Rueda: “Eu quero máis e mellor Galicia, non que nos convirtamos nunha sucursal máis das franquicias independentistas que apoia o PSOE”

Hoxe, nun mitin en Vilagarcía de Arousa ao que asistiron 400 persoas e no que tamén interviron o presidente provincial do PP de Pontevedra, Luis López, o candidato pola provincia de Pontevedra, Raúl Santamaría, e a portavoz do PP local, Ana Granja

Rueda: “Eu quero máis e mellor Galicia, non que nos convirtamos nunha sucursal máis das franquicias independentistas que apoia o PSOE”

  • “Chova ou non, faga frío ou calor, pase o que pase, o próximo domingo tedes que ir a votar”, arengou ao tempo que subliñaba que o próximo 18 de febreiro “é a verdadeira enquisa”
  • Ante o remate do prazo para exercer o voto CERA o próximo xoves 15, tivo unhas palabras para os galegos do exterior: “Non sodes mercancía electoral da que falar mal durante catro anos e á que pretender convencer en 15 días como fai a esquerda. Sodes galegos que tiveron que emigrar co posto e que, co voso esforzo, construíchedes a Galicia de hoxe”

O presidente e candidato do PPdeG, Alfonso Rueda, asegurou hoxe que “as mellores páxinas da historia de Galicia están aínda por escribir” e por iso mostrou o seu desexo de escribilas man a man cos galegos e galegas “como continuación de todo o pasado e do moito que queda por escribir”.

Facendo un chamamento ao voto, recoñeceu ser consciente de que pedir unha maioría é “pedir moito” porque “supón pedirlle á xente a súa confianza para seguir xestionando os seus recursos e tamén pedirlle a súa axuda para parar o retroceso que quere promover a esquerda”. Pero remarcou que está disposto a asumir ese compromiso e a cambio ofrece “unha xestión desde a experiencia e o inconformismo” e “as ganas de aproveitar o aprendido para seguir mellorando”.

“Chova ou non, faga frío ou calor, pase o que pase, o próximo domingo tedes que ir a votar”, arengou aos 400 asistentes ao mitin celebrado esta tarde en Vilagarcía de Arousa subliñando que o próximo 18 de febreiro “é a verdadeira enquisa”.

Recordou ademais que onte abriu o prazo para exercer o voto CERA –que estará aberto ata o próximo xoves 15– e quixo ter unhas palabras para os galegos do exterior: “Non sodes mercancía electoral da que falar mal durante catro anos e á que pretender convencer en 15 días como fai a esquerda. Sodes galegos que tiveron que emigrar co posto e que, co voso esforzo, construístes a Galicia de hoxe”.

“Preséntome para facerlle a vida un pouco máis fácil aos galegos e para que poidan atopar nos seus gobernantes a alguén que ofreza solucións aos seus problemas”, engadiu incidindo na importancia de contar cun Goberno “sereno á hora de tomar decisións, sensato nas súas actuacións e eficaz na súa xestión”.

“SE PRETENDEN ARROLLARNOS, EU SÁIOLLES AO CHOQUE”

Alfonso Rueda preguntouse “por que en Galicia non se poden seguir facendo as cousas ben”, ao contrario do que pretende ese multipartito da esquerda que “aspira a traer aquí os seus líos”. E dirixíndose directamente a eles afirmou: “Se eles pretenden arrollarnos, eu sáiolles ao choque”.

Explicou que fronte á Galicia que avanza, a alternativa que ofrecen os outros “é o mesmo que xa tiñamos superado hai 20 anos pero branqueado e escondido detrás dunha falsa sonrisa”. Pero, engadiu, aí está o seu programa para recordar a realidade: “A nosa primeira medida é de axuda ás familias. A súa, a independencia”.

“Eu non quero que Galicia sexa unha sucursal máis das franquicias independentistas que apoia o PSOE. O que eu quero é máis e mellor Galicia, que nos superemos a nós mesmos e que sigamos mellorando con sentidiño e normalidade”, concluíu.

