Categoría: PP de Galicia

A Coruña, 14 de xuño de 2016.- O presidente do PPdeG, Alberto Núñez Feijóo, pediu hoxe o voto responsable para aqueles que se mollan por España e son garantía de esperanza, porque hoxe hai máis esperanza que hai catro anos, fronte a aqueles que, por vagancia ou inoperancia, nunca chegarán a nada e só son garantía de frustración, porque hoxe hai máis frustración alá onde gobernan.

 

Así se expresaba o líder dos populares galegos nun encontro sobre economía e emprego organizado na capital coruñesa, onde asistiu acompañado do candidato ao Congreso pola provincia da Coruña, Miguel Lorenzo, e polo presidente provincial, Diego Calvo. 

 

Como lembrou Feijóo, só hai dúas alternativas: un goberno presidido pola maioría das persoas que apostan por unha política rigorosa, realista e responsable; ou un Goberno secuestrado polas minorías e incapaz de evitar una nova frustración na cidadanía. 

 

A EXPERIENCIA DO PP EN ESPAÑA E EN GALICIA

Máis polo miúdo, o presidente do PPdeG analizou as dúas opcións e, sobre a primeira, lembrou que, entre a España na que crecía o paro máis que en ningún sitio de Europa e a España de hoxe, que é a que máis crece na Unión, o que pasou é que houbo un novo Goberno que fixo posible o cambio de ciclo. “Traballamos a favor de España, contra a presión de Europa e contra a presión da oposición”, subliñou.

 

Segundo engadiu, o balance do Goberno do PP en España resúmese en máis emprego, crecemento económico, menos impostos, máis esperanza, máis credibilidade internacional e pensións garantidas.

 

No que atinxe á xestión do PPdeG na comunidade, Feijóo destacou que, como en Galicia hai estabilidade, a economía vai medrar máis do previsto (ata un 2,8%) e máis que en España (2,7%), e tamén o paro vai reducirse algo máis do estimado inicialmente (ata o 17%).  

 

Do mesmo xeito, o líder do PPdeG destacou que Galicia logrou novos proxectos para os sectores estratéxicos e abriuse a novos sectores. Ademais, puxo en valor o progreso e as axudas aos emprendedores, que poden producir máis, innovar máis e exportar máis, tal e como indican os indicadores macroeconómicos. 

 

Do mesmo xeito, lembrou que a recadación fiscal en Galicia é a terceira máis alta en España no que vai de ano e que foi quen de aprobar uns orzamentos autonómicos para o 2016 que baixan e mesmo eliminan impostos e manteñen o esforzo para que Galicia poida seguir sendo a comunidade que máis inviste en toda España. 

 

Ademais, grazas á responsabilidade do Goberno galego cos obxectivos do déficit nos últimos anos, Galicia conta hoxe cun superávit de responsabilidade que fai posible destinar 50 millóns aos nenos e aos mozos, 60 á sanidade pública e a axudas para as vivendas das familias, case 30 a actuacións de dinamización do emprego, e preto de 20 ao medio rural. 

 

Por outra banda, como nesta comunidade non hai bloqueo nin parálise nin aventuras estériles como noutras autonomías, Galicia non ten nada que envexar de ningún outro lugar do Estado, mentres que España ten moitas cousas que imitar desta terra.

 

A EXPERIENCIA DOUTRA ALTERNATIVA

Con respecto á outra alternativa, a de reproducir a nivel estatal os pactos que permitiron a Podemos mandar en distintas corporacións locais e parlamentos autonómicos no último ano, Feijóo lamentou as consecuencias dos mesmos. Por exemplo, lembrou que nalgúns lugares os orzamentos locais aprobáronse con retraso e non se poderán executar ou, directamente, non se aprobaron como no caso de Ferrol. 

 

Nesta liña, citou outras promesas incumpridas, como o rigor nas contas ou a estabilidade, cando o único estable que lograron son as pelexas continuas co PSOE; ou facer política para a xente, cando gastan máis recursos en aproveitar actos públicos para convertelos en mitins.

 

O líder dos populares galegos fixo balance doutros fracasos destas formacións e lamentou que, por exemplo, na Coruña esta será a primeira vez en 10 anos que os mozos non van poder disfrutar do Programa de Becas USA; que en Ferrol se incrementase o tempo de espera para as axudas de emerxencia social; ou que en Santiago se reducisen as axudas para Cáritas ou para o Proxecto Home ou se lle retirase ao Banco de Alimentos. 

