Categoría: Parlamento de Galicia

O portavoz do Medio Rural do Grupo Popular, Miguel Ángel Viso, afirmou hoxe, respecto do acordo comercial entre a Unión Europea e Mercosur, que “a nosa posición é contundente: ningún acordo pode entrar en vigor sen garantías reais para o campo, sen cláusulas automáticas, sen controis reforzados en fronteira e sen revisar as cargas que soportan os produtores europeos”. “Trátase de dicir: primeiro o rural, logo o mercado”, incidiu.

Miguel Ángel Viso reiterou que “a Xunta solicitará ao Goberno central e á Comisión Europea que non activen de xeito provisional o acordo UE-Mercosur mentres non queden blindadas as garantías para agricultores e gandeiros do regulamento de salvagardas”.

Neste sentido, salientou que o PP logrou no día de hoxe no Parlamento Europeo a aprobación dun mecanismo de salvagardas reais e efectivas para protexer aos agricultores no acordo UE-Mercosur, reducindo os limiares de activación ao 5 por cento e permitindo unha intervención rápida en só 21 días. Así mesmo, logrou que a Comisión Europea impulse un grupo de traballo específico para endurecer o seguimento e control das importacións agroalimentarias.

ESTAR CO SECTOR

“Estar co sector é mobilizar recursos, acompañar, pagar axudas, reforzar servizos, apoiar investimentos, defender mercados e sentarse coas organizacións agrarias cando hai problemas, e a Xunta leva anos demostrando con feitos ese compromiso”, asegurou o portavoz popular.

Porén, lamentou que o BNG “presume de ser o partido do rural pese a que non protexeron aos gandeiros contra o lobo, votaron contra flexibilizar a PAC e impulsan un ecoloxismo radical”. “Iso non é defender o rural: é castigar a quen produce e poñer en risco a miles de familias, facendo política de escaparate con moita palabra en Galicia e pouca presión onde realmente importa e se decide”, dixo.

Viso acusou aos nacionalistas galegos de “abrir a porta no Parlamento Europeo a unha aplicación provisional do acordo UE-Mercosur sen negociación”. Así, anotou que “algúns preferiron aliñarse cos extremos antes que garantir seguridade xurídica e protección efectiva, mentres o sector galego queda atrapado nun relato que crea ansiedade pero no crea garantías”.

O deputado do Grupo Popular Ángel Rodríguez afirmou hoxe no Pleno do Parlamento galego que a Xunta procederá nos primeiros meses deste ano á actualización do Plan de prevención e defensa contra os incendios forestais de Galicia (Pladiga). Porén, asegurou que este plan “non perde a súa operatividade en ningún momento, porque o único que se fai é actualizalo naqueles aspectos que sofren variacións de ano en ano”.

Ángel Rodríguez considerou “materialmente imposible” que, como piden os socialistas galegos, os plans anuais de incendios forestais sexan aprobados e publicados antes do 31 de outubro do ano precedente ao da súa aplicación, porque debe incluír necesariamente a estatística completa de incendios do ano en curso, que non se atopa pechada antes do 31 de outubro; e porque debe incorporar o orzamento do exercicio seguinte, cando os presupostos xerais de Galicia nunca están aprobados nesa data o que fai imposible incluír os créditos definitivos.

“Por este motivo, antes do 31 de outubro só podería elaborarse un documento incompleto e carente de seguridade xurídica, incompatible co esixido na normativa básica”, concretou o deputado popular.

A portavoz de Sanidade do Grupo Popular, Encarna Amigo, cualificou hoxe de “irresponsabilidade maiúscula” que o BNG “poña en dúbida sen probas a atención sanitaria que reciben milleiros de pacientes do Hospital POVISA en Vigo, así como o traballo que desenvolven os profesionais que traballan neste centro sanitario”.

Encarna Amigo lembrou que o contrato da Xunta con POVISA “está publicado, fiscalizado e sometido á Lei de contratos do sector público” e indicou que “o único que fixo o Goberno do PPdeG foi cambiar o modelo: pasouse dun concerto per cápita a un contrato de servizos, no que se paga exclusivamente pola actividade efectivamente realizada”.

