A reforma da lei de Servizos Sociais reforza o papel das entidades iniciativa social

A norma tamén garante dereitos esenciais ás persoas usuarias, como a libre elección, o arraigo á contorna social e á continuidade de atención, e a atención personalizada e integral

O PARLAMENTO APROBA A REFORMA DA LEI DE SERVIZOS SOCIAIS, QUE INTRODUCE O CONCERTO SOCIAL E REFORZA O PAPEL DAS ENTIDADES DE INICIATIVA SOCIAL

Santiago, 28 de xuño de 2016.- O Parlamento de Galicia aprobou hoxe a reforma da Lei de servizos sociais, que introduce o concerto social como novo modelo de xestión, reforza o papel das entidades de iniciativa social e garante dereitos esenciais ás persoas usuarias. A portavoz de Asuntos Sociais, Marta Rodríguez Arias, subliñou que o Grupo Popular “non rexeitou ningunha das emendas presentadas polo PSOE, BNG e AGE, xa que todas foron aceptadas ou foi presentada unha proposta de transacción, chegando a un acordo sobre o 83 por cento das emendas”.

Rodríguez Arias lembrou que esta lei xurdiu “dun proceso de diálogo coas entidades sociais para acadar un marco consensuado con todas as garantías”, ao que seguiu “o proceso de diálogo entre todos os grupos parlamentarios sobre un documento aberto, no que nos volcamos para consensuar un documento conxunto que tivera o máximo apoio posible”.

SUPERA AS LIMITACIÓNS ACTUAIS

“Con esta modificación, se superan as limitacións da normativa actual, que establece dúas fórmulas de xestionar os servizos sociais: a xestión directa ou a indirecta a través das diversas modalidades de contratación establecidas na normativa reguladora dos contratos do sector público”, explicou a portavoz popular.

Deste xeito, apuntou que esta reforma da Lei de servizos sociais regula o concerto social como novo modelo de xestión, axustándose ao recollido nas directrices europeas e diferenciado do concerto xeral regulado na normativa de contratación do sector público.


PRIORIDADE A ENTIDADES SOCIAIS

Para o establecemento dos concertos, as administracións públicas darán prioridade ás entidades sociais sen ánimo de lucro, aplicando medidas de preferencia, medidas de discriminación positiva, criterios sociais de calidade e garantindo sempre a libre concorrencia e os principios de igualdade de trato, de non discriminación e de transparencia.

Marta Rodriguez salientou, ademais, que “se recoñece por primeira vez unha serie de dereitos ás persoas usuarias, como o dereito á libre elección, o dereito ao arraigo da persoa á súa contorna social e á continuidade da atención; e o dereito á atención personalizada e integral”.

O Parlamento aproba a devolución aos empregados públicos parte paga extra 2013

O PARLAMENTO APROBA A DEVOLUCIÓN AOS EMPREGADOS PÚBLICOS DA PARTE DEVINDICADA DA PAGA EXTRA DE 2013


·    O portavoz popular afirmou que PSOE, BNG, AGE e Grupo Mixto “se equivocan por facerlle oposición a Galicia, aos representantes dos traballadores e aos empregados públicos do noso país”

·    Tellado lembrou que durante a crise o Goberno galego tivo que “facer axustes que non foron do gusto de ninguén, pero dixemos que aqueles axustes eran temporais e que, en canto a situación económica mellorase, serían revertidos”

Santiago, 28 de xuño de 2016.- O Parlamento de Galicia aprobou esta tarde a Lei a través da que os empregados públicos galegos recuperarán a parte devindicada da paga extra do ano 2013, así como a recuperación da totalidade do complemento específico nas pagas extras a partir do vindeiro mes de xaneiro. O portavoz de Administracións Públicas do Grupo Popular, Miguel Tellado, acusou á oposición de “vivir instalada no pataleo e no bloqueo permanente” por non apoiar esta iniciativa lexislativa, acordada cos sindicatos UXT, CC.OO. e Cesif.

