O PPdeG enxalza a Rosalía de Castro como esencia da identidade de Galicia: “Somos un pobo orgulloso de si mesmo, da súa cultura e da súa lingua”

Hoxe, nunha ofrenda floral ante o monumento da escritora en Padrón con motivo do 187º aniversario do seu nacemento

  • Paula Prado asegura que “con ela aprendemos que a lingua é unha ponte para o entendemento e non un muro para fomentar a división” e que o seu papel foi clave na apertura e nos éxitos da nosa Comunidade

Ofrenda do PP a Rosalía de CastroO PPdeG rendeu hoxe unha homenaxe á figura de Rosalía de Castro con motivo do 187º aniversario do seu nacemento, enxalzando que a escritora representa a esencia do que fomos e somos os galegos: “Un pobo orgulloso de si mesmo, da súa identidade, da súa cultura e da súa lingua”.

A secretaria xeral do PPdeG, Paula Prado, o secretario da Comisión de Cultura do PPdeG, Valentín García, e Ángel Rodríguez Conde participaron esta mañá nunha ofrenda floral en Padrón na que quixeron reivindicar o legado que deixou a autora de Cantares gallegos e o seu papel na construcción da Galicia de hoxe.

“Con ela aprendemos que a lingua é unha ponte para o entendemento e non un muro para fomentar a división. Unha ferramenta para unir e para convencernos de que, como pobo, é moito máis o que nos une que o que nos diferenza e de que xuntos somos máis fortes”, explicou a número dous dos populares galegos.

Prado asegurou neste sentido que, “fronte a uns nacionalismos que pretenden separarnos entre bos e malos galegos e fronte aos que pretenden supeditar o destino de Galicia ao que decidan outros”, o PPdeG seguirá apostando pola unidade, a liberdade e o progreso.

Destacou así mesmo que, do mesmo xeito que Rosalía de Castro foi clave no rexurdir de Galicia, hoxe os galegos vivimos o que o presidente Alfonso Rueda denomina “Novo Rexurdimento” e que se materializa na apertura dunha Comunidade que non coñece límites: “Grazas a figuras como Rosalía de Castro e ás xeracións de galegos e galegas que nos precederon, Galicia é hoxe unha terra de retorno, de creación de emprego, de liderado cultural e referente para todo o mundo”.

“No camiño cara a Galicia do futuro, queremos reivindicarnos no que somos e no que queremos seguir sendo. E ningún espello mellor para mirarse nesta tarefa colectiva de seguir construíndo Galicia que Rosalía de Castro, a muller que nos fixo ser como somos”, concluíu.

A “INCONTESTABLE E INCUESTIONABLE” VITORIA DE RUEDA O 18-F

A secretaria xeral do PPdeG tamén aproveitou a ocasión para recordar a vitoria “incontestable e incuestionable” de Alfonso Rueda nas eleccións celebradas o pasado domingo asegurando que o partido sae desta primeira semana “absolutamente reforzada”.

Lamentou, en cambio que os partidos da esquerda “estean cuestionando unha vitoria tan contundente e tan importante para o futuro de Galicia”. Polo que remarcou que o futuro Goberno que encabezará o presidente Rueda “gobernará para todos os galegos, tanto os que votaron ao PPdeG como os que non”.

Alfonso Rueda considera que a suba en votos do PPdeG en Ourense é a recompensa ao intenso traballo feito polo partido na provincia

Hoxe, na Xunta Xestora Provincial do PP de Ourense acompañado polo líder do partido na provincia, Luis Menor, e a secretaria xeral do PPdeG, Paula Prado

  • Os populares galegos aumentaron o seu apoio na provincia en comparación coas eleccións autonómicas de 2020 ata acadar unha porcentaxe de voto moi próxima ao 50%
  • O presidente asegura que o pasado 18 de febreiro Galicia rexeitou unha forma de facer política baseada na chantaxe e nos privilexios para uns poucos e, en cambio, apostou maioritariamente pola responsabilidade, o sentidiño e a superación
  • Luis Menor reivindica que o partido mantén os 8 deputados e que os resultados acadados “non son froito da casualidade, senón a lóxica consecuencia da extraordinaria mobilización”

O presidente do PPdeG, Alfonso Rueda, puxo en valor hoxe o intenso traballo do PP de Ourense ao longo destes anos, e especialmente durante os últimos meses, e apuntou como resultado do mesmo o incremento no número de votos acadado na provincia respecto ás últimas eleccións autonómicas.

