Alfonso Rueda reivindica o seu compromiso con Vigo e anuncia a compra do cine Fraga “para poñelo a disposición dos veciños”

Hoxe, nun encontro coa sociedade viguesa no que foi presentado pola candidata pola provincia de Pontevedra, Patricia García

Alfonso Rueda reivindica o seu compromiso con Vigo e anuncia a compra do cine Fraga “para poñelo a disposición dos veciños”

  • Destaca que o novo instituto de Navia será o primeiro de Galicia centrado nas especificidades académicas, tecnolóxicas e de sustentabilidade
  • Destaca os investimentos feitos en obras fundamentais para o desenvolvemento da cidade como a estación intermodal, así como a construción de 200 vivendas en San Paio de Navia e a reforma dos centros sanitarios da área sanitaria
  • Reitera a súa disposición a contribuír á reforma das pistas de atletismo de Balaídos e a impulsar o Centro de Asociacionismo no edificio dos vellos xulgados da rúa Lalín

12 de febreiro de 2024. O presidente e candidato do PPdeG, Alfonso Rueda, anunciou hoxe a compra, en colaboración coa Deputación de Pontevedra, do Cine Fraga de Vigo para convertelo nun espazo para “o reencontro da cidade coa creación artística e cultural” e sede permanente da Galicia Film Comission.

Nun almorzo celebrado esta mañá con representantes da sociedade viguesa, Rueda incidiu en que vai “seguir rexeitando a confrontación entre Administracións e defendendo que, se hai ganas reais de facer cousas e vontade de non obstaculizar, pódese contar coa Xunta, como se fai noutros concellos e lugares de toda Galicia”.

Afirmou que “a política da ocorrencia, de botar cousas ao aire, de buscar liortas e non facer nada, non funciona”, polo que avogou pola “xestión e por render contas” ante os cidadáns do traballo feito. Neste sentido, dixo que nestas eleccións autonómicas hai dúas opcións: “Ou unha maioría suficiente do PPdeG para pactar cos galegos e cumprir os nosos compromisos, ou un multipartito encabezado por un partido nacionalista-independentista”.

POLÍTICA PARA CREAR RIQUEZA

Na súa intervención, manifestou que “a política ten que axudar a crear riqueza para que a sociedade funcione, e para crear riqueza están os empresarios”. Así, apuntou que “a Administración ten que estar para estimular a economía, acompañala e non ser un obstáculo”, e para iso “o primeiro é o rigor económico”.

Neste sentido, salientou que “Galicia foi a primeira comunidade autónoma en aprobar os orzamentos para 2024 e na que menos medrou o endebedamento nos últimos anos”, polo que “temos pulmón para facer unha serie de cousas que outros non van poder levar adiante”. De feito, asegurou non estar interesado en que a Galicia lle condonen os intereses da débeda porque “son perfectamente asumibles”, pero si en “poder dicirlle ao Goberno central onde deben investirse os cartos que hai para outras comunidades”.

Tamén en clave económica, o candidato do PPdeG lembrou que o Goberno galego vén de establecer como máximo un ano para a tramitación de todos os proxectos de máis dun millón de euros de investimento “para facilitar e atraer investimentos”.

“O INVESTIMENTO EN EÓLICA É O NOSO PETRÓLEO”

Alfonso Rueda asegurou que “aquí non nos van os plantexamentos demagóxicos como os que algúns están a facer cos proxectos de renovables, porque o investimento en eólica é o noso petróleo”. Deste xeito, avogou por “ser amigables cos que queren investir en Galicia e ofrecer unha estabilidade e un rigor nas nosas contas e na tramitación administrativa para facilitar o seu asentamento”.

O presidente do PPdeG cualificou a Saída Sur ferroviaria de Vigo como “a infraestrutura máis publicitada en papeis, máis sometida a estudos e menos real”, e amosou a súa preocupación porque “a aposta de Portugal é clara e temos que corresponder”.

“Faremos todo o posible para que o Goberno portugués manteña o seu compromiso de enganchar a súa alta velocidade coa galega”, avanzou a este respecto e botando de menos “declaracións moito máis contundentes por parte da esquerda que ten influencia no Goberno central”.

