22 de febreiro de 2023. O Pleno do Parlamento de Galicia aprobou hoxe a proposición non de lei do Grupo Popular, que non contou co apoio do BNG, a través da que se pide á Xunta a elaboración neste ano 2023 dun Plan galego fronte ás condutas aditivas.
“O obxectivo é poder dar resposta aos novos perfiles de adición, como é o caso das adicións ás novas tecnoloxías e o xogo, mellorar os recursos cos que contamos para a atención aos pacientes complexos e adecuar os recursos existentes ás necesidades actuais”, manifestou a portavoz popular de Sanidade, Encarna Amigo.
A proposición non de lei contempla, como liñas fundamentais deste Plan fronte ás condutas aditivas, a relevancia da prevención e o seu beneficio, especialmente nas idades de adultos novos e menores de idade; a dotación de recursos para elaboración propia de campañas de prevención, así como a creación dunha liña de axudas e colaboracións con entidades do sector que desenvolvan actividade preventiva e de asistencia a persoas afectadas; e adoptar a consideración de todas as persoas afectadas por unha adición como enfermas, seguindo os criterios validados dende o punto de vista clínico e asistencial para elo, e que poidan ser tratados da súa patoloxía a través do sistema público de saúde.
ESFORZO INNEGABLE DA XUNTA
Ademais, demanda ter en consideración as adicións a novas tecnoloxías e situacións derivadas; crear un Comité Galego de Estudo das Adicións, que integre a persoal da administración, clínico, asistencial, do asociacionismo implicado e do eido académico que permita avaliar a evolución do problema e presentar propostas de medidas ante o Goberno de Galicia; e, por último, cumprir o acordo parlamentario de marzo de 2021 sobre as unidades que tratan condutas aditivas, dentro do marco xeral de acordo entre Xunta e FEGAMP para delimitación competencial no ámbito das administracións locais e autonómica.
Encarna Amigo salientou o “innegable esforzo” que a Xunta de Galicia está a facer no eido da saúde mental e mostra disto é o aumento das prazas formativas, que nesta convocatoria increméntanse un 53 por cento as de psicoloxía clínica e un 33 por cento as de psiquiatría.
“O obxectivo do Goberno galego é realizar unha labor de prevención, ademais de atender ás persoas afectadas por trastornos mentais e aditivos, polo que o traballo que se fai no marco do Plan de saúde mental debe ser complementario cunha acción particular no eido das condutas aditivas en todos os seus niveis”, engadiu.
Por último, a portavoz popular lamentou que o BNG “se manteña no seu discurso negacionista de todo o que acontece no ámbito sanitario en Galicia, porque o certo é que as accións demóstranse con feitos e o Goberno galego aposta pola saúde mental das persoas e pola prevención e tratamento dos trastornos aditivos”. “Así, leva anos traballando en distintos eidos, aumentando partidas orzamentarias, contratando a máis persoal e estendendo os programas de saúde mental e creando novos cando a poboación o require”, afirmou.
