Santiago, 20 de abril de 2018.- O Parlamento de Galicia aprobou hoxe unha proposición non de lei do Grupo Popular a través da que se insta á Xunta de Galicia a desenvolver a figura das agrupacións de defensa contra os incendios contempladas na normativa de incendios forestais. “A loita contra os incendios require da colaboración cidadá, sobre todo se temos en conta que tres de cada catro lumes teñen carácter intencionado”, manifestou o portavoz de Montes, Silvestre José Balseiros.
Na súa intervención na Comisión 7ª, Balseiros considerou “crucial fomentar a participación da sociedade civil na vixilancia e detección de incendios forestais a través da publicación dun decreto que regule a figura das agrupacións de defensa contra os incendios forestais”.
SEN RISCO PARA A INTEGRIDADE DOS PARTICIPANTES
En concreto, apuntou que, entre outras actuacións, “poderían acometer a realización de actividades de prevención e defensa contra incendios forestais nas tarefas de detección, vixilancia e disuasión, e colaboración na investigación”.
“Cando falamos de que poden participar nas tarefas de extinción, nunca nos estamos a referir á extinción directa, xa que non contan co equipos de protección individual; pero si nos traballos de remate dun incendio, cando xa simplemente queda un retén para verificar que está totalmente apagado ou na vixilancia dos incendios, avisando das posibles alertas”, explicou o portavoz popular. En definitiva, “sempre en actuacións que non supoñan un risco para a integridade dos participantes”.
José Silvestre Balseiros manifestou que “para colaborar na extinción de incendios estas agrupacións deberán estar inscritas como tales no rexistro da Xunta de Galicia e asinar o correspondente convenio coa Administración galega”. A modo de exemplo, citou os casos da Federación Galega de Caza, de agrupacións de radioaficionados ou de asociacións ecoloxistas.
VENTA DA MADEIRA QUEIMADA
No debate dunha iniciativa sobre a retirada da madeira afectada e queimada polos incendios forestais nos montes de xestión pública, o portavoz popular subliñou que “a súa totalidade saíu á venda antes de que rematara o ano 2017 a prezos de mercado”.
Porén, Balseiros lamentou que “aproximadamente a metade dos lotes quedou sen comprador e nunha alta proporción foi adquirida por empresas portuguesas”. Neste sentido, criticou “a falla de compromiso real e de interese por parte da industria galega á hora de implicarse na retirada da madeira queimada dos montes galegos, malia ter escenificado a súa disposición a cooperar neste proceso tras a vaga de lumes de outubro pasado”.
“O Goberno galego cumpriu a súa parte do acordo sacando á venta a prezos de mercado toda a madeira queimada nos montes galegos, pero a industria decidiu non presentarse a estas poxas e mesmo, nalgún caso, presentou baixas temerarias, incumprindo así o seu compromiso inicial”, sinalou.
