O PPdeG enxalza a Rosalía de Castro como esencia da identidade de Galicia: “Somos un pobo orgulloso de si mesmo, da súa cultura e da súa lingua”

Hoxe, nunha ofrenda floral ante o monumento da escritora en Padrón con motivo do 187º aniversario do seu nacemento

  • Paula Prado asegura que “con ela aprendemos que a lingua é unha ponte para o entendemento e non un muro para fomentar a división” e que o seu papel foi clave na apertura e nos éxitos da nosa Comunidade

Ofrenda do PP a Rosalía de CastroO PPdeG rendeu hoxe unha homenaxe á figura de Rosalía de Castro con motivo do 187º aniversario do seu nacemento, enxalzando que a escritora representa a esencia do que fomos e somos os galegos: “Un pobo orgulloso de si mesmo, da súa identidade, da súa cultura e da súa lingua”.

A secretaria xeral do PPdeG, Paula Prado, o secretario da Comisión de Cultura do PPdeG, Valentín García, e Ángel Rodríguez Conde participaron esta mañá nunha ofrenda floral en Padrón na que quixeron reivindicar o legado que deixou a autora de Cantares gallegos e o seu papel na construcción da Galicia de hoxe.

“Con ela aprendemos que a lingua é unha ponte para o entendemento e non un muro para fomentar a división. Unha ferramenta para unir e para convencernos de que, como pobo, é moito máis o que nos une que o que nos diferenza e de que xuntos somos máis fortes”, explicou a número dous dos populares galegos.

Prado asegurou neste sentido que, “fronte a uns nacionalismos que pretenden separarnos entre bos e malos galegos e fronte aos que pretenden supeditar o destino de Galicia ao que decidan outros”, o PPdeG seguirá apostando pola unidade, a liberdade e o progreso.

Destacou así mesmo que, do mesmo xeito que Rosalía de Castro foi clave no rexurdir de Galicia, hoxe os galegos vivimos o que o presidente Alfonso Rueda denomina “Novo Rexurdimento” e que se materializa na apertura dunha Comunidade que non coñece límites: “Grazas a figuras como Rosalía de Castro e ás xeracións de galegos e galegas que nos precederon, Galicia é hoxe unha terra de retorno, de creación de emprego, de liderado cultural e referente para todo o mundo”.

“No camiño cara a Galicia do futuro, queremos reivindicarnos no que somos e no que queremos seguir sendo. E ningún espello mellor para mirarse nesta tarefa colectiva de seguir construíndo Galicia que Rosalía de Castro, a muller que nos fixo ser como somos”, concluíu.

A “INCONTESTABLE E INCUESTIONABLE” VITORIA DE RUEDA O 18-F

A secretaria xeral do PPdeG tamén aproveitou a ocasión para recordar a vitoria “incontestable e incuestionable” de Alfonso Rueda nas eleccións celebradas o pasado domingo asegurando que o partido sae desta primeira semana “absolutamente reforzada”.

Lamentou, en cambio que os partidos da esquerda “estean cuestionando unha vitoria tan contundente e tan importante para o futuro de Galicia”. Polo que remarcou que o futuro Goberno que encabezará o presidente Rueda “gobernará para todos os galegos, tanto os que votaron ao PPdeG como os que non”.

Alfonso Rueda considera que a suba en votos do PPdeG en Ourense é a recompensa ao intenso traballo feito polo partido na provincia

Hoxe, na Xunta Xestora Provincial do PP de Ourense acompañado polo líder do partido na provincia, Luis Menor, e a secretaria xeral do PPdeG, Paula Prado

  • Os populares galegos aumentaron o seu apoio na provincia en comparación coas eleccións autonómicas de 2020 ata acadar unha porcentaxe de voto moi próxima ao 50%
  • O presidente asegura que o pasado 18 de febreiro Galicia rexeitou unha forma de facer política baseada na chantaxe e nos privilexios para uns poucos e, en cambio, apostou maioritariamente pola responsabilidade, o sentidiño e a superación
  • Luis Menor reivindica que o partido mantén os 8 deputados e que os resultados acadados “non son froito da casualidade, senón a lóxica consecuencia da extraordinaria mobilización”

O presidente do PPdeG, Alfonso Rueda, puxo en valor hoxe o intenso traballo do PP de Ourense ao longo destes anos, e especialmente durante os últimos meses, e apuntou como resultado do mesmo o incremento no número de votos acadado na provincia respecto ás últimas eleccións autonómicas.

A pesar da renovación experimentada pola candidatura que encabezaba Elena Rivo, os populares galegos aumentaron o seu apoio na provincia en comparación co ano 2020 ata acadar unha porcentaxe de voto moi próxima ao 50%. Destacando especialmente o caso de Verín –onde a suba supera o 10%– e dunha ducia de concellos onde se acadou o pasado domingo un apoio de máis do 70% á lista do PP ou o caso de Quintela de Leirado, onde se acadou o pasado domingo un apoio do 90% á lista do PP.

O líder dos populares galegos asegurou que estes resultados son o mellor impulso para continuar co traballo ben feito e por iso agradeceu ao líder do partido na provincia, Luis Menor, a súa capacidade para pilotar unha transición que foi posible grazas á xenerosidade de todos.

Ante a Xunta Xestora Provincial do PP de Ourense, Rueda sostivo que a vitoria do PPdeG o pasado 18 de febreiro foi a constatación de que Galicia rexeita unha forma de facer política baseada na chantaxe e nos privilexios para uns poucos e, en cambio, aposta maioritariamente pola responsabilidade, o sentidiño e a superación.

