Categoría: PP de Galicia

Manuel Ángel Fernández Movilla (Baños de Molgas, 1992) foi elixido presidente do Partido Popular de Baños de Molgas no congreso celebrado hoxe por esta agrupación local, conclave que clausuraron a secretaria xeral do PPdeG, Paula Prado, e o presidente provincial do PP, Luis Menor, acompañados pola secretaria xeral do PPdeOU, Sandra Quintas.

Paula Prado e Luis Menor puxeron en valor que o liderado de Manuel Fernández, aos seus 32 anos, demostra que o Partido Popular “aposta pola mocidade con feitos e non só con slogans”, fronte a un socialismo que “compra aos mozos con promesas pero non lles ofrece nada” e fronte a un independentismo galego que “non pode ofrecerlles máis futuro que unha utopía”.

Nese sentido, a secretaria xeral do PPdeG salientou o feito de que Manuel sexa o alcalde popular máis novo da provincia de Ourense e o terceiro en Galicia: “Demostra que a mocidade tamén se implica na política, no rural e, sobre todo, en querer mudar o rumbo dos seus concellos”

“O PP ten un equipo que non só é pasado e presente, senón que tamén é futuro. Manu, ao igual que o resto das nosas Novas Xeracións, demostra que a xuventude tamén é sinónimo de estabilidade, de solvencia e de experiencia”, subliñou.

Así mesmo, Paula Prado falou da “madurez” de Manuel Fernández e a “experiencia e coñecemento do seu concello” que xa tiña antes das eleccións, o que o levou, dixo, a conseguir a alcaldía.

LUIS MENOR SUBLIÑA O TRABALLO DO PP DE BAÑOS DE MOLGAS NA VITORIA DAS EUROPEAS

Luis Menor felicitou ao novo presidente da agrupación local, que nas pasadas municipais arrebatou a alcaldía ao BNG na súa primeira cita electoral como cabeza de lista popular, advertindo que ten ante si o reto de revalidar a maioría absoluta e demostrar que a vitoria de hai dous anos “non foi unha casualidade, senón que soubeches escoitar á túa veciñanza e canalizar o seu descontento”.

Por outra banda, o aniversario da vitoria das eleccións europeas de 2024, Menor afirmou que o apoio das direccións do PP provincial e galega no congreso son “unha forma de devolver e agradecer todo ese apoio que nos destes hai un ano”.

Lembrou o presidente provincial que Manuel Fernández e o PP de Baños de Molgas foron quen de darlle a volta aos resultados das europeas de 2019, cando gañaron os nacionalistas, obtendo o pasado ano máis de 41 puntos de vantaxe sobre o BNG. “A mellor maneira de axudar a que Ourense fose a primeira provincia de Galicia e de toda España en apoio electoral, cun 51,4 % dos votos. O rigor, a honestidade e a estabilidade sempre triunfan por riba do desgoberno e da corrupción política e moral”, remarcou.

MANUEL FERNÁNDEZ: “O COMPROMISO QUE ASUMÍN COMO ALCALDE QUERO TRASLADALO AGORA AO PARTIDO

Manuel Fernández expresou o seu agradecemento á militancia de Baños de Molgas polo apoio recibido, e aos simpatizantes do partido por compartir o inicio dunha nova etapa no PP, sinalando que “o compromiso que asumín como alcalde quero trasladalo agora ao partido, para conseguir un PP forte e unido, aberto a toda persoa que queira traballar para mellorar o noso municipio”. O presidente da agrupación local destacou tamén que desexa contar con todas as que xa formaron parte do PP local nalgún outro momento.

Trátase, dixo, de que o PP de Baños de Molgas axude a conseguir máis vitorias electorais como as municipais e as europeas”, co foco sempre posto no municipio e na veciñanza.

A secretaria xeral do PPdeG, Paula Prado, denunciou hoxe que “o sanchismo está arrastrando o nome de España polas cloacas” e invitou a todos os galegos e ao resto de españois a manifestar o seu rexeitamento a esta situación: “A calquera demócrata, sexa de esquerdas ou de dereitas, debería preocuparlle que dentro do PSOE haxa tramas mafiosas”.