 

Segundo concluíu Feijóo, non teñen proxecto nin rumbo e serán recordados como aqueles que o prometeron absolutamente todo e que, cando tiveron a súa oportunidade, non fixeron absolutamente nada. Neste senso, asegurou que “hai algo moito peor que executar nun país un proxecto equivocado, e é dicirlle a xente que es capaz de calquera cousa cando despois, non sabes ou non podes facer nada”. 

 

Fronte aos “animais de plató”, reivindica aos candidatos “con currículo de servizo” que saen a “falar cara a cara cos galegos”

 

• Espera que no debate de hoxe Sánchez non insulte, Rivera explique o seu apoio ao PSOE, e Iglesias confirme que se é presidente haberá referéndum en Cataluña

• Fai un chamamento ao voto “dende a responsabilidade” e destaca que os votos a Sánchez e Rivera dende Galicia poden “acabar en Podemos”

Santiago, 13 de xuño de 2016.- O secretario xeral do PPdeG, Miguel Tellado, avanzou hoxe as visitas a Galicia de Mariano Rajoy, María Dolores de Cospedal e Soraya Saénz de Santamaría. 

 

Os tres estarán esta semana en territorio galego. O primeiro será o candidato popular, que estará o xoves na súa cidade natal, Santiago de Compostela, e na cidade na que máis anos residiu: Pontevedra.

 

A secretaria xeral, María Dolores de Cospedal, estará co presidente do PPdeG, Alberto Núñez Feijóo durante parte da xornada de sábado, e a vicepresidenta do Goberno fará o propio o domingo.

 

Por iso, fronte aos das visitas exprés ou os que nin sequera veñen a Galicia por non consideralo prioritario, tanto o presidente nacional do partido como as súas número dous no Goberno e no PP estarán pedindo o apoio aos galegos sobre terreo. 

 

Tellado valorou positivamente a campaña que está levando a cabo o PPdeG, “con poucos atrís e moita rúa” e na que a xente está recibindo aos dirixentes do partido con cariño. “Temos boas sensacións”, dixo, e “agardamos que esas boas percepcións se traduzan en votos”.

 

Sobre o debate desta noite, dixo que “confiamos en que sexa construtivo e desexamos que Pedro Sánchez non insulte a Mariano Rajoy, que Albert Rivera diga se volverá a usar os votos dos galegos para entregarllos ao PSOE, e que Pablo Iglesias confirme que organizaría un reférendum en Cataluña a cambio de desbancar do poder á lista máis votada”.

 

O contraste entre os candidatos, cre Tellado, está entre os que son “animais de plató” e “viven pensando permanentemente en tertulias” e os que teñen “currículo de servizo” e son capaces de “falar cara a cara cos galegos”, entre os que situou a Mariano Rajoy.

 

Por todo isto, Tellado concluíu facendo un chamamento a concentrar o “voto útil” no PPdeG. O secretario xeral dos populares galegos destacou que “pensando en España, cómpre votar dende a responsabilidade” e, dende esta perspectiva, descartou a utilidade dun voto a un Pedro Sánchez que aínda non descartou que vaia a “permitir o ascenso do populismo” así como dun voto a Ciudadanos cuxo efecto en varias provincias galegas é non só “tirar o voto á papeleira” senón “acabar en Podemos”, ao reforzar as súas posibilidades de obter os seus escanos.

 

Madrid, 13 de xuño de 2016.- O presidente do PPdeG, Alberto Núñez Feijóo, asegurou que “o mellor que fixemos nestes últimos catro anos é devolver a esperanza ao noso país”, ao tempo que indicaba que os populares exercen a política sendo un equipo e queren seguir exercendo a defensa dos intereses xerais con responsabilidade. 

 

Así se expresaba nun foro celebrado esta mañá en Madrid no que estivo acompañado pola presidenta desta Comunidade, Cristina Cifuentes, e onde puxo en valor que tanto en Madrid como en Galicia, o goberno do PP, ademais de reducir o custe do transporte para os mozos, logrou baixar os impostos e eliminou o de Sucesións e Doazóns, “xa que parécenos máis razoable que sexan as familias as que xestionen a herdanza dos seus pais e non que o fagan os gobernos”.

