Categoría: Parlamento de Galicia

O PPdeG instou hoxe ao Goberno central a impulsar, en consenso coas comunidades autónomas e coa comunidade educativa, un novo marco legal que substitúa a actual LOMLOE, co fin de avanzar cara a un sistema educativo estable.

O deputado do Grupo Parlamentario Popular, Julio García Comesaña, remarcou que é imprescindible “superar os problemas que o actual marco normativo está a xerar no alumnado, o profesorado e os centros”. Así, referiuse ás consecuencias do que cualificou como a “lei do tanto dá” sobre a cultura do esforzo, a calidade educativa e a igualdade de oportunidades. “Non dá igual aprender que non aprender, adquirir os coñecementos necesarios ou pasar de curso sen adquirilos”, afirmou.

Neste sentido, defendeu unha educación baseada nas competencias, pero advertiu de que “para saber facer, primeiro hai que saber, porque non hai competencia posible sen coñecemento”. Considerou necesario recuperar o equilibrio entre coñecementos e competencias e simplificar unha arquitectura curricular que, na súa opinión, incrementou a carga burocrática do profesorado.

Tamén apostou por mellorar os mecanismos de avaliación e detección temperá das dificultades de aprendizaxe. “O obxectivo non debe ser que máis alumnos repitan, senón que menos alumnos necesiten repetir”, insistiu, defendendo que a resposta debe chegar antes e con máis apoios para quen o precise.

Asemade, incidiu en que igualdade de oportunidades non significa baixar a esixencia, senón proporcionar máis recursos ao alumnado que parte dunha situación máis desfavorable, porque “a esixencia e a equidade non son conceptos opostos”.

GALICIA LEVA CINCO ANOS TRABALLANDO
O popular destacou que, fronte á situación estatal, Galicia leva estes cinco anos desenvolvendo medidas para mellorar o sistema educativo e reducir o impacto das dificultades detectadas. Neste ámbito, puxo en valor o Acordo de Mellora do Sistema Educativo acadado cos sindicatos, as medidas para reducir progresivamente as ratios máximas por aulas, a mellora dos agrupamentos no rural e o reforzo da atención ao alumnado con necesidades educativas especiais.

Tamén salientou a redución das sesións lectivas directas do profesorado de 20 a 18 horas en Secundaria, co obxectivo de favorecer unha atención máis próxima ao alumnado, así como o Plan de impulso á atención á diversidade 2026-2030, dotado con 118 millóns de euros e que contempla un incremento dos especialistas en Pedagoxía Terapéutica, Audición e Linguaxe e orientación. A estas medidas súmanse os programas Avanza Lectura e Avanza Matemáticas, destinados a reforzar competencias fundamentais e detectar de maneira temperá as dificultades de aprendizaxe.

Así mesmo, lembrou que o novo Marco galego para o impulso educativo, aprobado esta mesma semana polo Consello da Xunta, contempla tamén reforzar a lectura en todas as materias de Primaria e incorporar en primeiro e segundo da ESO unha nova materia obrigatoria de Lectura e Comprensión.

O portavoz do Grupo Parlamentario Popular, Alberto Pazos, amosou hoxe o seu rexeitamento frontal ao modelo de financiamento autonómico “discriminatorio e inxusto” proposto polo Goberno central e instou aos grupos da oposición a impedir a súa aprobación nos termos actuais no Congreso e no Senado. “A prioridade non é debater un modelo alternativo, senón parar este modelo”, apuntou, para continuar advertindo de que se “este atropelo” sae adiante, non haberá unha nova negociación en moito tempo.

Afeou que os socialistas galegos pretendan que Galicia acepte “unha lesiva quita da débeda e un modelo de financiación inxusto”, e o fagan, ademais, cuestionando os beneficios fiscais duns orzamentos que aínda nin sequera foron presentados. “Pretenden dar leccións de como corrixir a perda de financiamento á que nos condena o novo modelo”, sinalou para, a continuación, reclamar que non se fagan propostas á medida de ninguén, senón atendendo á situación e a criterios obxectivos.