A pesar da renovación experimentada pola candidatura que encabezaba Elena Rivo, os populares galegos aumentaron o seu apoio na provincia en comparación co ano 2020 ata acadar unha porcentaxe de voto moi próxima ao 50%. Destacando especialmente o caso de Verín –onde a suba supera o 10%– e dunha ducia de concellos onde se acadou o pasado domingo un apoio de máis do 70% á lista do PP ou o caso de Quintela de Leirado, onde se acadou o pasado domingo un apoio do 90% á lista do PP.

O líder dos populares galegos asegurou que estes resultados son o mellor impulso para continuar co traballo ben feito e por iso agradeceu ao líder do partido na provincia, Luis Menor, a súa capacidade para pilotar unha transición que foi posible grazas á xenerosidade de todos.

Ante a Xunta Xestora Provincial do PP de Ourense, Rueda sostivo que a vitoria do PPdeG o pasado 18 de febreiro foi a constatación de que Galicia rexeita unha forma de facer política baseada na chantaxe e nos privilexios para uns poucos e, en cambio, aposta maioritariamente pola responsabilidade, o sentidiño e a superación.

Explicou ademais que a nova lexislatura estará chea de ilusión por construír a Galicia do futuro e por iso pide aos seus que sigan escoitando aos veciños e continúen facendo do bo Goberno e da boa oposición as sinais de identidade do PPdeG. Porque só así, traballando por mellorar a vida da xente, se garante que Galicia siga funcionando.

LUIS MENOR: “DIXEMOS QUE OURENSE NON ÍA FALLAR E NON FALLOU”

Luis Menor comezou a súa intervención lembrando que durante a campaña prometera que Ourense non ía fallar e “Ourense non fallou”. Así, destacou que 1 de cada 2 ourensáns votou ao Partido Popular e que isto se traduciu en que a formación conseguise na provincia máis votos que a suma de todas as formacións políticas que obtiveron representación no Parlamento de Galicia. O cal permitiu manter os 8 deputados conseguidos na anterior lexislatura.

Para o líder dos populares ourensáns a vitoria do PP de Ourense ten un valor especial no contexto galego pois, ademais das forzas políticas que se presentaron a estas eleccións en toda Galicia, “na provincia de Ourense tivemos que enfrontarnos a unhas siglas máis”. Con todo, subliñou, estas non conseguiron ser chave para formar goberno en Galicia: “O único deputado que conseguiron déixaos na máis irrelevancia política no Parlamento”.

Con estes resultados –“que non son froito da casualidade, senón a lóxica consecuencia da extraordinaria mobilización”; apunta Menor– o PP de Ourense adquire o compromiso de “cumprir coa palabra dada, sen renunciar nin deixar a ninguén a bandeira da reivindicación que nos deu a veciñanza”.

Barreiro: “O PP defende Galicia e a súa industria a pesar da intención de Sánchez de discriminala”

Hoxe, no pleno do Senado

  • O portavoz adxunto do PP e senador por Lugo, José Manuel Barreiro, defende a moción para que o Goberno transfira fondos europeos a Galicia para a súa xestión directa que se aprobará hoxe no Senado

O Goberno terá que transferir os fondos europeos a Galicia para a súa xestión directa para dar cumprimento á moción consecuencia de interpelación defendida polo portavoz adxunto do Grupo Parlamentario Popular e senador por Lugo, José Manuel Barreiro, que será aprobada hoxe no Pleno do Senado.

En palabras de Barreiro, a moción nace da preocupación e a indignación do uso dos fondos europeos por parte do Goberno e ten por obxecto defender Galicia e a súa industria “aínda que sexa intención de Pedro Sánchez seguir discriminando esta terra. Non queremos ser máis que ninguén, pero tampouco menos”, incide o senador.

