Categoría: PP de Galicia

UNANIMIDADE NO PARLAMENTO DE GALICIA PARA RECLAMAR O REMATE ESTE ANO DA OBRA DO NOVO ACCESO AO PORTO DE BURELA

·    Ademais das melloras evidentes en comunicación, gañarase en seguridade, pois evitará o paso de 146.000 vehículos pesados ao ano polo centro da localidade

·    A concorrencia de dous gobernos populares, en Galicia e en España, permitiu que nos últimos meses a obra acadara o impulso definitivo tras anos de múltiples contratempos

Santiago, 8 de xuño de 2016.- O Pleno do Parlamento de Galicia aprobou esta mañá por unanimidade a iniciativa impulsada polo Grupo Popular na que se insta á Xunta ao remate, neste ano 2016, da obra do novo acceso ao porto de Burela.

Trátase dunha estrada na que o Goberno galego vén de investir preto de 8 millóns de euros, a través da Consellería de Infraestruturas e Vivenda, e que ao longo dos seus 1,26 quilómetros enlazará a Avenida da Mariña coa zona portuaria, á altura da nova lonxa.

INFRAESTRUTURA ESTRATÉXICA

O deputado popular Jose Manuel Balseiro agradeceu o apoio acadado e salientou que “todos os grupos parlamentarios coincidiron en considerar esta infraestrutura como estratéxica polo pulo que suporá para as empresas e particulares que operan nunha das dársenas pesqueiras e comerciais máis importantes do Cantábrico”.

“A gran maioría dos transportes que teñen a súa orixe no porto de Burela son de produtos do mar, peixes e mariscos perecedoiros, polo que mellorar os tempos supón gañar en competitividade e capacidade económica”, dixo Balseiro. Neste sentido, apuntou que, “ademais dunha mellor comunicación, toda a localidade gañará en seguridade pois evitará o paso, inevitable e hoxe obrigado, de 146.000 vehículos pesados ao ano polo centro da localidade”.

MÚLTIPLES CONTRATEMPOS

Balseiro tamén quixo poñer en valor o feito de que a concorrencia de dous gobernos populares, en Galicia e en España, permitiu que nos últimos meses a obra acadara o seu impulso definitivo tras anos de múltiples contratempos.

“Xunta e Goberno central foron quen de desbloquear o trazado, concordar o desvío das liñas de FEVE e elaborar un novo proxecto que superase as dificultades técnicas derivadas da complicada orografía e da necesidade de non provocar un enorme impacto visual e paisaxístico”, explicou Balseiro.

O deputado popular fixo tamén un repaso polos incontables contratempos que afectaron a esta obra e que implicaron unha demora enorme desde que fora proxectada. En concreto, lembrou a paralización xudicial dos traballos pola presentación de distintos recursos que tiveron que resolverse ou a aparición de pegadas arqueolóxicas que precisaron dun plan especial de catalogación e intervención.

Balseiro lembrou que cando o Goberno Feijóo recibiu o proxecto a Xustiza tiña determinado que o trazado decidido polo anterior Goberno bipartito non se correspondía co planeamento municipal vixente, “o que obrigou a empezar practicamente de cero, entre outras cousas, para deseñar un trazado soterrado baixo as vías do tren e, nese senso, salientou o esforzo realizado pola Xunta para mellorar todo o proxecto herdado”.

ASPECTOS TÉCNICOS

Finalmente, desde o portavoz popular repasaron algúns dos principais aspectos técnicos desta obra, que implicou a escavación de preto de 179.000 metros cúbicos de terra e o inminente estendido de mestura bituminosa en quente. A actuación tamén incluíu traballos de restauración e acondicionamento paisaxístico, restauración de patrimonio histórico, drenaxe lonxitudinal e transversal e sinalización horizontal e vertical.

O novo viario beneficiará directamente máis de 9.500 veciños do concello de Burela, e a unha poboación aínda maior debido ao emprego que xera o porto e a afluencia turística que esta localidade ten sobre todo no verán.