Referiuse así á concentración convocada este domingo en Madrid e á que o presidente Alfonso Rueda, ela mesma e unha “boa representación” dos populares galegos acudirán para “esixir alto e claro respecto para Estaña” e “dicir que xa está ben”. De feito, invitou a acudir tamén aos líderes da oposición galega, Ana Pontón e a Xosé Ramón Gómez Besteiro, xa que, na súa opinión, eles “tamén deberían dicir ‘xa basta’ a Sánchez, condenar ao Goberno das cloacas e pedir eleccións xerais”.

“Estamos ante un PSOE que está sostido, entre outros, polo BNG, e atrapado nas súas propias mentiras, nas súas propias trampas e nun sistema absolutamente corrompido”, asegurou cualificando de “verdadeira vergoña” os feitos coñecidos nos últimos días e que supoñen “a retransmisión en vivo e en directo da degradación de España, da caída do Partido Socialista e o adeus de Pedro Sánchez”.

A número dous do PPdeG subliñou que “nin os galegos nin o resto de españois merecen os espectáculos que levamos vivindo nos últimos meses e que xa son incontables”. Non en balde, engadiu, “cando parece que nada pode ir a peor neste epílogo do Goberno central, sempre aparece algo novo”.

“O sanchismo está arrastrando o nome de España polas cloacas e o que pasou onte non foi un circo, foi un sinal máis de que o PSOE está en caída libre”, concluíu ironizando que, con Pedro Sánchez presente na Conferencia de Presidentes de mañá, “pode pasar de todo e mesmo que apareza Aldama por unha esquina”.

CONFERENCIA DE PRESIDENTES

Precisamente ao respecto da Conferencia de Presidentes, a secretaria xeral dos populares galegos manifesto o seu escepticismo logo do que ten acontecido noutras ocasións: “Galicia vai coas expectativas baixas”.

“A última Conferencia e a última reunión de Alfonso Rueda con Pedro Sánchez foron estériles e a sensación é que o Goberno central non ten a mínima intención de escoitar nin de pactar nada”, denunciou apuntando a que o obxectivo “evidente” desta convocatoria é “tapar o ruído atronador que fan as cloacas socialistas”.

Con todo isto, remarcou, “Galicia non vai renunciar a facerse escoitar e a elevar as súas inquedanzas e prioridades a todos os foros nos que estea presente”.

ANIVERSARIO DAS ELECCIÓNS EUROPEAS

Paula Prado aproveitou a ocasión para recordar así mesmo que o próximo luns vaise cumprir un ano das eleccións europeas nas que o PPdeG sumou case medio millar de votos –“máis votos que o PSOE e o BNG xuntos”, apuntou– e gañou no 97% dos concellos galegos, sendo Ourense e Lugo as provincias con máis apoio ao PP de toda España.

“Demostramos que cando lle preguntamos aos galegos e galegas nas urnas, sempre somos maioritariamente a súa resposta e, grazas a iso, somos o único partido galego con dos eurodeputados”, destacou facendo unha contraposición do éxito do proxecto popular co “fracaso” do independentismo galego.

De feito, a secretaria xeral acusou ao BNG de “estafar” aos galegos logo de que “non lles chegara con mentir sobre o seu programa nas eleccións autonómicas, nin con ocultar aos seus socios nas europeas, senón que tamén esconderon o seu reparto de tempos co independentismo catalán cun escano medio galego, medio catalán”.

O escano do independentismo galego na Eurocámara é, polo tanto, un “engano” e, de deito, xa falta menos “para que o escano do BNG se converta nun escano en mans do independentismo catalán unha vez se cumpra o pacto que ocultan a todos os galegos e galegas”.

O PPdeG recorre á ironía para denunciar a aprobación da 50ª prórroga do debate sobre a transferencia da AP-9 no Congreso e asegura que “chegou o momento de conmemorar as vodas de ouro de Pedro Sánchez co bloqueo a Galicia pedindo o divorcio e quedando coa custodia da autopista”.

