Iniciativa sobre o prazo para a reclamación ás entidades financeiras dos gastos de formalización do préstamo hipotecario que se consideran abusivos

A sentenza do Tribunal de Xustiza da Unión Europea (TXUE) do 16 de xullo de 2020, aínda que aclara certos aspectos en relación coa consideración dos gastos de formalización das hipotecas como abusivos, deixa a determinación de outros aspectos ao dereito Nacional e á interpretación dos tribunais.

Un destes aspectos é o prazo para reclamar á entidade financeira os gastos de formalización do préstamo hipotecario que se consideran abusivos, unha cuestión que pode afectar á moitas numerosas persoas consumidoras, limitando o seu dereito para ser restituído nos seus prexuízos.

A sentenza do TXUE no seu fundamento xurídico 89 indica que: Do auto de remisión despréndese que este prazo, fixado no artigo 1964, apartado 2, do Código Civil, parece empezar a correr a partir da conclusión dun contrato de préstamo hipotecario que contén unha cláusula abusiva, extremo este cuxa comprobación, con todo, correspondeao órgano xurisdicional remitente.

Sen embargo, a sentenza non se pronuncia sobre este extremo, determinando exclusivamente que: O artigo 6, apartado 1, e o artigo 7, apartado 1, da Directiva 93/13 deben interpretarse no sentido de que non se opoñen a que o exercicio da acción dirixida a facer valer os efectos restitutorios da declaración da nulidade dunha cláusula contractual abusiva quede sometido a un prazo de prescrición, sempre que nin o momento en que ese prazo comeza a correr nin a súa duración fagan imposible na práctica ou excesivamente difícil o exercicio do dereito do consumidor para solicitar tal restitución.

Polo tanto, o Tribunal de Xustiza da Unión Europea non se pronuncia de forma clara e taxativa sobre o prazo aplicable, nin sobre o momento de inicio e o momento de finalización, unha indefinición que vai en contra do principio de seguridade xurídica.

Polo exposto, o Grupo Parlamentario Popular presenta a seguinte proposición non de lei en Comisión:

“O Parlamento de Galicia insta á Xunta de Galicia a solicitar do Goberno do Estado que unifique o criterio respecto ao prazo dispoñible para as persoas consumidoras que queiran solicitar os gastos de formalización do préstamo hipotecario que se consideran abusivos, preferiblemente con rango normativo, propoñéndose que sexa de cinco anos desde a súa finalización ou cancelación no rexistro da propiedade”.

Rexistro Iniciativa: http://www.parlamentodegalicia.gal/Expedientes/11/PNC-000320