Barreiro explica que cando o Goberno decidiu xestionar os Fondos Next Generation para fortalecer a industria, “fixérono como adoitan: cun deseño errático, sen unha coordinación coas administracións autonómicas, nin na súa formulación, nin na súa xestión”, o que, en palabras do senador lucense, tradúcese nunha falta de encaixe nas convocatorias.

Así, dos 33.556 millóns de euros incluídos nos fondos adicionais do Plan de Recuperación, o Goberno resolveu 9.758 millóns –parte deles por transferencias directas—dos que 194 millóns foron asignados a Galicia, un 0,58% do total. “Non me vaian a dicir que isto non é unha clara discriminación para os galegos”, afirma o dirixente popular.

No caso concreto dos PERTES, dos sete proxectos estratéxicos que presentou o Goberno de Galicia, con 2.000 millóns de investimento previsto e a creación de preto de 3.700 empregos, “só recibiron apoio por importe de 30 millóns de euros”, destaca.

Barreiro afea a “soberbia” do PSOE ante a proposta do Grupo Popular e engade que quedan tres anos para a aplicación dos fondos, pero o Goberno demostrou ser “absolutamente incapaz” e denuncia que “o máis grave é que non teñen intención nin vontade de corrixir a situación”.

Lamenta que “pecamos de inxenuos” ao presentar diferentes iniciativas, todas aprobadas no Senado, “pero o PSOE non respecta a vontade desta Cámara, non respecta nada. E claro, o que pasa é que xa non son cribles, por iso o pobo galego déronlles unha boa lección o pasado domingo”.

DISCRIMINACIÓN A GALICIA

O senador Barreiro chama a atención na baixa eficacia na execución dos fondos e a desigualdade de oportunidades entre proxectos e, por tanto, entre territorios, polo modo de actuar do Executivo. Pon o foco nos PERTES VEC: as entidades galegas foron beneficiarias do algo menos do 2% de total resolvido, cando Extremadura figura como a primeira beneficiaria, con 300 millóns de euros só para un proxecto.

Mentres, Galicia segue esperando que o Goberno se pronuncie acerca de varios proxectos, como o de Altri para a implantación dunha fábrica de fibras téxtiles a base de celulosa, con máis de 900 millóns de investimento e 2.500 empregos.

O portavoz adxunto do PP mostra a súa indignación, porque mentres Sánchez comprometeuse en xullo de 2022 co presidente da Xunta, “o ministro do ramo decatouse diso en decembro, e a vicepresidenta afirmou en Vigo que non ‘tocaba’ falar do tema. Como non imos estar preocupados se isto lles da igual?”, pregunta o senador galego á bancada socialista.

Barreiro insiste en que o PP expón unha fórmula que “axilice a xestión de fondos e sexa eficaz” e aclara que é imprescindible a coparticipación das CC.AA. “pola proximidade e o coñecemento da realidade de cada territorio”.

Advirte que pola súa falta de eficacia “imos perder unha gran oportunidade de desenvolvemento e modernización industrial” e pídelles “humildade e compromiso para o resto de comunidades autónomas e tamén para Galicia”.

Conclúe sinalando que a discriminación de Sánchez a Galicia é manifesta e lembra que o sector naval, “piar fundamental” para Galicia, recibe menos do 4% do investimento do Goberno central e ao sector do vehículo eléctrico conectado, o 7%.

Rueda destaca que Lugo foi, cun 53,4% do voto, a provincia onde o PPdeG acadou maior apoio o 18-F: “Lugo participou como nunca e votou como sempre”

O presidente do PPdeG, Alfonso Rueda, destacou hoxe que Lugo foi a provincia onde maior apoio recibiu o partido nas eleccións do pasado domingo –un 53,4% do voto– e tamén a que rexistrou a porcentaxe de participación máis alta de todas as provincias galegas –un 69,8%– : “Lugo participou como nunca e votou como sempre”.

Puxo así en valor que os populares galegos acadaron 8 dos 14 deputados que representarán a Lugo no Parlamento de Galicia e agradeceu o seu extraordinario traballo a todos os apoderados, interventores, afiliados, alcaldes e portavoces do PP de Lugo. Grazas á xenerosidade e dedicación de todos eles, asegurou, o partido obtivo o 18-F un resultado acorde ao seu esforzo.