Respecto da AP-9, Alfonso Rueda afirmou que “ogallá sexa gratis” pero recordou que, mentres o Goberno galego conxelou as tarifas das autoestradas da súa titularidade, as de titularidade estatal tiveron unha suba que non rexistraran en todo o século XXI. “Se non son capaces de conter a suba das tarifas, é difícil de crer que nos veñan dicir que van ser gratuítas”, indicou.

En materia de solo industrial, lembrou que o Goberno galego fixo todo o posible para a aprobación do Plan Xeral de Vigo, que agora permitirá ampliar o polígono de Valladares, en colaboración coa Zona Franca; e o parque empresarial de Balaídos. Ao tempo que considerou necesario seguir apostando pola PLISAN.

Alfonso Rueda tamén citou os 19 millóns de euros que o Goberno autonómico investiu na construción da estación intermodal de Vigo, pero lamentou que “a día de hoxe estean sen facer os seus accesos, que era o que tiña que aportar o Concello”. Ademais, avanzou que “imos seguir apostando polo transporte metropolitano, que xa utilizan 80.000 veciños de Vigo; e as bonificacións para sectores da poboación, que xa benefician a 30.000 menores da área e que agora estenderemos aos maiores de 65 anos”.

O líder dos populares galegos demandou “falar en serio de vivenda e ser realista”, ante o que avanzou que “seguiremos promocionando a súa construción”. En concreto, explicou que en Vigo xa están licitados os contratos para construír 200 vivendas en San Paio de Navia, cun investimento próximo aos 30 millóns de euros; e despois se urbanizará o polígono 1 para que, a través da promoción privada, se poidan facer 1.600 vivendas máis: “Intentaremos seguir investindo no Casco Vello desta cidade, onde nos atopamos co inconveniente de que, a pesar de aportar o 90% dos fondos, as decisións teñen que aprobarse polo Consorcio, que xa paralizou importantes investimentos nestes últimos anos”.

SANIDADE, EDUCACIÓN E SERVIZOS SOCIAIS

Un dos apartados nos que máis énfase fixo o candidato do PPdeG foi a sanidade, lembrando “todos os disparates que se dixeron do Hospital Público Álvaro Cunqueiro, que hoxe é un orgullo e un referente da sanidade en Galicia”.

Citou ademais as actuacións na mellora da Atención Primaria na área de Vigo, como o novo centro de saúde de Moaña, a ampliación do de Porriño ou as reformas dos centros de saúde de Salvaterra ou Crecente. Así como o novo centro de saúde de Mos ou a construción do Centro Integral de Saúde de Olimpia Valencia en Vigo, que contará cun investimento de 14,8 millóns de euros.

Ademais, demandou “que o Concello de Vigo poña a disposición da Xunta os terreos na ETEA para que poidamos investir 12 millóns de euros na urbanización da parcela que albergará a futura residencia de maiores que construirá a Fundación Amancio Ortega”.

No que respecta á educación, Alfonso Rueda destacou que o novo instituto de Navia, no que se investirán 14 millóns de euros e levará o nome do escritor Domingo Villar, será o primeiro de Galicia centrado nas especificidades académicas, tecnolóxicas e de sustentabilidade. Insistindo ademais no impulso da FP Dual e na proposta para que todos os universitarios que aproben teñan a matrícula gratis en todos os cursos de grao.

O presidente e candidato concluíu reiterando a súa disposición para contribuír con tres millóns de euros á reforma das pistas de atletismo de Balaídos, así como a impulsar o Centro de Asociacionismo no edificio dos vellos xulgados da rúa Lalín.