MAIOR ORZAMENTO NO BIPARTITO

“Falan dun contrato de 97 millóns de euros anuais como se fose un escándalo, pero esquecen que no ano 2009, co Goberno bipartito de BNG e PSdeG, destinábanse 74,3 millóns de euros a POVISA, unha cifra que actualizada a día de hoxe suporía máis de 100 millóns de euros cada ano”, manifestou.

Ademais, a portavoz popular lembrou que o Goberno PSdeG-BNG asinou en 2006 un Acordo básico pola saúde da área de Vigo no que se defendía explicitamente manter e potenciar os instrumentos de concertación e cooperación público-privada. “Cando gobernan, a concertación é responsable, pero agora chámano escándalo”, criticou.

Respecto das listas de espera no Hospital de POVISA, Encarna Amigo subliñou que pasaron de 113 días de espera cirúrxica en 2008 a 53 días na actualidade. “Sesenta días menos, resultado do actual modelo con máis control, pago por actividade e supervisión constante”, dixo.

Para rematar, apuntou que o novo contrato asinado con POVISA inclúe a posta en marcha dunha Unidade de Supervisión e Control, integrada por persoal público desde o primeiro día para garantir o cumprimento das obrigas contractuais e a calidade asistencial. “O Goberno do PP ten un modelo claro: sanidade pública, universal, de calidade, con control público e sen dogmatismos ideolóxicos”, sinalou.

O portavoz do Mar do Grupo Popular, Miguel Fidalgo, asegurou hoxe no Pleno do Parlamento galego que “Galicia ten hoxe o sistema de control e inspección contra o furtivismo e a entrada de produto foráneo no sector pesqueiro e marisqueiro galego máis potente de España gracias á Xunta, e o que falta é que o Goberno central cumpra coas súas obrigas e controle o que vén de fora”.

“A Xunta de Galicia non só actúa, senón que lidera en España a loita contra a pesca ilegal: e faino con feitos, con medios, con persoal e con resultados que desmontan o relato catastrofista que BNG e PSdeG queren instalar”, sinalou o portavoz popular. Neste sentido, apuntou que “o Servizo de Gardacostas de Galicia é pioneiro e único no Estado, que traballa 24 horas ao día os 365 días ao ano e leva máis de 30 anos salvando vidas e combatendo a contaminación e loitando contra a pesca ilegal”.

Miguel Fidalgo concretou que a Xunta destina este ano 18,5 millóns de euros ao Servizo de Gardacostas, ao tempo que apoia con cinco millóns de euros ás confrarías no financiamento da vixilancia, o que permite contar hoxe con 163 vixiantes colaborando co Servizo de Gardacostas.

Porén, explicou que “a loita contra organizacións criminais corresponde á Policía Xudicial e á Policía Nacional, non a unha Policía administrativa autonómica”. “A Xunta colabora, coordina e facilita medios, pero no pode nin debe asumir competencias que son do Estado, como é a entrada de produto ilegal doutros países”, dixo.

Para rematar, o portavoz popular reivindicou o traballo desenvolvido pola Consellería do Mar en Bruxelas, “onde estivo defendendo á frota galega, acompañando ao sector e levando datos, informes e propostas concretas ante o ministro socialista Planas”. “Pola contra, o BNG non estaba nin co sector nin defendendo os intereses de Galicia, e quen non da a cara cando toca non pode vir aquí dar leccións”, sinalou.

Os deputados do Grupo Popular Raquel Arias e Enrique Barreiro salientaron hoxe o importante beneficio para as arcas dos concellos rurais que terá o acordo entre a Xunta e a Fegamp a través do que a Administración galega incrementará nun 50 por cento ao longo desta lexislatura a súa aportación para a prestación do servizo de axuda no fogar por parte dos concellos.

