Santiago, 29 de xaneiro de 2020. O Parlamento aprobou hoxe no Pleno unha iniciativa do Grupo Popular a través da que se esixe ao Goberno de España “que elimine con urxencia as barreiras burocráticas que entorpecen, e mesmo bloquean, o retorno dos galegos e españois do exterior” e para que os trámites que teñen que realizar sexan “máis fáciles, máis áxiles e máis flexibles”, tal e como expuxo a deputada Raquel Arias na súa intervención.
A voceira de Emigración do Grupo Popular explicou que os retornados “viven un auténtico pesadelo burocrático” á hora de conseguir documentos “vitais para o desenvolvemento da súa vida laboral e persoal en Galicia” e que “condicionan a súa integración”.
PARELLAS MIXTAS
A deputada popular detallou as diferentes problemáticas que afrontan os galegos da diáspora no seu regreso a Galicia, coma no caso da homologación de títulos universitarios. “Estas xestións chegan a prolongarse máis de dous anos, mentres a Xunta resolve a homologación de títulos non universitarios, que si é da súa competencia, en menos de tres meses”, dixo. Dous anos de espera nos que “os retornados perden oportunidades de traballar en base á súa cualificación e Galicia perde talento”.
Arias explicou tamén as dificultades das familias mixtas para obter permisos de residencia e traballo. “É moi habitual que no núcleo familiar do retornado a parella ou os fillos teñan nacionalidade estranxeira”, explica, “pero esas xestións eternízanse e en demasiados casos os permisos son denegados, deixando ás familias nunha situación de inseguridade e entorpecendo o mantemento da unidade familiar”. “Propoñemos unha autorización residencial temporal para familiares de españois con nacionalidade estranxeira que lles permita establecerse primeiro e consolidar a posteriori un permiso definitivo”, manifestou a deputada.
Do mesmo xeito, Arias defendeu a relevancia de “garantir o troco do permiso de conducir dos retornados, unha materia pendente en países como México o EEUU”, ao tempo que expresou a necesidade de suprimir as taxas para a expedición de documentos básicos, como o pasaporte en países baixo unha crise social e económica, como Cuba ou Venezuela, “con custos tan elevados que moitos galegos non poden asumir, bloqueando a súa saída e o retorno”.
RETORNA 2020
Raquel Arias considerou contraditorio que a Xunta teña en marcha a Estratexia Retorna 2020, cun orzamento de 235 millóns de euros para favorecer o regreso dos galegos á súa terra con diversos mecanismos e axudas directas, mentres o Goberno de Sánchez “non move nin un dedo para solucionar esta problemática que afecta especialmente a Galicia, a comunidade que máis retornados recibe de toda España“.
Neste contexto, Arias fixo referencia ao Plan de Retorno que o Goberno central aprobou o pasado mes de marzo e que, case un ano despois, “conseguiu só o regreso de 19 españois do exterior”. Neste sentido, confrontou este dato cos 20.000 retornados que chegaron a Galicia nos últimos catro anos e lembrou que só no 2019 o Goberno galego concedeu axudas económicas directas a máis de 1.000 familias a través do Retorna 2020.
Unhas achegas que supuxeron un investimento de máis de 3 millóns de euros entre as bolsas para estudar un máster en Galicia atraendo o talento do exterior; axudas para afrontar os gastos derivados do retorno; ou apoio económico para emprender un negocio. “A Xunta é a única administración que vela polos retornados galegos”, asegurou a deputada popular.
Arias lembrou as liñas de axudas da Consellería de Economía, Emprego e Industria para o fomento do emprego e que priorizan aos galegos que regresan a Galicia; as axudas de Educación para cursar estudos universitarios; ou os beneficios para as familias de retornados, que poden percibir a Tarxeta Benvida en igualdade de condicións. De feito, a Consellería de Política Social ten realizado melloras na convocatoria para facilitar o acceso destas axudas aos galegos que inician o camiño de volta a Galicia.
DATOS DE RETORNO
Arias valorou moi positivamente as cifras de retorno da última década, período no que chegaron á comunidade case 42.000 galegos do exterior, 20.000 só na última lexislatura. “Se o pasado foi o século da emigración, este estase convertendo no do retorno”, asegurou.