O PPdeG esixe ao BNG o cese inmediato do seu asesor condenado por terrorismo

“O Bloque ten a soldo no Parlamento Europeo a un membro de Bildu con antecedentes en ETA e condenado por terrorismo”, di Paula Prado
O Partido Popular de Galicia esixe ao BNG que cese de inmediato a un dos seus asesores no Parlamento Europeo, Pernando Barrena, pola súa condena por pertenza á banda terrorista ETA.
“O Bloque ten a soldo no Parlamento Europeo a un membro de Bildu con antecedentes en ETA e condenado por terrorismo”, sinala Paula Prado.
Segundo recorda a secretaria xeral do PPdeG, Barrena –que exerce como asesor da eurodeputada nacionalista Ana Miranda– milita actualmente en Bildu e en 1985 foi detido por pertencer a un grupo de información de ETA. Motivo polo que posteriormente sería arrestado no ano 2008.
“Un novo caso máis de ocultación por parte do BNG e os seus escuros aliados”, sostén Paula Prado ao tempo que acusa aos nacionalistas de pretender agochar ademais un programa electoral co que queren “impoñer o monolingüismo, suprimir as provincias e mesmo botar á Guardia Civil de Galicia”.

Imaxe: Pernando Barrena – Ok Diario

Rueda: “Eu quero máis e mellor Galicia, non que nos convirtamos nunha sucursal máis das franquicias independentistas que apoia o PSOE”

Hoxe, nun mitin en Vilagarcía de Arousa ao que asistiron 400 persoas e no que tamén interviron o presidente provincial do PP de Pontevedra, Luis López, o candidato pola provincia de Pontevedra, Raúl Santamaría, e a portavoz do PP local, Ana Granja

Rueda: “Eu quero máis e mellor Galicia, non que nos convirtamos nunha sucursal máis das franquicias independentistas que apoia o PSOE”

  • “Chova ou non, faga frío ou calor, pase o que pase, o próximo domingo tedes que ir a votar”, arengou ao tempo que subliñaba que o próximo 18 de febreiro “é a verdadeira enquisa”
  • Ante o remate do prazo para exercer o voto CERA o próximo xoves 15, tivo unhas palabras para os galegos do exterior: “Non sodes mercancía electoral da que falar mal durante catro anos e á que pretender convencer en 15 días como fai a esquerda. Sodes galegos que tiveron que emigrar co posto e que, co voso esforzo, construíchedes a Galicia de hoxe”

O presidente e candidato do PPdeG, Alfonso Rueda, asegurou hoxe que “as mellores páxinas da historia de Galicia están aínda por escribir” e por iso mostrou o seu desexo de escribilas man a man cos galegos e galegas “como continuación de todo o pasado e do moito que queda por escribir”.

Facendo un chamamento ao voto, recoñeceu ser consciente de que pedir unha maioría é “pedir moito” porque “supón pedirlle á xente a súa confianza para seguir xestionando os seus recursos e tamén pedirlle a súa axuda para parar o retroceso que quere promover a esquerda”. Pero remarcou que está disposto a asumir ese compromiso e a cambio ofrece “unha xestión desde a experiencia e o inconformismo” e “as ganas de aproveitar o aprendido para seguir mellorando”.

“Chova ou non, faga frío ou calor, pase o que pase, o próximo domingo tedes que ir a votar”, arengou aos 400 asistentes ao mitin celebrado esta tarde en Vilagarcía de Arousa subliñando que o próximo 18 de febreiro “é a verdadeira enquisa”.

Recordou ademais que onte abriu o prazo para exercer o voto CERA –que estará aberto ata o próximo xoves 15– e quixo ter unhas palabras para os galegos do exterior: “Non sodes mercancía electoral da que falar mal durante catro anos e á que pretender convencer en 15 días como fai a esquerda. Sodes galegos que tiveron que emigrar co posto e que, co voso esforzo, construístes a Galicia de hoxe”.

“Preséntome para facerlle a vida un pouco máis fácil aos galegos e para que poidan atopar nos seus gobernantes a alguén que ofreza solucións aos seus problemas”, engadiu incidindo na importancia de contar cun Goberno “sereno á hora de tomar decisións, sensato nas súas actuacións e eficaz na súa xestión”.

“SE PRETENDEN ARROLLARNOS, EU SÁIOLLES AO CHOQUE”

Alfonso Rueda preguntouse “por que en Galicia non se poden seguir facendo as cousas ben”, ao contrario do que pretende ese multipartito da esquerda que “aspira a traer aquí os seus líos”. E dirixíndose directamente a eles afirmou: “Se eles pretenden arrollarnos, eu sáiolles ao choque”.