Raquel Arias explicou que a través deste acordo a Xunta aumentará de forma gradual a súa aportación para a prestación do servizo de axuda no fogar, unha competencia municipal segundo se recolle na Lei de servizos sociais de Galicia, aprobada polo Goberno bipartito de PSdeG e BNG no ano 2008. En concreto, a Xunta comprométese a incrementar de 12 a 16 euros por cada hora prestada este mesmo ano, subir un euro máis por hora para o 2027 e chegar aos 18 euros no 2028.

No caso concreto do concello de Sober, a deputada popular dixo que “pasará de ingresar 285.000 euros na actualidade pola prestación do servizo de axuda no fogar a 380.000 euros, case 100.000 euros máis só neste ano”.

A CARÓN DOS CONCELLOS GALEGOS

Enrique Barreiro asegurou que este incremento da aportación realizada pola Xunta “demostra que o Goberno galego está ao carón dos concellos galegos, sobre todo dos máis pequenos, que verán aliviadas as súas contas municipais”.

“Ademais, é bo para os propios traballadores e traballadoras deste servizo, xa que gozarán dunha maior estabilidade nos seus contratos; e, por suposto, tamén é bo para as persoas con dependencia e as súas familias, garantindo que máis persoas dependentes poidan seguir vivindo con dignidade no seu propio fogar e co apoio que precisan”, indicou.

Raquel Arias considerou “esencial o servizo de axuda no fogar, porque afecta directamente á calidade de vida das persoas maiores, dependentes e das súas familias, pero que ten unha especial relevancia na Comunidade galega cunha gran cantidade de persoas maiores e unha importante dispersión poboacional”.

Porén, afirmou que “este servizo podería estar aínda mellor financiado se o Goberno de Pedro Sánchez puxera enriba da mesa o 50 por cento que lle corresponde pola Lei da dependencia, pero para desgraza dos galegos, en vez de achegarse a esa metade, cada ano reduce a súa aportación, que pasou nos últimos anos do 40 ao 34 por cento”.

Os deputados do Grupo Popular Rubén Lorenzo e Carmen Pomar destacaron hoxe que a Xunta xa ten en marcha neste momento a construción de máis de 1.600 vivendas públicas na provincia da Coruña, o mellor exemplo da política de expansión do parque público residencial que está a desenvolver ao longo da presente lexislatura.

Rubén Lorenzo e Carmen Pomar aseguraron que a Xunta “continúa dando pasos para cumprir o obxectivo de duplicar o parque público residencial nesta lexislatura, ata chegar a acadar as 8.000 vivendas públicas”. En concreto, na actualidade xa ten 3.000 vivendas públicas en diferentes fases de execución e ao longo deste ano 2026 porá en marcha as restantes ata chegar as 4.000 comprometidas para duplicar as existentes ao comezo da lexislatura.

POLÍTICA AMBICIOSA, SOSTIDA E TERRITORIALMENTE EQUILIBRADA

Durante a súa visita ás obras de construción das vivendas públicas de Lamas de Abade e Castiñeiro en Santiago, Carmen Pomar indicou que a Xunta xa ten en marcha 400 vivendas nesta cidade, das que 60 se entregarán proximamente. Ademais, esta mesma semana o Presidente Rueda presentou o concurso de ideas para construír en Santiago e A Coruña sendas residencias xuvenís de 150 prazas cada dunha, ademais de novas vivendas de promoción pública.

Pola súa banda, Rubén Lorenzo referiuse expresamente a Carballo, onde a Xunta vén de asinar un convenio co Concello para a cesión dunha parcela municipal na que construír un edificio de promoción pública de 73 vivendas. “O Goberno galego está aberto a poñer en marcha novos proxectos de construción de vivendas en calquera concello galego, para o que é necesario que os responsables municipais aporten o solo necesario”, indicou.

“A Xunta reafirma con estas actuacións, ás que se suman outras que está a emprender en A Coruña, Ferrol ou Ames, o claro obxectivo de cumprir o seu obxectivo de dotar a Galicia dunha política de vivenda ambiciosa, sostida e territorialmente equilibrada, situando á provincia de A Coruña como un dos piares fundamentais da expansión do parque público residencial”, rematou Carmen Pomar.

