Categoría: PP de Galicia

Imaxes do comité de dirección do PPdeG

A iniciativa pretendía ampliar aos concellos de A Coruña, Ferrol, Santiago, Lugo, Vigo e Ourense o acordado pola Xunta para o transporte metropolitano interurbano

·    O portavoz de Infraestruturas,Jesús Goldar lembrou que despois das mocións presentadas polo PP en cada concello, “somos o único partido que está claramente a favor desta medida social”

Santiago, 29 de xuño de 2016.- O Parlamento de Galicia aprobou hoxe, co único voto favorable do Grupo Popular, solicitar aos concellos de A Coruña, Lugo, Santiago, Vigo e Ourense que adopten cantas medidas sexan necesarias para estender a gratuidade do transporte urbano aos menores de 18 anos, do mesmo xeito que o acordado pola Xunta para o transporte metropolitano interurbano. O portavoz de Infraestruturas, Jesús Goldar, criticou a negativa dos grupos da oposición a apoiar esta iniciativa, que “ten como obxectivos garantir un mellor futuro da mocidade galega, promover o uso do transporte público, axudar á economía das familias con menores e educar aos nenos no uso do transporte público”.

Goldar lembrou que a Xunta de Galicia aprobou o pasado 12 de maio a posta en marcha dunha nova medida de marcado carácter social que consistirá na implementación da gratuidade do transporte metropolitano interurbano para os menores de 18 anos. Esta iniciativa suporá un investimento anual de dous millóns de euros e beneficiará a arredor de 250.000 mozos.

“A medida terá especial relevancia para os mozos de ensino secundario non obrigatorio, de xeito que a gratuidade nos desprazamentos aos centros educativos se estenderá ata os 18 anos; ao tempo que ten unha clara compoñente educativa, ao fomentar unha mobilidade máis sustentable entre os máis novos, concienciándoos das vantaxes que supón o uso do transporte público fronte ao vehículo particular”, apuntou.

EXTENSIÓN AO TRANSPORTE URBANO

Diante desta situación, o portavoz popular sinalou que “a aplicación desta importante medida debe complementarse coa súa extensión ao ámbito do transporte urbano” nos concellos que dispoñen deste servizo: A Coruña, Ferrol, Santiago, Lugo, Vigo e Ourense.

Porén, e logo do debate de mocións promovidas polo PP en todos estes concellos, Goldar salientou que “somos o único partido que está claramente a favor desta medida social, xa que os demais abstéñense ou votan en contra en función de para onde vire o vento dos gobernos de turno”.

O portavoz popular lamentou que tanto PSOE, como BNG e AGE “deixaran pasar esta posibilidade de emendar eses graves erros dos seus compañeiros nesas cidades, facendo seguidismo dos seus grupos municipais e deixando ben claro a quen defende cada quen”. 

O PARLAMENTO APROBA POR UNANIMIDADE A PRIMEIRA PROPOSICIÓN NON DE LEI DE INICIATIVA POPULAR, QUE SOLICITA UN TIPO SUPERREDUCIDO DO IVE PARA OS CUEIROS DOS NENOS

·    A Lei de iniciativa lexislativa popular e participación popular aprobada o pasado mes de agosto facilita que os galegos poidan presentar preguntas ou proposicións non de lei no Parlamento galego

Santiago, 29 de xuño de 2016.- O Parlamento galego aprobou hoxe por unanimidade a primeira proposición non de lei de iniciativa popular, rexistrada pola Asociación galega de familias numerosas (Agafan) e asumida polo Grupo Popular, a través da que se demanda ao Goberno central a redución do tipo impositivo de IVE dos cueiros dos nenos, pasando do 21 por cento actual ao superreducido do 4 por cento como produto de primeira necesidade.

