Santiago, 23 de marzo de 2021.- O viceportavoz do Grupo Popular, Miguel Tellado, considerou hoxe no Pleno do Parlamento como un “erro malintencionado que o BNG pretenda facer culpable á Xunta da situación na que se atopa o sector naval de Ferrol ou do peche da central térmica de As Pontes, cando saben perfectamente que toda a responsabilidade é do Goberno de España”.

Neste sentido, demandou que o BNG “asuma as súas responsabilidades nesta situación, porque foron os nacionalistas galegos co seu voto os que fixeron presidente do Goberno a Pedro Sánchez, logo daquel pacto entre Ana e Adriana que ía salvar a Galicia de todos os males”.

Miguel Tellado reiterou que “desde o PPdeG vimos alertando desde hai moito tempo da difícil situación que se vive na comarca de Ferrol, coa ausencia de carga de traballo no sector naval, o peche anticipado da central térmica de As Pontes, a marcha de Siemens-Gamesa, a delicada situación da industria electrointensiva ou a perda de tráficos portuarios”.

INACCIÓN DO GOBERNO DE ESPAÑA

“Unha situación que se agrava por momentos ante a inacción do Goberno de España, de quen depende o estaleiro público da ría de Ferrol e a política enerxética que está a condicionar o futuro de moitas das industrias galegas”, manifestou.

Neste sentido, Tellado indicou aos deputados do BNG que “se equivocan de porta ao pretender facer culpable á Xunta da situación na que se atopa o sector naval de Ferrol ou do peche da central térmica de As Pontes, porque a responsabilidade é do Goberno de España”.

“Foi o BNG o que nomeou Presidente de Goberno de España a quen freou o proxecto de construción das Fragatas F-110; a quen decidiu pechar a central térmica de As Pontes, vinte anos antes de cando correspondería; e a quen decidiu xestionar os Fondos Next Generation dende a Moncloa, desatendendo as necesidades dos territorios”, lembrou. Ademais, dixo que “non só lle regalaron a Presidencia do Goberno ao PSOE a cambio de nada, senón que tamén o fixeron coa Alcaldía de Ferrol, o mesmo PSOE con quen o BNG cogoberna en moitos concellos e varias deputacións”.

EVITAR A CRÍTICA AO GOBERNO SOCIALISTA

Miguel Tellado lamentou que ao BNG “sempre lle parece pouco o que fai a Xunta, pero miran cara outro lado e buscan malas escusas para evitar criticar ao Goberno socialista”. Así, dixo que “non son de recibo os atrasos das fragatas F-110, o abandono do proxecto de Estaleiro 4.0, a negativa a construír un buque de acción marítima nos estaleiros de Ferrol, posicionarse en contra da construción militar por razóns ideolóxicas, ou rexeitar a UTE Windar-Navantia que devolveu Astano á actividade”.

Respecto do saneamento da ría de Ferrol, o viceportavoz popular subliñou que o Goberno galego “leva investido 115 millóns de euros na marxe sur da ría, e todo o sistema de depuración está en servizo coa posta en marcha da EDAR e a conexión da nova rede”. “Non pretenderán vir a este Pleno a instar á Xunta a facer o que xa está facendo”, cuestionou.