Faino logo de que a Mesa do Congreso dos Deputados, dominada polo PSOE e os seus socios, aprobase onte a prórroga número 35 á tramitación parlamentaria da proposición de lei sobre a transferencia da AP-9 no que vai de lexislatura, sumando 50 desde que Pedro Sánchez chegou á Moncloa.

“50 anos de relación normalmente marcan unha vida de compromiso e constancia, só que neste caso o compromiso é co bloqueo, e a constancia, coa falta de respecto a Galicia”, defendeu a secretaria xeral Paula Prado nun encontro que mantivo en Oroso cos presidentes provinciais do partido na Coruña e Pontevedra, Diego Calvo e Luis López, a responsable de Vivenda e Infraestruturas do Goberno galego, María Martínez Allegue, e o alcalde Álex Doval.

Un encontro no que tamén participaron o deputado nacional e vicepresidente 2º da Comisión de Transportes e Mobilidade Sostible do Congreso, Celso Delgado, e o coordinador de Infraestruturas e Territorio do PPdeG, Antonio Ameijide.

A número dous dos populares galegos defende que “cando non hai dúbidas técnicas, nin falta de orzamento, nin oposición á transferencia da AP-9, o que hai é bloqueo” e que “cando se fala de desatender unha demanda unánime da sociedade galega e do Parlamento galego, o que hai é unha falta de respecto a Galicia”.

Criticou así que, mentres se suceden estas prórrogas, os galegos e galegas teñan que “seguir pagando peaxes abusivas por circular por unha autoestrada que, por xustiza e por eficacia, debe xestionarse desde Galicia” e comprometeu o traballo do PPdeG para que “canto antes se faga realidade o que levamos anos reclamando”.

“NON QUEREMOS SER MÁIS QUE NINGUÉN, PERO TAMPOUCO MENOS”

A responsable de Vivenda e Infraestruturas do Goberno galego, María Martínez Allegue, pediu non só que se desbloquee a tramitación da proposición de lei orgánica sobre a transferencia da AP-9 a Galicia, senón que tamén se atendan as solicitudes de reunión trasladadas desde o Executivo autonómico ao Ministerio de Transportes para abordar a situación desta e doutras infraestruturas na Comunidade.

“Pedimos que se dea resposta ao estudo económico que fixemos desde a Xunta sobre o custo do rescate e da transferencia e que, tendo en conta que o custo das bonificacións actuais é similar ao do rescate, se valore esta última posibilidade”, apuntou remarcando que “en Galicia non queremos ser máis que ninguén pero tampouco menos”.

A LOITA DOS CONCELLOS POLOS QUE TRANSCORRE A AUTOESTRADA

O presidente provincial do PP da Coruña, pola súa banda, quixo poñer sobre a mesa as demandas e reivindicacións dos concellos polos que transcorre esta infraestrutura e que demandan unha “compensación” por problemas como a perda de valor das propiedades, o impacto no turismo ou a contaminación acústica e visual.

Por todo isto, reclaman á concesionaria que colabore cos concellos a través do pagamento íntegro do Imposto sobre Bens Inmobles (IBI) que durante anos estivo bonificado e que nestes momentos suporía unha inxección de 2,3 millóns de euros nas arcas municipais dos diferentes concellos.

“Se isto se consegue é grazas á loita dos concellos”, reivindicou Diego Calvo agradecendo a “valentía” de todos aqueles municipios que deron “un paso adiante” para unirse nesta reivindicación e lamentou que o PSOE “pedira a moitos concellos que non formasen parte desta asociación e, polo tanto, que non reclamasen para os seus veciños o que é xusto”.

INFRAESTRUTURAS CONXELADAS E PARALIZADAS

Tamén o presidente provincial dos populares en Pontevedra, Luis López, criticou o “desgoberno” de Pedro Sánchez e o seu desleixo cara a nosa Comunidade na medida en que, na súa opinión, está  “conxelando as infraestruturas existentes e paralizando as futuras”.