Explicou ademais que a nova lexislatura estará chea de ilusión por construír a Galicia do futuro e por iso pide aos seus que sigan escoitando aos veciños e continúen facendo do bo Goberno e da boa oposición as sinais de identidade do PPdeG. Porque só así, traballando por mellorar a vida da xente, se garante que Galicia siga funcionando.

LUIS MENOR: “DIXEMOS QUE OURENSE NON ÍA FALLAR E NON FALLOU”

Luis Menor comezou a súa intervención lembrando que durante a campaña prometera que Ourense non ía fallar e “Ourense non fallou”. Así, destacou que 1 de cada 2 ourensáns votou ao Partido Popular e que isto se traduciu en que a formación conseguise na provincia máis votos que a suma de todas as formacións políticas que obtiveron representación no Parlamento de Galicia. O cal permitiu manter os 8 deputados conseguidos na anterior lexislatura.

Para o líder dos populares ourensáns a vitoria do PP de Ourense ten un valor especial no contexto galego pois, ademais das forzas políticas que se presentaron a estas eleccións en toda Galicia, “na provincia de Ourense tivemos que enfrontarnos a unhas siglas máis”. Con todo, subliñou, estas non conseguiron ser chave para formar goberno en Galicia: “O único deputado que conseguiron déixaos na máis irrelevancia política no Parlamento”.

Con estes resultados –“que non son froito da casualidade, senón a lóxica consecuencia da extraordinaria mobilización”; apunta Menor– o PP de Ourense adquire o compromiso de “cumprir coa palabra dada, sen renunciar nin deixar a ninguén a bandeira da reivindicación que nos deu a veciñanza”.

Alfonso Rueda reivindica a vitoria do PPdeG nas eleccións autonómicas coa mobilización máis alta da historia: “Galicia participou como nunca e votou como sempre”

Hoxe, acompañado polo presidente nacional do PP, Alberto Núñez Feijóo, na Xunta Directiva do PPdeG

  • “Galicia tiña que escoller entre as mentiras que algúns intentaron contar e o camiño da palabra. Eu creo no valor da palabra dada e por iso me comprometo a manter a miña palabra e a cumprir todo o prometido. Ese será o fundamento de todo o que faga”, asegura
  • Asume desde hoxe mesmo a obriga de gobernar para todos os galegos, tanto os que o votaron como os que non, porque “xuntos, en liberdade, con tranquilidade e con sentidiño, conseguimos superar o intento de separarnos e de levantar muros entre galegos bos e malos”

O presidente do PPdeG, Alfonso Rueda, logo de acadar a súa primeira maioría absoluta, reivindicou esta tarde a “contundente” vitoria acadada polo seu partido nas eleccións autonómicas do 18 de febreiro apelando á mobilización histórica que se deu nestes comicios: “Galicia participou como nunca e votou como sempre”.

Ante os membros da Xunta Directiva do PPdeG e acompañado polo presidente nacional do Partido Popular, Alberto Núñez Feijóo; o líder dos populares galegos quixo dar as grazas aos máis de 700.000 galegos que confiaron no seu proxecto e puxo de manifesto a responsabilidade que isto supón para el.

“Galicia tiña que escoller entre as mentiras que algúns intentaron contar e o camiño da palabra. Eu creo no valor da palabra dada e por iso me comprometo a manter a miña palabra e a cumprir todo o prometido. Ese será o fundamento de todo o que faga”, asegurou.

Neste sentido engadiu que asume desde hoxe mesmo a obriga de gobernar para todos os galegos, tanto os que o votaron como os que non, porque “xuntos, en liberdade, con tranquilidade e con sentidiño, conseguimos superar o intento de separarnos e de levantar muros entre galegos bos e malos”.

“Queremos traballar desde o primeiro día porque entramos nas eleccións cuns Orzamentos aprobados e saímos delas cuns Orzamentos xa en funcionamento, con moitas ganas de traballar e co apoio da maioría dos galegos”, subliñou ao tempo que facía un chamamento a non dar nada por gañado porque “a confianza dos galegos hai que gañala día a día”.

Fronte aos intentos de manipulación, ás descualificacións e ao dano feito só por obter rédito electoral, Alfonso Rueda asegurou que isto “nin funcionou nin funcionará” nunca en Galicia e avogou, en cambio, pola humildade e a tranquilidade que sempre triunfan.

En clave nacional, o presidente do PPdeG afirmou que onte Galicia deu claramente “un frenazo en seco a Pedro Sánchez e aos seus socios separatistas” e que os galegos dixeron que “nin queren nin van admitir chantaxes nin privilexios”. O que o pobo galego manifestou onte nas urnas, explicou, é que quere igualdade, entendemento, responsabilidade, sentidiño e dignidade para Galicia.

“A mensaxe que mandamos a través das urnas foi que nos sentimos moi orgullosos do que somos, do que facemos e do que queremos facer”, concluíu Rueda reivindicando a Galicia que funciona fronte ao fracasado intento de importar modelos que non paga a pena “nin intentar facelos funcionar”.