A portavoz de Asuntos Sociais do Grupo Popular, Marta Rodríguez, lembrou que se trata da primeira proposición non de lei de iniciativa popular que se debate e aproba nun Parlamento español. Esta situación é posible logo da aprobación o pasado mes de agosto no Parlamento galego da Lei de iniciativa lexislativa popular e participación cidadá, que permitiu ampliar os mecanismos de participación directa dos cidadáns no Parlamento, facilitando que os galegos se impliquen activamente na actividade parlamentaria presentando iniciativas de control e impulso ao Goberno galego.

Acolléndose a esta posibilidade, Agafan rexistrou no Parlamento galego esta primeira proposición non de lei de iniciativa popular, que “o Grupo Popular asumimos e compartimos porque é coherente coa política de apoio ás familias galegas que xa leva adiante a Xunta de Galicia”.

MEDIDAS DE APOIO Á FAMILIA

Neste sentido, Marta Rodríguez lembrou que a Lei de apoio á familia e a convivencia de Galicia, aprobada no mes de xuño de 2011, establece o deber dos poderes públicos de recoñecer e amparar á familia en todas as súas manifestacións e formas de organización, dándolle un especial apoio e protección.

“Así mesmo, en abril de 2013 aprobouse o Plan de dinamización demográfica de Galicia, que contempla medidas como a mellora dos beneficios fiscais, os servizos de axuda no fogar para a infancia e axudas tanto para o acceso á vivenda como para o transporte público”, indicou a portavoz popular.

Rodríguez Arias referiuse tamén ao borrador do Plan galego de política familiar, presentado en febreiro de 2015 e que conta con 177 medidas que complementan as recollidas no Plan de dinamización demográfica de Galicia. “Unha destas iniciativas é solicitar unha tarifa reducida do IVE para produtos de primeira necesidade e atención a menores de seis anos, incluíndo neste grupo os cueiros dos nenos”, sinalou.

A portavoz de Servizos Sociais salientou o incremento de recursos para apoiar ás familias e á infancia disposto polo actual Goberno galego, que no 2016 se incrementaron nun 40 por cento. En concreto, fixo referencia ao bono conciliación para as familias que non teñan praza nunha escola infantil da Xunta; o bono Coidado no rural para aqueles casos onde non existe escola infantil á que levar aos seus fillos; a tarxeta Benvida de axuda directa de 100 euros mensuais por nacemento de fillos durante o primeiro ano; o incremento de deducións por nacemento ou adopción de fillos de 300 a 360 euros; ou duplicando o límite da dedución por coidado de fillos menores de 200 a 400 euros.

A norma tamén garante dereitos esenciais ás persoas usuarias, como a libre elección, o arraigo á contorna social e á continuidade de atención, e a atención personalizada e integral

O PARLAMENTO APROBA A REFORMA DA LEI DE SERVIZOS SOCIAIS, QUE INTRODUCE O CONCERTO SOCIAL E REFORZA O PAPEL DAS ENTIDADES DE INICIATIVA SOCIAL

Santiago, 28 de xuño de 2016.- O Parlamento de Galicia aprobou hoxe a reforma da Lei de servizos sociais, que introduce o concerto social como novo modelo de xestión, reforza o papel das entidades de iniciativa social e garante dereitos esenciais ás persoas usuarias. A portavoz de Asuntos Sociais, Marta Rodríguez Arias, subliñou que o Grupo Popular “non rexeitou ningunha das emendas presentadas polo PSOE, BNG e AGE, xa que todas foron aceptadas ou foi presentada unha proposta de transacción, chegando a un acordo sobre o 83 por cento das emendas”.

Rodríguez Arias lembrou que esta lei xurdiu “dun proceso de diálogo coas entidades sociais para acadar un marco consensuado con todas as garantías”, ao que seguiu “o proceso de diálogo entre todos os grupos parlamentarios sobre un documento aberto, no que nos volcamos para consensuar un documento conxunto que tivera o máximo apoio posible”.

SUPERA AS LIMITACIÓNS ACTUAIS

“Con esta modificación, se superan as limitacións da normativa actual, que establece dúas fórmulas de xestionar os servizos sociais: a xestión directa ou a indirecta a través das diversas modalidades de contratación establecidas na normativa reguladora dos contratos do sector público”, explicou a portavoz popular.

