O PPdeG reclamou hoxe ao Goberno de Pedro Sánchez que elimine definitivamente a obrigatoriedade da cita previa nas oficinas da Seguridade Social das zonas rurais e garanta unha atención presencial directa, accesible e de calidade a todos os cidadáns, sen diferencias entre territorios, criticando que a cita previa só sexa obrigatoria nos municipios do rural.
Así fixeron esta reclamación en Celanova a deputada nacional Ana Vázquez e o senador Francisco José Fernández, acompañados pola secretaria da xestora local do PP nesta vila, Ana Antorrena, ante unha das oficinas da Seguridade Social que aínda mantén a obrigatoriedade da cita previa.
Os representantes populares denunciaron que o Executivo continúa facendo caso omiso ao mandato do Congreso dos Deputados, que o pasado 28 de maio aprobou, por 186 votos a favor e 159 abstencións, unha Proposición non de lei do Grupo Popular para eliminar a cita previa como requisito exclusivo de acceso ás oficinas da Administración Xeral do Estado.
“Pasaron máis de dous meses dende que o Congreso lle ordenou ao Goberno central garantir unha atención presencial con ou sen cita previa, pero nada cambiou”, advertiron. Como exemplo, sinalaron que a propia páxina oficial da Seguridade Social continúa indicando que no centro comarcal do Instituto Nacional da Seguridade Social de Celanova a atención préstase con “cita previa obrigatoria”.
Para os populares galegos, esta situación resulta especialmente grave nunha provincia como Ourense, caracterizada polo envellecemento da poboación, a dispersión territorial e o elevado número de persoas que viven no medio rural. “Non se pode obrigar a unha persoa maior a realizar por internet os trámites para solicitar unha pensión, unha prestación de viuvez ou unha incapacidade. A Administración ten que estar ao servizo dos cidadáns e non converterse nun labirinto que os deixa desamparados”, subliñaron.
UNHA INICIATIVA ESPECÍFICA PARA A SEGURIDADE SOCIAL
Ante a falta de resposta do Executivo, o Grupo Parlamentario Popular presentou unha nova Proposición non de lei centrada especificamente na atención prestada polo Instituto Nacional da Seguridade Social e pola Tesourería Xeral da Seguridade Social.
A iniciativa reclama suprimir o carácter obrigatorio e xeneralizado da cita previa, permitindo que os cidadáns poidan acudir directamente ás oficinas. A cita manteríase como unha opción voluntaria para aquelas persoas que prefiran reservar previamente o día e a hora da súa atención. O PP propón tamén establecer un prazo máximo de dez días hábiles para conseguir cita nos trámites esenciais, especialmente nas solicitudes de pensións de xubilación, incapacidade permanente, viuvez e orfandade, así como nas prestacións por nacemento e coidado de menores.
Ademais, pide habilitar canles de atención prioritaria para os colectivos máis vulnerables, entre eles as persoas maiores de 65 anos, con discapacidade e os residentes nos municipios rurais. En todos estes casos deberá garantirse a atención presencial sen necesidade de realizar previamente ningunha xestión telemática. A proposta complétase coa cobertura inmediata das vacantes existentes nos cadros de persoal da Seguridade Social e coa aprobación dunha oferta extraordinaria de emprego público que permita recuperar os niveis de atención anteriores á pandemia.
O GOBERNO OCULTA OS DATOS DE OURENSE
Ana Vázquez lembrou que o pasado 28 de abril, xunto con outros deputados do Grupo Popular, formulou unha batería de preguntas parlamentarias para coñecer os tempos medios de resolución das diferentes prestacións da Seguridade Social na provincia de Ourense dende 2017, os prazos para recoñecer o complemento por fenda de xénero ou maternidade e o número de expedientes pendentes de resolución.
Porén, na súa resposta do 10 de xuño, o Goberno non facilitou ningún dos datos solicitados sobre Ourense. Limitouse a reproducir os prazos máximos establecidos legalmente: 90 días para as pensións de xubilación, 135 para as prestacións de incapacidade permanente, 90 para as de viuvez e supervivencia, 30 para incapacidade temporal e maternidade e seis meses para o ingreso mínimo vital.
“O Goberno non respondeu a unha soa das preguntas formuladas nin explicou cantos ourensáns están esperando pola resolución dos seus expedientes. Esa opacidade confirma a súa falta de interese por solucionar un problema que afecta directamente a pensionistas, familias, autónomos e traballadores”, criticou Vázquez.
Pola súa banda, Francisco José Fernández incidiu na necesidade de reforzar os cadros de persoal da Seguridade Social para garantir unha atención pública áxil e eficaz, mentres que Ana Antorrena puxo o foco nas dificultades que a obrigatoriedade da cita previa provoca entre os veciños e veciñas de Celanova e da súa contorna, especialmente entre as persoas maiores e quen reside nos municipios rurais da comarca.
Os representantes populares insistiron en que a dixitalización debe servir para facilitar a relación coa Administración, pero nunca para excluír a quen non dispón de medios ou coñecementos tecnolóxicos. “A cita previa pode seguir existindo como instrumento voluntario de organización, pero non pode ser unha porta pechada. Os cidadáns teñen dereito a ser atendidos e o Goberno ten a obriga de poñer os medios humanos e materiais necesarios para facelo posible”, concluíron.