Citou como exemplo a falta de conexións ferroviarias no Eixo Atlántico, a retirada de conexións con Madrid, o mal estado das estradas nacionais ou a eliminación de paradas de autobús estatais. Ademais, denunciou a “paralización de infraestruturas de futuro” como son o AVE Vigo-Porto, a Saída Sur ou a Vía Verde.

No que se refire á AP-9 e á súa problemática específica na provincia de Pontevedra, o líder popular asegurou que “nada hai e nada se sabe da gratuidade do treito entre Pontevedra e Curro, así como tampouco da liberación do treito que transcorre polo Porriño e que sería unha alternativa útil e rápida para a saída sur de Vigo”.

López censurou a “obediencia cega” que tanto o PSOE e o BNG teñen a Pedro Sánchez mentres todo isto acontece e por iso pediulles que “se deixen de paripés e centren as súas enerxías en loitar polos intereses dos galegos e galegas”.

O Partido Popular de Galicia denuncia un “plan encuberto” por parte do Goberno central para “desmantelar” á Garda Civil e aféalle a súa actitude cara os efectivos deste Corpo: “Pedro Sánchez está máis preocupado por protexerse a si mesmo que por protexer a quen nos protexe”

Faino logo de que a secretaria xeral Paula Prado mantivese unha reunión con Diego Madrazo e Olaya Salardón, secretario xeral en Galicia e secretaria nacional de relacións institucionais da Asociación Unificada de Gardas Civís (AUGC), para recoller as súas demandas e compartir a súa preocupación ante “os recortes que o Goberno de Sánchez está a aplicar na seguridade dos galegos e galegas”.

“Recortes como que cada día falten máis de 1.000 gardas civís en Galicia porque nin se cobren as vacantes nin se amplían as plantillas, como que se pechen cada vez máis cuarteis e postos auxiliares nos concellos rurais ou como que se reduzan os horarios de atención presencial e se substitúa aos axentes por aplicacións móbiles ou mesmo avatares”, explica a número dous dos populares galegos.

Ante esta situación, asegura, o Partido Popular de Galicia ten claro que “é necesario protexer a quen nos protexe e iso pasa tanto por dotar de máis medios materiais e persoais á Garda Civil como por mellorar as súas condicións laborais”.

Sobre a mesa están cuestións como a protección da saúde mental dos axentes ou a adaptación “á europea” do modelo que rexe á Benemérita para garantir o exercicio efectivo dos dereitos fundamentais dos seus integrantes, así como que se deixe de aplicar o Código Penal Militar en actuacións que se produzan fóra do ámbito laboral.

EN DEFENSA DA INDEPENDENCIA DA UCO

Paula Prado tamén denuncia “as difamacións, as presións e o cuestionamento” aos que o Goberno central somete a organismos independentes como a Unidade Central Operativa (UCO) cando “precisamente traballa por protexer á nosa democracia fronte á inmoralidade da corrupción”.

Un “apoio decidido” a esta unidade que o responsable de AUGC en Galicia, Diego Madrazo, agradece especialmente nun momento no que a UCO non conta co apoio nin da Secretaría de Estado de Seguridade nin do Ministerio do Interior.

O Partido Popular de Galicia critica que o BNG se poña “a un ou outro lado segundo sopre o vento” no que se refire aos eólicos e cataloga de “hipócrita” e “cínico” o seu “falso ecoloxismo” logo de descubrir que “membros do BNG do ‘non’ aos eólicos hai uns anos eran os do ‘si’ aos eólicos”.

A secretaria xeral dos populares galegos, Paula Prado, en declaracións aos medios esta mañá en Pol, referiuse ás “preocupantes” informacións publicadas esta semana sobre o “paso de empresarios a activistas” de diversas persoas vinculadas ao BNG e que, na súa opinión, confirman que “o independentismo galego pasa do apoio máximo ao bloqueo máximo segundo crea que lle vai tirar máis rédito electoral e deixando ao lado calquera coherencia ou interese cidadán”.

“Creo que, como mínimo, estas informacións requiren explicacións por parte de Ana Pontón e da dirección do BNG”, concluíu explicando que os dirixentes deste partido “xa estaban naquela época” e apelando ao “dano” que estes “falsos ecoloxismos” fan a Galicia como potencia en enerxías renovables.