O PARLAMENTO APROBA, A INICIATIVA DO GRUPO POPULAR, INSTAR Á XUNTA A IMPULSAR A COMPRA PÚBLICA INNOVADORA

·    O obxectivo é promover a mellora dos servizos públicos e exercer un efecto tractor na innovación do tecido empresarial e nos centros de coñecemento galegos

·    Moisés Blanco salientou que “Galicia foi unha das comunidades autónomas pioneiras en incorporar na súa lexislación e normativa medidas de impulso á compra pública Innovadora”

Santiago, 8 de xuño de 2016.- O Parlamento de Galicia aprobou esta mañá a proposición non de lei do Grupo Popular a través da que se insta á Xunta a impulsar a compra pública innovadora en todas as administracións galegas, como medida para promover a mellora dos servizos públicos e exercer un efecto tractor na innovación do tecido empresarial e nos centros de coñecemento galegos. “Temos que seguir avanzando nunha materia que evoluciona a gran velocidade e conseguir o maior número de fondos posibles, porque se non o facemos nós irán a parar a proxectos doutras autonomías ou estados da Unión Europea”, manifestou o portavoz de Novas Tecnoloxías, Moisés Blanco.

Na súa intervención, Blanco sinalou que a compra pública innovadora “pódese levar a cabo en calquera ámbito ou nivel da administración que desenvolva procesos de contratación, e abrangue desde a actuación máis sinxela ata a utilización de procedementos contractuais máis complexos”.

O portavoz popular salientou que “España é líder en Europa na creación dun ecosistema necesario que favoreza a investigación e a innovación”, e referiuse “ao importante esforzo lexislativo realizado nos últimos anos para facilitar a utilización das compras públicas con solucións innovadoras”. En concreto, citou a inclusión de procedementos de diálogo competitivo na Lei de contratos do sector público e tamén dunha nova modalidade de contrato de colaboración público privada para a compra pública de tecnoloxía innovadora.

“Pero, ademais, Galicia foi unha das comunidades autónomas pioneiras en incorporar na súa lexislación e normativa medidas de impulso á compra pública Innovadora, recollidas no Plan galego de investigación, innovación e crecemento-Plan I2C; na Lei 5/2013, de fomento da investigación e da innovación de Galicia; na Lei 14/2013, de racionalización do sector público autonómico; ou no Plan de mellora da contratación publica 2014-2016”, apuntou.

GALICIA COMO REFERENTE

Moisés Blanco engadiu que “non nos quedamos só na teoría, porque hoxe Galicia constitúe un referente no desenvolvemento de proxectos de compra pública innovadora que conseguiron captar financiamento de fondos Feder e que mesmo, nalgún caso, chegaron a obter o recoñecemento das boas prácticas empregadas”. Neste sentido, citou o Premio estatal á mellor iniciativa innovadora outorgado ao proxecto para implantar un polo tecnolóxico e industrial en Rozas ou o Premio Nacional de Innovación outorgado ao Sergas en 2013.

O portavoz popular considerou “clave a colaboración e o diálogo coas entidades ou organismos públicos que pretendían realizar licitacións mediante procedementos de compra pública innovadora” na consecución de financiamento con fondos Feder. “Froito desta labor, entre 2007 e 2013 conseguiuse cofinanciación para desenvolver proxectos como o Hospital 2050 e InnovaSaúde, do Sergas; LáserPET, da Universidade de Santiago; A-Tempo, da Universidade da Coruña; Táctica, da Universidade de Vigo; ou SmartCity, do Concello de A Coruña; iniciativas que mobilizaron preto de 120 millóns de euros”, dixo.

“Pero, sen lugar a dúbidas, o proxecto estrela que recibiu todos os parabéns e recoñecementos foi a alianza da Xunta con Inaer e Indra para a creación no aeródromo de Rozas dun polo industrial e tecnolóxico de referencia en avións non tripulados para aplicacións civís, unha iniciativa na que a Xunta ampliou a súa aposta inicial de 25 a 40 millóns e se completa con outro de compra pública innovadora no que se investirán 20 millóns en tecnoloxías novas”, indicou. 

O PPDEG LAMENTA QUE A OPOSICIÓN REXEITE SOLICITAR AO GOBERNO CENTRAL QUE EXPLORE A POSIBILIDADE DE ACADAR UN PACTO POLA EDUCACIÓN

·    Hipólito Fariñas lembrou o principio de acordo asinado por representantes de PP, PSOE, PODEMOS e Ciudadanos na Universidade de Nebrija para a elaboración dun Pacto de Estado pola Educación

Santiago, 7 de xuño de 2016.- O portavoz de Educación do Grupo Popular, Hipólito Fariñas, lamentou que os grupos da oposición rexeitaran esta tarde no Parlamento a súa emenda para que o Goberno central explore a posibilidade de acadar un Pacto pola Educación que consolide a senda de mellora dos indicadores de resultados consecuencia das innovacións pedagóxicas e metodolóxicas postas en marcha nos últimos anos.