Deste xeito, apuntou que esta reforma da Lei de servizos sociais regula o concerto social como novo modelo de xestión, axustándose ao recollido nas directrices europeas e diferenciado do concerto xeral regulado na normativa de contratación do sector público.

PRIORIDADE A ENTIDADES SOCIAIS

Para o establecemento dos concertos, as administracións públicas darán prioridade ás entidades sociais sen ánimo de lucro, aplicando medidas de preferencia, medidas de discriminación positiva, criterios sociais de calidade e garantindo sempre a libre concorrencia e os principios de igualdade de trato, de non discriminación e de transparencia.

Marta Rodriguez salientou, ademais, que “se recoñece por primeira vez unha serie de dereitos ás persoas usuarias, como o dereito á libre elección, o dereito ao arraigo da persoa á súa contorna social e á continuidade da atención; e o dereito á atención personalizada e integral”.

O PARLAMENTO APROBA A DEVOLUCIÓN AOS EMPREGADOS PÚBLICOS DA PARTE DEVINDICADA DA PAGA EXTRA DE 2013

·    O portavoz popular afirmou que PSOE, BNG, AGE e Grupo Mixto “se equivocan por facerlle oposición a Galicia, aos representantes dos traballadores e aos empregados públicos do noso país”

·    Tellado lembrou que durante a crise o Goberno galego tivo que “facer axustes que non foron do gusto de ninguén, pero dixemos que aqueles axustes eran temporais e que, en canto a situación económica mellorase, serían revertidos”

Santiago, 28 de xuño de 2016.- O Parlamento de Galicia aprobou esta tarde a Lei a través da que os empregados públicos galegos recuperarán a parte devindicada da paga extra do ano 2013, así como a recuperación da totalidade do complemento específico nas pagas extras a partir do vindeiro mes de xaneiro. O portavoz de Administracións Públicas do Grupo Popular, Miguel Tellado, acusou á oposición de “vivir instalada no pataleo e no bloqueo permanente” por non apoiar esta iniciativa lexislativa, acordada cos sindicatos UXT, CC.OO. e Cesif.

Miguel Tellado defendeu a tramitación polo procedemento de lectura única deste proxecto de lei porque “ten como único obxecto o abono da parte do complemento específico da paga extra devindicada nos meses de xaneiro e febreiro de 2013; ten un artigo único, con sete apartados; e vén derivado dun acordo asinado entre a Xunta e tres das catro centrais sindicais representadas na Mesa Xeral de Negociación dos empregados públicos”.

“A cidadanía non valora o bloqueo, a ausencia do diálogo ou o desprezo ao rival político, senón que castiga a soberbia ou a prepotencia”, sinalou Tellado respecto da negativa de PSOE, BNG, AGE e Grupo Mixto a apoiar este proxecto de lei. Neste sentido, asegurou que “practican a política de canto peor, mellor”.

Por este motivo, o portavoz popular sinalou que “se equivocan por facerlle oposición a Galicia, aos representantes dos traballadores e aos empregados públicos do noso país”.

AXUSTES REVERTIDOS

Tellado lembrou que durante a crise o Goberno galego tivo que “facer axustes que non foron do gusto de ninguén, pero dixemos que aqueles axustes eran temporais e que, en canto a situación económica mellorase, serían revertidos”. Así, apuntou que en abril do pasado ano aprobouse no Parlamento galego a Lei de Emprego Público, que comprometía un fondo para devolver a paga extra de 2012 e en setembro deste ano todos os empregados públicos terán recuperado a totalidade daquela paga.

Tamén en setembro do pasado ano o Goberno central devolveu aos seus empregados públicos os días de vacacións e os días de libre disposición que lle foran retirados, habilitando ás comunidades autónomas a facer o propio co seu persoal. “Un mes despois, a Xunta asinou un acordo con tres centrais sindicais para levalo a cabo canto antes”, sinalou.