Neste punto, o voceiro popular recordou que a chamada “mutualización da débeda autonómica” naceu exclusivamente para atender as esixencias e o interese do independentismo catalán, e advertiu de que “só se fará realidade se satisfai ao nacionalismo catalán”. “Por que merece mellor trato o despilfarro que a responsabilidade?”, dixo Pazos. “Por que –continuou-, en lugar de premiar a quen subiu impostos durante a crise, non se premia a quen preferiu apertar o cinto e non castigar os petos dos seus cidadáns?”.
Así mesmo, fixo mención á “oposición frontal” que xa demostraron trece das quince Comunidades afectadas –incluídas as gobernadas por socialistas- por esta proposta do Executivo central no pasado Consello de Política Fiscal e Financeira. “Os galegos non queremos que nos compensen. Reclamamos un trato xusto”, destacou.

A DESFEITA DA QUITA DA DÉBEDA E O IMPACTO NOS GALEGOS
O voceiro popular referiuse como o “grande éxito” de socialistas e nacionalistas a “desfeita” da quita da débeda e explicou polo miúdo as súas consecuencias para o peto dos cidadáns. Tal e como informou, no caso de que Galicia se adhira ao procedemento a débeda de cada galego incrementarase en máis de 600 euros, pero de non facelo o resultado final tamén será pésimo, xa que “teremos que asumir o pago da débeda transferida por outras Comunidades, sen que elas asuman nin un só euro do pago da nosa”. E agardou que “un novo goberno en España compense esta inxustiza”.

Para rematar, instounos a aclarar o seu voto se finalmente “non se modifica a poboación axustada, a valoración do envellecemento, a dispersión da poboación e o maior custe efecto da prestación de servizo públicos en Galicia”.

Os deputados do Grupo Parlamentario Popular Cristina Sanz e José Manuel Mato puxeron en valor, nunha visita á sede da Asociación Española Contra o Cancro de Lugo, o investimento que a Xunta anunciou recentemente –preto de 48 M€- para a compra de varios medicamentos innovadores e de vangarda para loitar contra os cancros de mama e de ovario nos hospitais públicos galegos. “Esta potente inxección económica sitúa a Galicia á cabeza da medicina de precisión e supón un salto cualitativo na calidade de vida das pacientes”, sinalaron.

Da man do presidente da entidade, José Manuel Rozas, e do secretario, Daniel Botana, os parlamentarios puideron coñecer de primeira man o traballo diario de apoio e asesoramento que realiza a asociación. Durante o encontro, aproveitaron para trasladarlle “o compromiso prioritario e firme” do Goberno galego na loita contra a enfermidade. “A mellor forma de apoiar o inmenso labor que fan entidades como a AECC de Lugo é garantir que a sanidade pública galega ofreza sempre as solucións terapéuticas máis avanzadas e eficaces, con tratamentos máis individualizados e de vangarda”, apuntaron os deputados populares.

Neste senso, afondaron en que deses case 48 M€, arredor de 36 M€ diríxense ao tratamento do cancro de mama, que segue a ser o tumor máis frecuente entre as mulleres galegas, con 2.396 novos casos diagnosticados no ano 2023. E que case 12 M€ irán destinados a fármacos de precisión para pacientes con cancro de ovario –unha patoloxía que, en 2023, rexistrou 220 novos diagnósticos- ou de mama. “Son –tal e como salientaron- novas terapias que representan un gran avance respecto á quimioterapia convencional”.

O Parlamento de Galicia vén de aprobar unha iniciativa do Grupo Parlamentario Popular relativa a impulsar e reforzar a formación a través do campus virtual do comercio galego, co obxectivo de axudar ao pequeno comercio a adaptarse ás tendencias actuais de consumo.

