Santiago, 9 de marzo de 2022.- O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta a promover o mantemento e ampliación dos programas e axudas destinados á inclusión sociolaboral das mulleres máis vulnerables; consolidar os recursos para mulleres con discapacidade; reforzar a perspectiva de xénero no ámbito medioambiental; apoiar a promoción profesional das mulleres no ámbito cultural e a visibilización da súa produción artística; fomentar as boas prácticas e implicación dos medios de comunicación para promover a igualdade; a concienciación da sociedade en torno á igualdade; así como consolidar e impulsar a igualdade no ámbito deportivo.
A viceportavoz popular, Paula Prado, afirmou que “debemos enfocar as liñas de actuación no ámbito da igualdade de xeito transversal, de maneira que as políticas públicas que se desenvolvan ao seu abeiro teñan en conta as necesidades específicas de todas as mulleres; pero tamén estruturais, tendo en conta a diversidade da sociedade galega, en xeral, e a das mulleres, en particular, desde unha perspectiva interseccional orientada a acadar unha sociedade verdadeiramente inclusiva”.
Paula Prado lembrou que a Xunta “ten asumido un firme compromiso coa sociedade galega en prol da igualdade de dereitos e oportunidades entre mulleres e homes, que pasa inescusablemente pola loita contra a violencia de xénero, erradicación da fenda salarial, mellorar a empregabilidade de mulleres vítimas de violencia de xénero ou promoción do emprendemento feminino, entre outras accións”.
Máis en concreto, salientou que a área de igualdade do Goberno galego contará este ano con 31,4 millóns de euros, un 14 por cento máis que no 2021 e máis dun 24 por cento con respecto a 2020.
ACTUACIÓNS NO ÁMBITO DA IGUALDADE
No ámbito concreto da promoción da igualdade, a viceportavoz popular citou algunhas das actuacións levadas a cabo pola Xunta de Galicia nestes anos, como as axudas a concellos e entidades locais, para centros de información ás mulleres, o fomento da conciliación ou a promoción da igualdade; a asociacións e entidades de iniciativa social, para atención a mulleres en situación de vulnerabilidade ou o fomento do asociacionismo; ás ANPAS, federacións e confederación de ANPAS; para compensar a redución da xornada laboral nas empresas e institucións; ou o programa EMEGA de emprendemento feminino.
Para rematar, Prado destacou o impulso por parte do Goberno galego á nova Lei galega de igualdade de mulleres e homes, cuxo anteproxecto foi aprobado polo Consello da Xunta a pasada semana e iniciará neste mes de marzo o período de consulta pública previa.
Este texto legal contemplará medidas que reforcen a igualdade de xénero en materia de dixitalización; ofrecerá protección ás mulleres fronte a ataques sexistas; promoverá programas municipais para crear espazos urbanos libres de violencia e acoso sexual; contribuirá á defensa dos dereitos e á visibilización das mulleres que sofren discriminación; ou introducirá a idea de benestar laboral nas empresas, vencellada coas políticas de conciliación, substitución por maternidade, prevención de riscos laborais, teletraballo e responsabilidade social empresarial.
“Unha vez máis, Galicia será pioneira en regular estas cuestións, porque a nosa Comunidade merece unha lei adaptada á realidade do século XXI, mentres o Goberno de España está enredado en discutir a ideoloxía de xénero Queer”, indicou a viceportavoz popular.
