A secretaria xeral do PPdeG, Paula Prado, lamentou hoxe que a Galicia “non lle soara a frauta” con Pedro Sánchez este semana, no que foi “máis que un Debate sobre o Estado da Nación, un debate sobre o estado da súa nación”. “Sobre a nación que el está xestionando e que está fóra da realidade”, agregou.

Prado, acompañada de Román Rodríguez e co gallo da constitución da Comisión de Cultura da formación, visitou o Xacobeo Clarinet Fest, que se celebra desde hoxe no Auditorio Municipal de Lalín.

“Pedímoslle ao Goberno de España que se fixe en Galicia, que a teña en conta e que reciba ao presidente Rueda”, subliñou a continuación a secretaria xeral, e lembrou que a espera xa é de máis de 60 días desde a petición da xuntanza.

Non obstante, dubidou de “cal é o mes de xullo” para Sánchez, posto que neste mes tamén ían chegar os trens Avril, e agora non teñen data. “A reunión é importante non para o presidente Rueda, non para o Partido Popular, senón para Galicia en si mesma e para os galegos e galegas. Aí faremos todas as reivindicacións que temos pendentes”, incidiu.

NOVA COMISIÓN DE CULTURA DO PPdeG

En canto á nova Comisión de Cultura do PPdeG, Paula Prado salientou que está presidida polo buenense Daniel Chapela e acolle a persoas de concellos de tamaños moi diversos e de ámbitos culturais moi diferentes, polo que traballará para achegar propostas “libres de ideoloxía” que se adapten a todos os concellos galegos dentro do “proxecto común” para acadar “313 obxectivos” nas municipais do próximo ano.

Unha desas proposicións “relevantes” é a petición ao Goberno central de que cumpra con Galicia e coa súa cultura aprobando o PERTE cultural que se lle vai trasladar desde a Xunta con propostas por valor de 400 millóns de euros. “Será un pulo importante para este sector”, dixo.

O PERTE é unha clara mostra do dinamismo das artes escénicas, dos museos, das industrias creativas, da música, do audiovisual ou da literatura. Grazas ao labor da Xunta e das achegas de máis de 100 entidades, existen propostas que fomentan a transformación dixital, a competitividade, a sustentabilidade e a internacionalización da nosa cultura.

Pola súa parte, Román Rodríguez apuntou que “a cultura non é patrimonio de ningunha formación política, senón un conxunto de manifestacións que posibilitan que unha sociedade teña lazos de cohesión”.

“Entendemos que a cultura é unha parte básica de Galicia, que nos define como somos, pero que ademais de xerar emocións ou benestar, é tamén un elemento importante da perspectiva económica: uns 30.000 profesionais que xeran en torno a un 3% do PIB”, destacou Rodríguez, que tamén estivo na primeira reunión da Comisión, celebrada na sede do PP local: “Temos un gran labor por diante, imos facelo o mellor posible e estar á altura da cultura do país”

Na xuntanza salientouse tamén a necesidade de seguir traballando “con sentidiño” para, desde a cultura, impulsar o mundo rural e ofrecer solucións contra o despoboamento. Ademais, a Comisión servirá tamén para ofrecer novas propostas que, e seguindo modelos como o existente en Lalín co alcalde José Crespo e a concelleira Begoña Blanco, fomenten o respecto e o coñecemento do noso medio natural e da nosa paisaxe.