Os deputados galegos Ana Pastor, Celso Delgado e Juan Constenla participaron no X Foro Parlamentario Hispano-Portugués, celebrado na cidade lusa de Braga, para defender as prioridades da Eurorrexión Galicia-Norte de Portugal no contexto das relacións bilaterais.
Os parlamentarios, que formaban parte dunha delegación de deputados do Congreso de España e da Asemblea da República de Portugal, destacaron a importancia dos fondos europeos, especialmente os Next Generation, que constitúen “unha oportunidade única” para impulsar as infraestruturas de comunicación de Galicia e o Norte de Portugal. Igualmente, tamén se referiron á aprobación do Interreg España-Portugal (POCTEP 2021-2027), que é o principal programa de cooperación transfronteiriza da Unión Europea e que “debe ter un notable impacto na nosa Eurorrexión”.
En materia de infraestruturas ferroviarias, cualificaron a conexión en alta velocidade entre Vigo, Porto e Lisboa como “unha actuación prioritaria” e reclamaron un compromiso explícito do Goberno de España para o desenvolvemento da liña do AVE no tramo entre Vigo e a fronteira portuguesa, incluíndo a “tan necesaria” obra da Saída Sur de Vigo.
Ademais, pediron garantir que o actual tren Celta Porto-Vigo opere “en boas condicións de rendemento e frecuencias”, e resaltaron a necesidade de avanzar no desenvolvemento das obras de modernización e electrificación vinculado á fronteira e na parte española do tramo Tui-Guillarei.
En canto ás infraestruturas viarias, solicitaron “apoio e impulso” á conexión transfronteiriza internacional por estrada entre o Noroeste portugués e Galicia —concretamente por Macedo de Cavaleiros, pasando por Vinhais ata chegar á Gudiña— para potenciar a estación de alta velocidade Porta de Galicia, o acondicionamento e mellora da estrada OU-540 entre Celanova e a fronteira portuguesa, e a ampliación da plataforma para a construción dunha ciclovía da Ponte Internacional na Eurocidade de Salvaterra-Monção.
Os deputados galegos tamén insistiron en “divulgar as manifestacións culturais e creativas como matriz dunha identidade común e de promoción turística da Eurorrexión”, salientando a promoción turística do Xacobeo e, en particular, do Camiño Portugués, “que a día de hoxe é o segundo máis transitado, o que está a experimentar un maior incremento no número de peregrinos e polo que se tramita a súa inclusión na lista de Patrimonio Inmaterial da Humanidade da UNESCO”.
Por outra banda, puxeron en valor a importancia de impulsar a elaboración do Estatuto do Traballador Transfronteirizo entre España e Portugal, fixado como “medida prioritaria” no último Cume en Trujillo no 2021, e enmarcada na Estratexia Común de Desenvolvemento Transfronteirizo: “Trátase dun proxecto que non pode ser reducido a unha guía práctica informativa e que ten como finalidade principal mellorar as condicións de traballo e a mobilidade dos traballadores transfronteirizos para aumentar as súas oportunidades de acceso a postos de calidade e dar cobertura ás ofertas das empresas da Eurorrexión”.
Así mesmo, precisaron que hai que reforzar a cooperación de proximidade —especialmente nas zonas con maior densidade poboacional como é o caso da conca do Miño— apoiando os servizos colectivos de proximidade, compartindo recursos e favorecendo a utilización conxunta de equipamentos —áreas de educación, saúde, servizos sociais, protección civil, cultura ou deporte—, evitando duplicidades innecesarias e eliminando os custos de contexto transfronteirizo, “que lastran de forma moi negativa a economía da Eurorrexión”.
Finalmente, expresaron no Foro o rexeitamento á decisión da Comisión Europea de vetar a pesca de fondo en 87 áreas do Atlántico, que xera enormes problemas á frota española, singularmente á galega e á portuguesa.