Tal e como remarcou a deputada do Grupo Parlamentario Popular, Felisa Rodríguez, o comercio local galego atópase inmerso nun proceso de transformación profunda motivado pola dixitalización, o auxe do comercio electrónico e unha clientela cada vez máis conectada. Neste escenario, defendeu que a formación continua é a chave para que os establecementos tradicionais melloren a súa presenza dixital, adapten os seus modelos de negocio e reforcen a súa capacidade de innovación para incrementar a súa competitividade. Así, considerou que a dixitalización ten que ir acompañada da formación, porque “dixitalizar debe significar máis oportunidades, non dificultades”.

Segundo apuntou Felisa Rodríguez, o campus virtual do comercio galego preséntase como unha ferramenta estratéxica para chegar a un maior número de persoas, con independencia da súa localización xeográfica. Así mesmo, incidiu en que esta plataforma non só contribúe a impulsar a profesionalización do comercio local, senón que tamén fortalece o seu papel como motor económico e social do territorio.

A deputada popular fixo fincapé en que a capacitación en materias como o márketing dixital, a xestión empresarial, a atención ao cliente ou a integración de novas tecnoloxías resulta esencial para dar resposta ás demandas do mercado. Por este motivo, sinalou a importancia de que calquera profesional do sector poida acceder a estes recursos coa máxima flexibilidade.

Felisa Rodríguez subliñou que apoiar activamente esta plataforma supón avanzar no apoio efectivo a un sector estratéxico. Así, a iniciativa aprobada sen votos en contra busca dotar ao pequeno comercio de ferramentas para afrontar con éxito os retos da nova realidade e consolidar un modelo comercial moderno, competitivo e sostible.

Para rematar, puxo en valor o Plan Estratéxico de Comercio 2025-2030 do Goberno galego, o cal mobiliza máis de 320 M€ en 74 accións de apoio á dixitalización e modernización, ás prazas de abastos, aos centros comerciais abertos e, tamén, á remuda xeracional.

A portavoz de Política Social do Grupo Parlamentario Popular, Raquel Arias, e o deputado José Luis Novo, acompañados pola presidenta do PP en Vilalba, Sandra Vázquez, salientaron que o Bono Concilia Familia, posto en marcha polo Goberno galego, “facilitou a atención aos cativos en máis dun milleiro de fogares” da provincia de Lugo.

Concretamente, na convocatoria de 2025, o Bono Concilia Familia chegou a 1.042 familias lucenses, con Lugo (613), Monforte de Lemos (66), Sarria (56) e Vilalba (51) como os concellos co maior número de beneficiarios. En toda Galicia, concedéronse máis de 13.000 solicitudes.

Durante unha visita á ludoteca Diverminds de Vilalba, Raquel Arias e José Luis Novo destacaron que, só no primeiro día de apertura do prazo da convocatoria de 2026, a Xunta de Galicia rexistrou máis de 9.000 solicitudes en toda a Comunidade, o cal “da boa conta da súa excelente acollida”.

“É unha mostra máis do apoio do Goberno galego ás familias para que poidan compaxinar a vida persoal coa laboral”, sinalaron os representantes populares. Ademais de medidas pioneiras como a gratuidade das escolas infantís ou as casas niño, lembrou que o Executivo autonómico tamén apoia aos concellos con case 7,5 millóns de euros, a través do Plan Corresponsables, para organizar campamentos e outras actividades similares de conciliación. “A pesar de que o Goberno central recortou a achega a este plan nun 25%”, censuraron.

PRAZO ABERTO ATA O 9 DE OUTUBRO
A través do Bono Concilia Familia, as unidades familiares poden recibir ata 500 euros para sufragar os custos dun servizo de coidado no domicilio, ou ben ata 200 euros por fillo naqueles casos nos que se acuda a un servizo especializado como as ludotecas, campamentos ou actividades de conciliación.

A Xunta inviste 2,6 M€ nesta orde de axudas económicas directas que contribúe a sufragar os custos dos servizos de atención e coidado aos nenos de entre 4 e 13 anos.

As persoas interesadas en contar con esta axuda poden solicitala ata o vindeiro día 9 de outubro ás 14,00 horas a través da Sede Electrónica da Xunta de Galicia.