Alfonso Rueda reivindica no Porriño a Galicia que funciona desde as vilas e aposta pola competitividade da súa mocidade

O presidente e candidato do PPdeG, Alfonso Rueda, participou hoxe nunha comida-mitin no Porriño na que animou aos 600 asistentes a ir votar o próximo 18 de febreiro para que Galicia non pare e siga funcionando os próximos catro anos.

Acompañado polo presidente provincial do PP de Pontevedra, Luis López, a número 2 da candidatura pola provincia, Patricia García, e o alcalde Alejandro Lorenzo; o líder dos populares galego reivindicou a Galicia que funciona coa verdade por diante e orgullo do que é fronte o modelo de división identitaria que promove o multipartito da esquerda.

Quere que Galicia siga superándose a si mesma tomando como punto de partida os grandes avances vividos ao longo destes anos. Neste sentido, reivindicou o moito que avanzou a educación pública e a súa proposta dunha educación a prezo cero desde a gardería ata acadar unha profesión na FP ou na Universidade. Para así garantir ao máximo a competitividade da mocidade galega.

Un avance que se deu tamén na sanidade pública, do que puxo como exemplo a reforma que se está levando a cabo do centro de saúde do Porriño para ampliar as súas instalacións e á que o Goberno galego dedicou un investimento de máis de catro millóns de euros.

Por todo isto, trasladou o seu desexo de repetir o 18 de febreiro un éxito como a de Alejandro Lorenzo nas pasadas eleccións municipais, nas que reuniu o 65% dos votos e demostrouse que os veciños do Porriño coñecen ben –e por iso apoian– o modo de facer política do Partido Popular.

Alfonso Rueda quere que os votos que reciba o 18-F sirvan para seguir mellorando a vida dos galegos e que o resto de españois continúen tendo un espello onde mirarse

Hoxe, nun mitin na Estrada ao que asistiron un milleiro de persoas e no que tamén participaron o presidente provincial de Pontevedra, Luis López, a candidata pola provincia María Martínez e o alcalde José López Campos

Alfonso Rueda quere que os votos que reciba o 18-F sirvan para seguir mellorando a vida dos galegos e que o resto de españois continúen tendo un espello onde mirarse

  • Refírese á “Galicia soñada” como “unha terra serena, sensata, resolutiva e eficaz” e un faro de “tranquilidade” ao que a xente poida mirar con alivio porque “aquí as cousas se fan ben e a xente vive tranquila”
  • Fronte á “política de egos” e fronte aos “sectarios e intolerantes de sempre”, o presidente pide a confianza no “partido que traballa, que é eficaz e que non promete nada que non poida cumprir”

11 de febreiro de 2024. O presidente e candidato do PPdeG, Alfonso Rueda, quere que os votos que reciba o próximo 18 de febreiro sirvan para continuar facéndolle a vida máis doada a todos os galegos e que o resto de españois sigan tendo en Galicia un espello onde mirarse desde o respecto e a admiración.

Así o asegurou hoxe nun mitin na Estrada no que falou da “Galicia soñada” como “unha terra serena, sensata, resolutiva e eficaz”. Un faro de “tranquilidade” ao que a xente poida mirar con alivio porque “aquí as cousas se fan ben e a xente vive tranquila”.

“Pídovos o voto para conservar todo o que funciona en Galicia e para non converternos nunha sucursal do lío nin nun reflexo dos peores vicios que se están instalando na política nacional”, explicou facendo un chamamento a demostrar nas urnas que “Galicia ten o remedio que España necesita”.

Fronte á “política de egos” e fronte aos “sectarios e intolerantes de sempre”, Rueda pediu a confianza no “partido que traballa, que é eficaz e que non promete nada que non poida cumprir”. Un PPdeG que non fala tanto de ideoloxía como a esquerda, senón que prefire fala só do importante: “O que propoñemos e o que faremos para que a xente viva aínda mellor en Galicia”.