Alfonso Rueda: “Cada galego, viva onde viva e vote o que vote, ten en min alguén en quen confiar”

Hoxe, no mitin de peche de campaña na Coruña ao que asistiron 3.500 persoas e no que tamén participaron o presidente nacional do PP, Alberto Núñez Feijóo, o cabeza de lista pola provincia, Diego Calvo, e o presidente local do partido, Miguel Lorenzo

  • Se obtén a confianza dos galegos para seguir dirixindo o destino de Galicia, comprométese a “gobernar para todos sen sectarismos, sen adoutrinamentos, sen fronteiras e sen divisións entre bos e malos”
  • “Votemos polo que somos, polo que é Galicia: unha terra aberta e que quere un futuro compartido. Non é o momento de separarse. É o momento de superarse e facelo xuntos e convencidos”, engade
  • “Este domingo hai que atender á familia, aos amigos, facer deporte, descansar, pero sobre todo votar. Non hai escusa de ningún tipo”, afirma

O presidente e candidato do PPdeG, Alfonso Rueda, fixo hoxe un chamamento a “seguir construíndo a Galicia que soñaron os nosos pais e avós para poder legarlle o mellor aos nosos fillos”, onde a ninguén se lle pregunte de onde vén ou o que pensa e que só mire cara o futuro: “Cada galego, viva onde viva e vote o que vote, ten en min alguén en quen confiar”

O líder dos populares galegos iniciou a súa intervención agradecendo a todos os que fixeron posible unha campaña electoral “inesquecible” enchendo masivamente todos os lugares onde se celebraron mitins ao longo destes 15 días, incluídos os galegos que desde o exterior “viven Galicia en primeira persoa, con preocupación, con actitude construtiva e con sentimento”.

“Esta gran mobilización era necesaria e demostra aos que pensaban que isto non podía ser como sempre que non só foi como sempre, senón que foi a mellor campaña do Partido Popular de Galicia”, afirmou antes de pedir aos seus un último empuxón para seguir traballando “con convicción e disposición a falar con quen queira escoitar” ata o 18 de febreiro.

Subliñou acto seguido que non importa o tempo que faga o domingo, xa que o que realmente importa é votar e encher as urnas: “Este domingo hai que atender á familia, aos amigos, facer deporte, descansar, pero sobre todo votar. Non hai escusa de ningún tipo. E, se votamos, o domingo pola noite celebraremos e o luns porémonos a traballar”.

Alfonso Rueda aproveitou este último día de campaña para volver pedir o voto “para a Galicia que funciona” dirixíndose tanto a todos aqueles que sabe con seguridade que o van votar como a aqueles que, máis que nunca, “están agardando que alguén lles pida a súa confianza con argumentos e convicción”.

A todos eles dálles a súa palabra de que non vai renunciar a nada do que prometeu en campaña, nin fará cousas que dixo que non faría. Remarcando que todo aquel que vota ao PPdeG ten que ter claro que vota a un partido que “cumpre os seus compromisos porque cre no valor da palabra dada”.

Pediu así a confianza de todos eses votantes do PSOE que xa non recoñecen nin entenden a un partido “rendido ás ordes dos de arriba e totalmente entregado ao independentismo”. A todos eses “verdadeiros socialistas” aseguroulles que poden confiar nel do mesmo xeito que aqueles que noutras ocasións votaron a outras formacións: “Esta vez necesitámosvos máis que nunca”.

“Despois de que todos fagamos unha reflexión e de que cada un vote o que estime conveniente, eu me comprometo a que, se obteño a confianza dos galegos para seguir dirixindo o destino de Galicia, a gobernar para todos sen sectarismos, sen adoutrinamentos, sen fronteiras e sen divisións entre bos e malos”, afirmou.

“EN GALICIA CABEMOS TODOS”

Alfonso Rueda reivindicou “liberdade para sentir, vivir e falar nunha Galicia na que cabemos todos” fronte aqueles que pensan que “só serve o seu xeito de pensar, que só hai unha maneira de sentir e de ver a vida” e “non entenden o orgullo e o recoñecemento que supón ter dúas linguas nas que poder falar”.

“Este domingo votemos polo que somos, polo que é Galicia: unha terra aberta e que quere un futuro compartido. Non é o momento de separarse. É o momento de superarse e facelo xuntos e convencidos”, engadiu convencido de que “nunha Galicia que se supere hai moitas máis vantaxes que nunha Galicia que se separe”.

Defendeu así a Galicia do sentidiño, que convive tranquila e sen crisparse, que é líder en formación da xente nova, en innovación, en apoio ás familias, en servizos públicos e na que cada mozo ten garantido un futuro a través do ensino en todas as etapas educativas.

E, do mesmo xeito, avogou por unha Galicia que siga ofrecendo alternativas ao abandono escolar, na que se paguen cada vez menos impostos, que estea mellor comunicada, que respecte aos maiores, que respecte o seu patrimonio natural e cultural e que aproveite as oportunidades de crear emprego e riqueza.

“Quero unha Galicia na que cada galego poida elixir como vivir e como quere que sexa a súa propia historia. Unha Galicia sen imposicións, que viva en liberdade, en plenitude e sen complexos. Unha Galicia orgullosa de si mesma e que non teña necesidade de mirar cara outros lados nin de importar modelos fracasados”, concluíu Rueda pedindo a todos os galegos que “voten con orgullo do que somos”.