O EXEMPLO DO QUE OCORRE ONDE NON GOBERNA O PP

A número dous dos populares galegos fixo estas declaracións durante a visita que realizou a Pol xunto á portavoz local do partido e presidenta de Novas Xeracións de Galicia, Nicole Grueira, para reivindicar que este concello “precisa máis rigor na xestión e moito máis sentidiño no destino de fondos públicos”.

Neste sentido apuntou que Pol é “un grande exemplo do que ocorre onde non goberna o Partido Popular” e que o seu alcalde “está impregnado do peor da marca PSOE”, xa que “deixa de lado os problemas máis urxentes do concello para centrarse só nos seus”.

“Estamos no concello coa débeda per cápita máis alta de toda a provincia de Lugo (en total, máis de 3,5 millóns de euros) e unha das máis altas de Galicia”, denunciou ao tempo que afeaba ao rexedor socialista estar “máis centrado no fútbol que nos récords negativos da súa xestión”.

En contraposición a todo isto, a secretaria xeral do PPdeG apuntou a Nicole Grueira como alternativa e amosouse convencida de que, se a líder local do partido fose alcaldesa, “traballaría para todos os seus veciños e veciñas sen sectarismos e sen deixarse influír pola cor política”.

Nicole Grueira, pola súa banda, quixo agradecer a presenza de Paula Prado no seu concello para coñecer de primeira man os problemas que sofren os veciños ante a “pasividade” dun alcalde “centrado só nos seus problemas”.

“Só se ocupa dos seus caprichos e esquécese do que realmente importa”, afirmou a voceira popular trasladando demandas veciñais como son a necesidade de arranxar as pistas ou dotar duns servizos “en condicións” ao alumnado do centro de educación infantil e primaria da localidade.

O PPdeG conmemora a chegada ao ecuador dos mandatos municipais coa ambición de “conseguir dentro de dous anos máis gobernos fortes, estables e en maioría” e reivindicando que, a día de hoxe, xa goberna na metade dos concellos de Galicia e segue subindo o seu apoio nas cidades.

O Comité de Cidades do partido reuniuse estes días co obxectivo de “compartir os proxectos das diferentes urbes e facer sinerxias” e analizar os resultados das últimas enquisas que apuntan a que, neste momento, o apoio ao proxecto do PP é xa maior ao de 2023 nas cidades galegas e, ao mesmo tempo, mantense como o partido líder en 5 das 7 urbes.

“Non nos conformamos e queremos consolidar as nosas maiorías. Porque esa será a única forma de que os pactos de perdedores do PSOE e do BNG non sigan traendo espectáculos e inestabilidade”, asegura a secretaria xeral Paula Prado en referencia ao que ocorre en Santiago, Lugo ou A Coruña, á vez que pon de exemplo o “proxecto de éxito” do PP en Ferrol.

Por iso, cun apoio á alza nas cidades galegas, desde o partido seguen traballando para “construír unha alternativa” alá onde non gobernan e conseguir en dous anos un maior número de “gobernos fortes, estables e en maioría”.

REY VARELA: “NON QUEREMOS PERDER O TREN DO FUTURO”

O coordinador do Comité de Cidades e alcalde de Ferrol, José Manuel Rey Varela, tamén fixo referencia ás enquisas electorais e explicou que “a baixa doutros partidos é o resultado da falta de estabilidade e de proxecto dos seus gobernos municipais e dos desacordos permanentes cos seus socios”. Unha situación que, na súa opinión, supón un “lastre” que está “paralizando” esas cidades.

Todo o contrario acontece en Ferrol, onde esas mesmas enquisas mostran que os veciños e veciñas “están moi satisfeitos e valoran positivamente a estabilidade” que lles ofrece o goberno que encabeza Rey Varela. De feito, de celebrarse hoxe as eleccións municipais, o PP vería incrementada a súa confianza nesta cidade.

O rexedor ferrolán tamén quixo aproveitar esta reunión para poñer sobre a mesa os “agravios” de Pedro Sánchez coas cidades galegas e referiuse concretamente aos problemas ferroviarios que están a provocar “os atrasos permanentes, as poucas frecuencias e o feito de que Ferrol e Lugo sigan sen conexión de Alta Velocidade”.