Fariñas subliñou que “a sociedade demanda consenso” e neste eido lembrou o principio de acordo asinado recentemente por representantes de PP, PSOE, PODEMOS e Ciudadanos na Universidade de Nebrija para a elaboración dun Pacto de Estado pola Educación.

MENSAXE PEDAGÓXICA

Deste xeito, lamentou que os grupos da oposición impediran que o Parlamento galego “fora o primeiro no que se acadara un consenso unánime arredor da necesidade deste pacto educativo”. “Tratemos de esquecer o que nos separa, que é bastante menos do que nos une, e sexamos responsables para poñernos de acordo e facer algo conxunto polo sistema educativo”, apuntou.

Hipólito Fariñas criticou que os grupos da oposición inciten ao incumprimento das leis, en concreto da LOMCE. “Estamos nunha Cámara lexislativa e debemos velar pola mensaxe pedagóxica que se lle manda aos educandos”, indicou.

PEDRO PUY ASEGURA QUE O CONCERTO ECONÓMICO “NON É RENDIBLE E SERÍA TREMENDAMENTE PREXUDICIAL” PARA GALICIA

·    Estudos realizados sobre a materia afirman que o cupo suporía perdas do 3,8 por cento do PIB para Galicia

·    Puy acusou ao BNG de traer ao Parlamento “un debate fiscal contrario ao que se está debatendo no mundo

Santiago, 7 de xuño de 2016.- O portavoz do Grupo Popular, Pedro Puy, asegurou hoxe que o concerto económico para Galicia que propón o BNG “non é rendible e ademais sería tremendamente prexudicial”, xa que suporía perdas de ingresos aproximadas do 3,8 por cento do PIB. Neste sentido, dixo que “fan as contas da vella, porque comparan o que recada o Estado en Galicia co que a Administración central transfire para pagar os servizos que exerce na Comunidade galega, esquecéndose de todos os servizos que o Estado presta aos galegos, como defensa, Seguridade Social ou obras públicas”.

Na súa intervención na sesión plenaria, Puy explicou que o concerto económico supón que unha comunidade autónoma se financie cos impostos que recada e paga á Administración central unha contía como contraprestación polo que a Administración central realiza nesa comunidade. Neste sentido, indicou que este cupo “non depende do nivel de renda das persoas que residen nesa comunidade autónoma e canto máis rica sexa a comunidade maior será a diferenza que se queda, que practicamente non contribúe á solidariedade nin interpersoal nin interterritorial do conxunto do Estado”.

“O sistema actual garante a equidade interpersoal”, asegurou Pedro Puy. Así, tomou como referencia os datos do INE do ano 2013 en Galicia para comparar o 85,89 por cento da renda bruta por habitante co 91,65 por cento da renda dispoñible bruta dos galegos, é dicir, despois de que o Estado cobre os impostos e dea todo tipo de transferencias e subvencións. “Un seis por cento máis de capacidade de gasto, o que supón que funciona o Estado de Benestar que se basea nun sistema fiscal progresivo de carácter estatal, que redistribúe a renda sacándolle menos a quen menos ten e dándolle máis a quen menos ten e máis o precisa”, sinalou.

Ademais, o portavoz popular lembrou que a Seguridade Social se paga coas cotizacións, aínda que na actualidade “se comece a debater en España que para garantir o futuro das pensións se tire das fontes tributarias”. Lembrou que en Galicia hai unha relación entre contribuínte e cotizante á Seguridade Social do 1,25, lonxe da estabilidade do sistema que estaría no 2,5 e da media de España, que está no 2,2, polo que alertou sobre “os 800.000 pensionistas galegos poden ter nalgún momento dependencia do conxunto fiscal de España, que non é un asunto menor”.

FUNCIONANDO DE XEITO AXEITADO

“O sistema de financiamento de réxime común está funcionando de xeito axeitado para Galicia, que recibe por enriba da media española porque é unha comunidade que en termos de riqueza relativa está por baixo da media do conxunto do Estado”, manifestou.

Pedro Puy recordou que nos estudos sobre extrapolación do cupo para Galicia realizados polo profesor Zubiri “falaba de perdas de ingresos arredor do 3,8 por cento do PIB”, polo que “se Galicia renuncia con este cupo a este ingreso está facendo un negocio moi malo”.