Catro recoñecidos artistas galegos mostran o seu apoio a Alfonso Rueda: “Unha rueda que nos fai rodar a todos nós”

Catro recoñecidos artistas galegos mostran o seu apoio a Alfonso Rueda: “Unha rueda que nos fai rodar a todos nós”

Catro recoñecidos artistas galegos mostran o seu apoio a Alfonso Rueda A través dun vídeo publicado polo PPdeG nas súas redes sociais

  • Agradecen o apoio recibido e o seu impulso á creación e difusión da arte galega reivindicando o bo momento que vive o tecido cultural na nosa Comunidade
  • Acislo Manzano, Antón Lamazares, César Taboada e Manolo Paz interveñen no vídeo para defender que apostar pola cultura é apostar tamén por Galicia e que así se ten demostrado con feitos desde o Goberno autonómico

Os artistas galegos mostran o seu apoio ao presidente e candidato do PPdeG, Alfonso Rueda, nun vídeo no que agradecen o apoio recibido polo Goberno galego nestes anos no impulso da creación e difusión da arte galega e reivindican o bo momento que vive o tecido cultural de Galicia.

Catro recoñecidos artistas galegos mostran o seu apoio a Alfonso Rueda: “Unha rueda que nos fai rodar a todos nós”
Catro recoñecidos artistas galegos mostran o seu apoio a Alfonso Rueda: “Unha rueda que nos fai rodar a todos nós”

O escultor ourensán Acislo Manzano reivindica que “os artistas son valiosos para o Goberno” e que este á súa vez tamén o é para eles na medida en que “ofrece liberdade e apoio”. O cal constitúe para el “a esencia galega” e un elemento fundamental para que os artistas poidan traballar por e desde Galicia: “Non hai que ir a Nova York, nin a París, nin a Roma porque en Galicia temos o que esa xente non ten”. E no que se refire ao presidente non dubida en afirmar: “É unha gran rueda que nos fai rodar a todos nós”.

Nesta mesma liña, o pintor lalinense Antón Lamazares considera que o programa de Alfonso Rueda vai na liña de “multiplicar a cultura” e que iso supón tamén “defender a casa grande que é Galicia” do mesmo xeito que fixera no seu día o presidente Manuel Fraga.

“O Goberno galego apostou claramente polas diferentes sensibilidades artísticas que hai en Galicia e asignou, por primeira vez en moito tempo, un papel fundamental ás ensinanzas de Arte”, sostén pola súa banda o tamén pintor César Taboada recordando a creación de novas escolas e centros artísticos “con todos os elementos da contemporaneidade”. O artista ourensán engade neste sentido: “Temos todo en Galicia, sen ter que saír de aquí”.

Por último, o escultor cambadés Manolo Paz recoñece abertamente que todo o que pode dicir da xestión cultural do Goberno galego é positivo, na medida en que no seu caso persoal contou co apoio que precisaba para poder levar a cabo un proxecto “moi ambicioso” de expoñer a súa obra en tres lugares catalogados como Patrimonio da Humanidade. “Somos galegos e debemos demostralo coa nosa cultura”, conclúe.

ENLACE DO VÍDEO EN REDES SOCIAIS

Alfonso Rueda asegura que ten “ganas de gañar” e pide o voto para que Galicia poida seguir o seu camiño sen impedimento

Hoxe, nun mitin en Vigo ao que asistiron máis de 1.500 persoas e no que tamén participaron a presidenta do PP de Madrid, Isabel Díaz Ayuso, a candidata pola provincia de Pontevedra Patricia García e a presidenta do PP local, Marta Fernández-Tapias

  • Aposta por unha Galicia que “siga sendo como é sen que ninguén nos diga como temos que ser” e na que non se separe aos galegos entre bos e malos en función do que pensan
  • Sostén que este domingo “hai que elixir entre a unión fronte a ruptura, entre as solucións fronte aos problemas e entre o cumprimento da palabra dada fronte aos quen farán todo o que dixeron que non farían e renunciarán a todo o que dixeron que non renunciarían”

O presidente e candidato do PPdeG, Alfonso Rueda, asegurou hoxe en Vigo que ten “ganas de gañar” e non polo mero feito de acadar o triunfo, senón porque é consciente do “moito que hai en xogo” e porque quere que Galicia poida seguir o seu propio camiño sen escusas nin impedimentos.

Explicou que quere unha Galicia na que non sexa necesario “separar aos galegos entre bos e malos en función do que pensan” para defender a súa identidade e ter “voz propia en España” e, do mesmo xeito, unha Galicia que “siga sendo como é sen que ninguén nos diga como temos que ser”.

Referiuse así á “esas minorías que queren impoñerse á maioría coa complicidade dun PSOE ao que lle da igual quen goberne Galicia” e fixo un chamamento aos votantes socialistas “desencantados, alucinados e descontentos porque non recoñecen ao que foi o seu partido”.

“A todos eses votantes do PSOE que non entenden a renuncia aos seus principios só para que o seu xefe de filas siga no seu asento, que senten que as cousas poden ser doutra maneira e que non queren separatismos en Galicia, dígolles que poden confiar en nós”, afirmou reivindicando que quere seguir sendo “o presidente de todos e cada un dos galegos”.

Ante unha audiencia de máis de 1.500 persoas, Alfonso Rueda ofreceuse para “seguir gobernando con sentidiño e sensatez, sen crear problemas novos e sen perder o tempo en discusións” e reivindicouse como bo xestor porque “xa hai de sobra na esquerda xente que non xestiona, que inventa un problema para cada solución e que só entende a política desde a crispación e o enfrontamento”.

Asegurou que este domingo “hai que elixir entre a unión fronte a ruptura, entre as solucións fronte aos problemas e entre o cumprimento da palabra dada fronte aos quen farán todo o que dixeron que non farían e renunciarán a todo o que dixeron que non renunciarían”.