Miguel Tellado defendeu a tramitación polo procedemento de lectura única deste proxecto de lei porque “ten como único obxecto o abono da parte do complemento específico da paga extra devindicada nos meses de xaneiro e febreiro de 2013; ten un artigo único, con sete apartados; e vén derivado dun acordo asinado entre a Xunta e tres das catro centrais sindicais representadas na Mesa Xeral de Negociación dos empregados públicos”.

“A cidadanía non valora o bloqueo, a ausencia do diálogo ou o desprezo ao rival político, senón que castiga a soberbia ou a prepotencia”, sinalou Tellado respecto da negativa de PSOE, BNG, AGE e Grupo Mixto a apoiar este proxecto de lei. Neste sentido, asegurou que “practican a política de canto peor, mellor”.

Por este motivo, o portavoz popular sinalou que “se equivocan por facerlle oposición a Galicia, aos representantes dos traballadores e aos empregados públicos do noso país”.

AXUSTES REVERTIDOS

Tellado lembrou que durante a crise o Goberno galego tivo que “facer axustes que non foron do gusto de ninguén, pero dixemos que aqueles axustes eran temporais e que, en canto a situación económica mellorase, serían revertidos”. Así, apuntou que en abril do pasado ano aprobouse no Parlamento galego a Lei de Emprego Público, que comprometía un fondo para devolver a paga extra de 2012 e en setembro deste ano todos os empregados públicos terán recuperado a totalidade daquela paga.

Tamén en setembro do pasado ano o Goberno central devolveu aos seus empregados públicos os días de vacacións e os días de libre disposición que lle foran retirados, habilitando ás comunidades autónomas a facer o propio co seu persoal. “Un mes despois, a Xunta asinou un acordo con tres centrais sindicais para levalo a cabo canto antes”, sinalou.

O portavoz popular engadiu que “este mesmo mes, no mesmo acordo no que a Xunta se comprometeu a tramitar este proxecto de Lei, acordamos coas centrais sindicais que a partires de xaneiro do ano próximo, o persoal empregado público recuperará a totalidade do complemento específico nas pagas extra”. “Adiantámonos un ano ao previsto inicialmente”, salientou.

PP E GOBERNO CUMPREN

Miguel Tellado criticou que a oposición desprece todas as medidas adoptadas polo Goberno galego en beneficio dos empregados públicos. “Dálles igual que haxa 8.500 persoas beneficiándose do sistema de flexibilidade horaria, dálles igual que ampliáramos o permiso de maternidade; e dálles igual que instaurásemos un sistema de adaptación de xornada para aqueles empregados públicos que estean someténdose a tratamentos de radioterapia ou quimioterapia, porque seguirán dicindo que é un goberno que maltrata aos empregados públicos, pero eles, que se están beneficiando destas medidas, saben que non”, manifestou.

“Os empregados públicos, igual que a cidadanía galega en xeral, están a ver que o PP e Goberno cumpren co que dixeron, que están a amosar que o que se fixo tiña un sentido e que están a demostrar que os sacrificios foron temporais e necesarios para evitar a bancarrota e o rescate”, indicou Miguel Tellado.

Parlamento aproba reforma Lei policías locais que desbloquea procesos nos concelllos

O PARLAMENTO APROBA A MODIFICACIÓN DA LEI DE COORDINACIÓN DE POLICÍAS LOCAIS, QUE DESBLOQUEA OS PROCESOS PARA INCORPORAR NOVOS AXENTES NOS CONCELLOS

·    O deputado popular dixo que a partir de agora dous concellos limítrofes poderán asociarse para prestar servizos de policía local, sempre que non superen en conxunto os 40.000 habitantes

Santiago, 28 de xuño de 2016.- O Parlamento de Galicia aprobou hoxe a modificación da Lei de coordinación de policías locais, “unha lei necesaria, garantista e consensuada cos axentes afectados e os concellos, que desbloquea os procesos de introdución de novos axentes nos concellos”, manifestou o deputado do Grupo Popular, Jacobo Moreira.

Na súa intervención na sesión plenaria, Moreira concretou que o Goberno galego decidiu abordar a reforma da Lei de coordinación de policías locais do ano 2007 “para adaptala á normativa vixente e aos distintos pronunciamentos xudiciais” sobre a materia, como a eliminación do límite de idade para o acceso aos corpos da policía local.

