16 de febreiro de 2023. A deputada do Grupo Popular Rosalía López criticou hoxe no Parlamento galego que o BNG “demande agora a reversión á xestión pública dos centros autonómicos de atención á dependencia con xestión externa, cando moitos deles foron externalizados polo Goberno bipartito de socialistas e nacionalistas”. Pero é que, ademais, na actualidade “o BNG segue a externalizar a xestión de moitos centros e servizos públicos alí onde goberna, ben nos concellos ou nas deputacións provinciais”.
Rosalía López lembrou que a Lei estatal de promoción da autonomía e atención ás persoas en situación de dependencia é a que determina como se prestan os servizos neste eido. Ao mesmo tempo, a Lei de servizos sociais de Galicia, tamén aprobada por socialistas e nacionalistas en 2008, sinala que estes servizos poden ser prestados tanto de xeito directo, indirecto, en réxime de concerto social ou a través de convenios con entidades sen ánimo de lucro.
MÁIS DO 70% DAS PRAZAS EN MANS PRIVADAS
“O balance do paso do BNG polo Goberno bipartido, á fronte da Vicepresidencia da Igualdade e do Benestar, foi a promoción de catro centros de xestión pública directa, cun total de 240 prazas, e a externalización de outros cinco centros, con 607 prazas”, concretou a deputada popular, quen subliñou que “deste xeito máis do 70 por cento das prazas foron para mans privadas”.
“En definitiva, a gran maioría dos centros da Xunta de xestión externa xa estaban en funcionamento durante o Goberno bipartito, no que o BNG ostentaba as competencias xustamente en materia de política social”, manifestou.
Rosalía López apuntou que “o BNG segue na actualidade externalizando servizos sociais e residencias nos concellos e deputacións provinciais onde goberna”. Así, ningunha das 8 residencias das que é titular a Deputación de Lugo é de xestión 100% pública e en concellos como Ribadeo a xestión da residencia municipal tamén é privada.
“Cando o BNG está na oposición esíxelle ao Goberno galego unha xestión 100 por cento pública dos seus centros sociais, pero cando goberna privatiza o 100 por cento dos que fai”, concluíu.
A deputada popular afirmou que un servizo público “debe cumprir as condicións e os parámetros establecidos pola Consellería de Política Social, garantindo a calidade de atención aos traballadores e cumprindo cos rateos establecidos para que os usuarios teñan un servizo de calidade”.
ACUSACIÓNS SEN FUNDAMENTO
Respecto da situación do centro terapéutico ocupacional Souto de Leixa de Ferrol, Rosalía López lembrou que “nas inspeccións realizadas nos anos 2019, 2020, 2021 e 2022 o único que se puido constatar foron deficiencias no seu estado de conservación das instalacións, polo que este centro non ten tramitado expediente sancionador algún, nin consta proposta da inspección neste sentido”.
Neste sentido, manifestou que “moitas persoas que traballan neste centro están a pasalo realmente mal coas acusacións sen fundamento que o BNG están a verter sobre eles” e demandou ao BNG a “cesar caos calumnias e os infundios cos que desvirtúan e menosprezan o seu traballo”.
“O único certo é que este centro é moi antigo e, polo tanto, de moi difícil mantemento, a pesar de que se veñen facendo obras de acondicionamento que continuarán no futuro para a mellora das instalacións”, rematou.