Este apoio é para Alfonso Rueda un reflexo do traballo ben feito, da confianza que el e o resto de integrantes das candidaturas lle demostraron á xente e do proxecto de futuro que ten o PPdeG. E, ante a responsabilidade que isto supón, comprometeuse a traballar desde o primeiro momento para que Galicia siga funcionando e cada vez mellor.

Reiterou así o seu desexo de seguir sendo un presidente honesto que só prometerá o que poida cumprir, que traballará día a día para que Galicia se supere a si mesma e que gobernará para todos sen distincións. Un reto no que, engadiu, os seus únicos obxectivos serán facerlle a vida un pouco mellor cada día aos galegos e defender a súa dignidade desde a responsabilidade e o sentidiño.

Alfonso Rueda reivindica a vitoria do PPdeG nas eleccións autonómicas coa mobilización máis alta da historia: “Galicia participou como nunca e votou como sempre”

Hoxe, acompañado polo presidente nacional do PP, Alberto Núñez Feijóo, na Xunta Directiva do PPdeG

  • “Galicia tiña que escoller entre as mentiras que algúns intentaron contar e o camiño da palabra. Eu creo no valor da palabra dada e por iso me comprometo a manter a miña palabra e a cumprir todo o prometido. Ese será o fundamento de todo o que faga”, asegura
  • Asume desde hoxe mesmo a obriga de gobernar para todos os galegos, tanto os que o votaron como os que non, porque “xuntos, en liberdade, con tranquilidade e con sentidiño, conseguimos superar o intento de separarnos e de levantar muros entre galegos bos e malos”

O presidente do PPdeG, Alfonso Rueda, logo de acadar a súa primeira maioría absoluta, reivindicou esta tarde a “contundente” vitoria acadada polo seu partido nas eleccións autonómicas do 18 de febreiro apelando á mobilización histórica que se deu nestes comicios: “Galicia participou como nunca e votou como sempre”.

Ante os membros da Xunta Directiva do PPdeG e acompañado polo presidente nacional do Partido Popular, Alberto Núñez Feijóo; o líder dos populares galegos quixo dar as grazas aos máis de 700.000 galegos que confiaron no seu proxecto e puxo de manifesto a responsabilidade que isto supón para el.

“Galicia tiña que escoller entre as mentiras que algúns intentaron contar e o camiño da palabra. Eu creo no valor da palabra dada e por iso me comprometo a manter a miña palabra e a cumprir todo o prometido. Ese será o fundamento de todo o que faga”, asegurou.

Neste sentido engadiu que asume desde hoxe mesmo a obriga de gobernar para todos os galegos, tanto os que o votaron como os que non, porque “xuntos, en liberdade, con tranquilidade e con sentidiño, conseguimos superar o intento de separarnos e de levantar muros entre galegos bos e malos”.

“Queremos traballar desde o primeiro día porque entramos nas eleccións cuns Orzamentos aprobados e saímos delas cuns Orzamentos xa en funcionamento, con moitas ganas de traballar e co apoio da maioría dos galegos”, subliñou ao tempo que facía un chamamento a non dar nada por gañado porque “a confianza dos galegos hai que gañala día a día”.

Fronte aos intentos de manipulación, ás descualificacións e ao dano feito só por obter rédito electoral, Alfonso Rueda asegurou que isto “nin funcionou nin funcionará” nunca en Galicia e avogou, en cambio, pola humildade e a tranquilidade que sempre triunfan.

En clave nacional, o presidente do PPdeG afirmou que onte Galicia deu claramente “un frenazo en seco a Pedro Sánchez e aos seus socios separatistas” e que os galegos dixeron que “nin queren nin van admitir chantaxes nin privilexios”. O que o pobo galego manifestou onte nas urnas, explicou, é que quere igualdade, entendemento, responsabilidade, sentidiño e dignidade para Galicia.

“A mensaxe que mandamos a través das urnas foi que nos sentimos moi orgullosos do que somos, do que facemos e do que queremos facer”, concluíu Rueda reivindicando a Galicia que funciona fronte ao fracasado intento de importar modelos que non paga a pena “nin intentar facelos funcionar”.