SEGURIDADE XURÍDICA

Jacobo Moreira apuntou que coa nova lei “dótase de seguridade xurídica aos concellos para a convocatoria de procesos selectivos de novos axentes de policía local, evitando a parálise case absoluta de convocatoria de prazas existente na actualidade”.

“Trátase dunha reforma consensuada tanto coas administracións locais como cos profesionais, que xurdiu do traballo da Comisión de Coordinación de Policías Locais e conta ademais cos parabéns das forzas sindicais”, indicou o deputado popular.

Moreira afirmou que esta nova lei “responde ás principais demandas dos sector: da seguridade xurídica, elimina as discriminacións arbitrarias, flexibiliza os procesos selectivos, da maior mobilidade aos axentes e facilita a súa permanencia en activo”.

Entre as novidades que incorpora este novo texto lexislativo, Jacobo Moreira salientou que os concellos poidan asociarse para a adquisición ou disposición de equipamentos conxuntos, ao tempo que se vai permitir que dous ou máis concellos limítrofes se poidan asociar para prestar servizos de Policía Local, sempre que non superen en conxunto os 40.000 habitantes”. 

Puy critica que a oposición queira retrasar a devolución da paga extra a funcionarios

No Pleno de mañá tamén se procederá á aprobación da modificación da Lei de servizos sociais e da modificación da Lei de coordinación de policías locais

PEDRO PUY CRITICA QUE A OPOSICIÓN “QUEIRA RETRASAR SEN XUSTIFICACIÓN” A DEVOLUCIÓN AOS FUNCIONARIOS DA PARTE DA PAGA EXTRA DEVINDICADA EN 2013

Santiago, 27 de xuño de 2016.- O portavoz do Grupo Popular, Pedro Puy, criticou hoxe que os grupos da oposición “queiran retrasar, sen aparente xustificación”, a aprobación no Pleno de mañá do proxecto de lei para a devolución da parte da paga extra devindicada aos funcionarios en 2013, a pesar de que conta co apoio dos sindicatos UXT, CC.OO. e Cesif. Así mesmo, na sesión plenaria procederase ao debate para a aprobación da proposición de lei, promovida polo Grupo Popular, de modificación da Lei de servizos sociais e do proxecto de lei de coordinación das policías locais de Galicia.

Pedro Puy lembrou que o Pleno dará comezo coa elección de tres membros do Consello Social da Universidade de Vigo e outros catro membros do Consello Social da Universidade de Santiago.

TEXTOS LEXISLATIVOS

A continuación, procederase ao debate para aprobación de tres textos lexislativos. En primeiro lugar, abordarase o proxecto de lei que modifica a Lei de coordinación de policías locais de Galicia que, entre outras cuestións, permite unha maior eficacia en determinados aspectos operativos e de organización dos corpos de policía local, favorecendo tanto aos propios concellos como ao persoal que se integra nestes corpos.

En segundo lugar, debaterase para a súa aprobación o proxecto de Lei a través do que a Xunta procederá este ano ao abono  aos empregados públicos da parte devindicada da extra de 2013.

Puy explicou que este proxecto de lei chega ao Parlamento logo do acordo entre a Xunta e os sindicatos UXT, CC.OO. e Cesif, polo que amosouse “sorprendido porque todos os grupos da oposición estean en desacordo en que este texto lexislativo se aprobe nunha única sesión plenaria e habilite ao Goberno galego para proceder ao pago inmediatamente”. “Despois de reivindicar a devolución destas cantidades aos empregados públicos, parece que queren retrasar o procedemento sen aparente xustificación”, apuntou.

SEN REXEITAR EMENDAS DA OPOSICIÓN

En terceiro lugar, o Pleno procederá ao debate para a súa aprobación da proposición de lei, impulsada polo Grupo Popular, para modificar a Lei de servizos sociais e introducir o modelo de concerto social como modelo de xestión. Así, Puy indicou que “as entidades sociais sen ánimo de lucro van ter medidas de preferencia e discriminación positiva en relación cos concertos sociais que se asinen”.