“Non queremos perder o tren do futuro e por iso demandamos unha maior atención do Goberno de Pedro Sánchez ás nosas cidades”, concluíu facendo un chamamento á unión a todos os representantes do partido nesta reclamación.

O presidente do PPdeG, Alfonso Rueda, comprometeuse hoxe a seguir gobernando Galicia como queren os galegos e as galegas, “con sentidiño”, fronte aos “espectáculos de corrupción e todo o que se está vendo” do PSOE e fronte ao “non a todo” do BNG, aos que “nada lles gusta e sempre están enfurruñados”.

Así o manifestou este mediodía ante os máis de 1.000 asistentes á XVIII Xuntanza Popular no Monte Castrove do PP de Poio, na que tamén participaron a secretaria xeral do PPdeG, Paula Prado, o presidente provincial do PP de Pontevedra, Luis López, e o alcalde, Ángel Moldes.

“Imos cumprir a nosa palabra e que así vos sigades sentindo orgullosos”, dirixiuse Rueda aos presentes, salientando que “por algo será” que haxa tanta xente nesta romaría “nun día no que podían estar en calquera outro sitio”: “É unha marabilla”.

Así, o líder dos populares galegos subliñou que “é fundamental” que neste momento haxa tanto apoio ao PP ou, o que é o mesmo, “a unhas ideas e unha unidade”.

Puxo de exemplo dese bo facer ao líder local, Ángel Moldes, un alcalde do que está “moi orgulloso”, con “moitas ideas” e que “vai seguir dando moitas alegrías”. “Aquí temos unha oportunidade para demostrar que sabemos facer moi ben as cousas”, dixo xusto cando se cumpre o ecuador do mandato municipal.

Moldes, engadiu, logrou en 2023 “acabar con tantos anos nos que parecía que se facía, pero en realidade non se facía nada”.

“Os que gobernaron en Poio tanto tempo son os dignos representantes de dicir ‘non’ a todo: ‘non’ a que veñan turistas, que parece que lles molestan; ‘non’ a que veñan industrias, pero despois se queixan de que a xente se teña que ir traballar fóra; ou ‘non’ a dicirlle ao PSOE en Madrid que hai que poñer as pilas”, afondou, incidindo en que co actual Goberno central “non funcionan os trens, non veñen os cartos e non se teñen en conta aos galegos e galegas”.

Por último, despois de visita de onte do presidente nacional do PP, Alberto Núñez Feijóo, Rueda pediu á provincia de Pontevedra e a toda Galicia que o apoien “para que canto antes haxa un cambio en España”.

LUIS LÓPEZ: “PSOE E BNG ÚNENSE SÓ PARA QUE NON GOBERNE O PP”

Pola súa banda, o líder provincial, Luis López, puxo en valor as “políticas grandes, amplas, maioritarias, próximas á xente e de portas abertas” do Partido Popular en todos os concellos de Pontevedra e contrapúxoas ao “resentimento, crispación, parálise e bloqueo” que supón a acción conxunta de PSOE e BNG, “exclusivamente unidos, non a favor da xente, senón só para que non goberne o PP nunha cativeza de miras que está a ser erradicada da provincia”.

Ademais, Luis López destacou o “estilo Poio” imposto polo alcalde na vida municipal desde a súa chegada ao goberno local hai dous anos: “O prato estrela desta comida, que reúne máis de 1.000 persoas, é a política útil de Moldes e o seu equipazo, a que lle importa aos veciños, a do sentidiño, a de escoitar aos cidadáns, a que oxalá fora unha realidade en todos os concellos socialistas e nacionalistas… En definitiva, en Poio hai alcalde e hai proxecto para rato”.

POIO, NO MELLOR MOMENTO: “OFRECEMOS TRABALLO E RESULTADOS”

Mentres, Ángel Moldes asegurou que chegan ao ecuador do mandato situando a Poio no seu “mellor momento”, algo que “non é casualidade”: “É o resultado dun traballo serio, dunha xestión comprometida e dun goberno unido, cun proxecto único, claro e centrado, por riba de todo, nas necesidades reais da veciñanza”.