“Mentres outros seguen co mesmo de sempre, nós sabemos o que é gobernar coa confianza dos galegos e temos a ambición e o inconformismo que se precisan para continuar facendo que Galicia funcione”, reivindicou.

Rueda rematou a súa intervención apostando por “unha Galicia que avance en servizos cada vez mellores” e na que “os soños se convertan en realidades”. Algo que exemplificou en clave local falando dos moitos compromisos materializados en feitos no concello da Estrada, como o Centro de Emerxencias de Galicia, o novo edificio dos xulgados ou a ampliación da autovía Santiago-A Estrada (AG-59).

Alfonso Rueda pide o voto para a Galicia que se supera a si mesma e non queda atascada en barullos multipartitos e separatistas

Hoxe, nunha cea-mitin en Sanxenxo na que tamén participaron o presidente do PP de Andalucía, Juanma Moreno, a candidata pola provincia de Pontevedra María Deza e o alcalde Telmo Martín

Alfonso Rueda pide o voto para a Galicia que se supera a si mesma e non queda atascada en barullos multipartitos e separatistas

  • Recorda que somos a Comunidade que máis apoia ás familias, que a educación pública galega está nos mellores niveis de España e que os galegos contan con prestacións únicas como o calendario vacinal infantil

10 de febreiro de 2024. O presidente e candidato do PPdeG, Alfonso Rueda, pediu hoxe o voto para a Galicia que funciona, que se supera a si mesma e non queda atascada en barullos multipartitos e separatistas, ofrecendo a cambio o seu compromiso coa confianza maioritaria que agarda acadar dos galegos e galegas o próximo 18 de febreiro.

Nunha cea-mitin organizada en Sanxenxo na que estivo acompañado polo presidente do PP de Andalucía, Juanma Moreno, a candidata pola provincia de Pontevedra María Deza e o alcalde Telmo Martín; o líder dos populares galegos insistiu en que o próximo 18 de febreiro só hai dúas opcións: ou os que van á contra de todo ou os que fan propostas de futuro desde o inconformismo e tendo a Galicia como razón de ser.

Reivindicou que, fronte ás visións sectarias dos partidos da imposición, os galegos séntense tan orgullosamente galegos como españois. E por iso avoga por unha Galicia na que as identidades non sexan un problema e ningún teña o dereito a dicir quen é máis ou quen é menos galego.

Tamén fixo balance do moito que avanzamos nestes anos, incidindo especialmente en que Galicia é a Comunidade que máis apoia ás familias, que a educación pública galega está nos mellores niveis de España e que, no eido sanitario, os galegos contan con prestacións únicas como o calendario vacinal infantil.

Alfonso Rueda asegura que o 18-F Galicia será, fronte a Sánchez e o nacionalismo, “o futuro e a esperanza de España”

Hoxe, nun mitin en Santiago de Compostela ao que asistiron 500 persoas e no que tamén participaron o presidente do PP de Andalucía, Juanma Moreno, a secretaria xeral do PPdeG, Paula Prado, e o candidato pola provincia da Coruña Borja Verea

Alfonso Rueda asegura que o 18-F Galicia será, fronte a Sánchez e o nacionalismo, “o futuro e a esperanza de España”

  • Reivindica “sen contradicións e sen complexos” que non é incompatible ser orgullosamente galego e orgullosamente español, nin fai falta ser menos español para ser mais galego
  • “Isto vai de ter palabra e eu si teño palabra e quero seguir traballando por Galicia sen que ninguén nos diga o que temos que facer. O único que necesitamos é a maioría suficiente para poder facelo”, defende

10 de febreiro de 2024. O presidente e candidato do PPdeG, Alfonso Rueda, ten claro que unha España mellor comeza en Galicia e por iso asegurou hoxe que o próximo 18 de febreiro os resultados das eleccións autonómicas demostrarán que a nosa Comunidade é tamén “o futuro e a esperanza de España”.

Reivindicou “sen contradicións e sen complexos” que non é incompatible ser orgullosamente galego e orgullosamente español, nin fai falta ser menos español para ser galego. Do mesmo xeito que tampouco é necesario que a outros territorios lle vaia mal para que a Galicia lle poida ir ben.