 

Nese senso, afeou o obxectivo de moitos partidos -como Podemos- de querer implántalo de novo, mantendo unha presión fiscal máis alta e volvendo poñer un imposto que co esforzo da xente se puido eliminar. 

 

Ademais, Feijóo tamén fixo fincapé na importancia de dar liberdade á cidadanía sen querer adoutrinala así como o fundamental que é que un político non lle deixe unha débeda ao seu país cando marcha. Nese sentido, insistiu en que cando un dirixente do PP marcha pode mirar aos ollos á xente e dicirlles “non deixei un pufo, paguei o que debía, marcho coas contas ordenadas, non fun un problema para a comunidade autónoma”. “Nin Madrid nin Galicia deixaron ningún pufo e iso é o que nos anima a seguir pedindo o voto para a política da liberdade e da responsabilidade”, dixo.

“Hai un proxecto para España e chámase Partido Popular”, apuntou o presidente ao tempo que lembraba que o PSOE tívoo durante moito tempo pero xa non o ten; que é evidente que Ciudadanos tampouco é un partido para o país, intentando buscar persoas de UPyD e do PP para ir concretando as súas candidaturas ao longo de España; así como tampouco teñen proxecto os nacionalistas, que só queren manterse no poder nas comunidades autónomas onde están no goberno.

 

Nesta liña, afirmou que un dos activos máis grandes do PP é que non fai falta optar entre ser de Galicia ou de España “porque sabemos que a nosa forma de ser españois é ser galegos”. “Non podemos facer unha política local que é a destrución dun proxecto común”, engadiu.

 

Segundo apuntou, gobernar é facer un proxecto a favor e non discutir e ir en contra, “é buscar as vantaxes para que o país mellore”. Así, insistiu en que cando se pon o ego por riba do país e se busca o interese propio por riba dos intereses xerais o país bloquéase, tal e como aconteceu en España. 

 

“Estes meses puidemos comprobar que se pode estar peor que co PSOE no goberno e é estar con Sánchez, con Iglesias e con Rivera. Con España en mans dun equipo sen proxecto e cun conxunto de egos que teñen unha característica en común, que nunca solucionaron nada”, indicaba Feijóo. Polo contra, o presidente si valorou que, co PP, España despexou as súas incertidumes e hoxe está mellor que cando Rajoy chegou á Moncloa. 

 

Así mesmo, apuntou que o Partido Popular é o único voto seguro para ter un goberno estable cuxa única alternativa é o populismo.

 

O dirixente tamén advertiu que nos xogamos a posibilidade de deixar o noso futuro en mans de persoas que nunca xestionaron nin nun concello pero que agora pretenden ser primeiro ministro e, por iso, recordou que nas urnas está a solución. 

 

Salienta que o voto que empeza no PSOE tamén pode acabar en Podemos pola vía do pacto

 

 

• Asegura que a Podemos non lle interesa o país, que non teñen proxecto para España e que presentan un programa que só vale para gobernar seis meses

 

• Apunta que culpar ao partido que gaña eleccións de que non hai goberno ou que se diga que se ten que ir o candidato gañador  “é a democracia ao revés”

Monforte, 12 de xuño de 2016.- O presidente do PPdeG, Alberto Núñez Feijóo, sinalou que o voto ao Partido Popular é a única vía segura para que haxa moderación e goberno.

 

O dirixente, que participou nun mitin en Monforte acompañado polos candidatos ás Cortes pola provincia de Lugo, José Manuel Barreiro e Joaquín García Díez, e pola presidenta provincial, Elena Candia; dixo que a alternativa ao goberno dos populares co que crece España non é outro goberno senón o populismo, “que non ten ningún interese en gobernar senón en enganar”.

 

Do mesmo xeito, tamén incidiu en que os votos a Ciudadanos en Galicia non serven para dar escanos a esta formación, lembrando como en Lugo, Ourense ou Pontevedra todos eses apoios transformáronse en máis escanos para as Mareas de Podemos.

 

Tal e como explicou, o voto que comeza en Ciudadanos pode rematar no partido de Pablo Iglesias polo sistema de reparto de escanos, así como o que empeza no PSOE tamén pode acabar en Podemos pola vía do pacto. Ante isto, insistiu en que o que empeza no PP remata no propio PP e na creación de emprego, nunha política económica e nun goberno.

 

Así mesmo, o dirixente incidiu en que a Podemos non lle interesa o país porque só están interesados en eles mesmos, non teñen proxecto para España e presentan un programa que “como moito vale para gobernar seis meses”. 