Así mesmo, criticou que os nacionalistas apoien que Cataluña vaia a un pacto fiscal semellante ao do cupo, cando “os cálculos feitos polos profesores Leiceaga e Lago Peñas din que o pacto fiscal que propón Cataluña quitaría a Galicia de 570 a 780 millóns de euros ao ano”.

O portavoz popular acusou ao BNG de traer ao Parlamento “un debate fiscal contrario ao que se está debatendo no mundo: máis equidade, máis orzamento europeo con tributos que redistribúan; máis colaboración internacional na loita contra a fraude; estabilidade da economía e controlar con impostos os movementos do capital”. 

O PARLAMENTO TOMA EN CONSIDERACIÓN A PROPOSICIÓN DE LEI PARA A ACTUALIZACIÓN DO SISTEMA DE TRANSPORTE PÚBLICO DE GALICIA, IMPULSADA POLO GRUPO POPULAR

·    “O obxectivo é que entre todos sexamos quen de poñer unha solución acaída e urxente a un grave problema que pon en serio risco a milleiros de persoas que traballan nun sector fundamental para a economía de Galicia”, sinalou

·    A nova Lei achegará seguridade xurídica aos usuarios, ás empresas que deben prestar o dito servizo público e, por suposto, aos seus traballadores

Santiago, 7 de xuño de 2016.- O Parlamento de Galicia aprobou hoxe a toma en consideración da proposición de Lei de medidas urxentes para a actualización do sistema de transporte público de Galicia, impulsada polo Grupo Popular para asegurar a prestación deste servizo a todos os usuarios con todas as garantías e coa máxima seguridade xurídica para os operadores. O portavoz de Infraestruturas, Jesús Goldar, animou aos grupos da oposición a realizar “aportacións construtivas” na tramitación parlamentaria deste texto lexislativo, “co obxectivo de que entre todos sexamos quen de poñer unha solución acaída e urxente a un grave problema que pon en serio risco a milleiros de persoas que traballan nun sector fundamental para a economía de Galicia”.

Jesús Goldar explicou que esta proposición de lei vén dar resposta á recente sentenza do Tribunal Supremo que anulaba a renovación das concesións de transporte público regular permanente de uso xeral por estrada e o plan de modernización deste servizo. “A consecuencia directa desta sentenza é que dos 145 contratos de transporte interurbano existentes en 2009, só 14 manterían a súa vixencia”, apuntou.

Neste sentido, sinalou que a Xunta de Galicia ten interposto un incidente de nulidade fronte a esta sentenza do Tribunal  Supremo, ao considerar que procedeu a unha valoración da constitucionalidade dunha disposición autonómica de rango legal, a Lei 5/2009, o que está excluído da competencia do citado tribunal.

“O Grupo Popular cre firmemente que este texto achegará seguridade xurídica aos usuarios dos servizos públicos de transporte da competencia da Comunidade Autónoma; ás empresas que deben prestar o dito servizo público e, por suposto, aos seus traballadores”, manifestou. Ademais, dixo que “non só achega a solución adecuada para garantir esta estabilidade, senón que establece mecanismos para afrontar unha intensa modernización do servizo público e a súa plena adaptación ás demandas da sociedade para as próximas décadas”.

PLAN DE TRANSPORTE

Jesús Goldar explicou que a planificación deste novo sistema de transporte público será afrontada polo Plan de Transporte Público de Galicia, que determinará, ordenará e establecerá a oferta de servizos de transporte público da competencia da Xunta e implementará a coordinación da totalidade de servizos de transporte público que se desenvolvan no territorio galego.

Este Plan de Transporte analizará a ordenación do territorio entermos de mobilidade, fixará os modelos de xestión de servizosbaixo demanda das persoas usuarias; e regulará os requisitos básicos que deba cumprir a oferta de transporte público en ámbitos tales como accesibilidade, conectividade territorial, seguridade, interconexións modais e intermodais nos principais nós de conexión.

Así mesmo, establecerá os sistemas de tarificación que resultarán aplicables ao conxunto do sistema de transportes; complementará as condicións básicas de dereitos e obrigas das
persoas usuarias; e garantirá a accesibilidade para o conxunto da poboación.

