O presidente do Executivo galego, Alberto Núñez Feijóo, destacou hoxe a consolidación da Tarxeta Benvida, cunha achega inicial de 18 millóns en 2017 para incluír máis produtos e ampliar os beneficiarios.

Feijóo avanzou na rolda de prensa do Consello que ás máis de 12.600 familias que xa son usuarias desta tarxeta, estímase que se van sumar outras 15.000 no próximo ano. Ao que engadiu que ademais dun incremento cuantitativo, esta iniciativa contará tamén con importantes melloras, ampliando tanto os supostos que dan dereito á axuda, como os lugares e produtos incluídos no programa.

En relación á ampliación de supostos, o titular da Xunta incidiu en que ademais das familias que no ano 2017 teñan un fillo ou adopten un neno menor dun ano, tamén se poderán beneficiar da Tarxeta Benvida aquelas que estean en situación de garda con fins adoptivos dun neno menor dun ano.

Así mesmo, explicou que tamén se aumentarán os lugares onde se pode utilizar a tarxeta, sumándose os establecementos de puericultura ou os especializados en artigos e produtos para a infancia ás farmacias, parafarmacias, supermercados e tendas de alimentación da convocatoria anterior.

Cómpre recordar que a contía total da axuda, como ata o de agora, ascende a 1.200 euros, a razón de 100 euros mensuais durante o primeiro ano de vida do bebé.

Durante a súa intervención, o responsable autonómico lembrou que esta axuda é compatible coas prestacións por fillo menor de 3 anos ao cargo e a exención de pago nas escolas infantís para familias que teñan xa outro fillo no mesmo centro, co Bono Concilia, co Bono Coidado, co incremento de prazas públicas en escolas infantís para nenos/as de 0 a 3 anos e coas Casas Niño no rural.