Explicou que fronte á Galicia que avanza, a alternativa que ofrecen os outros “é o mesmo que xa tiñamos superado hai 20 anos pero branqueado e escondido detrás dunha falsa sonrisa”. Pero, engadiu, aí está o seu programa para recordar a realidade: “A nosa primeira medida é de axuda ás familias. A súa, a independencia”.

“Eu non quero que Galicia sexa unha sucursal máis das franquicias independentistas que apoia o PSOE. O que eu quero é máis e mellor Galicia, que nos superemos a nós mesmos e que sigamos mellorando con sentidiño e normalidade”, concluíu.

Alfonso Rueda pide o voto para a Galicia que se supera a si mesma e non queda atascada en barullos multipartitos e separatistas

Hoxe, nunha cea-mitin en Sanxenxo na que tamén participaron o presidente do PP de Andalucía, Juanma Moreno, a candidata pola provincia de Pontevedra María Deza e o alcalde Telmo Martín

Alfonso Rueda pide o voto para a Galicia que se supera a si mesma e non queda atascada en barullos multipartitos e separatistas

  • Recorda que somos a Comunidade que máis apoia ás familias, que a educación pública galega está nos mellores niveis de España e que os galegos contan con prestacións únicas como o calendario vacinal infantil

10 de febreiro de 2024. O presidente e candidato do PPdeG, Alfonso Rueda, pediu hoxe o voto para a Galicia que funciona, que se supera a si mesma e non queda atascada en barullos multipartitos e separatistas, ofrecendo a cambio o seu compromiso coa confianza maioritaria que agarda acadar dos galegos e galegas o próximo 18 de febreiro.

Nunha cea-mitin organizada en Sanxenxo na que estivo acompañado polo presidente do PP de Andalucía, Juanma Moreno, a candidata pola provincia de Pontevedra María Deza e o alcalde Telmo Martín; o líder dos populares galegos insistiu en que o próximo 18 de febreiro só hai dúas opcións: ou os que van á contra de todo ou os que fan propostas de futuro desde o inconformismo e tendo a Galicia como razón de ser.

Reivindicou que, fronte ás visións sectarias dos partidos da imposición, os galegos séntense tan orgullosamente galegos como españois. E por iso avoga por unha Galicia na que as identidades non sexan un problema e ningún teña o dereito a dicir quen é máis ou quen é menos galego.

Tamén fixo balance do moito que avanzamos nestes anos, incidindo especialmente en que Galicia é a Comunidade que máis apoia ás familias, que a educación pública galega está nos mellores niveis de España e que, no eido sanitario, os galegos contan con prestacións únicas como o calendario vacinal infantil.

Alfonso Rueda asegura que o 18-F Galicia será, fronte a Sánchez e o nacionalismo, “o futuro e a esperanza de España”

Hoxe, nun mitin en Santiago de Compostela ao que asistiron 500 persoas e no que tamén participaron o presidente do PP de Andalucía, Juanma Moreno, a secretaria xeral do PPdeG, Paula Prado, e o candidato pola provincia da Coruña Borja Verea

Alfonso Rueda asegura que o 18-F Galicia será, fronte a Sánchez e o nacionalismo, “o futuro e a esperanza de España”

  • Reivindica “sen contradicións e sen complexos” que non é incompatible ser orgullosamente galego e orgullosamente español, nin fai falta ser menos español para ser mais galego
  • “Isto vai de ter palabra e eu si teño palabra e quero seguir traballando por Galicia sen que ninguén nos diga o que temos que facer. O único que necesitamos é a maioría suficiente para poder facelo”, defende

10 de febreiro de 2024. O presidente e candidato do PPdeG, Alfonso Rueda, ten claro que unha España mellor comeza en Galicia e por iso asegurou hoxe que o próximo 18 de febreiro os resultados das eleccións autonómicas demostrarán que a nosa Comunidade é tamén “o futuro e a esperanza de España”.