CONSELLO GALEGO

Os traballos de elaboración e aprobación deste Plan de Transporte non superarán os 21 meses e na elaboración do mesmo está prevista a participación do Consello Galego de Transportes, no que están presentes a administración local, o sector empresarial, as organizacións sindicais, a representación de consumidores e usuarios, a de persoas con discapacitadas e membros doutras ámbitos sectoriais das administracións públicas de Galicia.

Outra das cuestións que destacou Jesús Goldar da nova Lei é a garantía da continuidade do servizo público afectado polo fallo xudicial. “Esta continuidade sería unha oportunidade para manter as liñas de modernización impulsadas na Lei 5/2009, a través da integración dos plans de transporte metropolitano e no modelo de tarifas zonais; a implantación do sistema de axuda á explotación; e o mantemento do compromiso de integrar progresivamente vehículos accesibles a persoas con mobilidade reducida”. 

O portavoz do Grupo Popular sinalou que o PP debe “traballar arreo para facer ver que a situación é moi complexa”

PEDRO PUY ASEGURA QUE A GOBERNABILIDADE EN ESPAÑA SE FACILITARÍA “SE GOBERNA QUEN TEN O MAIOR RESPALDO DA CIDADANÍA, QUE DE ACORDO COAS ELECCIÓNS E AS ENQUISAS É O PP”

Santiago, 6 de xuño de 2016.- O portavoz do Grupo Popular, Pedro Puy, manifestou hoxe que a gobernabilidade de España se facilitaría “se quen goberna é quen ten o maior respaldo da cidadanía, que de acordo coas eleccións e co que vamos coñecendo das análises demoscópicas é o Partido Popular”.

A preguntas dos medios sobre o posible sorpasso de Unidos Podemos ao PSOE nas vindeiras eleccións xerais, Pedro Puy salientou que “as enquisas reforzan ao PP e a consolidación e a fidelidade do seu voto”, polo que avanzou que “o feito de que quede un ou outro partido por diante non vai contribuír a facilitar a gobernabilidade”.

ESFORZO DE RESPONSABILIDADE

Neste sentido, Puy apuntou que cos datos aportados polas enquisas “vanse manter ou mesmo incrementar as dificultades para organizar un goberno estable en torno á confluencia dos grupos máis extremistas co PSOE”. Esta situación “vai esixir un especial esforzo de responsabilidade ao PP”, que a xuízo do portavoz popular debe centrarse máis en confirmar que os cidadáns avalíen o feito desde as eleccións de decembro que de preocuparse por quen quede segundo.

Pedro Puy sinalou que o PP debe “traballar arreo para facer ver que a situación é moi complexa”, agravada porque a partir do mes de xaneiro “non teremos o colchón duns orzamentos aprobados que permitan que a xestión pública siga realizándose sen problema”.  

Por este motivo, considerou necesario “intentar convencer aos cidadáns de que estamos no bo camiño e a alternativa pode conducir a unhas incertezas e incapacidades de formar goberno que non a fan boa”.

O Grupo Popular espera que a oposición apoie a proposta de declaración institucional de apoio aos traballadores de Alcoa

PUY SALIENTA A IMPORTANCIA DA PROPOSICIÓN DE LEI DE TRANSPORTE PÚBLICO PARA “DAR GARANTÍAS XURÍDICAS A UN SECTOR QUE ESTÁ ACOMETENDO TRANSFORMACIÓNS IMPORTANTES”

Santiago, 6 de xuño de 2016.- O portavoz do Grupo Popular, Pedro Puy, salientou hoxe a importancia da proposición de lei de medidas urxentes para a actualización do sistema de transporte público de Galicia, que mañá inicia a súa tramitación parlamentaria co debate de toma en consideración en Pleno, porque “é necesario dar garantías xurídicas ao sector, que está acometendo unha serie de transformacións importantes para mellorar o servizo que prestan aos cidadáns”.

Pedro Puy lembrou que o cumprimento da sentenza do Tribunal Supremo supuxo que dos 145 contratos de transporte interurbano existentes en 2009, só 14 manterían a súa vixencia. Neste sentido, indicou que esta proposición de lei é “unha saída falada co sector, establecendo un marco que garante a elaboración dun plan de transporte para sacar a concurso as liñas e que as decisións que se adoptaron para mellorar o servizo se manteñan ao longo do tempo”.

DECLARACIÓN ALCOA

Na súa comparecencia ante os medios logo da reunión dos deputados do Grupo Popular para preparar a sesión plenaria desta semana, o portavoz amosou a confianza en que “os grupos da oposición apoien a declaración institucional de apoio aos traballadores de Alcoa, que están a vivir incertezas en relación á situación das plantas de A Coruña e San Cibrao”.