Alfonso Rueda, tras gañar as eleccións do 18-F: “Galicia votou pola igualdade, o entendemento, a dignidade e o sentidiño”

O presidente e candidato do PPdeG, Alfonso Rueda, compareceu esta noite logo de coñecer o escrutinio das eleccións autonómicas –nas que o seu partido acadou o apoio maioritario dos galegos cun 47,36% do voto– para valorar os resultados e asegurou que “Galicia votou pola igualdade, o entendemento, a responsabilidade, a dignidade e o sentidiño”.

Amosando o seu profundo agradecemento aos máis de 700.000 galegos que apoiaron as candidaturas populares nas catro provincias, o presidente recalcou a “honra” e o “privilexio” que supón para el continuar á fronte da nosa Comunidade e comprometeuse a traballar para estar á altura dese apoio: “Voume dedicar a propoñer a Galicia do futuro”.

Asegurou que Galicia, da que “todos estaban pendentes”, envía tamén unha mensaxe a España con estes resultados: “Aquí non queremos chantaxes nin sometementos. Votamos polo sentidiño e foi a decisión correcta para Galicia e para España tamén”.

“Por se houbese algunha dúbida, nós sentímonos orgullosos de ser galegos e de ser españois. Sen tensións, sen disputas e sen problemas”, engadiu.

Tras acadar a súa primeira maioría absoluta, Alfonso Rueda subliñou que non vai decepcionar aos galegos, tanto aos que votaron ao PPdeG como aos que non. E, neste sentido quixo agradecer as felicitacións recibidas polos candidatos dos partidos da oposición: “Se todos somos conscientes de que a nosa misión é traballar por Galicia e somos capaces de facelo, todo irá moito mellor”.

Prometeu facer todo o posible para “estar á altura da misión que me encomendaron os galegos” e afirmou que “Galicia funcionará coa axuda de todos”.

“Hoxe gañou a Galicia aberta, que quere resolver e avanzar sen mirar aos lados, sen envexas, sen levantar muros e sen ir contra ninguén. Gañou a Galicia que se sinte máis potente que nunca”, concluíu.

A xornada de reflexión de Alfonso Rueda

Durante a xornada de reflexión deste sábado, 17 de febreiro, o presidente e candidato do Partido Popular de Galicia, Alfonso Rueda, saíu camiñar a primeira hora desta mañá coa súa muller Marta e as súas fillas, Bea e Marta, polo Monte Pedroso de Santiago de Compostela, onde tamén aproveitaron para sentarse a charlar ao aire libre.

Neste día tamén acudiu a Marín, coma presidente da Xunta, á homenaxe ás vítimas do Villa de Pitanxo.

O resto do día pasarao coa familia e asistirá, como fai habitualmente, a ver o partido do RC Celta de Vigo ao estadio de Balaidos, fronte ao FC Barcelona.

A pasada noite, despois do multitudinario mitin de Ourense, gravou o último videoblog diario Galicia Rueda acompañado da súa nai, Lola de Valenzuela, que lle desexou “moita sorte”.

 

Ver esta publicación en Instagram

 

Unha publicación compartida de Alfonso Rueda (@alfonsoruedagal)

Alfonso Rueda: “Cada galego, viva onde viva e vote o que vote, ten en min alguén en quen confiar”

Hoxe, no mitin de peche de campaña na Coruña ao que asistiron 3.500 persoas e no que tamén participaron o presidente nacional do PP, Alberto Núñez Feijóo, o cabeza de lista pola provincia, Diego Calvo, e o presidente local do partido, Miguel Lorenzo

  • Se obtén a confianza dos galegos para seguir dirixindo o destino de Galicia, comprométese a “gobernar para todos sen sectarismos, sen adoutrinamentos, sen fronteiras e sen divisións entre bos e malos”
  • “Votemos polo que somos, polo que é Galicia: unha terra aberta e que quere un futuro compartido. Non é o momento de separarse. É o momento de superarse e facelo xuntos e convencidos”, engade
  • “Este domingo hai que atender á familia, aos amigos, facer deporte, descansar, pero sobre todo votar. Non hai escusa de ningún tipo”, afirma

O presidente e candidato do PPdeG, Alfonso Rueda, fixo hoxe un chamamento a “seguir construíndo a Galicia que soñaron os nosos pais e avós para poder legarlle o mellor aos nosos fillos”, onde a ninguén se lle pregunte de onde vén ou o que pensa e que só mire cara o futuro: “Cada galego, viva onde viva e vote o que vote, ten en min alguén en quen confiar”

O líder dos populares galegos iniciou a súa intervención agradecendo a todos os que fixeron posible unha campaña electoral “inesquecible” enchendo masivamente todos os lugares onde se celebraron mitins ao longo destes 15 días, incluídos os galegos que desde o exterior “viven Galicia en primeira persoa, con preocupación, con actitude construtiva e con sentimento”.