Reivindicou “sen contradicións e sen complexos” que non é incompatible ser orgullosamente galego e orgullosamente español, nin fai falta ser menos español para ser galego. Do mesmo xeito que tampouco é necesario que a outros territorios lle vaia mal para que a Galicia lle poida ir ben.

Neste sentido, e aproveitando a presenza no acto do presidente do PP de Andalucía, Juanma Moreno, o líder dos populares galegos subliñou que a nosa Comunidade é “parte fundamental dunha España diversa, plural e igualitaria”.

Alfonso Rueda cre que, ás portas da última semana de campaña electoral, xa están claras as dúas únicas opcións para Galicia: “Ou seguir mellorando desde o sentidiño e a estabilidade ou deixarnos levar polo barullo que vemos noutros sitios e que os partidos do multipartito queren traer aquí”.

Referíndose precisamente ao multipartito de esquerdas, o líder dos populares galegos acosounos de “seguir dicindo o mesmo que hai 20 anos pero agora intentando disimular e branquear as súas intencións” e retou ao BNG a facer campaña cos seus verdadeiros aliados: “Se os nacionalistas foran valentes, consecuentes e sinceros, deberían traer a ese do que tanto presumen cando cren que non os oen e con quen se fan fotos que logo negan: Arnaldo Otegi”.

Tamén aproveitou a celebración esta mañá dun acto con representantes do sector educativo na Cidade da Cultura para reivindicar que “a educación non é de ninguén máis que das familias, dos alumnos e dos docentes”, que “as aulas non son lugares para facer mítines” e que “os docentes non teñen obriga de ser axentes electorais de ningún partido”.

“Fronte ao modelo de adoutrinamento, de imposición e de monolingüismo, os galegos queremos liberdade. Porque empezan dicíndonos como hai que falar e acabarán dicíndonos como temos que pensar. Nós queremos pensar en liberdade”, defendeu.

Rueda apostou por “seguir funcionando como un pobo unido a pesar das diferenzas” e apelou ao inconformismo para seguir construíndo entre todos unha Galicia con “máis e mellores servizos públicos” sen esquecer nunca todo o avanzado. Ese é o espírito que, tal e como asegurou, impregna o programa electoral do PPdeG.

“Isto vai de ter palabra e eu si teño palabra e quero seguir traballando por Galicia sen que ninguén nos diga o que temos que facer. O único que necesitamos é a maioría suficiente para poder facelo sen escusas e cun único compromiso: entre os que conformamos as listas e os galegos que confíen en nós”, concluíu.

Alfonso Rueda aposta por seguir incrementando a seguridade viaria nas vías autonómicas para reducir a vulnerabilidade dos motoristas

10 de febreiro de 2024. O presidente e candidato do PPdeG, Alfonso Rueda, realizou hoxe un percorrido en moto desde a Cidade da Cultura en Santiago de Compostela ata a parroquia do Pedrouzo (O Pino) acompañado dunha trintena de motoristas e co obxectivo de concienciar sobre a especial vulnerabilidade dos condutores de motocicletas nas estradas e a importancia da seguridade viaria.

Cómpre salientar que as especiais características territoriais de Galicia, cunha orografía complexa e unha poboación espallada, esixen dunha rede de infraestruturas de comunicación completa e segura. De aí que sexa necesario aumentar os esforzos no mantemento e conservación das vías e poñer as novas tecnoloxías ao servizo dunha mobilidade máis segura, sostible e conectada.

O Goberno galego xa actuou ao longo destes anos en todos os treitos de concentración de accidentes da rede autonómica, logrando unha redución do 60% na sinistralidade. Por iso agora o PPdeG quere seguir esa mesma liña e no seu programa propón actuar en todos os puntos negros das vías autonómicas identificando os treitos con maior potencial de mellora e eliminando obstáculos dos marxes para evitar os accidentes e reducir a súa gravidade.