Os deputados do Grupo Popular Miguel Fidalgo e Felisa Rodríguez destacaron hoxe en Fitur 2026 a crecente importancia que o Camiño Portugués está a ter na chegada de turistas a Vigo e toda a súa comarca, e avogaron porque as administracións dean un paso máis na súa promoción.

En concreto, demandaron ao Concello de Vigo que “abandone dunha vez o seu sectarismo e acceda a sinalizar o traxecto do Camiño Portugués pola costa, de xeito que facilite o tránsito dos peregrinos polo municipio”.

Felisa Rodríguez puxo en valor que o incremento de peregrinos rexistrado nos últimos anos no Camiño portugués pola costa “levouno a situarse como o itinerario xacobeo que máis medrou, superando o pasado ano os 89.500 peregrinos logo dun incremento de case un 20 por cento no 2025”.

Así mesmo, subliñou que o 80 por cento destes peregrinos que percorren o Camiño portugués pola costa son estranxeiros, especialmente alemáns, norteamericanos e italianos. “Esta internacionalización debe ser unha das bazas que debemos xogar para conseguir aumentar o número de peregrinos, co conseguinte aumento dos ingresos para os nosos sectores comerciais e hostaleiros”, indicou.

MANCHA NO ESPLENDOR

Pola súa banda, Miguel Fidalgo lamentou que este impulso que está a rexistrar o Camiño Portugués pola costa “non se vexa correspondido pola atención que merece desde o Concello de Vigo, que leva moitos anos negándose a sinalizar o traxecto ao seu paso polo municipio vigués, a pesar de que unha gran parte das pernoctacións na cidade son debidas aos peregrinos que fan o Camiño, algo que o alcalde segue negando aínda que é imposible non velo”.

“Vigo non pode quedar como unha mancha no esplendor que está a vivir o Camiño Portugués pola costa, para o que é imprescindible que os peregrinos que chegan á cidade por esta ruta conten coas mesmas comodidades e servizos que se lles presta nos demais concellos, e o primeiro paso é que conten cunha sinalización correcta e completa á que neste momento no Concello se nega rotundamente”, lamentou o deputado popular.

Os deputados do Grupo Popular Cristina Campero e José Luís Ferro enxalzaron hoxe o traballo desenvolvido polo historiador, investigador e estudoso Justo Gude Méndez na difusión e posta en valor do entroido galego, unha das manifestacións culturais máis singulares e identitarias de Galicia, recoñecida como ben de interese cultural polo seu valor como patrimonio inmaterial.

Durante o encontro, Cristina Campero e José Luís Ferro tiveron a oportunidade de coñecer de primeira man o intenso traballo de investigación e documentación desenvolvido por Justo Gude, e todas as persoas que traballan conxuntamente con el no estudo de elementos significativos do entroido como as pantallas. “Non son só traxes nin rituais, son emocións herdadas, orgullo compartido e sentimento de pertenza”, dixo a deputada popular.

Os deputados populares intercambiaron impresións sobre os retos actuais do entroido galego, a súa evolución no tempo e a necesidade de seguir promovendo iniciativas que garantan a súa preservación e posta en valor, tanto no ámbito cultural como turístico.

EXPRESIÓN VIVA DA SOCIEDADE

“Desde as institucións, temos a obriga de protexer, apoiar e difundir o noso patrimonio cultural inmaterial”, sinalou José Luís Ferro, quen anotou que o entroido galego “é unha expresión viva da nosa identidade colectiva e o traballo de investigadores como Justo Gude resulta imprescindible para garantir que esta tradición se conserve con rigor e proxección de futuro”.

Pola súa banda, Cristina Campero subliñou que o entroido “é unha expresión popular que une xeracións, territorios e memoria, polo que coñecer a súa historia e o seu significado profundo axúdanos a valoralo e a respectalo como unha parte esencial da cultura galega”.