Neste sentido, e aproveitando a presenza no acto do presidente do PP de Andalucía, Juanma Moreno, o líder dos populares galegos subliñou que a nosa Comunidade é “parte fundamental dunha España diversa, plural e igualitaria”.

Alfonso Rueda cre que, ás portas da última semana de campaña electoral, xa están claras as dúas únicas opcións para Galicia: “Ou seguir mellorando desde o sentidiño e a estabilidade ou deixarnos levar polo barullo que vemos noutros sitios e que os partidos do multipartito queren traer aquí”.

Referíndose precisamente ao multipartito de esquerdas, o líder dos populares galegos acosounos de “seguir dicindo o mesmo que hai 20 anos pero agora intentando disimular e branquear as súas intencións” e retou ao BNG a facer campaña cos seus verdadeiros aliados: “Se os nacionalistas foran valentes, consecuentes e sinceros, deberían traer a ese do que tanto presumen cando cren que non os oen e con quen se fan fotos que logo negan: Arnaldo Otegi”.

Tamén aproveitou a celebración esta mañá dun acto con representantes do sector educativo na Cidade da Cultura para reivindicar que “a educación non é de ninguén máis que das familias, dos alumnos e dos docentes”, que “as aulas non son lugares para facer mítines” e que “os docentes non teñen obriga de ser axentes electorais de ningún partido”.

“Fronte ao modelo de adoutrinamento, de imposición e de monolingüismo, os galegos queremos liberdade. Porque empezan dicíndonos como hai que falar e acabarán dicíndonos como temos que pensar. Nós queremos pensar en liberdade”, defendeu.

Rueda apostou por “seguir funcionando como un pobo unido a pesar das diferenzas” e apelou ao inconformismo para seguir construíndo entre todos unha Galicia con “máis e mellores servizos públicos” sen esquecer nunca todo o avanzado. Ese é o espírito que, tal e como asegurou, impregna o programa electoral do PPdeG.

“Isto vai de ter palabra e eu si teño palabra e quero seguir traballando por Galicia sen que ninguén nos diga o que temos que facer. O único que necesitamos é a maioría suficiente para poder facelo sen escusas e cun único compromiso: entre os que conformamos as listas e os galegos que confíen en nós”, concluíu.

Alfonso Rueda aposta por seguir incrementando a seguridade viaria nas vías autonómicas para reducir a vulnerabilidade dos motoristas

10 de febreiro de 2024. O presidente e candidato do PPdeG, Alfonso Rueda, realizou hoxe un percorrido en moto desde a Cidade da Cultura en Santiago de Compostela ata a parroquia do Pedrouzo (O Pino) acompañado dunha trintena de motoristas e co obxectivo de concienciar sobre a especial vulnerabilidade dos condutores de motocicletas nas estradas e a importancia da seguridade viaria.

Cómpre salientar que as especiais características territoriais de Galicia, cunha orografía complexa e unha poboación espallada, esixen dunha rede de infraestruturas de comunicación completa e segura. De aí que sexa necesario aumentar os esforzos no mantemento e conservación das vías e poñer as novas tecnoloxías ao servizo dunha mobilidade máis segura, sostible e conectada.

O Goberno galego xa actuou ao longo destes anos en todos os treitos de concentración de accidentes da rede autonómica, logrando unha redución do 60% na sinistralidade. Por iso agora o PPdeG quere seguir esa mesma liña e no seu programa propón actuar en todos os puntos negros das vías autonómicas identificando os treitos con maior potencial de mellora e eliminando obstáculos dos marxes para evitar os accidentes e reducir a súa gravidade.

Alfonso Rueda: “As nosas prioridades son seguir ofrecendo certezas aos galegos e que os servizos públicos funcionen aínda mellor”

O presidente e candidato do PPdeG, Alfonso con veciños de Curtis

O presidente e candidato do PPdeG, Alfonso Rueda, pediu hoxe aos veciños de Curtis unha maioría absoluta o 18 de febreiro para que Galicia siga funcionando e poder parar a unha esquerda que pretende impoñer o que eles defenden en contra do sentir maioritario dos galegos e galegas.