O portavoz popular engadiu que “este mesmo mes, no mesmo acordo no que a Xunta se comprometeu a tramitar este proxecto de Lei, acordamos coas centrais sindicais que a partires de xaneiro do ano próximo, o persoal empregado público recuperará a totalidade do complemento específico nas pagas extra”. “Adiantámonos un ano ao previsto inicialmente”, salientou.

PP E GOBERNO CUMPREN

Miguel Tellado criticou que a oposición desprece todas as medidas adoptadas polo Goberno galego en beneficio dos empregados públicos. “Dálles igual que haxa 8.500 persoas beneficiándose do sistema de flexibilidade horaria, dálles igual que ampliáramos o permiso de maternidade; e dálles igual que instaurásemos un sistema de adaptación de xornada para aqueles empregados públicos que estean someténdose a tratamentos de radioterapia ou quimioterapia, porque seguirán dicindo que é un goberno que maltrata aos empregados públicos, pero eles, que se están beneficiando destas medidas, saben que non”, manifestou.

“Os empregados públicos, igual que a cidadanía galega en xeral, están a ver que o PP e Goberno cumpren co que dixeron, que están a amosar que o que se fixo tiña un sentido e que están a demostrar que os sacrificios foron temporais e necesarios para evitar a bancarrota e o rescate”, indicou Miguel Tellado.

O PARLAMENTO APROBA A MODIFICACIÓN DA LEI DE COORDINACIÓN DE POLICÍAS LOCAIS, QUE DESBLOQUEA OS PROCESOS PARA INCORPORAR NOVOS AXENTES NOS CONCELLOS

·    O deputado popular dixo que a partir de agora dous concellos limítrofes poderán asociarse para prestar servizos de policía local, sempre que non superen en conxunto os 40.000 habitantes

Santiago, 28 de xuño de 2016.- O Parlamento de Galicia aprobou hoxe a modificación da Lei de coordinación de policías locais, “unha lei necesaria, garantista e consensuada cos axentes afectados e os concellos, que desbloquea os procesos de introdución de novos axentes nos concellos”, manifestou o deputado do Grupo Popular, Jacobo Moreira.

Na súa intervención na sesión plenaria, Moreira concretou que o Goberno galego decidiu abordar a reforma da Lei de coordinación de policías locais do ano 2007 “para adaptala á normativa vixente e aos distintos pronunciamentos xudiciais” sobre a materia, como a eliminación do límite de idade para o acceso aos corpos da policía local.

SEGURIDADE XURÍDICA

Jacobo Moreira apuntou que coa nova lei “dótase de seguridade xurídica aos concellos para a convocatoria de procesos selectivos de novos axentes de policía local, evitando a parálise case absoluta de convocatoria de prazas existente na actualidade”.

“Trátase dunha reforma consensuada tanto coas administracións locais como cos profesionais, que xurdiu do traballo da Comisión de Coordinación de Policías Locais e conta ademais cos parabéns das forzas sindicais”, indicou o deputado popular.

Moreira afirmou que esta nova lei “responde ás principais demandas dos sector: da seguridade xurídica, elimina as discriminacións arbitrarias, flexibiliza os procesos selectivos, da maior mobilidade aos axentes e facilita a súa permanencia en activo”.

Entre as novidades que incorpora este novo texto lexislativo, Jacobo Moreira salientou que os concellos poidan asociarse para a adquisición ou disposición de equipamentos conxuntos, ao tempo que se vai permitir que dous ou máis concellos limítrofes se poidan asociar para prestar servizos de Policía Local, sempre que non superen en conxunto os 40.000 habitantes”. 