O portavoz do Grupo Popular, Alberto Pazos, demandou hoxe ao BNG que recoñeza o esforzo que fai o Goberno galego incrementando un 50 por cento nesta lexislatura o financiamento do servizo de axuda no fogar nos concellos galegos e deixe de mentir sobre o acordo acadado logo da negociación levada a cabo entre os responsables da coa Federación Galega de Municipios e Provincias.

Neste sentido, pediu aos nacionalistas “máis defensa e mirar polos intereses da Comunidade galega para que o Goberno de Pedro Sánchez cumpra o que lles prometeu a cambio do seu voto para continuar de Presidente do Goberno, aportando de maneira definitiva o 50 por cento que lle corresponde por lei para a atención aos dependentes en Galicia”.

Alberto Pazos lembrou que o acordo acadado esta semana suporá que a Xunta incremente este mesmo ano a súa aportación de 12 a 16 euros por hora, aumentado un euro o vindeiro ano e pechando a lexislatura chegando aos 18 euros por hora prestada. Deste xeito, a partida que a Xunta destina á prestación deste servizo por parte dos concellos galegos pasará dos 148 millóns de euros deste ano a máis de 220 millóns en 2028.

O acordo “consigue o seu principal obxectivo: reforzar o apoio da Xunta aos concellos para aliviar a carga económica que supón a prestación do servizo de axuda no fogar, unha competencia municipal, tal e como se recolle na Lei de servizos sociais de Galicia, aprobada polo Goberno bipartito de PSdeG e BNG no ano 2008”, explicou.

FURIOSA REACCIÓN NACIONALISTA

O portavoz popular amosou a súa sorpresa pola “furiosa reacción dos responsables do BNG a este acordo, chegando a cualificalo de trumpista ou un trágala para os concellos”, ante o que pediu aos nacionalistas “calma e, cando menos, que non mintan”. “Porque é totalmente falso que este incremento da aportación da Xunta sexa unha imposición aos concellos, xa que é consecuencia directa dunha negociación levada a cabo entre os responsables da Consellería de Política Social e da FEGAMP”, manifestou Pazos, quen criticou que “diálogo e pacto que non existe no dicionario benegués, máis amigos da trifulca e a algarada na rúa seguindo as directrices que lle marcan os coroneis da UPG e o seu sindicato CIG”.

Deste xeito, afirmou que o BNG debería “centrar os seus esforzos en que o Goberno de Pedro Sánchez cumpra o pacto que asinaron en 2024 para a súa investidura e que recolle, literalmente, o compromiso para que o Goberno de España achegue o 50 por cento do financiamento da Lei de dependencia”. Porén, lamentou que “a influencia do BNG no Goberno central é nula e este é un máis dos incumprimentos do famoso pacto para manter a Pedro Sánchez na Moncloa”.

Alberto Pazos alertou que, “en vez de incrementarse e camiñar cara o cumprimento do pactado cos nacionalistas, a aportación do Goberno central para o financiamento da Lei da dependencia en Galicia baixou nos últimos anos do 40 ao 34 por cento, obrigando á Xunta a facer un esforzo aínda maior para sufragar os custos da atención aos nosos maiores e dependente, e incrementando ano tras ano a débeda que o Estado ten con Galicia pola prestación da dependencia, que xa supera os 2.900 millóns de euros”.

Na súa comparecencia ante os medios, Alberto Pazos recordou que no Pleno ordinario que se celebra a vindeira semana tomará posesión a nova deputada do Grupo Popular Nazareth Cendán, que substitúe a Ethel Vázquez, ao tempo que se procederá á elección do novo secretario da Mesa do Parlamento de Galicia, posto para o que o Grupo Popular propón ao actual viceportavoz do Grupo e Presidente da Comisión 1ª, Julio García Comesaña.

Así mesmo, referiuse á comparecencia do conselleiro de Facenda para dar conta da reunión do Consello de Política Fiscal e Financeira celebrada a pasada semana en Madrid, na que a ministra de Facenda limitouse a comunicar o acordo bilateral de financiamento autonómico acadado entre Pedro Sánchez e o independentista e inhabilitado Oriol Junqueras.