O portavoz popular manifestou que se trata dunha proposición de lei que chega ao debate definitivo en Pleno “cunha ampla aceptación, logo de que no trámite parlamentario o Grupo Popular non rexeitara ningunha emenda da oposición, incorporando ao texto definitivo o 83 por cento das súas emendas”

Para rematar, Pedro Puy salientou que o Grupo Popular defenderá na sesión plenaria a primeira medida de impulso de carácter popular que se debate nun parlamento autonómico. Trátase da proposición non de lei rexistrada pola Asociación galega de familias numerosas (Agafan) que solicita a redución do IVE ao 4 por cento para os cueiros dos bebés. 

Feijóo di que non é necesario votar esperando a ver qué pasa ou qué fai o teu partido

Ourense, 23 de xuño de 2016.- O presidente do PPdeG, Alberto Núñez Feijóo, sinalou que non hai por qué xogarse o voto xa que se pode depositar con garantías, con seguridade e con certezas se é para o candidato do Partido Popular, Mariano Rajoy.

Desta maneira se expresaba o líder dos populares galegos, que participou nun mitin esta tarde en Ourense onde estivo acompañado polos candidatos ás Cortes por Ourense, Miguel Ángel Viso e Miri Barreira, e polo presidente provincial, Manuel Baltar.

Durante a súa intervención, fixo fincapé en que non hai por qué xogarse o voto a ver qué pasa, sen ter claro se o noso partido terá escano ou se, pola contra, o noso apoio beneficiará ao contrario, como pasa con Ciudadanos en Galicia. Do mesmo xeito, o dirixente salientou que tampouco hai razóns para votar sen ter a seguridade do que vai facer despois a nosa opción, nin con quén o fará.

Nesta liña, sinalou que o voto non é unha lotería e que non podemos arriscarnos a que poida acabar na bancarrota ou en “volver a xogar”.  

CONTINUAR AVANZANDO
Durante a súa intervención, Feijóo asegurou que temos que superar o bloqueo para que España continúe avanzando.

Segundo precisou, aínda queda moito traballo por facer, pero si é unha realidade que, despois de catro anos de mandato do PP, o país volve ser de fiar, respectable e crea máis emprego que calquera outro de Europa.

Por este motivo, asegurou que temos que ter unha garantía de goberno que se chama responsabilidade e compromiso, ao tempo que chamaba a desconfiar de calquera candidato sen experiencia en política. “Agora nos enfrontamos a un conxunto de políticos que queren desfacer a política e que queren dividir España en bandos”, engadía.

O dirixente tamén salientou que debemos mobilizarnos a favor de Galicia e de España, da moderación, dun partido que non ten máis obxectivo que unir e solventar os problemas que ten o país.

A FAVOR DA MODERACIÓN
Segundo o presidente, hai moita xente que nestes seis meses non atopou o que buscaba en Ciudadanos, sen criterio, sen candidatos, sen programa e sen conseguir ningún escano. Por este motivo, invitounos a todos eles a volver votar aos populares posto que “este é o voso partido e os vosos votos si se van converter en escanos”.

De igual modo, dirixiuse aos socialistas que non queren diluírse ata desaparecer. “Os votos aos PP son votos para impedir que o PSOE se entregue a Podemos”, dixo Feijóo facendo referencia ao Partido Socialista constitucional, moderado e que quere levantar o pais.

[iframe width=”600″ height=”350″ src=”https://www.youtube.com/embed/JfZDtsEU5uE” frameborder=”0″ allowfullscreen ]

Feijóo pide o voto dos socialistas que non atoparon no PSOE compromiso coa moderación

Di que nos enfrontamos a un populismo que quere dividirnos e que non ten máis plantexamento que o “poder polo poder”
 
Feijóo pide o voto dos socialistas que non atoparon no seu partido un compromiso claro coa moderación porque esa garantía a teñen no PP
 
• Indica que os partidos responsables do bloqueo que vive o país continúan vetando nesta campaña, sen aprender nada do acontecido nestes últimos seis meses
 
• “Cando un partido non acepta os resultados das urnas, é un partido que está reñido cos cidadáns”, asegura
 
Vigo, 22 de xuño de 2016.– O presidente do PPdeG, Alberto Núñez Feijóo, pediu o apoio dos votantes socialistas que non atoparon no seu partido un compromiso claro coa moderación, xa que esa é unha garantía que só teñen no PP. 
 