O portavoz do Grupo Parlamentario Popular, Alberto Pazos, contrapuxo hoxe na Coruña os dous modelos radicalmente opostos que existen en Galicia para facer fronte ao grave problema da vivenda: o da Xunta de Galicia, baseado en “construír vivenda e aportar solucións, fronte ao modelo que escenifican as alcaldesas da Coruña e de Santiago de “construír escusas e relato” para xustificar o seu fracaso.

Pazos, que estivo acompañado do portavoz municipal do PP, Miguel Lorenzo, afeou o encontro mantido hoxe por las alcaldesas da Coruña e Santiago, ao que tachou de ser un “cumio” cuxo único obxectivo é o de buscar escusas e botar culpas: “Son dúas alcaldesas que coinciden en sinalar un culpable externo ao fracaso das súas políticas de vivenda”. “Oxalá –engadiu- remate a política de escusas e se sumen á das solucións e investimentos pola que aposta o PPdeG”.

 

A este respecto, o representante popular referiuse á declaración de zonas tensionadas, a cal considerou un exemplo da desastrosa xestión neste ámbito de ambas as dúas rexedoras. Neste punto, fixo fincapé nos resultados que tivo nas cidades. Así, incidiu nos resultados desta política: aumento dos prezos do aluguer e redución da oferta en máis dun 50% no último ano, tal e como aconteceu na cidade coruñesa. E sinalou que a solución pasa por “políticas máis serias e compromisos orzamentarios”.

“SOLUCIÓN MOI ESCASA” FRONTE AOS FEITOS DA XUNTA

Asemade, Alberto Pazos cualificou de “solución moi escasa” a medida do Goberno central de destinar 5,11 millóns de euros vinculados a estas zonas na Coruña e Santiago, unha contía, tal e como explicou Pazos, coa que só se poderían financiar menos de 30 vivendas públicas, entre Santiago e A Coruña: “O lóxico sería recapacitar e tomar medidas alternativas, pero, lonxe diso, o que se pretende é crear polémicas absurdas e estériles arredor dunha suposta aportación do Estado, da que a Xunta aínda non recibiu nin un só euro”.

Fronte a isto, Alberto Pazos puxo en valor a política de feitos do Goberno galego, recordando que ten en marcha na Coruña máis de 1.000 VPP cun investimento de 200 millóns, converténdoa na urbe galega con máis vivenda pública en marcha.

INICIATIVA NO PARLAMENTO PARA ESIXIR RECURSOS REAIS

Pazos anunciou que o Grupo Popular vai presentar unha batería de iniciativas no Parlamento de Galicia. O obxectivo será instar á Xunta a reclamar ao Goberno central un incremento substancial e xusto dos recursos públicos, demandar lealdade institucional ao Ministerio evitando polémicas artificiais e blindar por lei a avaliación con datos oficiais dos efectos destas zonas tensionadas para evitar que sigan asfixiando o mercado.

O portavoz popular concluíu lembrando que o modelo do PPdeG na Xunta é cuantificable e con feitos, destinando en 2026 un total de 350 millóns de euros ás políticas de vivenda (un 63% máis para construción) e coa meta clara de duplicar o parque público ata acadar as 8.000 vivendas en 2028 e as 10.000 en 2030.

UNHA MEDIDA INEFICAZ

Pola súa banda, o portavoz municipal do PP da Coruña sumouse ás críticas cara á xestión local e cuestionou as demandas da alcaldesa coruñesa. Afeoulle que, en materia de vivenda, non fixera nada nos últimos sete anos e que, o pouco feito, tan só serviu para agravar o problema, aprobando medidas populistas que son un fracaso coma a zona tensionada ou acumulando atraso tras atraso en todas as actuacións municipais.

Para o representante local, o único que fixo a alcaldesa foi empeorar o mercado de aluguer coa zona tensionada, que retirou inmobles do mercado, aumentou a demanda e subiu os prezos. Ao seu xuízo, o problema da vivenda solucionarase derrogando a lei estatal de vivenda e a zona tensionada na cidade, ao que se comprometeu cando sexa o seu próximo Alcalde, construíndo máis vivendas públicas, seguindo o modelo que está a liderar a Xunta, axilizando as licenzas municipais dende o Concello para reactivar o sector e convocando axudas directas para a rehabilitación de inmobles e a instalación de ascensores.