“Esta gran mobilización era necesaria e demostra aos que pensaban que isto non podía ser como sempre que non só foi como sempre, senón que foi a mellor campaña do Partido Popular de Galicia”, afirmou antes de pedir aos seus un último empuxón para seguir traballando “con convicción e disposición a falar con quen queira escoitar” ata o 18 de febreiro.

Subliñou acto seguido que non importa o tempo que faga o domingo, xa que o que realmente importa é votar e encher as urnas: “Este domingo hai que atender á familia, aos amigos, facer deporte, descansar, pero sobre todo votar. Non hai escusa de ningún tipo. E, se votamos, o domingo pola noite celebraremos e o luns porémonos a traballar”.

Alfonso Rueda aproveitou este último día de campaña para volver pedir o voto “para a Galicia que funciona” dirixíndose tanto a todos aqueles que sabe con seguridade que o van votar como a aqueles que, máis que nunca, “están agardando que alguén lles pida a súa confianza con argumentos e convicción”.

A todos eles dálles a súa palabra de que non vai renunciar a nada do que prometeu en campaña, nin fará cousas que dixo que non faría. Remarcando que todo aquel que vota ao PPdeG ten que ter claro que vota a un partido que “cumpre os seus compromisos porque cre no valor da palabra dada”.

Pediu así a confianza de todos eses votantes do PSOE que xa non recoñecen nin entenden a un partido “rendido ás ordes dos de arriba e totalmente entregado ao independentismo”. A todos eses “verdadeiros socialistas” aseguroulles que poden confiar nel do mesmo xeito que aqueles que noutras ocasións votaron a outras formacións: “Esta vez necesitámosvos máis que nunca”.

“Despois de que todos fagamos unha reflexión e de que cada un vote o que estime conveniente, eu me comprometo a que, se obteño a confianza dos galegos para seguir dirixindo o destino de Galicia, a gobernar para todos sen sectarismos, sen adoutrinamentos, sen fronteiras e sen divisións entre bos e malos”, afirmou.

“EN GALICIA CABEMOS TODOS”

Alfonso Rueda reivindicou “liberdade para sentir, vivir e falar nunha Galicia na que cabemos todos” fronte aqueles que pensan que “só serve o seu xeito de pensar, que só hai unha maneira de sentir e de ver a vida” e “non entenden o orgullo e o recoñecemento que supón ter dúas linguas nas que poder falar”.

“Este domingo votemos polo que somos, polo que é Galicia: unha terra aberta e que quere un futuro compartido. Non é o momento de separarse. É o momento de superarse e facelo xuntos e convencidos”, engadiu convencido de que “nunha Galicia que se supere hai moitas máis vantaxes que nunha Galicia que se separe”.

Defendeu así a Galicia do sentidiño, que convive tranquila e sen crisparse, que é líder en formación da xente nova, en innovación, en apoio ás familias, en servizos públicos e na que cada mozo ten garantido un futuro a través do ensino en todas as etapas educativas.

E, do mesmo xeito, avogou por unha Galicia que siga ofrecendo alternativas ao abandono escolar, na que se paguen cada vez menos impostos, que estea mellor comunicada, que respecte aos maiores, que respecte o seu patrimonio natural e cultural e que aproveite as oportunidades de crear emprego e riqueza.

“Quero unha Galicia na que cada galego poida elixir como vivir e como quere que sexa a súa propia historia. Unha Galicia sen imposicións, que viva en liberdade, en plenitude e sen complexos. Unha Galicia orgullosa de si mesma e que non teña necesidade de mirar cara outros lados nin de importar modelos fracasados”, concluíu Rueda pedindo a todos os galegos que “voten con orgullo do que somos”.