 

O presidente tamén lembrou que esta é a primeira vez que ocorre que os que perderon as eleccións bloquean o país, recordando que “votar é o único que non nos poden quitar nin bloquear”.

 

Nesa liña, admitiu que, tras estes últimos meses con España en mans do PSOE, de Ciudadanos, de Podemos e dos nacionalistas, comprobamos que estes partidos non son quen nin de repartirse os cargos e que, cando aos populares se lles nega a posibilidade de gobernar hai desgoberno, división e actos só para os medios de comunicación.

 

Por outra parte, tamén fixo fincapé en que se o PP non gaña os comicios si vai facilitar que gobernen os vencedores, “porque hai que aceptar as reglas do xogo, aceptando que o que perde ten que estar na oposición e o que gaña no goberno”. Nese senso, engadiu que culpar ao partido que gaña eleccións de que non hai goberno ou que se diga que se ten que ir o candidato gañador “é a democracia ao revés”.

 

Feijóo asegurou que agora temos a opción de votar libremente a aqueles que cremos que poden solucionar mellor os problemas do país. E é que, segundo apuntou, os populistas, que nunca gobernaron nin solucionaron nada, din que teñen solución para todo dedicándose exclusivamente a falar pero non a facer.

 

Por este motivo, o presidente salientou que, se o voto se divide non haberá goberno. “Nós non estamos aquí para gobernar seis meses senón para sacar a España da crise económica”, sentenciou.

 

Fene, 12 de xuño de 2016.– O  Secretario Xeral do PP de Galicia, Miguel Tellado acudiu esta mañá xunto co candidato ó congreso, Juan Juncal, e o voceiro do PP de Fene, Gumersindo Galego ó tradicional feirón de Perlio. Tellado salientou os contratos conseguidos ó longo desta lexislatura polo goberno de Mariano Rajoy. 

 

O secretario xeral do PPdeG quixo poñer en valor que, á súa chegada ao goberno, Rajoy atopou o estaleiro de Perlío-Fene, a antiga ASTANO completamente pechada. “Non tiña traballo porque sobre ela caía un veto prorrogado polos socialistas durante os últimos dez anos” mentres que neste período o que fixeron Rajoy e o PP foi “reabrir a antiga ASTANO, acender os talleres, darlle luz, darlle carga de traballo ademais a través dun sector que significa a diversificación, que é o da éolica mariña”.

 

Tellado salientou que dende a fin do veto, o que fixo o goberno de Rajoy foi lograr un contrato para a construción das 29 Jackets de eólica mariña para Iberdrola, que supón unha facturación de 90millóns de euros, así como o contrato subscrito tamén por Navantia para a fabricación de 5 macroestructuras flotantes para a fixación de parques de eólica mariña en augas profundas para unha filial de Statoil. Estes dous contratos, segundo Tellado, “debullan un panorama completamente distinto para o sector naval na ría de Ferrol”.

 

 

O Secretario Xeral do PPdeG contrapuxo a herdanza recibida do goberno socialista, que non conseguira un só pedido nos seus últimos 5 anos, coa carteira de pedidos pechada polo executivo de Rajoy. 

 

Tellado sinalou que o longo destes catro anos de goberno popular conseguíronse ata seis novos contratos para os estaleiros de Navantia na ría de Ferrol. O primeiro deles foi o contrato para a construción dun flotel para a petroleira Pemex, que supuxo unha facturación de 175 millóns de euros e 1.150.000 horas de ocupación para os planteis do estaleiro, un contrato no que se involucrou persoalmente o Presidente Feijóo, seguido do contrato para o deseño e o equipamento dun LHD para a Armada de Turquía, (140M€ e 800.000 horas de carga de traballo), ou a construción dun BAM, Buque de Acción Marítima para a Armada Española (167M€ e 1.110.000 horas de traballo).

 

Tellado sinalou que a estes pedidos compre engadir a carga de traballo que vai supoñer ademais o contrato para a construción de 4 petroleiros para a navieira Ondimar, xa que as catro proas e os correspondentes bloques de máquinas fabricaranse nos estaleiros de Navantia na ría de Ferrol e concluíu mencionando o contrato subscrito recentemente para a construción de dous buques de aprovisionamento en combate para a Armada de Australia que “supoñen moito futuro para estes estaleiros”. 