Alfonso Rueda anuncia a posta en marcha dun plan para detectar e previr o abandono escolar potenciando a FP básica

Hoxe, nun acto co sector educativo na Cidade da Cultura ao que asistiron 1.500 persoas e no que tamén participou o candidato pola provincia de Pontevedra Román Rodríguez

Alfonso Rueda anuncia a posta en marcha dun plan para detectar e previr o abandono escolar potenciando a FP básica

  • Ofrecerase información e orientación ao alumnado e levaranse a cabo actuacións específicas encamiñadas a reorientar aos rapaces en risco de abandono ou que xa deixaron de formarse, a desempregados e a mozos sen titulación académica
  • “O ensino de calidade é aquel que non cree en ningún tipo de imposición ideolóxica, lingüística ou partidista, senón que ofrece unha visión ampla para que a xente decida en liberdade”, sostén o presidente do PPdeG

10 de febreiro de 2024. O presidente e candidato do PPdeG, Alfonso Rueda, anunciou hoxe a posta en marcha do Plan FPGal360 co obxectivo de detectar e previr o abandono escolar antes de que se produza e derivar a ese alumnado a ciclos de Formación Profesional Básica.

Un obxectivo que se enmarca na procura de acadar o “abandono cero” e que o 100% dos rapaces sigan formándose e preparándose, polo menos, ata cumprir a maioría de idade. Por iso, a aposta do líder dos populares galegos é potenciar os ciclos formativos para que ningún mozo quede sen ter unha titulación e poida así mellorar a súa inserción laboral.

A través deste novo plan ofrecerase información e orientación sobre a FP Básica ao alumnado desde idades temperáns e levaranse a cabo actuacións específicas tanto para animar ao rapaces en risco de abandono ou que xa deixaron os estudos a seguir formándose, como para dar a coñecer a desempregados ou mozos sen titulación académica as oportunidades laborais que ofrecen estes ciclos formativos.

Na súa intervención, Alfonso Rueda asegurou que “para que Galicia funcione, a educación ten que funcionar”. Algo para o que é fundamental “contar cun profesorado e unha comunidade educativa con vocación e dedicación” e, sobre todo, a procura constante da calidade, a excelencia e a accesibilidade no sistema educativo.

E precisamente nesa liña incidiu na capacidade de “vertebración do territorio” que tamén ten a educación, apostando por “construír un sistema educativo presente en todas partes, que vaia onde están os alumnos e non ao revés e que lles posibilite o máximo posible o acceso aos centros educativos”.

Unha accesibilidade que tamén ten que ser económica e de aí o esforzo económico que se fai desde o Goberno galego por financiar a gratuidade da educación infantil de 0 a 3 anos e a manter conxeladas as taxas universitarias. Dúas medidas ás que Alfonso Rueda propón ademais engadir a gratuidade das primeiras matrículas en todos os graos universitarios e en todos os cursos.

En clave máis política, o presidente e candidato do PPdeG remarcou especialmente que “a docencia ten que baseares en ensinar e formar, non en adoutrinar” porque, do contrario, xeraríase rexeitamento e desapego:  “Unha cousa é educar en valores e outra educar en ideoloxía”.

“O ensino de calidade é aquel que non cree en ningún tipo de imposición ideolóxica, lingüística ou partidista, senón que ofrece unha visión ampla para que a xente decida en liberdade”, concluíu a este respecto.

Alfonso Rueda en Betanzos

Visita do presidente e candidato do PPdeG, Alfonso Rueda, a Betanzos acompañado polo cabeza de lista pola provincia da Coruña, Diego Calvo, e a tamén candidata provincial Cecilia Vázquez.

Durante o percorrido, visitou lugares emblemáticos da vila como a Porta da Ponte Vella ou o paseo á beira do río Mandeo e reiterou o seu compromiso de seguir impulsando a dinamización e revitalización do conxunto histórico-artístico da vila mediante o Plan Rexurbe.

De feito, en materia de vivenda,  o programa electoral do PPdeG inclúe a aposta por seguir dando vida aos centros históricos rehabilitando inmobles abandonados e o emprego da madeira certificada na rehabilitación de vivendas. Ademais do compromiso de ampliar o parque público de vivenda.

