Solicitude ao concello de Vigo que poña a disposición do Ministerio de Cultura os terreos para a futura obra da Biblioteca Pública do Estado en Vigo
O proxecto da futura Biblioteca Pública do Estado en Vigo implica a participación das tres administracións: o Concello de Vigo,que cede a parcela; o Ministerio de Cultura, que redacta o proxecto, executa a obra civil e dota de equipamento; e a Xunta de Galicia, que recibe o edificio e pasa a xestionalo cos orzamentos propios da Comunidade Autónoma.
Os técnicos da Xunta de Galicia elaboraron hai máis de dous anos un plan de necesidades para a futura biblioteca cunha superficie útil de entre 8.000 e 8.500 m². As dimensións non podían ser inferior posto que, como se explicou en diversas ocasións, Vigo carece dunha rede de bibliotecas municipais e o tamaño medio das bibliotecas construídas polo Ministerio de Cultura é de entre 6.000 e 6.500 m².
A proposta de cesión da parcela realizada inicialmente polo Concello era insuficiente en relación ás necesidades dunha cidade do tamaño de Vigo. Pola contra, o proxecto da Xunta de Galicia permitía dotar á cidade dunha infraestrutura cultural de primeiro nivel. Por iso, xa no mes de outubro de 2020 o Grupo Popular presentou unha proposición non de lei (PNL) na que se solicitaba:
Por unha banda, que o concello de Vigo realizase coa maior brevidade posible a cesión da parcela para a edificación da futura biblioteca.
Pola outra, que o Goberno do Estado incorporara xa nos orzamentos de 2021 unha partida específica para iniciar a construción coas características do
proxecto da Xunta de Galicia.
Esta proposición non de lei, que pretendía xa no ano 2020 axilizar os trámites para a creación da nova sede da biblioteca en Vigo, só contou cos votos a favor do Grupo Popular.
Desde entón, avanzouse nalgúns aspectos e así, no mes de marzo de 2022, o Goberno do Estado aceptou, finalmente, a postura da Xunta de facer una biblioteca acorde ás necesidades de Vigo.
En setembro deste ano, o responsable de cultura da Xunta de Galicia, nunha xuntanza co Ministro de Cultura, Miquel Iceta, volveu manifestar a súa preocupación pola Biblioteca de Vigo.
Nestes momentos, o Concello de Vigo é a única administración que non está colaborando para que a cidade conte cunha infraestrutura cultural tan necesaria. Desde o Grupo Popular consideramos prioritario que o Concello, responsable de ceder os terreos onde se edificará a futura biblioteca, realice as xestións oportunas para que o Ministerio de Cultura poida iniciar, canto antes os traballos, seguindo o plan de necesidades elaborado Polos técnicos da Xunta de Galicia.
Polo exposto, o Grupo Parlamentario Popular de Galicia presenta a seguinte Proposición non de lei:
“O Parlamento de Galicia insta á Xunta de Galicia a que lle solicite ao Concello de Vigo que, coa máxima urxencia, poña a disposición do Ministerio de Cultura os terreos para comezar a futura obra da Biblioteca Pública do Estado en Vigo”.
