden, bloquean, non propoñen e van á contra. “O seu voto é contraproducente”, engadiu.
 
Durante un mitin celebrado en Ferrol e no que estivo acompañado polo presidente local, José Manuel Rey, polo candidato ao Congreso, Juan Juncal, e polo presidente provincial, Diego Calvo; Feijóo insistiu en que votar a Ciudadanos non ten sentido e é contraproducente ata para os votantes deste partido, xa que pode acabar transformándose nun voto ás Mareas de Podemos. “O voto a Ciudadanos non suma, o voto a Ciudadanos resta”, engadiu.
 
Así mesmo, fixo fincapé en que “o máis contraproducente para Galicia é o voto a Podemos”. Segundo indicou, eles din ser “os da xente” pero o primeiro que fan no Congreso é pedir un referendum en Galicia, para que nos dividamos entre nós e teñamos que escoller entre ser ou galegos ou españois. 
 
Do mesmo xeito, recordou tamén que din querer un estatus diferente para Cataluña e o País Vasco, algo que, segundo asegurou Feijóo, non pagaremos os galegos, “xa que nós non pagaremos os privilexios doutras comunidades autónomas”.
 
Ademais, o líder do PPdeG puxo en valor o esforzo que custou suprimir en Galicia o imposto de Sucesións, un tributo que Podemos quere restaurar pero que o presidente asegurou que o PP non vai permitir.
 
Se isto fose pouco,  lembrou que Podemos tamén se amosa en contra do naval, contra Reganosa, contra a factoría PSA, contra o aeródromo de Rozas e mesmo contra o AVE, que consideran “dos ricos”. “De ir tanto en contra do PP e de ir tanto en contra Feijóo, fóiselles a man e o que están é en contra de España”, precisou.
 
Por todos estes motivos, o dirixente pediu o voto para que si haxa un goberno útil que sirva ao españois ante os que empregaron o voto da cidadanía en que non servira para nada. 
 
“Fronte a un partido reformista está o inmobilismo”, indicou Feijóo incidindo en que a irresponsabilidade trae consigo unhas novas eleccións, mentres a responsabilidade, como a que demostrou ter o PP, sempre da resultados.
 
“Hoxe estamos mellor que cando chegamos ao Goberno en 2012 e en 2009”, incidiu Feijóo mentres salientaba que, durante o parón en España, Galicia seguiu funcionando. 
 
Ademais, tamén fixo fincapé en que o que non pode ocorrer é que o presidente do país sexa o perdedor das eleccións e que o xefe da oposición sexa o vencedor dos comicios. Así, apuntou que España xa perdeu seis meses e, por este motivo, pediu non dispersar o voto para lograr gañar con contundencia e poder ter un goberno. 
 
[iframe width=”600″ height=”350″ src=”https://www.youtube.com/embed/Zup3LAEEFQ8″ frameborder=”0″ allowfullscreen ]

Feijóo di que a estabilidade garante emprego e a alternativa desgoberno

Apunta que non é posible parecer alternativa de Goberno en dúas horas cando non foron capaces de sela en seis meses
 
Feijóo di que o debate foi a constatación televisada de que a estabilidade garante emprego e de que a alternativa é desgoberno
 
• Indica que Sánchez, Rivera e Iglesias “non suman un goberno”, e engade que con Rajoy si vimos experiencia, resultados, humildade e o balance dos catros últimos anos
 
• “A única opción é votar a un goberno seguro, moderado e que só pensa nos intereses xerais”, afirma indicando que a alternativa ao PP é o populismo
 
Carballiño, 14 de xuño de 2016-. O presidente do PPdeG, Alberto Núñez Feijóo, valorou hoxe o debate mantido onte polo candidato do PP, Mariano Rajoy, cos aspirantes de resto de partidos que concorren a estas eleccións. 
 
O dirixente popular destacou nun mitin celebrado en O Carballiño e no que estivo acompañado do candidato ao Congreso pola provincia de Ourense, Miguel Ángel Viso, e polo presidente provincial, Manuel Baltar; que o debate foi a constatación televisada de que a estabilidade garante emprego e de que a alternativa é o desgoberno e a obstrución. Ademais, dixo que non é posible parecer alternativa de Goberno en dúas horas cando non foron capaces de sela nos seis meses transcorridos entre as eleccións de decembro e a convocatoria destes comicios de xuño.
 
Pola contra, Feijóo destacou que o que si se constatou tamén foi a posibilidade de constituír un goberno cun presidente que é Mariano Rajoy. “Había un presidente e tres candidatos que nunha gobernaron en ningún sitio, nin nun concello e sen experiencia”, engadía admitindo que “a suma dos tres non da un goberno senón que é unha liorta entre eles e un desgoberno evidente”.
Nesa liña, tamén destacou que pese a que “estaban no seu momento culmen porque son especialistas en tertulias televisivas” resultoulles mal porque fronte tiveron a Rajoy, que si acreditou ter un proxecto para España.
 
“Os tres candidatos non suman un goberno”, engadía o presidente facendo referencia a Pedro Sánchez, Albert Rivera e Pablo Iglesias, mentres apuntaba que co candidato do Partido Popular si vimos a experiencia, os resultados, a humildade, os datos e o balance dos catros últimos anos. “Mentres, o resto só se dedicaban a rirse e insultarse amosando a súa pouca educación”, dixo. 
 
“Din que teñen solucións para todo aínda que nunca solucionaron nada”, reflexionou Feijóo lembrando como exemplo que en Galicia levamos un ano de gobernos das Mareas e comprobamos xa a súa inoperancia, a súa vagancia e a súa falta de proxecto. 
 
Tal e como indicou, “os políticos que están en prácticas non poden conducir o Goberno de España”. Así, insistiu en que é imposible ver neles un goberno responsable.
 
O presidente do PPdeG tamén asegurou que comprende a decepción e que hai xente que non entende para qué se votou en decembro. Así mesmo, advertiu que o voto que empeza no PSOE pode acabar en Podemos pola vía do pacto ao igual que o que comeza en Ciudadanos pode acabar en Podemos polo sistema de reparto de escanos.
 
 “A única opción é votar a un goberno seguro, moderado e que só pensa nos intereses xerais”, afirmaba indicando que “a alternativa a Rajoy é o populismo”. 
 
Para concluír, Feijóo aseverou que só o voto ao PP acaba no crecemento económico, na sanidade e na educación públicas, nas infraestruturas, nas pensións, no tren de alta velocidade e, en definitiva, en todas as cousas que lle interesan á xente.
 
[iframe width=”600″ height=”350″ src=”https://www.youtube.com/embed/lbOrRCyakyQ” frameborder=”0″ allowfullscreen ]