Nun mitin celebrado hoxe en Vigo no que contou coa compañía da candidata ao Congreso, Ana Pastor, e do presidente provincial, Alfonso Rueda; o dirixente aseguroulles a todos aqueles que votaron ao PSOE pero que non queren que Podemos “lles dea leccións”, que teñen a opción de unirse aos populares.
 
Do mesmo xeito, tamén sinalou que hai moita xente que nestes seis meses non atopou o que buscaba en Ciudadanos senón todo o contrario, coa incerteza de que o seu voto non se traduza nun escano para esta formación pero si se poida converter nun escano para Podemos. Para todos eles, tamén admitiu que teñen unha vía segura co voto aos populares
 
 
ACABAR CO BLOQUEO
Durante a súa intervención, Feijóo asegurou que hai que acabar co bloqueo, co veto e cos sectarismos.  “Pedimos un voto a favor de seguir construíndo”, engadiu.
 
O presidente recoñeceu que agora nos enfrontamos a un populismo que quere dividirnos e que non ten máis plantexamento que o “poder polo poder”. “Enfrontámonos ante uns revanchistas que o que queren é dividir aquilo que leva xunto 500 anos”, dixo. 
 
En contra disto, salientou que a política consiste en cumprir cos compromisos, facendo fincapé en que os populares non teñen máis interese que resolver os problemas daqueles que pasan por dificultades, como levan facendo nos últimos anos. 
 
“Acabáronse os bandos”, admitía explicando que non podemos permitir que haxa quen veña rematar con todo o que construímos nos últimos 40 anos. “Somos galegos e españois e por iso queremos seguir traballando xuntos”, apuntou.
 
Así mesmo, Feijóo aseverou que os partidos responsables do bloqueo que vive o país continúan vetando durante esta campaña, sen aprender nada do acontecido nestes últimos seis meses. Por este motivo, pediulles que sexan demócratas e que acepten o resultado das urnas.
 
FACILITAR O GOBERNO
Nese sentido, si asegurou que o PP se compromete a que, se hai outra formación con máis escanos, facilitarán que poida formar goberno. Por este motivo, incidiu na necesidade de que o PSOE e Ciudadanos aclaren o qué farán despois destas eleccións e se permitirán gobernar  aos que decida a cidadanía. 
 
“Non queremos que esta campaña volva a non servir para nada e que se rían de nós porque non lles gusta o resultado”, afirmaba Feijóo ao tempo que mantiña que, cando un partido non acepta os resultados das urnas, é un partido que está reñido cos cidadáns.
 
Para concluír, Feijóo tamén puxo en valor a actitude de Mariano Rajoy. “É un señor, un señor que non insulta, non lle falta o respecto a ninguén e que non é un sectarista”, precisaba indicando que o candidato popular á Moncloa si sabe o que significa “ser, estar e vivir en Galicia”. 
 
[iframe width=”600″ height=”350″ src=”https://www.youtube.com/embed/G0Rck9NZNEw” frameborder=”0″ allowfullscreen ]

GPP apoia incrementar obstáculos legais para operacións en paraísos fiscais

O GRUPO POPULAR APOIA NO PARLAMENTO DEMANDAR AO GOBERNO CENTRAL QUE DIFICULTE E INCREMENTE OS OBSTÁCULOS LEGAIS DAS OPERACIÓNS ECONÓMICAS EN PARAÍSOS FISCAIS

·    Tamén se solicita que a Administración central intensifique a sinatura de convenios de dobre imposición e dos acordos de intercambio de información en materia tributaria ata a eliminación de territorios considerados paraísos fiscais

Santiago, 23 de xuño de 2016.- O Grupo Popular, a través do seu portavoz, Pedro Puy, condenou esta mañá no Parlamento a existencia de paraísos fiscais e apoiou a aprobación dunha proposición non de lei a través da que se insta ao Goberno central a dificultar e incrementar os obstáculos legais das operacións económicas con residentes nestes paraísos fiscais, así como a intensificar a sinatura de convenios de dobre imposición e dos acordos de intercambio de información en materia tributaria ata a eliminación de territorios considerados paraísos fiscais.

