Santiago, 11 de maio de 2021.- A viceportavoz do Grupo Popular, Paula Prado, insistiu hoxe no Pleno do Parlamento que “non renunciamos a ter máis competencias que sexan útiles e melloren a xestión dos galegos, pero consideramos prioritario o pago de xeito inmediato dos 204 millóns de euros do IVE de 2017 recoñecidos pola sentenza do Tribunal Supremo, os incentivos polo cumprimento das regras de gasto e déficit, as transferencias das políticas de emprego, a titularidade da AP-9 cos fondos correspondentes e a xestión do dominio público marítimo-terrestre”.

“Respectamos a Constitución, o Estatuto e o marco autonómico para conseguir máis e mellor autogoberno conforme ao noso status constitucional de nacionalidade histórica, pero debemos distinguir entre as reivindicacións que son urxentes e importantes”, sinalou a viceportavoz popular.

Deste xeito, Paula Prado concretou que “consideramos urxente que o Estado pague a Galicia os 204 millóns de euros que nos debe pola liquidación do IVE de 2017, unha débeda que acaba de ser recoñecida e ratificada pola sentenza do Tribunal Supremo; os 170 millóns de euros polo cumprimento das regras de gasto e déficit; os 100 millóns de euros das transferencias para as políticas de emprego; ou os cartos que nos quitou o Estado das partidas destinadas ao Plan de Vivenda”.

?Para Galicia é urxente que o Estado lle devolva os 204 millóns da liquidación do IVE de 2017,o Tribunal Supremo ven de dar a razón a @Xunta e a desmentir ao señor Caballero que non defendía o mellor para Galicia e o PSOE votaba en contra en Madrid desa devolución @paulapra2 pic.twitter.com/OCev2ter6n

— GrupoPopularGalicia (@GrupoPopularGal) May 11, 2021

A viceportavoz popular salientou que “Galicia ten acadado ao longo destes anos un nivel de traspaso de competencias que nos sitúa como a comunidade autónoma con máis transferencias acadadas do Goberno central: un total de 154 traspasos desde o ano 1978, só superados por Cataluña, con 190, e Andalucía, con 155”.

Prado explicou que “ao longo dos últimos anos a actividade se ralentizou, pero non só en Galicia”. Así, nos últimos dez anos só se realizaron o 3,5 por cento dos traspasos totais feitos ás comunidades autónomas, “na súa maior parte ao País Vasco e Cataluña en anos de gobernos do Partido Socialista pola súa debilidade parlamentaria”.

“O Goberno da Xunta non vai renunciar a aspirar ao teito competencial máximo, similar ao que se marque para calquera das comunidades históricas, estando a favor de demandar novas transferencias a Galicia sempre que sexan útiles, melloren a xestión para os cidadáns e non lle supoñan ningún gasto”, apuntou. Pero manifestou que “o autogoberno vai máis alá que o mero feito de recibir transferencias, senón que consiste en deixar gobernar á Xunta e non boicotear a modificación da Lei de saúde que aprobamos neste Parlamento para xestionar a pandemia”.

TRASPASO DE TRÁFICO COA GARDA CIVIL

Respecto do traspaso concreto das competencias en materia de tráfico, Paula Prado afirmou que “para o PPdeG este traspaso non leva implícito a expulsión da Garda Civil de Galicia” e asegurou que “o PPdeG renunciará ás competencias de tráfico se iso leva consigo a expulsión da Garda Civil das estradas galegas”.

?️O @ppdegalicia renunciará as competencias de tráfico si eso leva implícito que a Guardia Civil abandone Galicia,se pretenden que abandonen as nosas carreteras non conten con nós,Galicia non se entende sen a Guardia Civil que vertebra o noso territorio @paulapra2 @Mtelladof pic.twitter.com/2eY9OvDoDU

— GrupoPopularGalicia (@GrupoPopularGal) May 11, 2021

A viceportavoz popular explicou que o Grupo Popular se abstivo no debate do pasado Pleno sobre a transferencia de tráfico “porque non é unha prioridade para nós, e en ningún caso coincidimos co modelo do BNG ou o que se vai implantar en Navarra”. “Nós estaremos sempre do lado da Garda Civil porque Galicia non se pode entender sen o traballo deste corpo, xa que vertebra o territorio, especialmente no ámbito rural”, engadiu.