Alfonso Rueda aposta polo retorno dos galegos na diáspora ofrecendo novas axudas para os estudos universitarios e sanidade pública gratuíta

Alfonso Rueda aposta polo retorno dos galegos na diáspora ofrecendo novas axudas para os estudos universitarios e sanidade pública gratuíta

Hoxe, nun acto con galegos retornados en Vigo no que tamén participaron a candidata número 2 pola provincia de Pontevedra, Patricia García, e o responsable do PP exterior e tamén candidato pola provincia de Ourense, Antonio Rodríguez Miranda

Alfonso Rueda aposta polo retorno dos galegos na diáspora ofrecendo novas axudas para os estudos universitarios e sanidade pública gratuíta

  • “Hai que seguir ampliando dereitos a quen ten todo o dereito”, asegura o presidente ao tempo que remarca a “débeda” que a Galicia de hoxe ten con todos aqueles que no seu día tiveron que emigrar e “contribuíron a converternos nunha terra de oportunidades e de acollida”
  • Galicia rexistrou en 2022 un saldo migratorio positivo de 27.251 persoas máis que volveron respecto ás que se foron: “Son cada vez máis os que queren volver e quedarse porque aquí se vive moi ben”

Alfonso Rueda aposta polo retorno dos galegos na diáspora ofrecendo novas axudas para os estudos universitarios e sanidade pública gratuíta

8 de febreiro de 2024. O presidente e candidato do PPdeG, Alfonso Rueda, asegurou hoxe que quere dar un paso máis á hora de ofrecer facilidades ao retorno dos galegos na diáspora e por iso se compromete a poñer en marcha unha axuda para estudar un grao nas universidades galegas e tamén a que todos os retornados, veñan do país que veñan, poidan desfrutar da sanidade pública galega de xeito totalmente gratuíto.

Nun acto celebrado en Vigo, o líder dos populares galegos recordou que a día de hoxe xa se ofrece unha axuda para a realización dunha FP ou un máster, pero agora tamén se poderá cursar un grao “con axuda para a viaxe, a matrícula e a manutención”. Unha axuda que os seus beneficiarios verían complementada ademais coa gratuidade das primeiras matrículas universitarias que o PPdeG propón implantar no sistema educativo galego.

“Hai que seguir ampliando dereitos a quen ten todo o dereito”, remarcou Rueda ao tempo que recoñecía ser consciente das dificultades que, en función do país de procedencia, moitos galegos retornados se atopan á hora de acceder a prestacións sanitarias na nosa Comunidade. De aí o seu compromiso de que todos eles, “veñan do país que veñan”, terán sanidade totalmente gratuíta en Galicia.

O presidente asegurou que “os galegos retornados teñen moito que dicir no futuro de Galicia” e que a nosa historia non podería entenderse sen a diáspora. De feito, apuntou á “débeda” que a Galicia de hoxe ten con todos aqueles que no seu día tiveron que emigrar e “contribuíron a converternos nunha terra de oportunidades e de acollida”.

“A Galicia continental e a do exterior son a mesma porque non hai quen poña límites aos galegos”, engadiu ao tempo que explicaba que a mellor forma de manter esa “unión indisoluble” é facer todo o posible para que quen queira volver á que é a súa casa poida facelo nas mellores condiciones posibles. “Non só porque sexa un dereito, senón tamén por unha cuestión de xustiza e incluso de necesidade”, apuntou.

Os bos resultados desta política aberta cara os galegos do exterior pódese constatar co feito de que Galicia rexistrou en 2022 un saldo migratorio positivo de 27.251 persoas máis que volveron –desde o estranxeiro ou desde outras comunidades autónomas– que das que abandonaron a nosa Comunidade.

Unha cifra que Rueda cualifica de “récord e histórica” e que demostra que “son cada vez máis os que queren volver e quedarse en Galicia porque aquí se vive moi ben”. Por iso concluíu a súa intervención dando as grazas a todos eles por apostar pola nosa Comunidade e ofrecéndose a corresponder esa aposta: “Necesitámosvos para que Galicia siga funcionando”.

– FOTOS E INTERVENCIÓNS COMPLETAS EN VÍDEO E AUDIO DISPOÑIBLES PARA A SÚA DESCARGA NA CARPETA PRENSA PPdeG