Pedro Puy sinalou que desde o Partido Popular “estamos plenamente de acordo na condena dos paraísos fiscais, que introducen distorsións na capacidade dos estados para facer políticas redistributivas”.


PLENAMENTE DEFINIDOS

Neste sentido, explicou que os paraísos fiscais “están plenamente definidos no ámbito internacional” e concretou que “é posible loitar contra eles a través da sinatura de convenios de doble imposición cos estados con réxime de tipo off-shore, de xeito que comuniquen á facenda española calquera movemento financeiro que se faga no seu territorio”.

Por este motivo, o Grupo Popular formulou unha emenda á proposición non de lei presentada por AGE, que resultou aprobada por unanimidade, a través da que se demanda ao Goberno central que intensifique a sinatura de convenios de dobre imposición e dos acordos de intercambio de información en materia tributaria necesarios ata a eliminación da lista de territorios considerados como paraísos fiscais.

Puy sinalou que na actualidade “xa existen organismos internacionais que están traballando na identificación e loita contra estes paraísos fiscais, do mesmo xeito que o Goberno español xa reformou a lexislación española, tanto no imposto de sociedades como no da renda das persoas físicas, para incorporar medidas neste sentido”. 

Parlamento aproba solicitar non sexa ganancia patrimonial o abono de costas xudiciais

A proposta, que saíu adiante por unanimidade logo dunha transacción entre o Grupo Popular e o BNG, pon especial énfase nos afectados polas participacións preferentes que gañaron os procesos xudiciais contra as entidades financeiras

O PARLAMENTO APROBA DEMANDAR AO GOBERNO CENTRAL QUE DEIXE DE CONSIDERAR COMO GANANCIA PATRIMONIAL O ABONO DAS COSTAS XUDICIAIS

Santiago, 23 de xuño de 2016.- O Parlamento de Galicia aprobou hoxe por unanimidade, logo dunha transacción entre o Grupo Popular e o BNG demandar ao Goberno central que deixe de considerar como ganancia patrimonial as cantidades recoñecidas a favor dos contribuíntes como abono das costas xudiciais pola parte perdedora nun xuízo, particularmente no caso dos preferentistas en relación coas cantidades abonadas polas entidades financeiras como consecuencia de teren sido condenadas ao pago das costas xudiciais.

A deputada do Grupo Popular Herminia Pouso salientou que este problema dos afectados polas participacións preferentes “afectou en menor medida en Galicia, xa que a maior parte dos prexudicados das antigas caixas galegas se acolleron á arbitraxe e evitaron acudir á vía xudicial”. Ademais, os que decidiron acudir á vía xudicial, conseguiron acadar un acordo antes da celebración do procedemento, polo que tampouco están afectados polo cobro de costas xudiciais.

“Pero ademais dos afectados polas participacións preferentes, que están obrigados a tributar polas costas procesuais percibidas, debemos ter en conta todas aquelas persoas que se poidan ver afectadas en procesos xudiciais logo de ter que tributar polas costas”, apuntou.

Por este motivo, o Grupo Popular propuxo na súa emenda que a Administración central estenda a todos os contribuíntes a non consideración como ganancia patrimonial das cantidades recoñecidas ao seu favor como dereito ao abono das costas xudiciais pola parte perdedora do litixio, con especial referencia aos posuidores de participacións preferentes que optaron pola vía xudicial para a resolución do seu problema.