Continue reading

Alfonso Rueda anuncia a posta en marcha dun plan para detectar e previr o abandono escolar potenciando a FP básica

Hoxe, nun acto co sector educativo na Cidade da Cultura ao que asistiron 1.500 persoas e no que tamén participou o candidato pola provincia de Pontevedra Román Rodríguez

Alfonso Rueda anuncia a posta en marcha dun plan para detectar e previr o abandono escolar potenciando a FP básica

  • Ofrecerase información e orientación ao alumnado e levaranse a cabo actuacións específicas encamiñadas a reorientar aos rapaces en risco de abandono ou que xa deixaron de formarse, a desempregados e a mozos sen titulación académica
  • “O ensino de calidade é aquel que non cree en ningún tipo de imposición ideolóxica, lingüística ou partidista, senón que ofrece unha visión ampla para que a xente decida en liberdade”, sostén o presidente do PPdeG

10 de febreiro de 2024. O presidente e candidato do PPdeG, Alfonso Rueda, anunciou hoxe a posta en marcha do Plan FPGal360 co obxectivo de detectar e previr o abandono escolar antes de que se produza e derivar a ese alumnado a ciclos de Formación Profesional Básica.

Un obxectivo que se enmarca na procura de acadar o “abandono cero” e que o 100% dos rapaces sigan formándose e preparándose, polo menos, ata cumprir a maioría de idade. Por iso, a aposta do líder dos populares galegos é potenciar os ciclos formativos para que ningún mozo quede sen ter unha titulación e poida así mellorar a súa inserción laboral.

A través deste novo plan ofrecerase información e orientación sobre a FP Básica ao alumnado desde idades temperáns e levaranse a cabo actuacións específicas tanto para animar ao rapaces en risco de abandono ou que xa deixaron os estudos a seguir formándose, como para dar a coñecer a desempregados ou mozos sen titulación académica as oportunidades laborais que ofrecen estes ciclos formativos.

Na súa intervención, Alfonso Rueda asegurou que “para que Galicia funcione, a educación ten que funcionar”. Algo para o que é fundamental “contar cun profesorado e unha comunidade educativa con vocación e dedicación” e, sobre todo, a procura constante da calidade, a excelencia e a accesibilidade no sistema educativo.

E precisamente nesa liña incidiu na capacidade de “vertebración do territorio” que tamén ten a educación, apostando por “construír un sistema educativo presente en todas partes, que vaia onde están os alumnos e non ao revés e que lles posibilite o máximo posible o acceso aos centros educativos”.

Unha accesibilidade que tamén ten que ser económica e de aí o esforzo económico que se fai desde o Goberno galego por financiar a gratuidade da educación infantil de 0 a 3 anos e a manter conxeladas as taxas universitarias. Dúas medidas ás que Alfonso Rueda propón ademais engadir a gratuidade das primeiras matrículas en todos os graos universitarios e en todos os cursos.

En clave máis política, o presidente e candidato do PPdeG remarcou especialmente que “a docencia ten que baseares en ensinar e formar, non en adoutrinar” porque, do contrario, xeraríase rexeitamento e desapego:  “Unha cousa é educar en valores e outra educar en ideoloxía”.

“O ensino de calidade é aquel que non cree en ningún tipo de imposición ideolóxica, lingüística ou partidista, senón que ofrece unha visión ampla para que a xente decida en liberdade”, concluíu a este respecto.

Alfonso Rueda en Betanzos

Visita do presidente e candidato do PPdeG, Alfonso Rueda, a Betanzos acompañado polo cabeza de lista pola provincia da Coruña, Diego Calvo, e a tamén candidata provincial Cecilia Vázquez.