A clave, asegurou, é traballar con eficacia e eficiencia, cumprir cos compromisos adquiridos e estar preto da xente. “Este é o camiño que seguirá marcando a acción deste goberno ata final de mandato: seguir mellorando a vida da xente, con rigor, planificación e compromiso. Porque este é o tempo de Poio. E estamos preparados para seguir facendo historia”, abundou.

Por iso, “fronte a quen prefire xerar confusión, lanzar bulos ou recorrer ao insulto”, vai seguir traballando “con paso firme e decidido”: “Fronte aos bulos, feitos. Fronte aos insultos, feitos. Fronte á resignación e o enfado, feitos. Fronte ao ruído, nós ofrecemos traballo e resultados”.

O presidente do PPdeG, Alfonso Rueda, amósase convencido de que, chegado o momento, Galicia será “fundamental” na próxima vitoria electoral de Alberto Núñez Feijóo porque o presidente nacional do PP “sabe que gobernar consiste en resolver e ter palabra e non en crear problemas e mentir” e porque os galegos “saben o que vale a política seria e con sentidiño”.

Así o manifestou esta mañá ante os máis de 4.000 asistentes á tradicional Romaría Popular do Pino, aos que animou a seguir apoiando como ata o de agora a “unha persoa que os galegos coñecemos, valoramos e sabemos todo o que pode facer” para que “canto antes” chegue á Moncloa e poida atender as demandas de Galicia.

“É o momento dicir a todos os españois que aquí houbo un gran presidente de Galicia e moi pronto haberá un gran presidente de España”, manifestou Rueda facendo referencia ao Congreso Nacional no que, tal e como adiantou, o PPdeG “aportará, construirá e traballará con forza para levar a Feijóo á presidencia”.

O líder dos populares galegos reiterou que así o farán porque “non queremos unha España dividida, a escuras e desigual” e porque “é o momento de deixar claro fronte aos do ‘non’ que Galicia nin admitirá nunca ser máis que ninguén nin consentirá que a fagan de menos”.

Referiuse así aos que “desde a Moncloa din ‘non’ á transferencia da AP-9, ao reparto dos fondos europeos, á mellora dos servizos ferroviarios, á execución das obras pendentes e ao financiamento dos servizos públicos”. E, do mesmo xeito, ao BNG “do ‘non’ a todo” e ao PSOE que “di sempre ‘si’ a todo o que sexa malo para Galicia”.

Facendo unha contraposición entre as propostas da oposición e a realidade da nosa Comunidade, o presidente Rueda reiterou que o PPdeG “seguirá dicindo ‘si’ a Galicia fronte aos do ‘non’ ao turismo, á liberdade lingüística e a todos aqueles investimentos e industrias que necesitamos para que a xente nova poida traballar aquí”.

“Non queremos unha Galicia pequena, pechada, enfurruñada e na que só sexa válida unha única forma de pensar. O que queremos é unha Galicia grande, aberta, sorrinte e plural que siga traballando con orgullo e confianza no futuro”, concluíu.

DIEGO CALVO: “GALICIA É A PROBA DE QUE SE PODE GOBERNAR BEN”

Pola súa banda, o presidente provincial do PP da Coruña, Diego Calvo, quixo poñer de manifesto que “mentres en Madrid se suceden os escándalos e as cesións a quen desexa romper en España, Galicia é a proba de que se pode gobernar ben e de que é posible unha xestión seria e responsable”.

Agradeceu así ao presidente Alfonso Rueda que día a día traballe por “construír un futuro de unidade e de progreso para a nosa terra e demostrar que a política de estabilidade, seriedade, xestión e compromiso real coa cidadanía sempre funciona”.

Unha forma de entender a política que, tal e como explicou, é a “esencia” do Partido Popular e que fai tamén de Alberto Núñez Feijóo “o líder que España necesita” para construír “un futuro con unidade, con integridade e coa firme determinación de limpar a política española da corrupción e devolvela ao servizo dos cidadáns”.