“O partidismo non leva a nada, pero a experiencia si”, engadiu facendo un chamamento a “ver o que fixemos entre todos, mirar cara adiante e superarnos a nós mesmos”. Por iso, na recta final da campaña, o líder populares galegos remarcou que non vai renunciar a seguir facendo balance de todo o feito e a seguir facendo propostas onde outros só fan descualificacións.

Apostou así por seguir axudando ás familias con medidas como a gratuidade das escolas infantís ou das primeiras matrículas universitarias, por seguir mellorando a sanidade pública e por “tomar medidas desde o primeiro minuto”.

Comprometeuse así a que nos seus primeiros 100 días de goberno rebaixará o imposto de sucesións aos herdeiros colaterais, permitirá que as mulleres que queiran optar pola fecundación in vitro poidan facelo ata os 45 anos e poidan ademais conxelar os seus óvulos sen necesidade de ter ningunha patoloxía, continuará completando o calendario de vacinación infantil e comezará a ampliación do parque de vivenda pública.

Seguirá apostando así mesmo por mellorar as infraestruturas de Galicia con feitos e non, como fan outros, “baixando dun tren cos Reis Magos, nin bicando locomotoras, nin escusándose en estudos medioambientais e publicacións no BOE para ocultar a súa inacción”.

Nesta liña recordou que, mentres o PSOE e o BNG pactaron a gratuidade da AP-9 e en cambio os galegos sufriron a maior subida das peaxes da historia, as autopistas de titularidade autonómica seguen por segundo ano consecutivo coas súas tarifas conxeladas. “Esa é a diferenza entre a propaganda e as realidades”, concluíu.

Rueda rematou a súa intervención asegurando que se sinte preparado, motivado e con ganas para solicitar aos galegos a súa confianza e que “Galicia siga funcionando desde a estabilidade e sen perder o tempo en discusións nin egoísmos”.

Quixo agradecer ademais á presidenta Isabel Díaz Ayuso que represente tan ben a unha Comunidade onde hai moitos galegos como é Madrid, así como o seu apoio persoal ao longo desta campaña electoral: “Grazas por transmitir estas ganas de gañar”.

Alfonso Rueda subliña a súa ilusión por seguir acompañando aos galegos no camiño cara a Galicia da próxima década

Hoxe, nun mitin en Mos no que tamén participaron a candidata pola provincia de Pontevedra Felisa Rodríguez e a alcaldesa Nidia Arévalo

  • Anima así aos seus a afrontar estes últimos días de campaña pedindo ata o último voto con confianza pero sen confiarse, con optimismo, con orgullo polo feito e coa esperanza polo que queda por facer para que Galicia siga funcionando
  • Destaca investimentos en Mos como o complexo sociosanitario do Rebullón, o centro público de coidados intermedios ou as vivendas públicas que se van construír en San Eleuterio
  • Nidia Arévalo: “Mediante o voto útil, o voto para Mos, debemos devolverlle a Alfonso Rueda todo o apoio que sempre lle outorgou ao noso concello porque, con el, Galicia funciona”

O presidente e candidato do PPdeG, Alfonso Rueda, subliñou hoxe a súa ilusión por seguir acompañando aos galegos no camiño cara a Galicia da próxima década reivindicando que ama e respecta a nosa Comunidade tal e como é, sen necesidade de cambiala por nada.

O líder dos populares aposta por unha vitoria que permita a Galicia ter un goberno que merece: con ilusión, con experiencia e ao servizo de todos os galegos sen excepción. De aí que afirmase que o 18 de febreiro todos os galegos deben ter claro que o que se escolle é o camiño para os próximos entre, chamándoos a escoller a papeleta do PPdeG e con ela a da unidade, as solucións e a experiencia fronte á ruptura, as liortas, o partidismo e os nacionalismos.

Animou así aos seus a afrontar estes últimos días de campaña pedindo ata o último voto con confianza pero sen confiarse, con optimismo, con orgullo polo feito e coa esperanza polo que queda por facer para que Galicia siga funcionando.

E nesa Galicia que funciona xoga e seguirá xogando un papel moi importante o concello de Mos, xa que contará co complexo sociosanitario do Rebullón e cun dos primeiros centros públicos de coidados intermedios. Comprometeuse ademais a atraer novos investimentos que creen riqueza e emprego, como a Factoría do Deporte Galego, e a apostar pola vivenda pública con 20 novas que se van construír en San Eleuterio.

Do mesmo xeito, Rueda quere seguir vertebrando o territorio e neste sentido amosouse contrario a que a AP-9 siga sendo a autoestrada de titularidade estatal máis cara de España, xunto coa AP-53.

Concluíu facendo un chamamento a que este domingo os galegos aposten pola Galicia orgullosa de si mesma e do que é dentro de España, a Galicia unida con sitio para todos, a Galicia próspera e con oportunidades. A Galicia, en definitiva, que funciona e que debe seguir funcionando.

ARÉVALO: “MOS TEN QUE DEVOLVER A RUEDA O APOIO QUE SEMPRE NOS DEU”

Pola súa banda, a alcaldesa de Mos, Nidia Arévalo, agradeceu a “gran afluencia de persoas e o gran traballo que sempre desenvolve para que así sexa o equipo do comité local dos populares de Mos”. Destacou, así mesmo, a importancia de “que Alfonso Rueda siga a ser o presidente da Xunta, para continuar cun presidente libre que prima e promove o modelo Galicia fronte ás minorías e chantaxes do modelo Sánchez. Un ‘modelo Galicia’ que que nos fai punteiros en sanidade, educación, transformación e sentidiño”.