Alfonso Rueda remata a súa campaña en Ourense e pide á provincia os resultados espectaculares que sempre lle deu ao PP

Hoxe, nun mitin-festa fin de campaña en Ourense acompañado pola cabeza de lista pola provincia, Elena Rivo, a tamén candidata Victoria Núñez e o líder provincial do PP, Luis Menor

  • Quixo trasladar tamén o seu orgullo polo feito de que o PP de Ourense estea tan forte e unido
  • Luis Menor reivindica o seu pacto con Alfonso Rueda para a cidade de Ourense: “Un compromiso coa cidade que recolle 12 propostas concretas, serias, rigorosas e realizables, con proxectos cuantificados nos ámbitos sanitario, de vivenda, servizos sociais, transporte público, mobilidade sostible, deporte, turismo ou a mellora dos servizos administrativos”
  • Elena Rivo: “Somos a Galicia da confianza fronte aos bandazos dos demais, ofrecemos unidade fronte as liortas doutros e traballamos por solucionar os problemas, non por aumentalos”

O presidente e candidato do PPdeG, Alfonso Rueda, rematou esta noite a súa campaña na cidade de Ourense trasladando o seu orgullo polo feito de que o PP de Ourense estea tan forte e unido e apelando aos bos resultados que o partido sempre acada na provincia.

Nun mitin-festa celebrado na cancha central do Pavillón dos Remedios, o líder dos populares galegos propuxo unha Galicia que funcione desde o primeiro momento e ao xeito de Galicia: con unidade, con sentidiño e coa esixencia de mellorar cada día. Por iso pediu o voto “por todo o que podemos acadar se en Galicia permanecemos xuntos”.

Ante aos asistentes ao mitin-festa de fin de campaña celebrado en Ourense, reivindicou que, fronte á Galicia do separatismo –na que só cabe un xeito de pensar, un xeito de sentir e un xeito de falar–, na Galicia que el propón todos os galegos teñen cabida.

Chamou a esquivar os obstáculos que impiden o avance e a evitar un porvir cunha sociedade partida votando pola Galicia que funciona e que ten que seguir sendo como é, por moito que algúns queiran impoñer aos galegos como teñen que ser.

Rueda quere, coa confianza dos galegos, comezar a construír a Galicia da nova década desde o próximo luns. Unha Galicia na que cada galego poida elixir o seu xeito de vivila e sexa dono do seu propio futuro sen imposicións nin complexos, senón desde a liberdade e en plenitude.

Reafirmando o orgullo de ser galego, pediu o voto ofrecéndose a liderar a Galicia que se sinte orgullosa do que é, que vai unida cara adiante, que constrúe España, na que se pode confiar, que non imita problemas alleos. Unha Galicia, en definitiva, que funciona libre de imposicións e submisións a intereses ideolóxicos e persoais.

LUIS MENOR: “OURENSE NON VAI FALLAR”

O presidente provincial dos populares, Luis Menor, proclamou que “Ourense non vai a fallar” este domingo. Afirmación que avalou logo da multitudinaria resposta á convocatoria do mitin nos Remedios: “Todo un desafío volver a encher esta cancha central e darlle outra noite gloriosa ao PP”.

Menor, que fixo unha mención especial “a todos os ourensáns que desde moitos recunchos do mundo quixeron colaborar nesta campaña”, agradeceu o intenso traballo da candidatura, presidentes das xuntas locais e dos distritos da cidade, de afiliados, de simpatizantes e de voluntarios, nunha campaña que contou con máis de 100 actos na cidade e máis de 80 na provincia.

“Unha media de 12 actos electorais diarios é algo que non está ao alcance dos outros partidos, igual que encher esta cancha central non é froito da casualidade: é froito da potencia e da capacidade de mobilización e traballo do Partido Popular en Ourense”, afirmou.

No que atinxe á única opción válida para este domingo, o líder dos populares ourensáns sinalou que “todos queremos o modelo de estabilidade que desfrutamos”. Lembrou tamén Luis Menor que o seu pacto con Alfonso Rueda para a cidade de Ourense: “Un compromiso coa cidade que recolle 12 propostas concretas, serias, rigorosas e realizables, con proxectos cuantificados nos ámbitos sanitario, de vivenda, servizos sociais, transporte público, mobilidade sostible, deporte, turismo ou a mellora dos servizos administrativos da Xunta de Galicia”.