 

Feijóo pideo apoio ós votantes de Cs que queiran máis deputados defendendo moderación

Insiste en que temos que votar para que gañe aquilo no que cremos e o que máis nos importa como galegos e españois
Feijóo pide o apoio dos votantes de Ciudadanos que quedaron sen escano o 20-D para que haxa máis deputados galegos que defendan a moderación e a convivencia constitucional
 
• Di que non pide un voto á contra senón a favor do país, das nosas liberdades, e de que ninguén lle teña que deber pleitesía a un gobernante por facer o seu labor 
 
• Apunta que Galicia ten que seguir sendo unha prioridade e destaca a importancia de ter un goberno que se centra no que debe, como fai o PP 
 
Lugo, 21 de xuño de 2016.- O presidente do PPdeG, Alberto Núñez Feijóo, pediu o apoio aos  galegos que votaron a Ciudadanos e quedaron sen escano o pasado 20 de decembro, asegurando que só co voto ao Partido Popular en Galicia haberá máis deputados galegos que defendan a moderación e a Constitución. 
 
Nun mitin celebrado hoxe en Lugo e no que estivo acompañado polos candidatos ás Cortes, Joaquín García Díez e José Manuel Barreiro, e pola presidenta provincial, Elena Candia; o líder do PPdeG afirmou que debemos votar para que aquilo no que cremos se poida defender desde os escanos do Congreso.
 
Así mesmo, sinalou en que temos que dar o noso voto polo que cremos e o que máis nos importa, xa que somos galegos e españois e non hai que escoller entre unha cousa ou a outra.
 
Nesta liña, incidiu que os que en Galicia cren na convivencia constitucional, na igualdade de todos os españois e na moderación só teñen na papeleta do PP a vía para que todo iso sexa posible.
 
Por este motivo, dirixiuse aos votantes de Ciudadanos que non queren que o seu voto sirva para que a formación de Pablo Iglesias consiga máis escanos, así como aos socialistas que non desexan que o seu partido se converta na muleta de Podemos. A todos eles, pediulles o voto para os populares.
 
UN VOTO A FAVOR
“A política non consiste en enfrontar a ninguén”, apuntou Feijóo mentres poñía en valor que os populares non irán contra da vontade dos cidadáns reflectida nas urnas xa que “non temos máis obxectivos que servir aos españois”.
 
Ademais, o dirixente recoñeceu que el non pide un voto á contra senón que o pide a favor do país, das nosas liberdades, e de que ninguén lle teña que deber pleitesía a un gobernante por facer o seu labor. 
 
Feijóo salientou tamén que cada un de nós seremos os responsables do que ocorra na España do 2020, por iso insistiu na importancia de volver mobilizarnos porque o país non se volva parar e siga avanzando.
 
GALICIA COMO PRIORIDADE
“Temos que votar para que Galicia siga sendo prioridade” dixo ao tempo que precisaba que debemos votar para que os nosos intereses se xestionen desde un goberno que se centra no que debe, como ocorre co PP.  
 
E é que, tal e como indicou, cos populares créase emprego, crecemos, e cúmprense as obrigas para así poder pagar as facturas, as pensións e que siga funcionando os servizos públicos.
 
Deste modo, fixo fincapé en que temos que mobilizarnos contra a radicalidade das propostas, contra a parálise das institucións, e contra os que queren “facer unha emenda aos últimos 40 anos, que parece que o inventaron todo pero non solucionaron nin un só problema
 
[iframe width=”600″ height=”350″ src=”https://www.youtube.com/embed/E0m_z0NtVwk” frameborder=”0″ allowfullscreen ]

GPP leva a pleno a primeira PNL de iniciativa popular,sobre rebaixa IVE dos cueiros

 

O GRUPO POPULAR LEVA A PLENO A PRIMEIRA PROPOSICIÓN NON DE LEI DE INICIATIVA POPULAR, QUE SOLICITA A REBAIXA DO IVE AOS CUEIROS DOS NENOS

·    A sesión plenaria debaterá para a súa aprobación a devolución aos funcionarios da paga extra de 2013, a modificación da Lei de servizos sociais e a Lei de coordinación de policías locais

 

Santiago, 21 de xuño de 2016.- O Grupo Popular asumiu e incorporou na orde do día do Pleno da vindeira semana o debate da primeira proposición non de lei de iniciativa popular que se debaterá nun Parlamento español, a través da que se solicita á rebaixa ao 4 por cento do IVE nos cueiros dos nenos. Ademais, o Grupo Popular demandará que os concellos de A Coruña, Lugo, Santiago, Vigo e Ourense adopten as medidas necesarias para estender a gratuidade do transporte urbano aos menores de 18 anos.