Durante o percorrido, visitou lugares emblemáticos da vila como a Porta da Ponte Vella ou o paseo á beira do río Mandeo e reiterou o seu compromiso de seguir impulsando a dinamización e revitalización do conxunto histórico-artístico da vila mediante o Plan Rexurbe.

De feito, en materia de vivenda,  o programa electoral do PPdeG inclúe a aposta por seguir dando vida aos centros históricos rehabilitando inmobles abandonados e o emprego da madeira certificada na rehabilitación de vivendas. Ademais do compromiso de ampliar o parque público de vivenda.

Alfonso Rueda comprométese a defender o dereito de galegas e galegos “a vivir tranquilos lonxe das imposicións”

Hoxe, nun mitin en Lalín ao que asistiron 2.000 persoas e no que tamén participou o presidente nacional do PP, Alberto Núñez Feijóo

Alfonso Rueda comprométese a defender o dereito de galegas e galegos “a vivir tranquilos lonxe das imposicións”

  • Contrapón o retroceso que supón o nacionalismo co avance que propón o PPdeG: “Quero que Galicia siga funcionando e que todo o que temos por diante sexamos capaces de facelo xuntos”
  • Fronte aos que non teñen nada máis que ofrecer que a ruptura con España e as imposicións lingüísticas, o presidente defende o inconformismo do seu partido: “Temos a imaxinación, as ganas e a valentía para ofrecer cousas novas para que Galicia sexa cada día mellor”

9 de febreiro de 2024. O presidente e candidato do PPdeG, Alfonso Rueda asegurou hoxe que o nacionalismo é sinónimo de retroceso para Galicia e que a única forma de seguir avanzando é facelo xuntos e desde a unidade, apelando á oportunidade que se presenta o 18 de febreiro para “librarnos das matracas da nacionalismo votando unha maioría do PPdeG”.

Sostivo neste sentido que esta campaña electoral está evidenciando que por unha banda están os que “non teñen nada que ofrecer a Galicia e dedican o seu día a día á descualificación” e, por outra, o PPdeG. “Nós si temos un programa e por iso empregamos cada día para facer propostas para todos: os mozos, as familias, os que están fora e queremos que volvan e a xente do agro e do mar”, engadiu.

Fronte a esta actitude propositiva dos populares galegos, Rueda afirma que o que hai en fronte é “a mesma matraca de sempre”. Unha visión negativa de Galicia e que nada mudou nestes anos: “Tiveron tempo para pensar cousas novas, pero seguen coas súas mesmas pretensións: a independencia, a ruptura con España e coa Constitución, e a imposición de falar só na lingua na que eles queren falar”.

“Nós temos a imaxinación, as ganas e a valentía para ofrecer as cousas novas. Porque somos inconformistas e queremos que as cousas sexan cada día mellor. Pero, sobre todo, porque sabemos o que é gobernar e por iso podemos seguir facendo propostas”, contrapuxo.

Alfonso Rueda reivindicou que o seu obxectivo “non vai ser impoñer unha ideoloxía aos demais, nin pretender que a algúns lle vaia ben a costa de que lle vaia mal a Galicia”, senón “seguir traballando polos galegos e as galegas”. De aí o seu compromiso de continuar defendendo “o dereito de Galicia a vivir tranquila lonxe das imposicións” para que “sigamos sendo unha terra tranquila e amable afastada dos problemas que nos queren traer”.

Apostou así por unha Galicia que “se supere a si mesma” e continúe o camiño de avance experimentado nestes anos no que se refire ao apoio ás familias, a aposta pola educación pública, a potenciación da excelencia entre a mocidade, a defensa do medio rural e o continuo incremento do investimento na sanidade pública.

“Eu non quero que Galicia se atasque en follóns. Quero que Galicia funcione con sentidiño e que todo o que temos por diante sexamos capaces de facelo xuntos”, concluíu animando aos seus a seguir traballando con convencemento para que o día seguinte das eleccións poidan “seguir traballando por Galicia durante catro anos coa maioría necesaria para poder facelo” e pedíndolles a todos a súa confianza asegurando que el, a cambio, fará “todo o posible por responder a ela”.