 

O balance global, segundo Tellado é que “onde outros deixaron miseria, nós deixamos carga de traballo e un panorama completamente distinto ao que nos atopamos á nosa chegada”.

 

 

En contraposición ao traballo do Partido Popular para recuperar a actividade dos estaleiros, Tellado sinalou a situación política do Concello de Ferrol, onde a principal preocupación é “retirar bustos do Rei emérito”.

 

O secretario xeral do PPdeG cualificou o consistorio ferrolán de “zona cero do encontro entre o populismo e o socialismo”, cun concello paralizado durante o último ano. Ante esa situación, Tellado fixo un chamamento aos electores para evitar que o populismo das alcaldías das Mareas en Ferrol, Coruña ou Santiago, se asente en España.

 

Tellado finalizou a súa intervención retando a Pedro Sánchez a chamar á voceira socialista de Ferrol para dicirlle “rompe con ese alcalde que Ferrol non merece e deixa gobernar a quen gañou as eleccións”. Sería o único xeito, opinou, no que o candidato socialista podería demostrar que non aposta polas políticas do populismo “nestes días nos que tanto critica a Pablo Iglesias”.

“Acudamos a votar para que non poidan decidir por nós, e para que sexa imposible que volvan bloquear o noso país”, apunta

• Asegura que canto máis se disperse o voto, máis se vai difuminar a posibilidade de ter un presidente libre para tomar decisións que beneficien aos intereses xerais

Sanxenxo, 11 de xuño de 2016.- O presidente do PPdeG, Alberto Núñez Feijóo, asegurou que, con Mariano Rajoy, un si sabe o que fará, que é emprego; o que pode esperar, que é moderación; e o que pode ofrecer, un goberno.

Así se expresaba no mitin celebrado hoxe en Sanxenxo, onde estivo acompañado pola candidata número un ao Congreso pola provincia de Pontevedra, Ana Pastor, e polo presidente provincial, Alfonso Rueda.

O dirixente popular recoñeceu que estas eleccións son un fracaso logo de que non se respectara “o que é a esencia da democracia”. Nese sentido, apuntou que a xente non entende para que se votou en decembro, por que non valeu seu voto, por que o PSOE se move entre a irracionalidade de entregarse a Podemos ou “marear a perdiz”, ou por que Ciudadanos se prestou ao teatro tras dicir que ía deixar que gobernara o partido máis votado.

Así mesmo, insistiu que toda esa xente ten unha opción de moderación en Rajoy, engadindo que non hai razóns para quedar na casa, “non hai máis razón que para superar a indecisión”.

Feijóo tamén admitiu que é lóxica esta indecisión porque, despois do visto, un non sabe a que aterse, cun PSOE que demostrou non ter criterio e con Ciudadanos que fai o contrario do que se espera. 

“Pedimos a confianza da xente para falar do que se necesita, que é emprego”, aseguraba ao tempo que indicaba que os populares tamén queren falar de política, economía, da familia, de Galicia e de España.

O líder do PPdeG apuntou tamén que o resultado de decembro non era algo novo senón que o novo foi o nivel de irresponsabilidade dos partidos que impediron que gobernara o partido que gañou as eleccións.

Por este motivo, falou da importancia de estar á altura para que non volva ocorrer o que pasou en España nos últimos seis meses, apuntando que non nos debemos deixar levar polo desanimo derivado da situación actual. “Acudamos a votar para que non poidan decidir por nós, e para que sexa imposible que volvan bloquear o noso país”, dixo.

Así mesmo, salientou que o PP é o partido que mantivo as pensións blindadas, así como a sanidade pública e os servizos sociais. “Nunca diremos que todo o que fixemos foi perfecto pero nós supoñemos un goberno”, apuntou mentres recordaba que, cando a gobernabilidade depende dos outros partidos, hai desgoberno, parálise e novas eleccións. 

“O país precisa de políticos que saiban da importancia que ten gobernar”, dixo facendo fincapé en que, canto máis se disperse o voto, máis se vai difuminar a posibilidade de ter un presidente libre para tomar decisións que beneficien aos intereses xerais.

“Eu non quero para Galicia o que ocorreu en España estes últimos seis meses”, aseverou o presidente mentres recordaba que a nosa comunidade estivo á marxe do sucedido no conxunto do país.

“Aos galegos non lle interesa paralizar Galicia, e por iso nós queremos seguir gobernando”, admitía Feijóo. Así mesmo, insistiu en que a irresponsabilidade o único que trae é a parálise mentres que con responsabilidades hai resultados.