ELENA RIVO: “PAGA A PENA ESTE ESFORZO FINAL”

Pola súa banda, a cabeza de lista do PP por Ourense, Elena Rivo, proclamou que “esta magnífica candidatura de Ourense e os nosos militantes estamos de festa despois dunha campaña na que deixamos claro que Galicia funciona e Galicia namora”.

“O perigo é real. Podemos acabar con todo o bo que conseguimos nestes últimos anos cos gobernos do PP na Xunta de Galicia e contaxiarnos dos males do independentismo e do radicalismo que sofre España”, advertiu Rivo.

“Paga a pena este esforzo final porque somos a Galicia da confianza fronte aos bandazos dos demais, ofrecemos unidade fronte as liortas doutros, traballamos por solucionar os problemas, non por aumentalos; damos estabilidade fronte ao caos,  temos experiencia e estamos avalados polos resultados de tantos anos de xestión”, concluíu.

Alfonso Rueda: “A xente está convencida de que o domingo hai que elixir entre a Galicia que funciona ou un multipartito de esquerdas”

Hoxe, en declaracións aos medios en Pontevedra logo dun encontro con interventores e membros do equipo de campaña do partido

  • Traslada o seu agradecemento a todos os interventores e apoderados que “o domingo estarán representando ao PPdeG e a disposición de todos os votantes”, despois dunha campaña de contacto directo coa xente a pé de rúa, actos sectoriais e almorzos informativos
  • “Pido unha confianza máxima, con máis razón e con máis forza que nunca, no Partido Popular”, subliña
  • Apela á confianza dos que “non queren que Galicia caia en mans dun goberno que ten como obxectivos a independencia, a imposición lingüística ou a desaparición das Forzas e Corpos de Seguridade do Estado

O presidente e candidato do PPdeG, Alfonso Rueda, quixo iniciar o seu último día de campaña en Pontevedra para coller forzas coa súa xente e, nun encontro con interventores e apoderados, asegurou estar “satisfeito, tranquilo e convencido” de que os galegos sexan conscientes que este domingo, 18 de febreiro, “hai que elixir entre a Galicia que funciona ou un multipartito de esquerdas”.

Insistiu en que durante a campaña e nas próximas horas o seu obxectivo foi e será “pedir a confianza maioritaria dos galegos fronte ao radicalismo do nacionalismo independentista e a resignación dun PSOE disposto a ceder en todo”. De feito, pediu o voto de todos aqueles que “non queren que Galicia caia en mans dun goberno que ten como obxectivos a independencia, a imposición lingüística ou a desaparición das Forzas e Corpos de Seguridade do Estado”.

“Todo iso pode instalarse aquí e por iso pido unha confianza máxima, con máis razón e con máis forza que nunca, no Partido Popular e na Galicia que funciona”, explicou amosando a súa satisfacción co traballo feito durante estes 15 días nos que “fixemos a campaña que nos gusta facer”.

Destacou así o contacto directo coa xente a pé de rúa e a través de actos sectoriais de todo tipo (culturais, deportivos, sociais…) e almorzos informativos nas sete cidades con gran afluencia. “A xente quixo escoitar as nosas propostas e decidir en consecuencia porque para iso son as campañas, sen necesidade de entrar nas descualificacións nin no insulto persoal”, subliñou.

Alfonso Rueda aproveitou o seu encontro con interventores e membros do equipo de campaña do PP de Pontevedra para darlle as grazas e facer extensivo o seu agradecemento “a todos os interventores e apoderados que o domingo estarán representando ao PPdeG, a disposición de todos os votantes, e formando parte dun dispositivo que permitirá que a xornada electoral transcorra con total normalidade”.

O presidente e candidato percorrerá durante esta xornada as catro provincias galegas, xa que logo deste encontro en Pontevedra realizará un paseo por Lugo, participará logo no mitin de peche de campaña –xunto ao presidente nacional do PP, Alberto Núñez Feijóo– e rematará no mitin-festa de fin de campaña organizado polo PP de Ourense.