A rexedora puxo en valor “a transformación e o cambio” que experimentou Mos nos últimos tempos “grazas aos elevados investimentos” impulsados polo PP desde a Xunta. “No 2005 atopei en Feijóo o mellor aliado para defender Mos e aí xa estaba Alfonso Rueda. En 2009 desaloxamos o bipartidismo de Galicia e de Mos, e o noso concello comezou o despegue para converterse no territorio de oportunidades que hoxe é, cun PXOM aprobado en 2017, co macrocentro sociosanitario do Rebullón que será pioneiro en España en desenvolvemento e tantos outros proxectos de presente e de futuro”.

“Por iso mediante o voto útil, o voto para Mos, debemos devolverlle a Alfonso Rueda todo o apoio que lle outorgou ao noso concello. Porque en fronte só hai mentira e oportunismo. Porque Galicia perde cos nacionalistas e os socialistas, sen embargo sabemos que con Rueda Galicia funciona”, concluíu Arévalo, poñendo en valor tamén á candidata mosense Feli Rodríguez, da parroquia de Tameiga, que é tamén concelleira do equipo de goberno local e que “xa demostrou nesta lexislatura a súa defensa de Mos por riba de todo como deputada autonómica”.

 

Alfonso Rueda reivindica ao PPdeG como o partido do rural e comprométese a seguir defendéndoo con orgullo

explotación gandeira en Friol

Hoxe, nunha visita a unha explotación gandeira en Friol acompañado polo candidato pola provincia de Ourense José González, o candidato pola provincia de Lugo Enrique Barreiro e o alcalde José Ángel Santos

  • Anuncia que impulsará a conectividade nas zonas rurais proporcionando servizos alternativos de conexión a Internet cando non sexa posible contar cunha conexión estable e de calidade
  • “É a nosa responsabilidade que o rural galego siga sendo atractivo e rendible. Porque fixar negocios no rural é tamén fixar poboación e permitir, polo tanto, que se poida vivir do rural e no rural”, subliña

O presidente e candidato do PPdeG, Alfonso Rueda, anunciou hoxe que impulsará a conectividade nas zonas rurais proporcionando servizos alternativos de conexión a Internet cando non sexa posible contar cunha conexión estable e de calidade.

Sendo consciente de que o traballo nas explotacións agrarias e gandeiras require cada vez máis dunha boas conexións, o líder dos populares galegos aposta así por seguir impulsando medidas para garantir no rural todos os servizos básicos que se poden desfrutar no resto de Galicia.

Puxo así en valor iniciativas pioneiras na nosa Comunidade como as Casas Niño ou a recentemente anunciada axuda para sufragar desde o Goberno galego o 100% dos gastos de adaptación das televisións das vivendas en zonas de sombra polo apagón da TDT SD fixado para hoxe. Deste xeito, a Administración autonómica asumirá o custo do novo receptor necesario e garantirá que “todo o mundo teña garantido o dereito fundamental de acceso á información”.

“É a nosa responsabilidade que o rural galego siga sendo algo atractivo e rendible economicamente. Porque fixar negocios no rural é tamén fixar poboación e permitir, polo tanto, que se poida vivir do rural e no rural”, subliñou Rueda ao tempo que vinculaba o futuro de Galicia ao futuro do seu rural e avogaba por seguir mellorando as infraestruturas e continuar axudando tanto a particulares como aos pequenos concellos.

Durante a súa visita á Gandería SAT Os Carrís, ubicada na parroquia de Nodar (Friol), acompañado por máis de medio cento de gandeiros do municipio, o presidente e candidato do PPdeG quixo poñer de manifesto a mellora experimentada por este tipo de explotacións en Galicia.

Falou así das permutas de terra para facilitar a dispoñibilidade e rendibilidade dos terreos ou a introdución de nova maquinaria “para modernizar as explotacións, facilitar o traballo, obter maior rendibilidade e facer máis atractivo este traballo”.

A proba deste éxito está, para Alfonso Rueda, na remuda xeracional que se está dando nas explotacións agrarias galegas coa incorporación de xente nova que “ve que vale a pena e aprecia moito marxe de mellora en cuestións como a innovación ou a tecnoloxía”.

Destacou así mesmo que Galicia é líder do sector leiteiro español (producimos ao redor do 42% do leite a nivel nacional) e que somos a autonomía que más creceu en produción de leite nos últimos cinco anos.

O presidente e candidato do PPdeG concluíu manifestando o total apoio do seu partido ás reivindicacións que está facendo o sector primario en Galicia e en toda España “para trasladar a Europa a mensaxe de que a competitividade das explotacións pasa tamén por unha normativa que teña en conta que, sen discutir obxectivos medioambientais, hai que vivir sobre o territorio e todo se pode compatibilizar”.

explotación gandeira en Friol
explotación gandeira en Friol
explotación gandeira en Friol
explotación gandeira en Friol

Alfonso Rueda aposta polo avance de Santiago co investimento de máis de 70 M€ no CHUS e a creación dun Centro Integrado de FP no eido sanitario

Hoxe, nun almorzo informativo coa sociedade compostelá no que foi presentado polo candidato pola provincia da Coruña Borja Verea

  • Comprométese a seguir mellorando as infraestruturas e os equipamentos da cidade e, nesa liña, ofrece a súa colaboración para a posta en marcha dunha piscina olímpica en Santa Marta e a reforma integral do Salón Teatro
  • “Santiago é marca Galicia e todo o que veña a Santiago ten repercusión en toda a Comunidade”, sostén ao tempo que reivindica un “turismo amable e acolledor” co horizonte posto xa no Xacobeo 2027

O presidente e candidato do PPdeG, Alfonso Rueda, manifestou hoxe o seu compromiso co avance e o progreso de Santiago de Compostela no eido socio-sanitario destacando un investimento de máis de 70 millóns de euros no CHUS e a súa proposta de poñer en marcha un Centro Integrado de FP de ciencias da saúde en Conxo.