A Comisión 2ª do Parlamento de Galicia aprobou a iniciativa do PPdeG para reclamar unha maior implicación das distintas administracións na resposta ao problema da vivenda en Vigo.

A deputada autonómica Patricia García destacou que a Xunta está a facer unha aposta decidida pola vivenda pública na cidade, con máis de 900 vivendas en distintas fases de desenvolvemento en San Paio de Navia, ademais da preparación de novo solo residencial no Ofimático e Ramón Nieto para futuras promocións.

“Navia é a demostración de que cando hai planificación, investimento e xestión, as vivendas se poden facer. Hai solo, hai obras e hai promocións en marcha”, sinalou.

Patricia García contrapuxo esta actuación coa do Concello de Vigo, ao que reclamou que empregue as competencias e os recursos dos que dispón.

“O Concello ten competencias en urbanismo e na promoción e xestión de vivenda protexida. O que non pode facer é pasar a pelota á Xunta mentres os anos pasan e as familias seguen esperando”, afirmou.
A parlamentaria popular puxo como exemplo a creación de EMVIGO, a empresa municipal de vivenda, e reclamou que deixe de ser “un instrumento sobre o papel” para converterse nunha ferramenta efectiva para construír vivenda pública.
“Se o Concello pode crear unha empresa municipal de vivenda, tamén pode facer política municipal de vivenda. O que lle pedimos é que pase dos anuncios aos feitos”, destacou.
A deputada lembrou tamén que a Xunta non se limita á construción de novas vivendas, senón que está a impulsar actuacións de rehabilitación, especialmente no Casco Vello, e a planificar novos desenvolvementos para incrementar o parque de vivenda protexida da cidade.
“A Xunta está construíndo vivenda, preparando solo e rehabilitando. Agora queremos que o Concello faga a súa parte”, resumiu.
Patricia García insistiu en que o problema da vivenda require a colaboración de todas as administracións, pero advertiu de que “colaborar non significa que a Xunta teña que facer tamén o traballo do Concello”.

“Non necesitamos máis escusas nin máis anuncios. Necesitamos vivendas. A Xunta está facendo a súa parte; agora tócalle ao Concello de Vigo facer a súa”, concluíu.

O Parlamento de Galicia aprobou a iniciativa do PPdeG pola que se insta á Xunta de Galicia a demandar do Goberno de España o cumprimento do paquete de medidas anunciado o 17 de decembro de 2024 para o ciclo da auga e, en particular, a execución das inversións comprometidas para mellorar o abastecemento da cidade de Monforte de Lemos.

A deputada autonómica do PPdeG Katy Varela sinalou que se trata dunha actuación “fundamental para Monforte”, ante o estado da rede de abastecemento e as incidencias que, segundo denuncia, afectan de maneira recorrente á veciñanza.

“Estamos a falar dun servizo público esencial. O abastecemento e o saneamento da auga son competencias municipais, pero iso non significa que os concellos teñan que afrontar en solitario investimentos de enorme complexidade e envergadura. Precisamente por iso é necesaria a colaboración entre administracións e, neste caso, o cumprimento dos compromisos anunciados polo Goberno de España”.

Varela lembrou que o 17 de decembro de 2024 o Consello de Ministros anunciou un paquete de 752 millóns de euros para actuacións relacionadas co ciclo da auga en distintas comunidades autónomas, no que se incluía unha actuación de 10 millóns de euros para a renovación da rede de abastecemento de Monforte de Lemos.

“O problema é que case dous anos despois seguimos sen coñecer avances concretos que permitan aos veciños saber cando se vai executar esa inversión”, afirmou a deputada popular. “Unha infraestrutura destas características non pode quedar nun anuncio. Os monfortinos necesitan solucións e unha planificación clara, con prazos e execución efectiva”.