No Pleno de mañá tamén se procederá á aprobación da modificación da Lei de servizos sociais e da modificación da Lei de coordinación de policías locais

PEDRO PUY CRITICA QUE A OPOSICIÓN “QUEIRA RETRASAR SEN XUSTIFICACIÓN” A DEVOLUCIÓN AOS FUNCIONARIOS DA PARTE DA PAGA EXTRA DEVINDICADA EN 2013

Santiago, 27 de xuño de 2016.- O portavoz do Grupo Popular, Pedro Puy, criticou hoxe que os grupos da oposición “queiran retrasar, sen aparente xustificación”, a aprobación no Pleno de mañá do proxecto de lei para a devolución da parte da paga extra devindicada aos funcionarios en 2013, a pesar de que conta co apoio dos sindicatos UXT, CC.OO. e Cesif. Así mesmo, na sesión plenaria procederase ao debate para a aprobación da proposición de lei, promovida polo Grupo Popular, de modificación da Lei de servizos sociais e do proxecto de lei de coordinación das policías locais de Galicia.

Pedro Puy lembrou que o Pleno dará comezo coa elección de tres membros do Consello Social da Universidade de Vigo e outros catro membros do Consello Social da Universidade de Santiago.

TEXTOS LEXISLATIVOS

A continuación, procederase ao debate para aprobación de tres textos lexislativos. En primeiro lugar, abordarase o proxecto de lei que modifica a Lei de coordinación de policías locais de Galicia que, entre outras cuestións, permite unha maior eficacia en determinados aspectos operativos e de organización dos corpos de policía local, favorecendo tanto aos propios concellos como ao persoal que se integra nestes corpos.

En segundo lugar, debaterase para a súa aprobación o proxecto de Lei a través do que a Xunta procederá este ano ao abono  aos empregados públicos da parte devindicada da extra de 2013.

Puy explicou que este proxecto de lei chega ao Parlamento logo do acordo entre a Xunta e os sindicatos UXT, CC.OO. e Cesif, polo que amosouse “sorprendido porque todos os grupos da oposición estean en desacordo en que este texto lexislativo se aprobe nunha única sesión plenaria e habilite ao Goberno galego para proceder ao pago inmediatamente”. “Despois de reivindicar a devolución destas cantidades aos empregados públicos, parece que queren retrasar o procedemento sen aparente xustificación”, apuntou.

SEN REXEITAR EMENDAS DA OPOSICIÓN

En terceiro lugar, o Pleno procederá ao debate para a súa aprobación da proposición de lei, impulsada polo Grupo Popular, para modificar a Lei de servizos sociais e introducir o modelo de concerto social como modelo de xestión. Así, Puy indicou que “as entidades sociais sen ánimo de lucro van ter medidas de preferencia e discriminación positiva en relación cos concertos sociais que se asinen”.

O portavoz popular manifestou que se trata dunha proposición de lei que chega ao debate definitivo en Pleno “cunha ampla aceptación, logo de que no trámite parlamentario o Grupo Popular non rexeitara ningunha emenda da oposición, incorporando ao texto definitivo o 83 por cento das súas emendas”

Para rematar, Pedro Puy salientou que o Grupo Popular defenderá na sesión plenaria a primeira medida de impulso de carácter popular que se debate nun parlamento autonómico. Trátase da proposición non de lei rexistrada pola Asociación galega de familias numerosas (Agafan) que solicita a redución do IVE ao 4 por cento para os cueiros dos bebés. 

Ourense, 23 de xuño de 2016.- O presidente do PPdeG, Alberto Núñez Feijóo, sinalou que non hai por qué xogarse o voto xa que se pode depositar con garantías, con seguridade e con certezas se é para o candidato do Partido Popular, Mariano Rajoy.

Desta maneira se expresaba o líder dos populares galegos, que participou nun mitin esta tarde en Ourense onde estivo acompañado polos candidatos ás Cortes por Ourense, Miguel Ángel Viso e Miri Barreira, e polo presidente provincial, Manuel Baltar.

Durante a súa intervención, fixo fincapé en que non hai por qué xogarse o voto a ver qué pasa, sen ter claro se o noso partido terá escano ou se, pola contra, o noso apoio beneficiará ao contrario, como pasa con Ciudadanos en Galicia. Do mesmo xeito, o dirixente salientou que tampouco hai razóns para votar sen ter a seguridade do que vai facer despois a nosa opción, nin con quén o fará.