A Lei de iniciativa lexislativa popular e participación cidadá no Parlamento, aprobada no mes de agosto do pasado ano co único voto favorable do Grupo Popular, recolle a posibilidade de que os cidadáns poidan presentar iniciativas populares de control e de impulso ao Goberno galego. Deste xeito, a Asociación Galega de Familias Numerosas (Agafan) rexistrou no Parlamento galego a primeira proposición non de lei de iniciativa popular, “que no PP temos a honra de ser o grupo parlamentario que solicitou a súa inclusión no debate da sesión plenaria da vindeira semana”, sinalou Puy.

A través desta proposición non de lei de iniciativa popular solicítase ao Goberno central a redución do tipo impositivo de IVE dos cueiros dos nenos, pasando do 21 por cento actual ao superreducido 4 por cento como produto de primeira necesidade. Pedro Puy  cualificou este debate como “moi interesante porque, máis aló da petición concreta que se fai de rebaixar o IVE a este produto hixiénico, introduce algo que axuda ás familias, especialmente a aquelas que teñen máis fillos, nun contexto no que a demografía é un dos principais problemas do país”.

“Ademais, vai en coherencia cos propios plans de acción social que ten a Xunta, entre os que inclúe favorecer que a crianza dos fillos reporte os menos custos posibles, sobre todo cando os custos teñen que ver con decisións públicas, como neste caso de carácter fiscal”, apuntou.


TRANSPORTE URBANO GRATUÍTO

O Grupo Popular tamén defenderá na sesión plenaria outra proposición non de lei a través da que se solicita aos concellos galegos que contan con transporte urbano (A Coruña, Lugo, Santiago, Vigo e Ourense) a que adopten as medidas necesarias para estender a gratuidade do transporte urbano aos menores de 18 anos.

O portavoz popular lembrou que o Goberno galego xa anunciou a gratuidade do transporte metropolitano interurbano para os menores de 18 anos, unha medida que suporá un investimento anual de dous millóns de euros e que beneficiará a arredor de 250.000 mozos. “Ten unha labor de promoción do transporte público de carácter pedagóxico e positiva para o conxunto da sociedade, polo que consideramos que esta medida debe trasladarse aos ámbitos urbanos”, sinalou.

O Pleno da vindeira semana dará comezo coa elección de diversos membros dos consellos sociais das universidades de Santiago e Vigo. A continuación, procederase ao debate para a súa aprobación do proxecto de Lei de coordinación das policías locais e da proposición de lei de modificación da Lei de servizos sociais, que chega ao debate definitivo en sesión plenaria logo de que o Grupo Popular aceptara ou transaccionara o 83 por cento das emendas presentadas polo PSOE, BNG e AGE.

COBRO DA EXTRA DE 2013

Así mesmo, procederase ao debate para a súa aprobación, polo procedemento de lectura única, do proxecto de lei polo que se aproba a recuperación dos importes deixados de percibir polos empregados públicos correspondentes á paga extra do período comprendido entre o 1 de xaneiro e o 28 de febreiro de 2013. Puy lembrou que esta iniciativa “ten a súa orixe no acordo acadado pola Xunta cos sindicatos UXT, CC.OO. e Cesif”, polo que lamentou que os grupos da oposición “se opuxeran na Xunta de Portavoces á tramitación deste texto lexislativo para dar inmediata solución a esta cuestión”.

O  Grupo Popular tamén formulará dúas preguntas ao Goberno galego. A primeira delas sobre as actuacións concretas que se realizarán ao abeiro do convenio de colaboración proposto pola Consellería do Medio Rural aos concellos galegos para a participación na prevención e defensa contra os incendios forestais; e unha segunda sobre as previsións que ten a Xunta para a construción da estación intermodal de Vigo.