UNHA REDE QUE PRECISA ACTUACIÓNS

A parlamentaria do PPdeG subliñou que a situación da rede de abastecemento de Monforte fai especialmente necesaria esta actuación, tanto para reducir as avarías e interrupcións no subministro como para avanzar na renovación das tubaxes de fibrocemento.

“Non estamos falando simplemente de cambiar unhas tubaxes. Estamos falando de garantir un servizo básico, de reducir as perdas e avarías e de que os veciños poidan dispoñer dun abastecemento adecuado e fiable”, explicou.

Varela tamén reclamou ao Concello de Monforte que exerza as súas competencias e traballe coordinadamente co resto das administracións para que as actuacións necesarias poidan materializarse.

“Os concellos teñen unha responsabilidade fundamental na prestación do abastecemento e saneamento, pero cando son necesarias actuacións millonarias é imprescindible a cooperación institucional. O que non pode ocorrer é que os anuncios queden no papel mentres os problemas continúan afectando á veciñanza”, engadiu.

A XUNTA, “PREPARADA PARA COLABORAR”

Katy Varela destacou igualmente que a Xunta de Galicia leva anos desenvolvendo políticas de planificación e investimento vinculadas á garantía do abastecemento e á mellora da eficiencia das redes municipais.

Neste sentido, lembrou o papel de Augas de Galicia e as medidas contempladas no Plan especial da seca, actualizado en 2022, así como os programas destinados a mellorar a eficiencia das redes municipais, as estacións potabilizadoras, os depósitos e a dixitalización dos sistemas de xestión da auga.

“A Xunta está a planificar con antelación, a traballar cos concellos e a mobilizar recursos para mellorar a eficiencia e a garantía do abastecemento. Agora é necesario que o Goberno de España cumpra tamén cos compromisos que anunciou para Monforte”, afirmou.

A deputada popular incidiu en que a cooperación entre administracións debe estar por riba de calquera consideración partidista. “Aos veciños de Monforte dálles igual que administración achegue os fondos. O que queren é que se arranxe a rede, que se reduzan as avarías e que se garanta un servizo básico. As administracións temos que estar á altura desa demanda”, concluíu.

O Grupo Parlamentario Popular remarcou, hoxe no Parlamento de Galicia, que a planificación so servizo de urxencias terrestre extrahospitalario no Salnés se realiza baixo criterios estritamente técnicos, asistenciais e de demanda coordinados polo 061. E acusou aos grupos da oposición de recorrer ao “sensacionalismo” e de utilizar argumentos sen base real para xerar alarma social entre a poboación.

Os populares defenderon que a comarca do Salnés conta cunha importante dotación de recursos materiais e humanos que, ademais, se reforza de forma notable durante os meses de verán para absorber o incremento estacional de habitantes. Desde o grupo parlamentario explicaron que o traslado temporal da base da ambulancia medicalizada comarcal a Sanxenxo, durante os meses de xullo e agosto, responde exclusivamente a patróns de demanda e accesibilidade, e non a criterios políticos.

Segundo os datos técnicos da campaña estival de 2026, dita unidade realizou 207 mobilizacións, das cales 110 tiveron lugar en Sanxenxo e 97 fóra deste municipio (incluíndo 32 en Vilagarcía e 22 no Grove), o que demostra que o recurso seguiu prestando cobertura a toda a comarca: “Ningún concello do Salnés veu reducida a súa asistencia sanitaria urxente”.

 

“Detrás de cada emerxencia hai unha persoa, unha familia e unha necesidade real de atención; precisamente por iso, non debemos xogar coa alarma nin terxiversar os datos”, sinalaron durante o debate da iniciativa, insistindo en que a saúde dos galegos esixe rigor e que non se pode desbotar a planificación técnica baseada en datos obxectivos para impoñer decisións de carácter político.
A rede de transporte sanitario da comarca completouse este verán con cinco ambulancias asistenciais de soporte vital básico permanentes en Caldas de Reis, Cambados, O Grove, Sanxenxo e Vilagarcía, sumando nesta última unha ambulancia básica adicional de 12 horas (de 10:00 a 22:00 horas).