Como exemplo disto, falou do traballo dos populares á fronte da Xunta, grazas ao que se logrou suprimir os impostos no medio rural, crear 5.000 prazas de gardería en época recesión ou construír hospitais.

“Eu elixo Galicia e España”, recoñeceu mentres explicaba que o que é bo para o país é bo para a nosa comunidade. Ante isto, recoñeceu que “para Galicia foi bo Rajoy” que “goberna España e pode levar a Galicia no corazón e nos orzamentos”. 

O dirixente galego concluíu pedindo o voto pola gobernabilidade e non polo desgoberno. “Pido o voto para que non se perda nin un día máis desde o próximo 26 de xuño”, sentenciou. 

Ferrol, 24 de xuño de 2016.- O presidente do PPdeG, Alberto Núñez Feijóo, pediu o voto fronte aos que desobedeceron ás urnas e aos que non fixeron caso aos cidadáns.

Durante un almorzo con interventores celebrado esta mañá en Ferrol e no que estivo acompañado polo presidente local, José Manuel Rey Varela, e polo presidente provincial, Diego Calvo Pouso; o dirixente sinalou que esta campaña nunca debería terse celebrado e que recorda a un fracaso dunhas urnas que non se escoitaron, se desobedeceron e ás que os políticos vulneraron.

Por este motivo, Feijóo asegurou que agarda que moita xente vote de forma clara para conseguir que non volva repetirse este fracaso da democracia nin esta forma frívola de entender os resultados.

Pola súa parte, dixo que os populares seguirán co seu traballo en Galicia e que o vindeiro luns será un día ordinario, de traballo, de goberno, de tomar decisións, de funcionamento das institucións e de estabilidade na comunidade.

Nese senso, salientou os efectos prácticos e as vantaxes de ter un goberno e unha política estable, e un proxecto para Galicia. Por iso, garantiu que, ocorra o que ocorra o domingo, a nosa comunidade seguirá tomando decisións e o Goberno da Xunta seguirá traballando.

Ademais, sinalou que os galegos sabemos que somos españois e nos interesa o país porque o que ocorre en España ten relación coa comunidade. Deste xeito, apuntou que debemos seleccionar aquela proposta máis respectuosa cos nosos intereses e que sexa válida para o conxunto do país e todas as súas Comunidades Autónomas.

Así mesmo, asegurou que agora tamén temos a oportunidade de volver escoller a un presidente do Goberno que coñece e ama Galicia, que é galego e que leva a nosa comunidade no corazón, no Boletín Oficial do Estado e na mesa de Goberno: Mariano Rajoy. “É unha oportunidade histórica que non debemos desaproveitar”, dixo.

Por outra banda, Feijóo recoñeceu que o PP non é un partido populista ou de extremos senón que está centrado no futuro e que o que lle interesa non é acabar coa riqueza senón coa pobreza.

Así, contrapuxo o efecto da política populista que só se centra nas ideoloxías, na división e nos bandos; coa política moderada dos populares, baseada nas persoas e en resolver os seus problemas.

E é que, segundo Feijóo, hai políticos de dúas clases: os que resolven problemas e os que os crean; os que conseguen co seu traballo e esforzo que a xente viva mellor ou os que, pola súa irresponsabilidade, fan que a cidadanía viva cada vez peor.

Nese sentido, admitiu que o PP non usará a dor e as dificultades das persoas para mandar nelas “porque nós estamos á disposición da xente”. Tal e como precisou, o obxectivo  non é o poder senón o servizo, do mesmo xeito que aseverou que, como partido demócrata, os populares si aceptaran o resultado das urnas este domingo.

Di que “cada voto moderado que se queda en casa pode volver a colapsar o país” 

 

 

– Dixo presentarse á reelección como presidente da Xunta para que en Galicia non pase o que pasou en España e para que os galegos sigan a ter un executivo responsable

 

A Rúa, 10 de xuño de 2016-. O presidente do PPdeG, Alberto Núñez Feijóo, pediu hoxe o voto para Mariano Rajoy para non perder máis tempo. “Levábamos uns anos de recuperación e agora levamos seis meses de parálise”, destacou. 

 

En A Rúa, no primeiro mitin de campaña, Feijóo puxo de relevo que, aínda que estas eleccións eran evitables, “agora é imprescindible votar” ante o risco de “inestabilidade e ruptura”.