O líder dos populares galegos explicou esta mañá nun almorzo informativo coa sociedade compostelá a súa intención de crear un “polo de ciencias da saúde” na USC para integrar as ensinanzas de Medicina, Farmacia e Enfermería.

Do mesmo xeito, e dentro da súa aposta por seguir potenciando a Formación Profesional, anunciou a creación dun Centro Integrado de FP en Conxo con 2.000 prazas para mellorar a oferta educativa vinculada ao campo sanitario e ás necesidades profesionais neste ámbito.

Rueda remarcou o seu compromiso por seguir mellorando as infraestruturas e os equipamentos da cidade e, nesa liña, ofrece a súa colaboración para a posta en marcha dunha piscina olímpica en Santa Marta e a reforma integral do Salón Teatro. Na mesma liña que outros proxectos que xa son unha realidade como o Centro de servizos innovadores para empresas biotecnolóxicas no parque empresarial da Sionlla ou o Centro de Supercomputación de Galicia.

No eido das infraestruturas, o líder dos populares galegas incidiu na importancia de garantir a conectividade de Santiago e lamentou a falta de compromiso do Goberno central en dúas cuestións que considera fundamentais para avanzar neste eido: a chegada da Alta Velocidade á capital galega, a mellora dos servizos ferroviarios e a conxelación das peaxes da AP-9 e da autoestrada a Ourense “como xa fai o Goberno galego nos tramos e vías que son da súa competencia”.

Puxo en valor, en cambio, a nova senda peonil e ciclista que se porá en marcha entre O Milladoiro e a nova estación intermodal, que se completará ademais cunha conexión ao CHUS e ao novo complexo administrativo de San Caetano. “Trece quilómetros que suporán un investimento de 12 millóns de euros pero que valen a pena”, sinalou.

Recordou así mesmo o recente inicio das obras do centro de protonterapia en Compostela, o primeiro de España, que contribúe a consolidar a cidade como “capital sanitaria” e volveu insistir no seu compromiso de poñer en marcha o aparcamento do CHUS.

NOVO ANO SANTO EN 2027 NO HORIZONTE

Nun lugar turisticamente referente, Alfonso Rueda quere que o número de visitantes a Galicia e á súa capital non teña freo e que desde o sector e as Administracións se siga ofrecendo “un destino amable e acolledor” fronte aos discursos de “turismofobia” que promoven algúns.

E xa co horizonte no Xacobeo 2027, o líder dos populares galegos insiste na necesidade dunha maior implicación do Goberno central neste acontecemento e avogou abertamente por vantaxes fiscais para favorecer os patrocinios. “Santiago é marca Galicia e todo o que veña a Santiago ten repercusión en toda a Comunidade”, concluíu neste sentido

Alfonso Rueda reivindica o seu compromiso con Vigo e anuncia a compra do cine Fraga “para poñelo a disposición dos veciños”

Hoxe, nun encontro coa sociedade viguesa no que foi presentado pola candidata pola provincia de Pontevedra, Patricia García

Alfonso Rueda reivindica o seu compromiso con Vigo e anuncia a compra do cine Fraga “para poñelo a disposición dos veciños”

  • Destaca que o novo instituto de Navia será o primeiro de Galicia centrado nas especificidades académicas, tecnolóxicas e de sustentabilidade
  • Destaca os investimentos feitos en obras fundamentais para o desenvolvemento da cidade como a estación intermodal, así como a construción de 200 vivendas en San Paio de Navia e a reforma dos centros sanitarios da área sanitaria
  • Reitera a súa disposición a contribuír á reforma das pistas de atletismo de Balaídos e a impulsar o Centro de Asociacionismo no edificio dos vellos xulgados da rúa Lalín

12 de febreiro de 2024. O presidente e candidato do PPdeG, Alfonso Rueda, anunciou hoxe a compra, en colaboración coa Deputación de Pontevedra, do Cine Fraga de Vigo para convertelo nun espazo para “o reencontro da cidade coa creación artística e cultural” e sede permanente da Galicia Film Comission.

Nun almorzo celebrado esta mañá con representantes da sociedade viguesa, Rueda incidiu en que vai “seguir rexeitando a confrontación entre Administracións e defendendo que, se hai ganas reais de facer cousas e vontade de non obstaculizar, pódese contar coa Xunta, como se fai noutros concellos e lugares de toda Galicia”.

Afirmou que “a política da ocorrencia, de botar cousas ao aire, de buscar liortas e non facer nada, non funciona”, polo que avogou pola “xestión e por render contas” ante os cidadáns do traballo feito. Neste sentido, dixo que nestas eleccións autonómicas hai dúas opcións: “Ou unha maioría suficiente do PPdeG para pactar cos galegos e cumprir os nosos compromisos, ou un multipartito encabezado por un partido nacionalista-independentista”.