Nesta liña, sinalou que o voto non é unha lotería e que non podemos arriscarnos a que poida acabar na bancarrota ou en “volver a xogar”.  

CONTINUAR AVANZANDO
Durante a súa intervención, Feijóo asegurou que temos que superar o bloqueo para que España continúe avanzando.

Segundo precisou, aínda queda moito traballo por facer, pero si é unha realidade que, despois de catro anos de mandato do PP, o país volve ser de fiar, respectable e crea máis emprego que calquera outro de Europa.

Por este motivo, asegurou que temos que ter unha garantía de goberno que se chama responsabilidade e compromiso, ao tempo que chamaba a desconfiar de calquera candidato sen experiencia en política. “Agora nos enfrontamos a un conxunto de políticos que queren desfacer a política e que queren dividir España en bandos”, engadía.

O dirixente tamén salientou que debemos mobilizarnos a favor de Galicia e de España, da moderación, dun partido que non ten máis obxectivo que unir e solventar os problemas que ten o país.

A FAVOR DA MODERACIÓN
Segundo o presidente, hai moita xente que nestes seis meses non atopou o que buscaba en Ciudadanos, sen criterio, sen candidatos, sen programa e sen conseguir ningún escano. Por este motivo, invitounos a todos eles a volver votar aos populares posto que “este é o voso partido e os vosos votos si se van converter en escanos”.

De igual modo, dirixiuse aos socialistas que non queren diluírse ata desaparecer. “Os votos aos PP son votos para impedir que o PSOE se entregue a Podemos”, dixo Feijóo facendo referencia ao Partido Socialista constitucional, moderado e que quere levantar o pais.

O GRUPO POPULAR APOIA NO PARLAMENTO DEMANDAR AO GOBERNO CENTRAL QUE DIFICULTE E INCREMENTE OS OBSTÁCULOS LEGAIS DAS OPERACIÓNS ECONÓMICAS EN PARAÍSOS FISCAIS

·    Tamén se solicita que a Administración central intensifique a sinatura de convenios de dobre imposición e dos acordos de intercambio de información en materia tributaria ata a eliminación de territorios considerados paraísos fiscais

Santiago, 23 de xuño de 2016.- O Grupo Popular, a través do seu portavoz, Pedro Puy, condenou esta mañá no Parlamento a existencia de paraísos fiscais e apoiou a aprobación dunha proposición non de lei a través da que se insta ao Goberno central a dificultar e incrementar os obstáculos legais das operacións económicas con residentes nestes paraísos fiscais, así como a intensificar a sinatura de convenios de dobre imposición e dos acordos de intercambio de información en materia tributaria ata a eliminación de territorios considerados paraísos fiscais.

Pedro Puy sinalou que desde o Partido Popular “estamos plenamente de acordo na condena dos paraísos fiscais, que introducen distorsións na capacidade dos estados para facer políticas redistributivas”.

PLENAMENTE DEFINIDOS

Neste sentido, explicou que os paraísos fiscais “están plenamente definidos no ámbito internacional” e concretou que “é posible loitar contra eles a través da sinatura de convenios de doble imposición cos estados con réxime de tipo off-shore, de xeito que comuniquen á facenda española calquera movemento financeiro que se faga no seu territorio”.

Por este motivo, o Grupo Popular formulou unha emenda á proposición non de lei presentada por AGE, que resultou aprobada por unanimidade, a través da que se demanda ao Goberno central que intensifique a sinatura de convenios de dobre imposición e dos acordos de intercambio de información en materia tributaria necesarios ata a eliminación da lista de territorios considerados como paraísos fiscais.

Puy sinalou que na actualidade “xa existen organismos internacionais que están traballando na identificación e loita contra estes paraísos fiscais, do mesmo xeito que o Goberno español xa reformou a lexislación española, tanto no imposto de sociedades como no da renda das persoas físicas, para incorporar medidas neste sentido”.