“Un acordo co que Galicia pasa a situarse por baixo da media estatal de financiamento por habitante, cando co actual modelo está 100 euros por enriba, unha situación que é consecuencia dunha rebaixa de máis do 7 por cento do que actualmente recibe de financiamento autonómico por habitante”, indicou.

BENEFICIOS PARA CATALUÑA

Pola contra, explicou que o novo modelo pactado por Pedro Sánchez e Oriol Junqueras recolle 2.000 millóns extra para Cataluña mediante mecanismos de axuste para beneficiar exclusivamente a esta Comunidade autónoma, así como unha redución en dúas terceiras partes da aportación que fai á solidariedade rexional, pasando dos 2.300 millóns de euros que aporta na actualidade á caixa común a pouco máis de 810 millóns.

“Estamos expectantes por coñecer os argumentos que defenderán os socialistas galegos, logo de que nos últimos días recoñeceron que este acordo era prexudicial para Galicia e amosaron a necesidade dun incremento do financiamento asignado á Comunidade galega, ao que se sumou o posicionamento no día de onte do ex Presidente socialista da Xunta, o señor Touriño, que recoñeceu publicamente que o novo modelo de financiamento autonómico privilexia a Cataluña e reduce o papel da Facenda estatal, mermando as súas capacidades e recursos para garantir a solidariedade interterritorial e a igualdade na prestación de servizos a todos os españois”, dixo o portavoz popular.

Respecto do BNG, Alberto Pazos asegurou que “esperamos pouco, porque seguirán na súa teima do cupo para Galicia, pechando os ollos e negándose a escoitar os argumentos solventes e reiterados dos expertos que demostran o prexudicial que sería para a Comunidade galega un cupo ao estilo do País Vasco ou Navarra, xa que se superarían os 2.000 millóns de euros de perda de financiamento cada ano·.

O Parlamento de Galicia aprobou hoxe por unanimidade a proposición non de lei do Grupo Popular a través da que se demanda a creación do Plan de accesibilidade e de inclusión cultural de Galicia, contando coa participación das entidades, públicas e privadas, máis representativas dos intereses daquelas persoas nas cales concorra algún factor de risco de exclusión cultural.

A portavoz popular de Cultura, Carmen Pomar, lembrou que a Lei 3/2024 de cultura inclusiva e accesible de Galicia contempla a creación dun Plan de accesibilidade e de inclusión cultural no que participen as entidades representativas dos colectivos especialmente previstos nesta normativa. “Un plan no que se detalle a situación de partida e as melloras que compre realizar para facilitar o acceso universal de todas as persoas á cultura, ao tempo que se concretarán as actividades e as accións que é preciso implementar para favorecer a participación de todo tipo de públicos nas actividades culturais que se realicen en Galicia”, apuntou.

NORMA PIONEIRA EN EUROPA

A Lei de cultura inclusiva e accesible de Galicia, aprobada polo Pleno do Parlamento de Galicia o 19 de novembro de 2024, foi unha norma pioneira en Europa que garante o acceso á cultura para todas as persoas, especialmente aquelas vulnerables por condicionantes diferenciais, e promove a igualdade de oportunidades, eliminando barreiras físicas, dixitais e sociais na participación, máis tamén na creación cultural.

“A inclusión nunca é un gasto, é un verdadeiro investimento en cohesión social e, aínda que a aplicación debe de ser progresiva e acompañada de asesoramento técnico e de criterios de proporcionalidade, debe camiñar forte, sen marcha atrás, sen pausa e paso a paso cara un modelo cultural que non exclúa a ninguén”, manifestou a portavoz popular.

Deste xeito, Carmen Pomar subliñou que este lei “non condiciona contidos, senón que é garante de que calquera persoa acceda a eles: a liberdade creativa permanece intacta porque o que cambia é a capacidade de participación do público”.