POLÍTICA PARA CREAR RIQUEZA

Na súa intervención, manifestou que “a política ten que axudar a crear riqueza para que a sociedade funcione, e para crear riqueza están os empresarios”. Así, apuntou que “a Administración ten que estar para estimular a economía, acompañala e non ser un obstáculo”, e para iso “o primeiro é o rigor económico”.

Neste sentido, salientou que “Galicia foi a primeira comunidade autónoma en aprobar os orzamentos para 2024 e na que menos medrou o endebedamento nos últimos anos”, polo que “temos pulmón para facer unha serie de cousas que outros non van poder levar adiante”. De feito, asegurou non estar interesado en que a Galicia lle condonen os intereses da débeda porque “son perfectamente asumibles”, pero si en “poder dicirlle ao Goberno central onde deben investirse os cartos que hai para outras comunidades”.

Tamén en clave económica, o candidato do PPdeG lembrou que o Goberno galego vén de establecer como máximo un ano para a tramitación de todos os proxectos de máis dun millón de euros de investimento “para facilitar e atraer investimentos”.

“O INVESTIMENTO EN EÓLICA É O NOSO PETRÓLEO”

Alfonso Rueda asegurou que “aquí non nos van os plantexamentos demagóxicos como os que algúns están a facer cos proxectos de renovables, porque o investimento en eólica é o noso petróleo”. Deste xeito, avogou por “ser amigables cos que queren investir en Galicia e ofrecer unha estabilidade e un rigor nas nosas contas e na tramitación administrativa para facilitar o seu asentamento”.

O presidente do PPdeG cualificou a Saída Sur ferroviaria de Vigo como “a infraestrutura máis publicitada en papeis, máis sometida a estudos e menos real”, e amosou a súa preocupación porque “a aposta de Portugal é clara e temos que corresponder”.

“Faremos todo o posible para que o Goberno portugués manteña o seu compromiso de enganchar a súa alta velocidade coa galega”, avanzou a este respecto e botando de menos “declaracións moito máis contundentes por parte da esquerda que ten influencia no Goberno central”.

Respecto da AP-9, Alfonso Rueda afirmou que “ogallá sexa gratis” pero recordou que, mentres o Goberno galego conxelou as tarifas das autoestradas da súa titularidade, as de titularidade estatal tiveron unha suba que non rexistraran en todo o século XXI. “Se non son capaces de conter a suba das tarifas, é difícil de crer que nos veñan dicir que van ser gratuítas”, indicou.

En materia de solo industrial, lembrou que o Goberno galego fixo todo o posible para a aprobación do Plan Xeral de Vigo, que agora permitirá ampliar o polígono de Valladares, en colaboración coa Zona Franca; e o parque empresarial de Balaídos. Ao tempo que considerou necesario seguir apostando pola PLISAN.

Alfonso Rueda tamén citou os 19 millóns de euros que o Goberno autonómico investiu na construción da estación intermodal de Vigo, pero lamentou que “a día de hoxe estean sen facer os seus accesos, que era o que tiña que aportar o Concello”. Ademais, avanzou que “imos seguir apostando polo transporte metropolitano, que xa utilizan 80.000 veciños de Vigo; e as bonificacións para sectores da poboación, que xa benefician a 30.000 menores da área e que agora estenderemos aos maiores de 65 anos”.

O líder dos populares galegos demandou “falar en serio de vivenda e ser realista”, ante o que avanzou que “seguiremos promocionando a súa construción”. En concreto, explicou que en Vigo xa están licitados os contratos para construír 200 vivendas en San Paio de Navia, cun investimento próximo aos 30 millóns de euros; e despois se urbanizará o polígono 1 para que, a través da promoción privada, se poidan facer 1.600 vivendas máis: “Intentaremos seguir investindo no Casco Vello desta cidade, onde nos atopamos co inconveniente de que, a pesar de aportar o 90% dos fondos, as decisións teñen que aprobarse polo Consorcio, que xa paralizou importantes investimentos nestes últimos anos”.

SANIDADE, EDUCACIÓN E SERVIZOS SOCIAIS

Un dos apartados nos que máis énfase fixo o candidato do PPdeG foi a sanidade, lembrando “todos os disparates que se dixeron do Hospital Público Álvaro Cunqueiro, que hoxe é un orgullo e un referente da sanidade en Galicia”.

Citou ademais as actuacións na mellora da Atención Primaria na área de Vigo, como o novo centro de saúde de Moaña, a ampliación do de Porriño ou as reformas dos centros de saúde de Salvaterra ou Crecente. Así como o novo centro de saúde de Mos ou a construción do Centro Integral de Saúde de Olimpia Valencia en Vigo, que contará cun investimento de 14,8 millóns de euros.

Ademais, demandou “que o Concello de Vigo poña a disposición da Xunta os terreos na ETEA para que poidamos investir 12 millóns de euros na urbanización da parcela que albergará a futura residencia de maiores que construirá a Fundación Amancio Ortega”.

No que respecta á educación, Alfonso Rueda destacou que o novo instituto de Navia, no que se investirán 14 millóns de euros e levará o nome do escritor Domingo Villar, será o primeiro de Galicia centrado nas especificidades académicas, tecnolóxicas e de sustentabilidade. Insistindo ademais no impulso da FP Dual e na proposta para que todos os universitarios que aproben teñan a matrícula gratis en todos os cursos de grao.

O presidente e candidato concluíu reiterando a súa disposición para contribuír con tres millóns de euros á reforma das pistas de atletismo de Balaídos, así como a impulsar o Centro de Asociacionismo no edificio dos vellos xulgados da rúa Lalín.