Puy tamén se referiu á comparecencia do conselleiro de Educación en relación coas decisións adoptadas polo Goberno galego en relación coa posibilidade de utilizar a maior marxe de déficit autorizado polo Goberno central para a realización de investimentos no ámbito da educación.

CONCERTO CONTRARIO AOS INTERESES

Respecto da proposición de lei do BNG para que se aprobe o concerto económico para Galicia, o portavoz popular manifestou que no Partido Popular “non compartimos nin as contas da vella que botan os nacionalistas respecto do concerto económico, nin a filosofía subxacente”, xa que considerou que “esa norma sería moi contraproducente e contraria aos intereses de Galicia”.

Para rematar, Pedro Puy salientou que, “pese a que estamos nun proceso electoral de xerais e as próximas eleccións autonómicas, o Parlamento galego está a aproveitar o período de sesións para a aprobación de medidas e tramitar normas como a modificación da Lei de Servizos Sociais, o proxecto de Lei de área metropolitana de Vigo ou a que afecta ao transporte público por estrada”.

Compromete a continuación desta aposta medioambiental coa elaboración dunha nova Lei de Conservación da Natureza

Tellado destaca a “sensibilidade verde” do PPdeG como demostración de que é o partido que máis se parece a Galicia

• Destaca a recente posta en marcha pola Xunta da nova Rede de Parques Naturais de Galicia como un exemplo do compromiso do PPdeG co medio ambiente da nosa terra

• Refírese ao patrimonio natural galego como “unha peza fundamental na construción da nosa identidade como pobo” e afirma que o PPdeG “ten que levar integrado no seu proxecto de futuro para este país” a súa conservación

Pontedeume, 5 de xuño de 2016.- O secretario xeral dos populares galegos, Miguel Tellado, animou no Día Mundial do Medio Ambiente a alcaldes, voceiros e membros de NN.XX. a “combinar o verde co azul do PPdeG” para parecerse máis a esa “Galicia verde e azul” que é a que “nos move”.

Despois dun paseo polo Parque Natural das Fragas do Eume, no que foi acompañado pola conselleira de Medio Ambiente e Ordenación do Territorio, Beatriz Mato, e polo presidente provincial do PPdeG, Diego Calvo, Tellado explicou a visita como unha contribución, por parte do PPdeG, á estratexia de difusión e posta en valor dos parques naturais de Galicia emprendida pola Xunta.

Neste sentido, Tellado destacou a recente posta en marcha por parte do Goberno de Feijóo da nova Rede de Parques Naturais de Galicia, co fin de “xestionar dun xeito coordinado tanto os parques como os monumentos naturais, os humedais ou as paisaxes protexidas”.

O secretario xeral do PPdeG enmarcou esta medida nunha aposta global da Xunta pola conservación do medio ambiente galego, que vai dende a posta en marcha de máis de 30 novas depuradoras para o saneamento das rías ata o incremento dos puntos limpos de recollida de residuos ou a posta en marcha de actuacións ambientais financiadas polo canon eólico.

Tellado comprometeu a continuación desta aposta “mentres os galegos e galegas nos outorguen a súa confianza” e salientou iniciativas de futuro como a inclusión de cláusulas ambientais na contratación pública autonómica ou o deseño, na próxima lexislatura, dunha Estratexia de Sustentabilidade Ambiental e dunha nova Lei de Conservación da Natureza.

O número dous do PPdeG identificou esta aposta polo medioambiente como un xeito de “defender Galicia”, ao considerar o patrimonio natural como “unha peza fundamental na construción da nosa identidade como pobo e da nosa forma de ser e de vivir”, ao nivel da lingua e da cultura.

Tras lembrar que o 12% da superficie da nosa Comunidade está cuberta de espazos protexidos, Tellado concluíu que “Galicia é fundamentalmente verde” motivo polo que, insistindo unha vez máis en que “somos o partido que máis se parece a Galicia”, afirmou que o PPdeG debe “ser tamén un partido cunha sensibilidade verde, cunha vocación de respecto e protección do medio ambiente”.

En consecuencia, o secretario xeral dos populares galegos manifestou o compromiso do seu partido de “levar integrado no seu proxecto de futuro para este país a conservación deste patrimonio que nos fai únicos”.