Santiago, 2 de xuño de 2021.- A deputada do Grupo Popular Felisa Rodríguez criticou hoxe no Parlamento galego que “BNE e PSdeG pretendan que a Xunta de Galicia se faga cargo de actuacións que son competencia do Goberno central, o Concello de Redondela ou Audasa para a mellora do IES de Chapela”.
En concreto, Felisa Rodríguez asegurou que a Xunta, a través da Consellería de Educación, “nunca deixou de atender os problemas do IES de Chapela que son da súa competencia, pero non podemos aceptar que nacionalistas e socialistas pidan que realice actuacións que dependen de autorizacións ou actuacións por parte doutras administracións ou organismos”.
Así, explicou que “a Consellería é consciente da necesidade de dar cobertura á pista polideportiva ao aire libre, pero non pode facer nada mentres o Concello de Redondela non lle facilite os permisos urbanísticos necesarios e que están pendentes da aprobación do novo Plan Xeral”.
PANTALLAS ANTIRRUÍDO E NOVO ACCESO
Respecto da redución do impacto acústico provocado pola proximidade do centro á AP-9, a deputada popular lembrou que instalación de pantallas antirruído nas parroquias de Chapela e Trasmañó foi un logro do anterior alcalde, Javier Bas, e da plataforma de afectados pola AP-9, que conseguiron o compromiso de Audasa e do Ministerio de Fomento de executar un paquete de medidas compensatorias pola ampliación da autoestrada: eliminación da peaxe de Redondela; reparación, reposición e mellora de vías municipais; e instalación de pantallas antirruído.
“É preciso que o Goberno central e Audasa cumpran canto antes todos estes compromisos”, demandou Felisa Rodríguez, quen criticou que “agora BNG e PSdeG esixan á Xunta que asuma estas obrigas que non so da súa competencia”.
No que atinxe á apertura dun novo acceso peonil ao IES de Chapela desde a estrada nacional, a deputada popular afirmou que a Consellería “xa comunicou ao centro que non ten inconveniente na súa apertura, pero hai que ter en conta que calquera novo acceso require da autorización do Ministerio competente en estradas nacionais”.
