Iniciativa sobre a elaboración dunha estratexia de medicina personalizada e terapia celular avanzada no marco do futuro plan galego de oncoloxía
A comezos de 2020, a Xunta de Galicia anunciou que comezaba os traballos para elaborar un novo Plan Galego de Oncoloxía, na estela dos avances no tratamento contra o cancro que levaron a crear en 2017 a Unidade de Oncoloxía Pediátrica de Galicia, que uniu os recursos das estruturas organizativas da Xestión Integrada de Vigo, Santiago de Compostela e A Coruña. Esta unidade serviu como exemplo para trazar un plan que lograse axilizar o itinerario de visitas clínicas e acelerar o diagnóstico e o inicio do tratamento.
Ante as eleccións autonómicas do ano 2020, o Partido Popular de Galicia incluíu o desenvolvemento dese proxectado Plan no seu programa electoral. Pero quixo facelo concretando algunha das melloras que ese Plan debía introducir.
En particular, fíxose referencia ao seguinte compromiso: “Incluiranse terapias avanzadas, poñendo en marcha un Centro de Terapia CAR-T en Galicia e elaborando una estratexia de medicina personalizada e terapia celular avanzada para que os galegos poidan beneficiarse deste tipo de tratamentos dunha forma máis próxima”.
A chamada terapia avanzada é aquela coa que se pretende que o sistema inmune do paciente recupere a capacidade de recoñecer e destruír de forma selectiva as células tumorais. Forman parte da inmunoterapia, unha forma de tratamento do cancro que se pretende que no futuro complemente aos clásicos tratamentos de radioterapia e quimioterapia. Ter en Galicia un centro CAR-T implicaría dotar a Galicia da posibilidade de fabricar no noso propio territorio os medicamentos indicados para estes tratamentos. O avance neste eido, no que se teñen dado algúns pasos por parte do SERGAS, requirirá dun importante esforzo organizativo e económico. Trátase dunha aposta política de primeiro nivel que o Grupo Popular cre que a Xunta debe levar a cabo baixo o amparo dun mandato parlamentario firme.
Por todo o exposto, desde este Grupo Parlamentario, presentamos a seguinte proposición non de lei en Pleno:
“O Parlamento de Galicia insta á Xunta de Galicia a que, no marco do seu futuro Plan Galego de Oncoloxía, elabore unha estratexia de medicina personalizada e terapia celular avanzada e poña en marcha un centro de terapia CAR-T en Galicia”.
Rexistro Iniciativa: http://www.es.parlamentodegalicia.es/Expedientes/11/PNP-000436
Nota de prensa: http://ppdegalicia.com/index.php/gl/novas/item/4857-o-parlamento-galego-demanda-a-posta-en-marcha-dun-centro-de-terapia-car-t-en-galicia