 

Feijóo salientou que o 26-X o voto decídese entre dúas opcións: “construír ou destruír, ir en contra ou a favor, ter un goberno ou que non haxa goberno”. Por iso apelou ao voto dos indecisos xa que “se de cada tres que non decidiron, dous votan ao PP, haberá unha maioría clara para gobernar España”. No caso contrario “xa sabemos o resultado dos empates”, lembrou.

 

Para ilustrar a importancia de ter un goberno en marcha, Feijóo comparou os últimos seis meses da política nacional co mesmo período na política galega: “durante os seis meses que España se parou, en Galicia seguimos gobernando”, destacando resultados como a aprobación dos orzamentos, a baixada do IRPF, a eliminación do imposto de sucesións e doazóns, a eliminación dos impostos autonómicos sobre as transmisións de fincas rústicas ou a creación de novas oportunidades de emprego en sectores como o da automoción, o naval ou o sector aeronáutico.

 

En consecuencia, Feijóo afirmou que “a diferenza entre un país que ten goberno e un país que se para é substancial” e, ante iso, animou ao voto pois “non é verdade que da igual o que fagamos”. “Se hoxe estamos aquí con menos parados e máis afiliacións á Seguridade Social é porque os votos son imprescindibles”, zanxou.

 

De feito, o dirixente popular dixo presentarse á reelección como presidente da Xunta para que en Galicia non pase o que pasou en España e para que os galegos sigan a ter un Goberno responsable. “Eu non quero que Galicia se pareza a España, quero que España se pareza a Galicia”. 

 

O presidente do PPdeG cargou a responsabilidade desta situación pois, afirmou, “cando o goberno depende deles hai desgoberno, hai parálise e hai que repetir as eleccións”. “Dicían que tiñan unha alternativa mellor pero cando tiveron a oportunidade non se puxeron de acordo entre eles”. Lembrou que o resultado dunhas eleccións sen maioría absoluta para o partido gañador non é novo en España pero “o que é novo é o nivel de irresponsabilidade das Mareas de Podemos, Ciudadanos, os socialistas e os nacionalistas”.

 

Ante iso, Feijóo dixo que “agora máis que nunca necesitamos que o pobo español estea á altura para mandar un correctivo duro” xa que “non podemos darlles a oportunidade de que volvan a confundir a política cun plató de televisión”.

 

“Nas eleccións hai que votar, non hai que vetar”, reflexionou Feijóo. “Contra os vetos, eu pido os votos”.

 

En consecuencia, Feijóo reivindicou o voto para “un goberno que conseguiu que pasáramos de seis millóns de parados a catro” e que “atopou a economía en caída libre e logrou que agora estamos crecendo”. Tamén salientou a figura de Mariano Rajoy, un presidente “que non nos mentiu nin cando dixo que estábamos ao borde do rescate nin cando dixo que non tiña apoios para gobernar”. “Non nos fixo perder un minuto”, destacou Feijóo.

 

Con esta actitude construtiva, o presidente do PP de Galicia pediu o voto para Mariano Rajoy para construír “un goberno que non vai contra ninguén nin ten o obxectivo fundamental de afundir a outro proxecto político”. “O goberno consiste en gobernar, non en estar de tertulia”, recalcou Feijóo para concluír que “ninguén vai atopar traballo insultando ao que pensa distinto”.

 

Por iso considerou que fronte ás actitudes de bloqueo, Rajoy é o único que “presenta o que fixo e un programa de goberno”  e é un candidato preparado fronte a Pedro Sánchez, Pablo Iglesias e Albert Rivera que, lembrou o presidente do PP galego, “gobernaron nunca nin sequera no seu concello”.

 

O voto para Rajoy, insistiu Feijóo, é o único voto para que siga crecendo a economía, sigan a crearse oportunidades de traballo, as familias paguen menos impostos e se mellore a conciliación familiar. Os votos a outras forzas son votos que “restan pero non suman”, explicou Feijóo, poñendo de relevo que “os votos para Ciudadanos non conseguen escanos para eles e si para Podemos”.

 

En consecuencia, chamou a aglutinar o voto moderado no PP, concluíndo que “cada voto moderado que se quede na casa pode volver a colapsar o país” e “España non pode seguir bloqueada catro anos máis. “Merecemos un goberno”, subliñou o presidente do PPdeG