Diego Calvo quixo poñer en valor tamén o traballo do partido na provincia da Coruña “estando a pé de rúa e coñecendo de primeira man o que necesita cada veciño” e amosouse especialmente orgulloso dos seus alcaldes e alcaldesas na medida en que “demostran con feitos o que significa gobernar con sensatez, responsabilidade e proximidade”.

Sandra Quintas (Bande, 1982) foi proclamada esta tarde presidenta da agrupación do Partido Popular de Bande no congreso celebrado no salón de actos da Casa do Concello, convocatoria que contou coa presenza da secretaria xeral do PPdeG, Paula Prado, e do presidente provincial do PP, Luis Menor. Nas súas intervencións, ambos coincidiron en poñer en valor os congresos locais que están a celebrar os populares ourensáns como un instrumento eficaz para “activar e preparar” ao PP de cara ás eleccións municipais de 2027, xusto cando se cumpre o ecuador do actual mandato.

Nese sentido, Paula Prado destacou que os populares estean “nun ano de moitos conclaves”, porque “para que un partido funcione ben e poida ofrecer credibilidade, ten que estar organizado”. De feito, lembrou, tamén se celebrará en breve un Congreso Nacional co mesmo obxectivo: “En Bande ou en Madrid sairá un PP plenamente preparado para os retos do futuro, con moita ilusión, ganas e valentía”.

En canto á nova presidenta local, a número dous dos populares galegos subliñou que Sandra é unha das 30 rexedoras do PPdeG, a formación galega que máis ten, 13 delas provincia de Ourense. “Representa o mellor do noso partido: leva máis de 5 anos sendo alcaldesa e é un exemplo de muller atrevida, que protexe aos seus veciños e que tamén exerce da mellor forma como secretaria xeral do PPdeOU”.

“O noso obxectivo aquí en Bande está claro e temos por diante dous anos para, entre todos, volver a conseguilo. Estou segura de que temos ao mellor equipo e á mellor capitana posible. É importantísimo seguir tendo gobernos fortes e estables para non ter que dedicar o tempo a nada máis que resolver os problemas da xente”, concluíu Paula Prado.

LUIS MENOR PIDE ESTAR LISTOS PARA DICIRLLE Á CIDADANÍA: “HAI ALTERNATIVA”

Luis Menor, pola súa parte, felicitou a Sandra Quintas pola capacidade de traballo que ten demostrada, xa que ademais do ámbito da xestión municipal, como alcaldesa de Bande, tamén desenvolve un labor político fundamental no PP de Ourense. Quintas, dixo, pertence a esa nova xeración de mulleres do Partido Popular que, á marxe de cotas, “representa a capacidade de traballo, a preparación e visión política, por iso está hoxe á fronte da secretaría xeral do PP ourensán”.

Para Luis Menor, o traballo que se está a facer para normalizar a vida política nas agrupacións locais é un xeito de “armar o partido” cara as próximas eleccións municipais de 2027, xusto cando se cumpre o ecuador do mandato local. Con todo, advertiu, hai que estar “alerta” porque que en calquera momento pode haber unha convocatoria “sorpresa” de eleccións xerais por parte de Pedro Sánchez: “Temos que estar preparados para dicirlle á cidadanía que hai alternativa”.

SANDRA QUINTAS DESTACA O “BO MOMENTO” DO PP DE BANDE

Ademais de destacar a recuperación da normalidade orgánica do PP local —cunha xestora desde outubro de 2022—, Sandra Quintas incidiu no “bo momento” polo que atravesa o partido en Bande, “mantendo a forza e solidez que lle procura o apoio maioritario da veciñanza en cada convocatoria electoral”, engadindo que ampliar as bases do PP “resulta fundamental para eses resultados”.

En referencia ao seu equipo de traballo no partido, Quintas sinalou que contará con todas as persoas que ata agora demostraron o seu compromiso coas siglas populares, tanto o grupo municipal “por ser o que más esforzo realiza, pero sen esquecer ás moitas persoas que colaboran sempre co partido”.